被開車九巴嚇親發惡 躁漢耍拳路過車長硬食
平安夜原意希望大家可以和平相聚，但沙田一個中年男人懷疑穿越巴士站時，俾一架剛開車巴士嚇親，一時火遮眼企喺路中擋車，車長落車理論，雙方情緒激動爭持不下之際，
中年漢突遷怒一個行過嘅車長對佢出拳揮打，無幾耐見到遇襲車長瞓喺地，警方到場拘捕中年漢。
火爆阿叔60歲姓林，佢事後涉嫌「普通襲擊」被捕；無辜被打嘅九巴車長姓曾（40歲）。
事發喺昨晚平安夜9點幾，，火爆阿叔喺沙田顯徑巴士總站落車後，穿越巴士站離開時，咁啱有架巴士開車，
火爆阿叔受驚，繼而轉為憤怒，企定定喺馬路，阻擋巴士駛離巴士站。
網上片段見到，火爆阿叔同一個中年婦同細路仔企喺巴士站馬路上，同大約四個車長對峙，
相信係火爆阿叔太太嘅中年婦嘗試分隔雙方，指住一個車長話：「你打咗人喇，算喇算喇！」
但車長情緒激動大喊一句「你撞我」，氣氛緊張。
火爆阿叔之後抱起細路仔返行人路，另一個車長咁啱行緊去休息室，
阿叔忽然遷怒於佢，拳打車長嘅右肩頸位置，旁觀車長即大叫「報警」，火爆阿叔太太馬上推開佢。
無耐見到疑似被打車長瞓喺地，中年婦亦上前睇傷勢，阿叔仲好好火繼續同車長拗。
影片中婦人最後話：「（佢）飲大咗，算啦阿哥，幫吓手啦！」
九巴職員權益工會理事長李國華話，近年越來越多乘客當住車長面發洩，
車長大多只能息事寧人，但如果涉及肢體衝突，車長就一定要報警。
九巴發言人回應查詢時話，事件中車長嘅右額受傷，站長報警處理。
https://hk.news.appledaily.com/breaking/realtime/article/20181225/59070426?fbclid=IwAR340zqs6FOXUPihkSFj6YU3QKyVc0fqqDtQ2rg5BBPxOARFWOTvuru0jf4
咁大個人都唔知過馬路要睇車？
近排好多因為啲小原因又喊打喊殺嘅事發生咁樣
必須告到底，才能減少車長被襲機會。
頁:
[1]