見大家嘅建議都咁好，真係好難選擇。所以公平起見，邊㗎開先就上邊㗎，反正等車開都係時間。
最近嗰次一到總站見 789 就開，就決定用 789 轉 101/111 呢個方法。
行程首段非常暢順，上車起計 19 分鐘就到舊灣仔警署。喺車上，我查咗灣仔嘅交通狀況，唔算太擠塞，所以決定按原定計畫轉 101/111，唔使行去堅拿道。
落咗車，就用我之前講嘅步速行去譚臣道車站，用咗 3 分鐘。唔夠半分鐘，就話咁快嚟咗㗎 111 。
灣仔道嘅路況一如所料唔係太塞，同想像中嘅速度差唔多，4 分鐘就到摩理臣山道港島尾站。
由於有巴士專線，入紅隧都唔係用咗好耐，5 分鐘左右就入到隧道。
九龍方面，行車大致暢順，只係停站之後食咗幾枝燈。而喺九龍城迴旋處，亦並冇見到有擠塞嘅情況。
喺伍華中學落車，全程只係用咗 50 分鐘，比想像中快得多，可能係因爲嗰日灣仔道同紅隧比較「合作」。