其實又話唔晒一定既, 好似前排有人話大快活響康怡開點, 我就諗起同下面美心既競爭
大快活就因為以前真係形象好差, 所以好少食, 而家就多返少少, 而大家樂同美心係自己食得最多既,
用平常去開既幾間快餐點去討論, 可能會比較了解情況, 起碼我覺得我附近間美心唔似大家講得咁差
店舖: 太古城中心大家樂 vs康怡廣場美心
客源同地理位置
呢兩間舖並非只做區內客, 特別響東九龍未有APM, 將軍澳新都城等商場未成氣候時,
加埋柴灣筲箕灣杏花村等居民, 太古城中心同康怡廣場都係佢地主要購物區
1)太古城大家樂
呢間大家樂唔知係唔係第一間店內同店外分開既舖, 所以響管理方面有一個幾大問題,
就係吸引到唔少既商場客長坐, 令呢間店長期都會好多人好迫, 通道亦相對上窄,
而遇到有火鍋時, 外面唔可以明火, 就更顯得成間舖係水洩不通, 呢個情況係響其他大家樂比較少見既
太古城其實唔少野食, 不過90年代初溜冰場旁邊既淨係識整堆垃圾出黎, 所以大家樂一直旺場
到之後一期既美食廣場, 終於有d正常既野食, 兼且多選擇, 原本應該令大家樂有影響,
但成個太古城廣場既革新, 令客源多左, 所以影響唔算大
而家個美食廣場行高級路線, 我都未去過, 亦少去左太古城大家樂, 所以唔知而家情況, 但應該係多左客既
2)康怡美心
康怡美心係康怡廣場除吉之島外, 係最長壽既一間, 原因可能係之前康怡廣場唔係好識利用飲食黎吸引客源,
一開始既美食閣, 最初期既吉之島美食廣場, 或者三樓既康橋餐廳, 嘉禾餐廳, 都係極難食而且地方隔涉,
所以美心就成為康怡區唯一能夠滿足中低檔食物既店舖, 90年代中期可以話係日日滿既
自從95-96年度吉之島第3次(約數)大變身, 美食廣場變左而家呢個樣, 情況開始改變喇,
吉之島美食廣場開始唔再整d垃圾出黎, 而吉之島開始多人行之後, 呢間美心首先係有優勢既,
就係吸引左班以前怕左美食廣場既吉之島客, 但之後美食廣場開始做起, 美心就開始少人喇
而更大打擊既係, 當年取消康怡街市, 來記搬去而家屈臣氏個位, 來記就霸左吉之島行街客既源,
特別係落雨天既時候, 去美心要過馬路, 去到佢門口又麻煩, 開遮唔係, 唔開遮又唔係, 就令d客多左去來記食
到而家, 澳門茶餐廳開左, 日日排隊爆滿, 雖然來記已經搬離康怡, 但對美心仍然有重大打擊,
有日平日8點幾去美心食早餐, 以前人頭湧湧既情況唔再出現喇
服務
1)康怡美心
唔知美心有無做過比賽咁既工作, 我覺得康怡美心係最好服務既一間,
我自己算係生客, 會見到執檯既阿嬸同d客經常有傾有講, 連水吧既服務員, 經理都關係好好
最令我覺得服務好既係, 佢地以前叫號碼(而家用報number機)既時候, 係好認真咁去講個number出黎,
例如係鐵板餐係會話"鐵板餐xx號請到櫃面取, 多謝", 兒童餐, 晚餐套餐, 蒸魚套餐都會分開得好清楚,
而家可能覺得呢d好正常, 但我話呢d情況響90年代初已經係咁, 當時大家樂都未開始用number制,
而就算用number, 都係十分粗魯既方式去叫, 就會覺得佢地真係好細心
大家樂就一時時, 服務好與壞真係因時間而異,
佢地有時會將打包既拎去另一個地方幫你裝好先比你, 有時竟然要你自己包好, 真係激死,
有時唔知係廚房同水吧出問題定點, 等比飛都可以排到去收銀果度,
排緊隊既當然氣憤, 未買既就更加會諗幾時先到我拎到野食, 呢個係太古城大家樂既長期大問題
食物
太古城大家樂既野食, 響全線大家樂黎講算係中上,
唔知係唔係上面所講既問題, 係由於廚房人員做事認真, 會覺得整d食物出黎係有一定水準既,
如果以太古城大家樂同附近兩間(116總站下面同太安樓)相比, 太古城就真係好食,
不過太安樓大家樂個廚房響上層, 基本上現成食物都係響水吧整, 見到水吧d人踢晒腳, 都無晒胃口囉
康怡美心食物都係ok既, 而佢地最好既係燒味,
唔知響其他快餐點, 相信無人會預計到買燒味既人係咁多, 而康怡美心係一直都係區內燒味既主要供應店,
假日隨時係買燒味返屋企多過食響度食快餐既
而呢間美心既快餐(泛指晚餐), 就感覺一般,
偶然有d短期既套餐, 味道還可以, 平時正常供應既套餐就無乜特別,
而午餐就真係同晚餐水平差一大截, 而且去過其他美心食午餐, 都係幾慘不忍睹下,
所以自己無乜事都唔會去美心食午餐
而下午茶就中規中舉啦, 份量一直比大家樂細, 其實都幾唔抵下架
[ 本帖最後由 wesley 於 2006-6-5 14:17 編輯 ]
未裝修前的大快活，質素唔好，不過真係好平
四年前在荃灣力生廣場店可以正價十二元一客焗肉醫意粉
依家同是肉醫意粉，好食左，但貴左一倍
三間都唔好，貴到阿媽都唔認得，茶餐廳最好
茶餐廳價錢咪又係差不多
又要凍飲加幾蚊
真係大家彼此彼此;P
原帖由 china 於 2006-6-5 18:41 發表
未裝修前的大快活，質素唔好，不過真係好平
四年前在荃灣力生廣場店可以正價十二元一客焗肉醫意粉
依家同是肉醫意粉，好食左，但貴左一倍
「一分錢,一分貨」嘛:lol
原帖由 Wright---AVW16 於 2006-6-8 13:05 發表
三間都唔好，貴到阿媽都唔認得，茶餐廳最好
茶餐廳睇下邊區，有部份食碟飯加野飲要四十幾蚊。
其實三間（大家樂、大快活、美心）都差不多，不過個人排次序都係：
大家樂＞美心＞大快活
論燒味類，美心係比較好，不過碟頭飯類就大家樂略好。大快活就比較平一點，不過質素就不穩定，而且晚市的套餐款式冇大家樂同美心咁多，有部份餐騎呢有餘美味不足。
原帖由 HK104 於 2006-6-8 14:37 發表
茶餐廳睇下邊區，有部份食碟飯加野飲要四十幾蚊。
係ga...尖咀銅鑼灣....茶餐廳都要三十幾四十蚊
原帖由 bigfish_hk2 於 2006-6-8 14:07 發表
茶餐廳價錢咪又係差不多
又要凍飲加幾蚊
真係大家彼此彼此;P
茶餐廳三十蚊以內, 有飲有湯有野飲,
仲有電視睇 :lol ;P
原帖由 bigfish_hk2 於 2006-6-8 14:07 發表
茶餐廳價錢咪又係差不多
又要凍飲加幾蚊
真係大家彼此彼此;P
我最憎茶餐廳的煙味:@
仲有,論服務態度都唔夠好.舒適度不夠。