而家d私家車司機真係大晒！！！(335@88R)

話說今日自己第一次係沙田搭城巴非專利88R出中環 原本真係好開心嘅 但係…

架車係下午1點幾行經灣仔軒尼詩道時 慢線有架車泊左係度 隨後嘅淺藍色私家車突然想抽入轉右出黎 明知得兩條行車線都仲要抽入黎中間個隙位同335並排行 搞到架335差d被佢撞…

件事仲未完 架私家車係燈位停低 仲落車影城巴司機相 抄低晒335嘅車牌同其他資料 係度阻住335繼續行程 最後架私家車就走左去 335就停左係度

雖然335冇被架私家車撞 但城巴司機為左保障自己唔好被個私家車司機告佢 亦怕唔知佢有d咩背景 就決定報警處理 其中車上有一位女乘客鼓噪 話趕時間仲話你地兩個玩還玩唔好搞到佢 城巴司機想搵佢做證人就冇聲出…當時城巴司機就不斷請求車內乘客為佢做證人 但我冇睇到成件起初係點 只睇到私家車想格硬並排行…

最後有位坐上層嘅女乘客願意做證人 其後就有幾個乘客肯幫司機 冇聲出嘅女乘客就由城巴司機嘅安排轉往新巴905 其餘乘客分別過車同係車內繼續行等候警察到黎…兩位警察到場記錄在案之後比巴士繼續行程 最後成件事搞到差唔多半個鐘先走人 加上中區爆水管大塞車 成個車程用左成個半鐘先到中環總站…

有禮貌冇脾氣嘅城巴司機係乘客落車時不斷講聲唔該晒同唔好意思 亦都有乘客安慰佢一定冇事 體現兩者之間嘅人情冷暖      
                          
成件事根本就係個私家車司機唔岩 係度惡人先告狀 明知自己架車係格硬抽出黎 仲要話城巴司機唔岩…

城巴司機講得岩 自己只係打份工唔想搞咩野 被個私家車司機告連份工都無埋咁點算…所以為左保障自己嘅人身安全 城巴司機報警係冇錯嘅！真係唔明點解而某部分人嘅駕駛質素咁鬼差劣！  
                    
最衰唔記得影低架死人淺藍色私家車同惡人先告狀嘅司機 只係記得個車牌係SR字頭 因為件事黎得太突然唔知發生咩事…

多謝收看 歡迎討論

原帖由 sam745522 於 2014-7-5 14:41 發表
但我冇睇到成件起初係點 只睇到私家車想格硬並排行…

就算你睇唔到起初係點, 但你睇到架私家車突然想抽入轉右出黎, 已經係一個重要的証供

點解當時唔挺身而出, 留低電話幫助司機呢?

我都有試過同樣經驗, 十幾年前我坐DM牌S3N@68, 坐導航位

在葵涌道北行過瑪嘉烈醫院巴士站後冇耐, 突然有架私家車從左方cut入黎, 仲要玩急停, 停車五秒先駛走,

攪到架巴士要急停, 好彩架巴士停到, 冇撞到佢, 然後架私家車就開走.

由於我在總站上車, 一路都唔覺有特別事發生, 所以問司機知唔知發生咩事,

佢話可能點錯相, 仲問我可唔可以留低電話, 需要時可否作證人

當時我二話不說, 就留咗電話俾司機, 不過最終都冇電話到

又冇撞, 對家又走左
仲停係度做乜, 又冇碰撞, 又冇人受傷

原帖由 kiwai 於 2014-7-5 15:36 發表

就算你睇唔到起初係點, 但你睇到架私家車突然想抽入轉右出黎, 已經係一個重要的証供
點解當時唔挺身而出, 留低電話幫助司機呢?



我都有試過同樣經驗, 十幾年前我坐DM牌S3N@68, 坐導航位
在葵涌道北行過瑪嘉烈醫院 ...

我以為只係過程一部分 幫唔到司機…我都想幫司機…
同時當時已經有好多乘客留低左電話比司機 其後當我都想留電話比司機時警察已經到場了解緊成件事 相中嘅黑色衫乘客就係講晒成件事嘅來龍去脈比警察聽 知道嘅野比較全面

唔使咁驚既,私家車條友上交通部落口供先再講吧

唔出奇，向來有部分有背景/富貴私家車司機胡亂揸車。
舊車冇裝車cam,車長如果自行裝，個私家車司機可能上車毁壞。與其買新車早退舊車，不如於全線車隊裝車cam,保障車長甚至公司利益，亦較難像車長私伙cam被街外人破壞。
城新似乎可放寛調用車cam片作證供嘅制度，進一步保障車長，吸引人加入，有利招聘。

好想知如果唔係335，是警車/隱形戰車/靈車/紅van，個司機會點。
Ps:雖然近日有報道關於車cam片可被改，紅燈變綠燈，但其實巴迷坐導航行拍片夠清夠穩影到事發經過應該可作呈堂證供？咁巴迷如果在乘車時拍行車記錄片都有多一重意義。

而家司機咁難揾人做
根本無意外發生過
司機點都唔會無份工
不過食死猫點都唔好受

原帖由 Rocketeer47 於 2014-7-5 15:40 發表
又冇撞, 對家又走左
仲停係度做乜, 又冇碰撞, 又冇人受傷

不小心駕駛唔一定要有碰撞先成立,報警都係保障自己日後比人追究有證明