佢, 為地鐵而誕生, 也為地鐵犧牲 (長文, 多圖注意)

(麻帆良市時報記者高坂 穂乃果報導)
"佢, 為地鐵而誕生, 也為地鐵犧牲。"
所指嘅, 就係呢條停辦已久嘅過海巴士路線 300,
呢條由九巴獨營 (中巴亦曾經參與營運), 來往太子及上環嘅過海巴士路線,
係用以紓緩繁忙時間地下鐵路荃灣綫喺 1988 至 90 年間嘅擠迫情況,
喺 1991 年 5 月 13 日開辦投入服務。由於呢條路線正正與地鐵正面交峰,
因此九巴非常重視 300 號線, 開線前曾經喺報章刊登廣告大肆宣傳。
開辦首日除左比乘客免費乘車之外,
九巴更喺水渠道始創中心地盤外舉行盛大嘅開線儀式,
邀得當時城中著名艷星, 人稱 "波霸" 嘅葉子楣作嘉賓,
而其中一架巴士更上有葉子楣肖像嘅路線宣傳廣告,
附有 "九巴繁忙時間附減費, 好嘢!"、"搭優惠隧巴" 等口號。
當年九巴更針對地鐵嘅繁忙時間附加費而特設 "隧巴附減費"
乘客喺早上 07:45 至 09:00 期間於彌敦道各站登車,
只須繳付優惠車費 $5.5 (當時原價為 $6.0), 更舉辦 "優惠隧巴大抽獎",
乘客將開線宣傳單張投入巴士錢箱內,
就有機會獲得優惠隧巴 300 號線免費乘車證一張。
與此同時，政府亦為左使呢條路線行車暢順，喺沿線道路作出相應改動。
及後, 九巴曾經多次宣傳呢條路線, 喺車上派發西餅優惠券,
同舉辦多次大抽獎, 可見當時九巴對呢條路線係何等重視,
亦因為呢個原因, 300 號線亦成為當時九巴嘅 "曬命" 線,
大部分新型號空調巴士, 或者安裝左新設備嘅巴士都會加入呢條路線行走,
例如裝有音響嘅 "音樂巴士"、九巴首款環保巴士 --
兩架配有 Gardner LG1200 引擎並且上有 "郭富城環保巴士"／
林志穎 "小旋風愛心專線" 嘅 Dennis Dragon 11m 空調巴士、
九巴首架 Volvo Olympian 11m 空調巴士樣辦車 (AV1)、
Scania N113 "進步環保巴士" (AS1 同 2)、
以至全港首架張貼有透視廣告嘅空調巴士,
都曾經喺呢條 300 號線行走過。

可惜好景不常, 地鐵東涌綫同三號幹線通車後,
荃灣綫彌敦道走廊嘅擠迫情況得以紓緩,
加上運輸署於 1990 年代末期實行新一輪嘅保鐵政策,
故此 300 號線被政府勒令取消。
九巴直至呢條路線嘅最後一刻仍然珍而重之, 喺 1999 年 5 月 15 日取消當日,
九巴曾經喺太子站舉行告別儀式, 更特地向乘客贈送 300 嘅線嘅巴士模型,
隨著載有 20 多名乘客嘅尾班車於當日晚上 08:40 抵達太子站,
300 號線正式完成歷史任務。

喺 300 號線服務嘅八年歲月內, 中巴亦曾經喺 1993 年 10 月開始加入營運,
九巴派車10 架, 中巴派車 5 架, 直至 1998 年 九月中巴專營權結束,
運輸署直接將中巴負責嘅班次交由九巴營辦, 自此路線恢復由九巴獨營,
直至 1999 年取消服務為止。本文主角嘅 VA10,
正係當時行走 300 號線嘅其中一員,
佢係中巴喺 1994 年引入嘅首批 30 架 Volvo Olympian 11m 空調巴士
(VA1-30) 嘅其中一員, 佢一直喺中巴服役至 1998 年中巴專營權結束,
佢連同其他同伴一齊過檔新巴, 為新主人效力,
直至 2012 年退役。今日, 麻帆良市好高興呢架中巴 VA10,
以新車行走 300 號線嘅姿態登場,
同場仲有佢嘅同輩, 行走 115 嘅 VA18,
115 亦係市長 Super Bus 以前最常坐過海嘅巴士線之一,
Super Bus 話呢條線自 1995 年開辦開始, 因為佢會入紅磡黃埔花園,
再過海去港澳碼頭, 以前住黃埔花園嘅佢,
幾乎每逢週末都會過去西港城藝軒睇巴士野同埋同啲同道中人切磋交流一番,
115 從此就成為 Super Bus 去西港城必坐嘅路線,
更因為咁而認識一啲車長, 其中一個姓周嘅鬍鬚仔車長,
仲會比佢搭免費車添! 雖然 Super Bus 以前坐 115 都坐過唔少,
當時中巴亦有行呢條線,  但係佢話坐親都係九巴多,
反而中巴嘅就少啲, 同埋大家果陣雖然都係用同一款車,
而中巴 VA 更係當時中巴最新引入嘅新一批巴士,
但係佢始終都係鍾意九巴嘅 Volvo 車,
或者呢個就係因為佢係九龍人, 因而對九巴車有一個情意結啦,
不過中巴 VA 對 Super Bus 嚟講都係特別嘅車款,
而呢批 VA 更同中巴嘅 Leyland Olympian 11m 空調巴士 LA 好似餅印咁,
比人一鍾 "雄兔腳撲朔, 雌兔眼迷離" 嘅感覺, 甚為有趣。
講左咁多, 我地依家就帶大家一齊嚟一睹呢兩架 300 號同 115 號中巴 VA 嘅風采啦!

隆重歡迎!! 中巴 Volvo Olympian 11m 空調巴士 VA10 同 VA18, どうぞ!!








VA18 @ 115, 證書編號 0329, 限量推出 400 架




VA10 @ 300, 證書編號 0204, 限量推出 600 架


正式落地!!




首先出埸嘅係 VA18 @ 115
















跟住就係 VA10 @ 300
















與中巴 Leyland Olympian 11m 空調巴士 (LA) 相會




中巴 LA 同 VA, 驟眼睇大家都好似餅印一樣,
但係細節上其實都有唔同, 大家又數唔數得出呢?








同 N 年前 Corgi 出嘅產物 VA40,
過埋今日, 架 VA40 就要講 "さよなら" 啦...






VA40 車尾原本冇錯, 因為中巴接收嘅第二批 VA,
車尾的確係如此模樣, 只係 Corgi 一模走天涯嘅作風,
實在教人頂唔順...






那些年的 300...




真車相, 姊妹車 VA28 @ 691 攝於 1995 年中環港澳碼頭




姊妹車 VA4 @ 592 攝於 1995 年摩頓臺




本文主角, 攝於 1995 年紅磡海隧巴士站











雖然 300 號線已經取消多時,
但係歷史話比我地聽, 歷史係會不斷地重演,
隨住政府推行以鐵路為主嘅公共交通運輸政策,
多條新鐵路路線建成啟用, 其他包括巴士在内嘅公共交通工具,
客量亦受到唔同程度嘅影響。港鐵南港島綫喺 2016 年末通車,
港島區嘅巴士服務亦隨住變天, 唔少巴士路線要重組、
更改行走路線、削減班次甚至取消服務, 除左令人不勝唏噓,
亦令人不禁想到, 假如沙中綫如期喺 2021 年開通,
香港嘅公共交通屆時又會有點樣翻天覆地嘅巨變同影響......


Thanks for reading~