今日行完山, 下晝五點二到達流水响巴士站(前九巴G36對面), 等78K 79K出聯和墟, 抵站時見站上堆滿人, 剛好一部綠小吉車接走呢班人, 站上只剩下三人, 以為部小巴係嚟截糊, 點知等左差唔多二十分鐘先有部企到黃線的AVW@78K到站, 而下一站軍地非常多人等車, 下層走廊企左六七人, 樓梯又企四個, 迫爆部車之後仲有差唔多十人上唔到車, 新圍軍營仲飛埋站.
在車上有些熟客指出蓮麻坑開放, 今日條路(指沙頭角公路)多左好多車行, 而在軍地上車的熟客, 上車前不停咁話唔怪得等咁耐啦, 而我由流水响水塘沿路行出沙頭角公路期間, 連續三班52K小巴都一早滿座, 在巴士站等巴士時, 亦沒有任何小巴停站, 全部滿座飛站.
當我到達聯和墟後, 在商場行左10分鐘先返總站等277X出九龍, 行到總站口, 先見到17:10打鼓嶺開的79K離站(當時是17:55), 該ATS仍有人要企, 而計番時間, 打鼓嶺到流水响要用差唔多30分鐘時間, 到聯和墟要45分鐘, 非常之慢.
今日係禁區開放第三階段兼兩條巴士路線乘客無需再出示禁區紙可搭全程的首個周末, 雖則可能係新屎坑三日香, 但今次解禁的範圍相當大, 而且吸引力大, 相信到該處的遊人仍會絡繹不絕, 周末及假日仍只提供解禁前的小巴和巴士服務及班次, 假以時日定必惹來日常通勤乘客不滿.
巴士服務方面, 78K 79K如可轉用高載車, 增加每班車載客量, 同時於客量最高峯時稍為加密班次, 相信問題即可解決, 至於增設R線吸客和加快車程, 也是可考慮之列. 73K今天的服務又如何呢?
歡迎討論. |