如果政府出售和諧式公屋,會否影響居屋市場及壓低樓價

現時唔少人認為政府既租者置其屋計劃只出售Y型公屋而唔出售和諧式公屋,唔少政黨要求重推此計劃,亦有意見指政府應出售和諧式公屋以解決市民置業問題,想問如果政府以較低價錢(平均20-50萬元一個單位)出售和諧式公屋,會否影響居屋準業主轉投公屋市場同埋壓低樓價

p.s.個人認為政府最好快d賣和諧式公屋,因為而加d樓價真係好貴,另外和諧式公屋有唔少都好新淨

一定會影響居屋市場，因為有唔少和諧式大厦用作居屋出售，單位間格尺寸同公屋無異；如果真係賣嘅話，住緊和諧公屋嘅人相信不作他選。
至於新淨，最早嗰批和諧公屋1993年開始入伙，老化陸續浮現；最後嗰批其實都已經10年，新淨與否好睇用料手工同住戶本身

輪候公屋條隊長, 買樓條龍都長, 但係而家啲樓就幾細幾貴啲人都爭住買, 而住緊公屋嘅又唔一定想置業, 咁點解仲要重推租者置其屋計劃, 整到啲屋邨業權散晒, 一來難管理, 二來你都睇到屋邨賣左之後, 除左維修之外, 仲有唔少問題, 例如法團.

好多座落同一地段, 一齊落成的和諧式公屋同居屋, 出去望望, 唔難發現居屋維修同粉飾都比公屋差很多, 最大原因就係同錢有關, 冇錢就連外牆甩晒色一撻撻漬都整唔到, 公屋有定期大修, 外牆粉飾亦由公帑去做.

最新預計2020年香港會有200萬人口為長者, 本身住緊和諧式公屋的長者戶亦唔少, 尤其是市區屋邨重建後的, 一旦買左自己層樓, 維修時有冇心拎錢出嚟做呢, 到佢地百年歸老冇人冇物時, 間樓又要處理, 又唔能夠拎番出來流轉俾其他市民.

其他市民想買都唔係話咁簡單, Y型樓而家都可以做到過萬蚊一呎, 何況和諧式? 敢肯定和諧式一經出售, 即時升價數以倍計, 假設定價為新居屋再折(計及是公屋和舊樓), 我當成是市價三至四成出售, 市區和諧式便只售$5000/呎, 一個轉手隨時賣成萬蚊呎都得, 樂富 黃大仙 觀塘 藍田等鄰近港鐵站的可能唔止, 樓價隨時同一向低水的麗港城睇齊, 何況有更多交通相對冇咁方便, 或者係鄰近港鐵站的新市鎮和諧式「一手」售價較低, 可見的升值潛力則相應提高.

和諧式公屋升值, 造就左一堆購買力, 繼而再將私樓價推高, 下一代仲點樣買樓呢, 輪候公屋條龍越來越長, 香港土地就係得咁多, 又唔會重施故技將某地區整到好似天水圍咁, 大部份住宅都係公屋, 一定係預留用地作私樓發展, 可見排公屋都唔係辦法.

即使我自己就係住緊市區和諧式公屋, 都有想過買番而家間屋, 但一諗到重推計劃有咁多弊處, 我都唔認同重推計劃有助解決「買唔到樓」呢個長遠問題.

首先,你話和諧式公屋舊,最舊果批都係93年入伙姐,24年樓齡,有幾舊呀,Y型公屋咪仲舊,又唔係咁伶出來賣,其次,我都講過,租者置其屋係可以買可以唔買,唔買咪繼續租住原有單位囉,本人認為重推此計劃係想俾公屋居民有另一個更廉宜既置業機會,我亦有講過售價應該係20-50萬每個單位,即係2000元一呎都唔駛,而唔係要5000元一呎咁貴,售價只係比當年Y型10幾20萬貴唔係好多姐,房委會又唔駛長期虧蝕,點解賣公屋唔好姐,售價平一樣大把人要架

p.s.個人認為上期未賣/賣剩/賣漏既Y2,Y3,Y4型公屋應該重新推出出售直至賣完所有Y2,Y3,Y4樓宇為止

GF4070@49X 發表於 2017-2-5 22:46
首先,你話和諧式公屋舊,最舊果批都係93年入伙姐,24年樓齡,有幾舊呀,Y型公屋咪仲舊,又唔係咁伶出來賣,其次, ...

最近揀樓的綠置居景泰苑就解決左一幢公屋有人買有人唔買的問題, 公屋戶買左綠置居之後要交番間(舊)公屋出嚟, 令輪候冊人士可以上樓.

若然當初係揀一條和諧式小型屋邨去重推租置計劃, 你難保有人可能嫌舊, 唔值, 冇興趣等種種原因而唔買, 或者等幾年先買, 而當呢條屋邨賣左之後, 政府仍然要繼續起公屋, 又既然呢條屋邨以外有咁多購買力, 點解唔搵地去起新單位賣俾人, 而要以市價再折, 變成賤價沽出手上開始殘舊的公屋.

有一樣嘢你一定諗到, 一個20年樓齡的市區公屋單位賣得貴啲, 定係一個相同呎數, 只接受公屋綠表申請的市區新單位賣得貴啲? 比較之下, 房委會推出邊個計劃會得到較大利益?

買樓唔係只睇表面, 掟舊錢出來之後乜都唔駛理, 後續仲有好多嘢跟尾, 至於坊間有越來越多聲音要求重推租置計劃, 一來公屋居民越來越多, 有置業的心願未了, 有前車租置計劃可鑑, 幾多公屋戶因此置富, 實在令人趨之若騖, 二來就係呢個訴求一直蔓延, 已經到達一個點, 唔加入爭取行列就執輸行頭, 爭取嗰班係唔需要理政府點諗, 唔需要理冇份買嗰班人, 甚至乎唔需要理下一代點算, 淨係知道而家班人買左磚頭, 然後等升值, 爭取嗰班功不可沒, 自然萬人敬仰, 為的是什麼?

綠置居大概係租置計劃的變奏版, 冇可能叫政府以市價一兩折去出售舊公屋, 即使俾你壓低到整體樓價, 只會係一時, 唔會係一世, 到時反彈力度有幾大, 唔會係你我而家想像得到.

公屋比你咁樣用既咩

政府有責任讓市民安居, 但冇責任幫市民置業, 你要搞清楚喎

唔係當年莫財要賤賣資產, 根本就唔應該出現"租者置其屋", 亦唔會搞出領匯/領展呢隻怪獸出黎...

總知都係果句,兩者共存,照顧唔同人士需要,想平d,咪租者置其屋囉,想間屋新淨d,咪綠置居囉

最好學新加坡咁