呢一篇嚟到呢度, 最關注嘅係兩樣嘢: 1. 繁時長線短用區內落客阻住大家返工, 2. 任何計劃內的公交路線一律為$2乘車, 增加庫房壓力.
先講1., 長線在區內上客時, 長者同時間落車, 阻到幾多時間? 等燈位時間隨時仲耐過落車用時間, 如果去晨運的長者=行動較快, 一個站上十個客, 同時有幾個長者落車, 有冇人可以見一次拍一次片, 長者落車會阻到大家幾耐, 打大家都識打, 有冇實證?
另外, 新界巴士路線有邊條算得上係短線, 尤其是西北. 我冇正式統計過, 過去討論呢個題目, 話早繁站站停車落客的, 依我記憶元朗區係零舍多, 而呢篇出現E22藍田頭車九龍站站停落客的問題, 係有得解釋(前面講左). 究竟元朗區交通服務發生咩事?
自己三幾年前返清晨, 要搭601過海, 往往有長者搭601頭二三車 N619尾班車落觀塘泳池晨運, 大家都唔覺得有咩問題, 個個熟客仔, 明白佢地咁做有佢地的考量, 而既然習已為常, 大家都冇因為架車爆左仲要落車, 或者霸左啲位搭短途而鼓噪, 唔會有好似討論區咁有正反兩面.
反而因為乘客長年累月投訴601頭二車嚴重不足, 經議員爭取, 大約在我將近離開該職位前, 九巴調整過開車時間, 令返工的可以盡早上到車. 我相信獨營線要做, 絕對比聯營線來得容易.
再睇, 601寶達至金鐘收$9.8, 過海路線未過海就落車, 咁又算唔算長線短用? 需知道年中唔少人101 102 111 112等港島方向, 九龍上九龍落, 人地俾足全費係咪唔應該俾人落車呢? 我相信會有人答:「係」, 但你要如何杜絕呢班人咁做?
如果話人地落車阻住你返工, 請從今日開始多啲接觸和認識社會上唔同年齡唔同崗位嘅人.
2. $2乘車係鼓勵受益人多點走入不同社區, 同呢個世界多點接觸, 除左可以開闊眼界, 不致與社會脫節, 讓其他人可多接觸長者和殘疾人士, 多點機會認識到佢地的需要, 富有教育功能, 而更大的原因, 係多活動的人(包括肢體和腦筋), 不論是否長者, 身體和心境都要比少甚至無活動的人健康, 多曬太陽有助骨骼健康, 多接觸人和新事物可以延緩衰老, 認識到不同事物令心境開朗......(下刪一萬字).
當一個人身體健康, 用於醫療和護養的開支就自然下降.
試諗下, 當一種香港人好普遍的疾病, 用於治療呢種病嘅藥, 一粒可以賣到$500 $1000時, 或者因為沒有恆常做運動, 骨質疏鬆嚴重而跌倒時, 入醫院做一個手術閒閒地用上五六位數字, 更壞情況係以後失去左活動能力, 醫療和護養開支一個月花上數萬元的時候, 那些$2乘車計劃下的補貼支出就只係九牛一毛.
盡量保持身體健康少病痛係每個人都需要做, 長者和殘疾人士更要加倍去做, 但他們的生活水平參差, 有的更仍要為生活奔波, 去唔同地方接觸不同事物成為奢侈品.
全港受惠者一律$2乘車, 不就是公平的做法.
如果話超過某個收費或某個里數去計優惠, 你可以計的只是巴士路線行車里數, 而非由屋企去目的地距離, 如果以收費去計優惠, 就更加奇怪, 觀塘去中上環同去馬鞍山 荃葵的巴士路線里數差唔多, 睇起嚟過海巴士貴過九巴路線, 實情係九巴加下加下先加到貼近過海巴士, 咁樣加法好快多一批所謂「長途線」.
九巴53夠晒長夠晒貴, 仲有好多雙向分段收費, 唔知又要點樣為呢一類路線度身訂做優惠? 前面有板友仲要半價後計折扣, 唔好話長者, 我就咁睇都睇唔明受惠者 公交營運商 政府補貼分別要俾幾多出來, 若果受惠者真心每次出行都為公帑著想而去計數搭車, 計到腦汁乾晒都未出得門口都似.
即使只係簡單地劃一$10以下可以$2乘車, $10.1-$20可以$4乘車, 如此類推, 又如何打擊大家所講的長線短用問題呢, 而政府補貼又真係少左? |
