hkitalk.net 香港交通資訊網

 找回密碼
 會員申請加入


(B0)香港巴士車務及車廂設備 (B1)香港巴士廣告消息/廣告車行踪 (B2)香港巴士討論 [熱門] [精華] (B3)巴士攝影作品貼圖區 [熱門] [精華] (B3i)即拍即貼 -手機相&翻拍Mon相 (B4)兩岸三地巴士討論 [精華] (B5)外地巴士討論 [精華]

Advertisement


(B6)旅遊巴士及過境巴士 [精華] (B7)巴士特別所見 (B11)巴士精華區 (B22)巴士迷吹水區   (V)私家車,商用車,政府及特種車輛 [精華]
(A6)相片及短片分享/攝影技術 (A10)香港地方討論 [精華] (A11)消費著數及飲食資訊 (A16)建築物機電裝置及設備 (A19)問路專區 (N)其他討論題目  
(F1)交通路線建議 (C2)航空 [精華] (C3)海上交通及船隻 [精華] (D1)公共交通有關商品 [精華]   (Y)hkitalk.net會員福利部 (Z)站務資源中心
(R1)香港鐵路 [精華] (R2)香港電車 [精華] (R3)港外鐵路 [精華]   (O1)omsi討論區 (O2)omsi下載區 (O3)omsi教學及求助區
(M1)小型巴士綜合討論 (M2)小型巴士多媒體分享區 (M3)香港小型巴士字軌表        
 

Advertisement

 

hkitalk.net 香港交通資訊網»論壇 (C) Transport 交通討論區 航空(C2) 浸鹹水遇溺記 第九回 LX467 LX138 尋找 Bombardier CS10 ...
開啟左側

[飛行報告] 浸鹹水遇溺記 第九回 LX467 LX138 尋找 Bombardier CS100 的故事

[複製鏈接]
HZ8186 發表於 2018-10-7 07:22 | 顯示全部樓層 |閱讀模式

                                    Advertisement




浸鹹水遇溺記 第九回 LX467 LX138 尋找 Bombardier CS100 的故事

--- Intro ---

轉眼間, 小弟已經完成了小弟係英國既第二年大學課程。 之前見唔少師兄對 Swiss 剛剛引入既 CSeries 一致好評, 今趟旅程小弟就決定再次乘搭 Swiss 回港, 初嘗呢位 Avro RJ100 既繼承者 - Bombardier CS100。

--- Flight Info ---
13/6
LX467 LCY->ZRH
Bombardier CS100 HB-JBD
STD 1825 ATD 1900 (BST)
STA 2100 ATA 2115 (CEST)
LX138 ZRH->HKG
Boeing 777-300ER HB-JNA
STD 2240 ATD 2255 (CEST)
STA 1630 ATA 1630 (HKT)

--- London City Airport (LCY) ---

當日小弟由 East Midlands 乘坐火車抵達 St. Pancras, 轉乘 Northern Line 及 Docklands Light Rail 前往位於 Zone 3 既機場, 大約四十分鐘後便抵達今日航程既起點 - London City Airport.

London City Airport 係因其位置及其高速既運作速度而聞名, 英航甚至標榜行李寄艙服務 "Will only close 20 minutes before departure"。 同時, LCY 亦算係一個 Spotter 既福地 - 由於 LCY 係興建係一個舊既碼頭之上, 機場跑道兩旁係有河水隔住, 亦係呢個原因, 跑道兩旁係無圍欄, 對攝影發燒友黎講的確係一件好事黎。

當天小弟辦理登機手續後便直接通過安全檢查進入 Airside。 小弟上次由 LCY 出發已經係一年半前既事, 而呢段時間期間 LCY 既 Airside 已經翻新過。 雖然個客運大樓依然係非常旺盛, 不過 LCY 係 Gate 4~10 旁增加左唔少座位, 而翻新後既 Airside 亦設有落地玻璃。 如果閣下想搵一個安靜既地方工作, 或者近距離觀察 Tarmac Movement, 呢個翻新後既候機空間相信會好適合~


雖然 London City 既客運大樓係非常細, 不過佢既空間係用到好盡 - 係輕鐵站既出口則擺滿自動預辦登機既機

London City 其中一個重點客源為在市中心或鄰近 Docklands 地區翻工既打工仔, 因此係候機區絕大部份人仕都係西裝佬, 坐低左之後就會有部 Macbook 自動現身

LCY 之前係裝修過, 係二號至十號閘口之間既空間係翻新過, 有更多候機空間之外, 個室內設計感覺上係幾舒服

LCY 的確係一個 Spotter 既福地 - 可惜當日跑道旁係有工程進行中, 否則 Landside 停車場既位置係可以飽覽 LCY 整條跑道既運作。 如果於夏天前往 LCY, 該位置係會背光, 閣下則可以前往對面岸既 University of East London 觀看。 裝修後, 係 Airside spotting 亦係一件非常輕鬆既事~~ (好遺憾呢個好可能係小弟最後一次見到 VLM 既 Fokker 50 - VLM 係八月三十一號宣佈結業, 而本身探訪 Antwerp 既計畫都泡湯)

--- LX467 LCY->ZRH ---

今日既用機為瑞士航空既第四部 CS100 - HB-JBD。 對比 Avro RJ100, CS100 係多個範疇上都比其前任佔優。 除左機艙空間有所增加之外, 窗口既尺吋亦大大提升, 提高機內的亮度同減少機內的幽閉感。 同時, 設於頭頂既螢幕亦可以提供安全影片等資訊, 呢種設計小弟真係第一次見, 亦非常欣賞。

瑞士航空既 CS100/300 亦設有新款座椅 - 雖然座距只有30吋, 不過由於座位椅背比較薄既關係, 就算小弟 (利申: 高178cm) 都唔會頂到前方座位。 座椅亦設有兩個 "Mesh Pocket" - 雖然呢兩個袋既尺寸比較細, 不過用黎裝水樽或手機等長條型物品則適合不過。 座椅亦設有 recline 功能, 唯座椅沒有 USB 插頭供充電用。

起飛後, 機組人員隨即派發小食同餐飲 - 小食係一個簡單既芝士包, 而飲品則有汽水, 果汁等等。 雖然小食既份量未必算好大, 不過用一個一個半小時既航班既標準黎講, 呢個份量則算綽綽有餘。Swiss 正常係會係降落前向乘客派發一片瑞士巧克力 - 適逢今年瑞士隊今年晉身俄羅斯世界盃既小組階段, Swiss 今次則派發一粒足球形既巧克力。

LX467 於 21:15 到達蘇黎世 - 雖然今日既航班係延誤左十五分鐘到埗, 不過機上既乘客體驗係非常好。 寬敞既座椅配上非常充裕既自然光 - 呢部機應該係小弟近年黎搭過最正既 Regional Jet 之一。另外, CS100 既飛行表現亦顯得比 E190 等同級機型穩重。 無論起飛降落或遇上氣流, CS100 都處理得好好 - 小弟記得當年搭完第一次 E190 後向友人投訴 E190 感覺上係好 '飄' , 不過今次 CS100 既表現絕對係一流。


登機~~ 由於 London City Airport 係沒有任何登機橋, 係 LCY 登機都係要自行步行上機。 同時, 由於 CS100 既機型相對上比較大, LCY 則長期安排有比較大 Taxi 空間既 Gate 21~24 供 CS100 使用

CS100 既內籠 - 留意經濟艙同商務艙之間只有一塊細卡板分隔, 並沒有好似 SWISS 其餘既 A320 或以前既 RJ100 般設有一塊布簾用作分隔兩批乘客

雖然張櫈既軟氈睇落好薄, 不過坐落其實係幾舒服

椅背則有一個放置 Safety Card, Inflight Magazine 等既 Hard Pocket, 而椅背下方則有兩個細既 Pocket。 不過個兩個 Pocket 真係好細, 連水樽都擺唔落~~

CS100 位於機位既 Galley

CS100 既廁所 - 呢部機係設有兩個廁所 - 一個係供商務艙既乘客使用, 而機尾既則供經濟艙既乘客用。

CS100 位於頭頂既讀書燈, 出風口及顯示屏 - 個顯示屏係會播安全片及 Flight Map 等資訊

CS100 既安全卡及 SWISS 的 Inflight Magazine

今日既小食有一塊夾芝士既法式麵包 - 雖然個麵包都幾凍, 不過個果醬係幾好食

CS100 設於機艙頭尾既旁板 - 小弟係非常欣賞呢個設計, 剩係用一個十字圖案砌出歐洲既地圖, 既簡潔又實在, 可以話係非常符合 Swiss 既形象

All flying is good flying - and here's why

事後小弟係網上閱讀 LX BCS1 既首航時, 發現該文章提到 SWISS 為了慶祝 2016 Eurocup, 當年亦派發過類似既足球形巧克力。

Spoilers 及 Flaps 全開

--- Zurich Airport (ZRH) ---

係 Zurich 轉機亦係一件好愉快既事 - 由於今日LX467 係泊左係 Gate E - 通過 Security Checkpoint 後上翻一層就可直接進入候機大堂, 無需於各大樓之間穿梭。

候機大堂既樓頂係有三層樓高 - 大樓用白色同黑色做主調既配搭係做得幾好 - 簡潔得黎又唔會令人覺得單調。 配合埋海量既落地玻璃同雲石磚, 呢個設計係好完美咁呈現瑞士既務實兼簡樸既作風。 (之前聽過唔少師兄講過 Gate A/B+D 個邊個設計做得幾好, 可惜今日小弟兩班機都係 Non-schengen, 入唔到個邊既閘口)

同時, Zurich 係有免費 wi-fi 提供 - 係一部電腦前掃描機票上既二維碼後, 電腦會列印一張附有 wi-fi 密碼既單據, 而每一組密碼係可以用兩小時, 唯 Wi-fi 速度上則一般。


係 ZRH 轉機係一件好輕鬆既事 - 由於今日兩個 Flight 都係 non-schengen, 小弟係無需通過 Passport Control - 快速穿過安全檢查後便可到達 Gate E 等待下一班機

ZRH 既 ATM 同 Wifi 機

Zurich 機場係有宵禁安排既, 而 LX138 亦算係當日既 Last Departures 之一

--- LX138 ZRH->HKG ---

小弟今次既座位為 23B, 係經濟艙第一排既 Exit Row Seat - 呢個座位除左有無限 legroom 之外, 由於經濟艙既洗手間係設於經濟艙中間及尾部既關係, 呢個位係唔駛驚其他乘客係你前面行黎行去, 私隱度係比較高, 唯呢個位係無窗口, 同埋頭頂既 Bin Locker 空間會比較少。 同時, 由於 Tray Table 同 IFE 等設備要收納係Armrest 之內, 座位既闊度則比正常座位少, 不過相信呢個取捨係值得既。

起飛後, 機組人員便開始派發晚餐 - 今日前菜有沙律, 芝士及餐包, 主菜有蕃茄醬 gnocchi, 而甜品則有一份紅莓蛋糕。 主菜同甜品係做得幾好 - 份 gnocchi 既蕃茄味道係非常濃烈, 而甜品略帶果酸, 可以平衡蕃茄既味道之餘亦可以解滯, 唯甜品既份量則令小弟有少少失望。 值得留意既係 SWISS 派發既芝士係一盒既 Parmesan shavings (SWISS 一年半前既飛機餐芝士係整粒上) 雖然個份量少左, 不過用黎夾餐包/餅乾既話則方便好多。

用餐後, 機組人員則把機艙燈光調暗, 並要求各乘客把窗簾關上。 機艙燈光到降落前三小時前才調光, 期間機組人員亦有定時派發果汁及小食。

SWISS 既 IFE 俾一年前明顯有進步 - 雖然佢既軟件無變, 不過佢提供既電影數量則明顯有增加, 而大部分電影皆有翻譯版本。 近期推出既電影, 例如 The Last Jedi 等, 皆可以係 SWISS 既 IFE 上找到。 唯機上既音樂選擇則沒有以前咁豐富 - SWISS 只係提供左十幾張精選合集供選聽, 而沒有獨立既大碟可供收聽。

SWISS 早餐既質數則一般 - 早餐除左有炒蛋同薯角外, 亦有一細盤水果及一杯乳酪提供。 炒蛋及薯角味道一般, 而水果感覺上比較軟身, 同時, 佢提供既咖啡亦沖得比較淡。

餘下既航程都無驚無險咁過 - 同 LX467 一樣, 開始 descent 之前機組人員派左粒朱古力足球。 不久後飛機進入 07L 既 Approach Path, 而 LX138 則於 1630 準時降落。 好快咁通過入境同 Baggage Reclaim 之後, 小弟便登上 A21, 為呢個十六小時既旅程畫上一個句號。


登機 - 睇黎小弟當日都幾眼瞓 - 連對焦都無 set, 影左就算 O.O

晚餐 - 雖然個 Gnocchi 睇落係幾頹, 不過食落真係好香蕃茄味~~

早餐 - 雖然個蛋同薯角既味道都非常淡, 不過既然小弟落機之後都第一時間衝去食碗細蓉, 所以呢餐幾頹對小弟心情黎講都無咩大影響~~

安全卡

別了的日子 像拔去這倒刺
遇各種對手 配上更好鑰匙
或我開始 已開始更了解
誰人也 或進或退在歲月不過暫時

SWISS 77W 既 IFE - 之前介紹 LX460/LX138 既 Trip Report 都介紹過呢套系統, 因此今次就唔會太詳細講佢既 IFE~~

對小弟暫時仲係"可遠觀而不可褻玩"既商務艙 - 唔少歐洲傳統既航空公司都係比較重視商務客, 而好似瑞士,漢沙,英航等既航空公司既收入來源有唔少都黎自客機既前半部份。 雖然小弟現在依然仲係一個學生, 不過小弟都幾想搵次體驗下坐傳統歐洲航空公司既商務艙。

--- Verdict ---

總括而言, 呢趟旅程既體驗對小弟黎講係幾好 - 雖然 SWISS 既 Long Haul Product 或許有唔少不足之處, 不過其 Regional Economy 既體驗不論係硬件及軟件上都做得好好。 如果閣下係歐洲各城市之間來往, 小弟係可以誠意推介乘搭 SWISS 及其 Bombardier CSeries 供閣下考慮。

Anyways, 今次飛行報告就寫到呢度, 希望咁多位睇完會鐘意啦。 黎緊小弟會搭漢沙航空既 A340-600 同 ERJ-190 經法蘭克福翻 London City, Stay Tuned~~~

---後記 Afterthought---

係一八年七月一號, Airbus 正式宣佈已正式買入 CSeries 既過半數股權, 並會把其產品改稱為 Airbus A220。

或許小弟對此宣佈並不感到驚訝 - CSeries 一直都係銷售方面落後 Embraer 既 ERJ 系列, 而其融資方面則多次受外界批評, 而或許 Airbus 既加入能夠為 CSeries 改變劣勢。 同時, 計畫加入 Airbus 之後, CSeries 亦可以使用 Airbus 龐大既供應商網絡及 Airbus 位於 Mobile 既廠房, 無論係零件價格或跨越地緣政治上都對項目整體上係有極大優勢。 唯對於改名為 A220 一事小弟其實係覺得非常可惜 - 畢竟飛機由設計, 銷售, 試飛到投入服務都係 Bombardier 一手包辦 - 而家 Airbus 一入股 50.01% 就改名為 A220, 難免有些小不尊重吧...

Airbus A220-100 的確為一部性能良好既飛機 - 既能駕馭 London City 既跑道又能提供一個舒適既飛行體驗 - 不過係筆者心中, 呢部客機永遠都係稱作 Bombardier CS100

--- 延伸閱讀 ---
浸鹹水遇溺記 第一回 LX139 LX460 HKG-ZRH-LCY 巧遇 Avro RJ100 的故事
浸鹹水遇溺記 第二回 BE1429 SOU-EMA 一個乘搭 Repositioning Flight 的故事
浸鹹水遇溺記 第三回 KL888 KL1515 HKG-AMS-NWI 尋找 Fokker 70 的故事
浸鹹水遇溺記 第四回 KL1426 KL887 BHX-AMS-HKG 被 Avro RJ 尋找的故事
浸鹹水遇溺記 第五回 OS58 OS455 HKG-VIE-LHR 不怕神一般的對手, 只怕鹹魚般的乘客?
浸鹹水遇溺記 第六回 探訪退役協和號 G-BOAF 的故事
浸鹹水遇溺記 番外篇 CX416 HKG-ICN 商務艙 冬日拜訪漢城記


評分

參與人數 5aPower +5 HugeC +50 收起 理由
vilo + 1 + 10 多謝分享
DIH + 1 + 10 多謝分享
S3BL100 + 1 + 10 CS 大法好
whyloveislove + 1 + 10 Huge C
YY487 + 1 + 10 多謝分享

查看全部評分

whyloveislove 發表於 2018-10-7 15:16 | 顯示全部樓層
尾段講到歐洲airline對Business Class既重視,恕我真係不敢苛同
坐過BA B77W既J LHR-HKG, 全程極度失望,比起"我坐MH narrowbody short-haul 既J, 甚至係 Scoot 既假J "ScootBiz" 感覺更差,成件事只係感覺到佢地唔想做,淨係想D客唔好煩佢地咁

clivetock 發表於 2018-10-7 16:14 | 顯示全部樓層
CS100 既內籠 - 留意經濟艙同商務艙之間只有一塊細卡板分隔
想問吓塊細卡板具體位置喺邊?睇相好似搵唔到

小弟今次既座位為 23B, 係經濟艙第一排既 Exit Row Seat
揀呢個位坐使唔使加錢?


另外,想問師兄第七同八回係咪未推出?
 樓主| HZ8186 發表於 2018-10-7 20:42 | 顯示全部樓層

                                    Advertisement



clivetock 發表於 2018-10-7 16:14
想問吓塊細卡板具體位置喺邊?睇相好似搵唔到

揀呢個位坐使唔使加錢?

Exit Row Seat 如果於登機前24h揀係唔駛另外加錢, 應該係同母公司漢莎睇齊

另外個 JCL/YCL Class Divider 就睇圖啦 - 塊板真係蚊型

第七回 (T3671) 第八回 (BA3287) 因為相片問題依然處理緊, 閣下可能要等多陣, 不過呢兩個報告內容係非常精彩,敬請閣下拭目以待~~

(截圖來自 Paul Trip's Reports)

(截圖來自 Paul Trip's Reports)
 樓主| HZ8186 發表於 2018-10-7 22:20 | 顯示全部樓層
whyloveislove 發表於 2018-10-7 15:16
尾段講到歐洲airline對Business Class既重視,恕我真係不敢苛同
坐過BA B77W既J LHR-HKG, 全程極度失望,比 ...

英航小弟都覺得係避之則吉~
小弟大概係兩年前搭過 BA32/27 既 World Traveller - 機頭既情況我就唔清楚啦,唯當時已經可以好清楚可以睇得出機尾既香港 Base 同英國 Base Crew 既分別  - 前者係辦工既, 而後者係扮工既, 而英航關左香港 Crew Base 之後英航真係更加唔駛搭

不過無可否認佢地近年係加重依賴 Premium Traffic 生存,而商務艙既設置都一直進步緊,睇下小弟將來有無機會往返香港同英國時坐機頭啦

S3BL100 發表於 2018-10-7 22:50 | 顯示全部樓層
感謝樓主精彩分享,就咁睇落 CSeries 無論外表定內籠都相當精美。

CSeries 毫無疑問係因為 Airbus 救返生,本身設計係相當唔錯,
問題在於 Bombardier 生產線太多問題要應對,而催命符係
美國商務部決定同 Delta 向 Bombardier 買既 75 隻 CS1 收接近 300% 關稅,
雖然最後 Bombardier 勝訴,但如果因為關稅而搞到無左幾個大客,CSeries 可能真係步入滅亡,會更可惜

小弟期待以後有機會坐 CSeries,美國下一水應該係 Delta,再之後係 JetBlue,
Delta 下月會收第一隻,二月會投入服務,但以佢地初步計劃投放航線來睇,可能要再多一年先有機會坐

LX 服務水平睇落亦相當唔錯,拍得住 LH,
熱切期待樓主下篇 A346 飛行報告,LH A346 小弟坐過兩次,
而今月下旬小弟係 LH 744 同 359 之間揀左 744,346 除非重返我有機會坐果兩條線,否則應該係無機會坐啦


fb.com/scientisthk2usa/
 樓主| HZ8186 發表於 2018-10-8 06:44 | 顯示全部樓層

                                    Advertisement



其實 CSeries 既命運都幾曲折離奇 - 近日有篇報導出左黎話其實 Bombardier 同 Airbus 係公佈關稅之前已經傾緊合作, 所以個關稅可能對雙方黎講都只係一個 catalyst , 並非原本既考慮因素之一。另外, 值得一提既係, 判詞入面係提到 1. Bombardier 的確係有作出 "Price Dumping" 既行動,惟 2. 由於波音並沒有製造相似載客量既客機, 波音既利益並沒有受損 因此 Bombardier 既上訴得直

不過唔知點解小弟覺得 CSeries 同 L1011 當年既處境有唔少相似既地方 - 而歷史最終會否重復,呢樣則需要大家放長雙眼睇~~

賣少少關子先 - 其實小弟兩個星期前已經搭左 LH797 & LH926 - 雖然小弟仲寫緊份飛行報告, 不過小弟絕對覺得論 Economy Class Product 既話 Lufthansa 係係唔少地方, 例如餐飲上同 IFE 既選擇上, 都比 Swiss 優勝


053h4 發表於 2018-10-8 19:30 來自手機 | 顯示全部樓層
提示: 作者被禁止或刪除 內容自動屏蔽
qunow 發表於 2018-10-8 22:30 來自手機 | 顯示全部樓層
HZ8186 發表於 2018-10-8 06:44
其實 CSeries 既命運都幾曲折離奇 - 近日有篇報導出左黎話其實 Bombardier 同 Airbus 係公佈關稅之前已經傾 ...

個人理解,Price dumping這行為具爭議的地方不但是在於這行為有否進行本身,還有例如:
* 原本這規則是用來避免企業在生產石油或者鋼鐵之類製品時用低價踢除其他製作相同商品競爭者的,將之用在飛機上這種需要大量研發成本、不同型號都有不同表現的商品上適合嗎?特別是由於限制的是生產成本而不是說項目成本,所以即使是判了有傾銷行為,只要像Airbus那麼有錢,在美國弄一條生產線,就沒問題了
* 新競爭者用低價來吸引航空公司加入成為自己客戶甚至阻止新競爭者加入市場也不是新聞,波音自己也曾經對UA開出了以每架二千多萬美元的價格出售737-700的條件來阻止他們採購CS100但是因為是國內交易所以不受這規則影響,巴西E2現在發售的價格應該也是差不多這水平,應該要因為新加入者在生產線未純熟時的製作成本較高就不讓他們加入競爭嗎?
* 就像前面說到的那樣,波音向UA低價銷售了一些737-700以期望對方能因而放棄選購CS100,但後來UA應該是加錢把那批飛機轉成別的型號了。既然波音以致美國國內沒有生產在這範圍內現時能吸引其他航空公司選購的產品,那麼也就沒籍口說龐巴迪賣CS100的價格會損害美國國內工業
* 本質上波音是想用這個訴訟來阻止CS產品系列成熟之後龐巴迪這家公司在大型客機市場上威脅AB兩家的主導地位,所以波音現在的行為損害競爭(實際上來說,即使現在結局是不成立並且CS系列獲得Airbus的支持,短期以至中期CS系列應該也不會推出更多載客量的CS500,而未來龐巴迪再在這市場甚至其以上的寬體客機市場推出新產品的機會也基本上消失了,從這角度來看可說是Airbus和波音的共同勝利)
您需要登錄後才可以回帖 登錄 | 會員申請加入

本版積分規則

Advertisement

Advertisement

Advertisement

Advertisement

Advertisement

站規|清理本站Cookies|hkitalk.net 香港交通資訊網

GMT+8, 2024-3-29 01:05

Powered by Discuz! X3.4

Copyright © 2001-2020, Tencent Cloud.

快速回復 返回頂部 返回列表