[Iran][Tehran] [多圖29p] 伊朗巴士（一）

返嚟香港兩個禮拜，終於的起心肝出Post

伊朗，一個長期畀敵對國家指控「邪惡軸心」嘅國度，好多香港人聽到都會避開。知道即將出發，就會直指「排外」、「恐怖分子」、「打緊仗」。
上面嘅指控，我諗大家都係受美國支配嘅媒體世界所影響，事實上呢個國家好客程度遠超多個港人認知嘅地方，以旅遊而言英語普及程度分分鐘高過香港。上面所講嚇親人嘅指控，睇怕除咗「日日都打緊仗」之外，都無乜邊個係成立嘅。

「打緊仗」都無問題照去？唔怕保險唔包咩？
我可以話畀大家聽，保險就一定唔包架喇，因為我諗你去到都會有機會「參軍」。
無錯，我講緊嘅打仗，其實就係同香港嘅打仗一樣，都係講緊繁忙時間搭車嘅情況。
作為首都，呢度住咗超過八百萬人，交通工具真係好緊要！

當我第一日到達伊朗首都德黑蘭，第一樣接觸到嘅交通工具就係地鐵，買咗張ezPay交通卡之後好幾次出行都係搭佢，一程地鐵收費9000蚊，大約1.6港紙（以黑市計算大約0.6-0.8港紙），主要路線全日大部份時間2分鐘一班，密過香港好多，而最好嘅就係ezPay交通卡係小形鎖匙扣設計，最平十萬蚊可以買到一張（當然畀夠一百萬都無話唔得，不過買少少唔夠再增值都好方便），搭地鐵同巴士都用得，所以有機會大家去嘅話，買多幾張當手信都唔錯架。

======================================================================
======================================================================
======================================================================

好啦呢度係巴士版，我應該要講返巴士嘅！
可以講，呢度完完全全係巴士迷嘅福地！
香港影巴士，或者會畀路人白眼、畀師傅舉一隻手指。但係呢度就唔同，路人只會在意你嘅外表同佢地唔同，影巴士果陣你應該擔心佢地會行入鏡擺pose多過佢地認為你係怪人；師傅見你影相，會舉兩隻手指，或者定鏡擺pose，更加好有可能同站長捉住你chok住咁畀你影相。或者可能因為我係遊客？又或者當地嘅文化唔同？呢樣就不得而知喇~

除咗無白眼路人同師傅之外，活生生仲飛緊嘅古董巴士似乎係謀殺你菲林嘅真兇！
喺伊朗，世界三大集團嘅巴士佔咗好重比例。第一款見到嘅就係法國雷諾。話說我第一日由機場去到Hostel附近嘅地鐵站，一出站就畀呢款法國巴士吸引咗！型號不詳嘅雷諾巴士，真．高地台設計，睇嚟係90年代產物，就咁睇外觀應該係法國進口嘅一手巴士（點解咁講？一陣講到其他嘅就知道）。不過好遺憾，我無機會試搭法國車。

https://c2.staticflickr.com/2/1841/42370200670_3d21fb37aa_o.jpg

https://c2.staticflickr.com/2/1877/42370258120_08f93dc911_o.jpg

https://c2.staticflickr.com/2/1815/44178099821_68cc66db43_o.jpg

https://c2.staticflickr.com/2/1818/42370197840_bf1d1bfb39_o.jpg


第二款見到嘅，亦都係全國都會見到、市場佔有率最率嘅車廠：Benz！
我唔講，大家可能誤會佢係二手巴士。不過事實上喺伊朗服役中嘅Benz可能比德國同期作品仲要多。其實到底我應唔應該叫佢做Benz，都仲係一個謎。事實上掛住Benz標誌嘅巴士，佔咗九成九都係由一間叫Iran Khodro Diesel（IKD）嘅廠出品，由Benz授權生產，大部份型號都屬於O457或者O457G/OSG，係伊朗獨有嘅Benz型號，外觀保留70年代德國單層巴士嘅設計，相信伊朗革命前已經生產，而從網上資料睇返可能2001年都仲有生產。好啦，最後一個謎，到底呢款車，我可唔可以叫佢做Benz O457/O457G/OSG呢？同樣道理，我地唔會叫Youngman出嘅巴士可唔可以叫佢做Neoplan、Yutong出嘅叫Man，不過似乎外國係認同呢個系列嘅巴士都係直屬Benz出品。

https://c2.staticflickr.com/2/1890/44178103471_6f528a9da0_o.jpg

https://c2.staticflickr.com/2/1849/42370199430_b8ec23c18b_o.jpg

https://c2.staticflickr.com/2/1837/42370198370_c6e5993a12_o.jpg

https://c2.staticflickr.com/2/1892/44178097041_bf1d30539e_o.jpg

https://c2.staticflickr.com/2/1898/43272367445_639a3a4104_o.jpg

https://c2.staticflickr.com/2/1873/44130246812_3b755f8dcc_o.jpg

https://c2.staticflickr.com/2/1840/42370191670_a521ff91e6_o.jpg

https://c2.staticflickr.com/2/1861/42370194880_9a0b41c559_o.jpg

https://c2.staticflickr.com/2/1891/44178097891_4af7627335_o.jpg

https://c2.staticflickr.com/2/1838/42370199970_33949588c9_o.jpg


由IKD生產嘅Benz又豈止一個系列呢。喺好多個細城市又或者城市—村落路線，交通需求無咁大，小型巴士係最好解決問題嘅辦法。當地有一款Benz小巴個樣似曾相識，佢個原名其實叫做O309，同樣嘅外表改成伊朗生產嘅話，就改咗名做O511。呢款車喺德黑蘭市區唔太常見，不過就喺我第一日離開Hostel去搵食果陣無意中撞見到一架，影完相想再影果陣再望真D，即刻扮無事走佬。點解要走佬？原來果架車已經唔係巴士用途，佢停咗喺警署出面上緊人，果班人係著住革命衞隊嘅衫，果度影政府嘢同軍事嘢係禁忌嚟，緊係走佬啦~

https://c2.staticflickr.com/2/1899/42370201580_7a00bfec32_o.jpg


同樣係Benz，不過佢就掛住IKD母公司Iran Khodro嘅名，好似係Benz客車O302，可能係Iran Khodro同Benz早期合作嘅作品。喺巴士總站附近突然出現，只係見過一次咁大把。

https://c2.staticflickr.com/2/1834/42370256900_566599f42e_o.jpg


好啦，去到第三款喺伊朗出現率都算高嘅巴士，就係由Scania喺伊朗成立分公司OGHAB嘅巴士。相比IKD，OGHAB其實只係掛個名，由內到外佢地出嘅巴士都係Scania新時代設計嘅真．高地台巴士，通常架巴士都會見到兩間廠個名，或者只有Scania嘅名，不過德黑蘭反而係例外嘅地方，大部份見到都係得OGHAB呢個名。喺伊朗嘅Scania高地台巴士（唔計長途客車）應該全部都係叫C-9，或者會有其他型號，呢個就唔多清楚。

https://c2.staticflickr.com/2/1887/43460109434_e5b9a997ca_o.jpg

https://c2.staticflickr.com/2/1814/42370196180_43d1bdca12_o.jpg


最後，伊朗巴士界近年出現咗新嘅族羣，就係中國出品嘅國產巴士。或者可以咁講，如果想喺今日嘅伊朗搵到特低地台巴士，大部份都只會係中國出品，當然OGHAB-Scania係有嘅，但似乎只係個別城市先會見到。
依我嘅理解，國產巴士其實都唔可以話係切實嘅國產巴士，事實上佢地同Benz O457系列一樣，只係由海外廠商授權IKD生產，亦都有IKD自己嘅代號，普通版Yutong就叫C1230，掛接版就叫C1836。不過國產巴士喺德黑蘭唔太常見（除咗BRT路線），反而喺南部設拉子就隨手都影到幾架，遲D講到設拉子果陣，再畀大家睇睇。
喺德黑蘭，Yutong可能係國產巴士嘅少數民族，反而中通出品嘅巴士就佔咗多數，似乎都係以佢地嘅LCK6120G為主，但至於係咪伊朗生產，就不得而知。據知，同巴士總站嘅師傅閒聊，佢地指住架同Wright撞樣嘅巴士話係Cin（秦，姐係中國）巴士，然後就話伊朗出品嘅（佢講緊O457系列）好揸過中國嘅，就呢個我估中通巴士應該係由中國進口。
PS. 上面Scania有張圖見到架AKIA嘅巴士，其實果架係金龍海格KLQ6128Q。AKIA係另一個伊朗車廠牌子，官網見到無論係佢生產嘅小巴定巴士，都係海格出品，所以到底佢係好似Benz、Yutong咁嘅合作關係，定係OGHAB-Scania嘅直屬關係，就不得而知了。

https://c2.staticflickr.com/2/1874/42370257370_12f97e17f4_o.jpg

https://c2.staticflickr.com/2/1833/44178167821_777bd87d98_o.jpg

https://c2.staticflickr.com/2/1864/42370199120_28a4c709e8_o.jpg

https://c2.staticflickr.com/2/1832/42370197470_2712fffecf_o.jpg

======================================================================
======================================================================
======================================================================

再一次證明，小弟我口水多過茶，呢22張相其實都係頭兩日喺德黑蘭影嘅，好高興過程中可以同唔同嘅師傅交流（雖然真係有D困難），下面放多幾張同德黑蘭巴士有關嘅相，希望之後仲有時間放埋其他幾個城市嘅巴士相畀大家睇啦~~~


德黑蘭豬紙，路線單向設計，有埋轉乘嘅地鐵站同BRT站，亦有好明確嘅開車時間。不過用英文寫就怪咗少少~~~

https://c2.staticflickr.com/2/1862/42370195700_658da474bd_o.jpg


有豬紙就緊係有巴士站，今次睇嘅係站牌。
佢地有獨立嘅站牌、加上交通標示嘅站牌，最正就係連埋預計到站時間嘅電子站牌。

https://c2.staticflickr.com/2/1818/42370192270_16d4c490b7_o.jpg

https://c2.staticflickr.com/2/1842/42370194660_ff9d3d6a7a_o.jpg

https://c2.staticflickr.com/2/1842/44178095501_5cdd1b93d3_o.jpg


德黑蘭嘅有蓋巴士站有個特色，就係會有附近嘅地圖，同埋巴士路線圖，真係show埋條路線點行架，呢樣喺香港誇真係落後晒，攞晒D位去搵真銀。

https://c2.staticflickr.com/2/1886/44178096291_0c670a7e63_o.jpg


香港人搭巴士，好多都會用八達通，喺德黑蘭都一樣。之前講過無論搭巴士定地鐵，佢地可以用ezPay呢種付款方式，拍一拍就得。如果真係無卡，其實都可以畀現金嘅，不過就要畀多少少。以我搭嘅果架巴士為例，拍卡係6600，現金就8600。同埋始終果邊買嘢最少都過萬，幾千蚊真係好難用，如果個個都畀現金要師傅找錢，真係站站都要停好耐。我就係由第一日攞住張2000蚊紙幣，攞到返嚟香港，已經差唔多爛晒，重點係唔．值．錢！
PS. 德黑蘭嘅巴士，係落車畀錢

https://c2.staticflickr.com/2/1849/44178098331_24cdd9d637_o.jpg


最後講埋佢，佢係當地嘅薩瓦利的士，可以叫佢共乘車都得嘅~~~
薩瓦利的士個樣唔同普通的士，技術上佢係夾一車人去相同或者相約、路經嘅地方，而的士就唔洗夾嘅。但事實運作上，我真係睇唔到佢地嘅分別，同樣企喺度見到黃皮膚就喺咁「踢斯」「踢斯」，同樣上車就會秒變水魚，當然的士傾掂數嘅話都可以一個人搭唔洗夾嘅。不過我就唔敢喇，同埋地鐵去到好多地方，真係唔得嘅Hostel都有介紹過用Snapp叫車（中東版Uber），會平過的士開價嘅好多！（無錯呀，的士唔係計程，係上車前傾價錢架）
因為唔識講價，基本上出行都唔會搭的士，除咗某D無得揀嘅情況。

https://c2.staticflickr.com/2/1882/42370194280_d178e102d8_o.jpg

======================================================================
======================================================================
======================================================================

好！第一Part伊朗巴士講完。
你可能會問我，我又話同師傅sss傾計，咁又有無癡車搭呀？
其實喺德黑蘭，我都搭咗兩個站巴士，主要係我問師傅sss架巴士經唔經我Hostel附近嘅地鐵站，佢本來話唔經，但最後都叫咗我上車搭兩個站，大約一兩個街口度啦，就叫我落車。
嗱，我一直都唔贊成大家「R著數」嘅，特別出外，就無謂好似香港人去日本咁出晒洋相啦。雖然我地都明白師傅sss真心唔洗我地D遊客畀錢，但著數攞得多，就會變老馮架喇，到時就無謂啦係咪先。
所以之後講嘅各程巴士同地鐵，全部都畀足錢嘅。之後仲會有D特別嘅搭巴士經驗，之後其他post出相再講講。

PS. 講多句，一如網上所指，喺伊朗搭巴士係有強制男女分座嘅政策，大約理解就係車頭男性，中門起到尾係女性專用車廂，大部份巴中士間係有條扶手作分隔之用（見Benz O457嘅內籠相）。不過上有政策下有對策，實際運作上，好多時只有繁忙時間先有明顯分別。搭客唔多嘅時間，其實女性都會坐車頭男性嘅部份，就算真係人多，都會有女性塞上車頭。
即使地鐵都係，一般地鐵車頭車尾各一卡半都係女性專用車廂，但中間嘅「共用」車廂都會有年輕女性嘅影子，呢個同好多遊記講嘅唔一樣。
其實一般情況下，只有已婚女性可以喺丈夫陪同時進入地鐵共用車廂或巴士車頭部份，不過……其實大家唔太理會。