[Update]長榮航空 BR892/130 香港>大阪 商務艙體驗
本帖最後由 szeto993 於 2020-2-10 15:18 編輯長榮航空 BR892/130 香港>大阪 商務艙體驗
*聽聞有前輩話未試過轉機唔可以當自己坐過飛機去過旅行
日期：08FEB2020
時間：0950-1625 (1004-1130，1311-1625)
航班：BR892>BR130
機型：Boeing 787-10 B-17805
有直航而且價錢合適時首選直航再正常不過，選擇轉機即係代表價錢先決而犧牲時間，放棄紅眠直航後最後拍板選擇長榮只係因為華航由香港去大阪經台北/高雄點都要食一程A330/B738，長榮就兩段都用787-10，咁自然會傾向後者，雖然之前講明我唔會再坐長榮，唯有畀多次機會體驗何謂Skytrax 五星航空公司。
*講錢傷感情，呢張單程機票費用係接近$6000，不包括因遷就航班時間而提早出發嘅額外開支，更遑論儲里數
長榮喺香港無自己嘅貴賓室，可以用UA、泰航、新航同因財困而節節敗退及需要裁員的香港航空嘅貴賓室，除咗因財困而節節敗退及需要裁員的香港航空需要出示貴賓室邀請卡外，其他三個星空聯盟嘅貴賓室都係只需出示登機證就可以
由於登機閘口就近新航貴賓室當然去新航嗰個
食物選擇唔多同質素一般，好過Skyteam嗰個都夠
長榮大本營位於桃園機場二號航廈，有幾個貴賓室你揀，網站寫得The Infinity 畀商務艙乘客入，但因為The Star同The Infinity 係同一個入口所以至少有2個係可以畀非會員嘅商務艙乘客用。The Infinity 內部真係充滿一總水療X中心嘅感覺，這就是台灣的味道？
長榮航空好重視佢哋嘅商務艙產品，反魚骨位同787嘅商務艙都係命名做皇璽桂冠艙，座位佈局係1-2-1，空間自然比2-2-2嘅桂冠艙要大，私隱度都會比較高 。長榮787皇璽桂冠艙由BMW旗下設計團隊設計，感覺上無華航靚甚至我覺得UA Polaris都比長榮787靚，但起碼靚過兩間以香港為基地嘅航空公司先。
座位佈局採用近年商務艙其中一個主流佈局～交錯座位設計。今次選擇9A同2A呢兩個位檯面同遙控靠走廊位，前後座係相反嘅，唔似華航咁有收納位放遙控同電源插座，所以檯面就真係得檯面而且夠位放一部13吋屏幕嘅手提電腦。
打開櫃門，門上有鏡應該都係標準配備，內有降噪耳機，空間夠放手機同行動電源之類嘅物品
因應武漢肺炎嘅關係，港臺航線除咗耳機可以問空姐攞外其他都有說明唔會派發，但台灣出發去中國以外嘅航班就有枕頭同拖鞋畀你，隨後有空姐畀毛毯你，可惜飛行時間太短無乜點休息
遙控可以當做第二個屏幕，你可以選擇影片喺邊一個屏幕播
BR892呢程餐係一袋上，一盒餅乾、一盒義美蛋糕、一盒果汁同一枝樽裝水，只有義美蛋糕無伏
BR130呢程Welcom drink可以選擇氣泡酒，混合果汁同水，我選擇咗酒
餐前飲品我選擇長榮特調，意外地啱口味
今次網上預訂餐點我選擇咗網上預訂限定餐點，前菜整體十分清新開胃，主菜就一般般，羊肉有少少過熟，調味唔錯，甜品係哈根大師雪糕而且係大杯過平時，上甜品前會問多次有冇需要多一杯飲品
總結：
上次經濟艙體驗真係慘不忍睹，今次商務艙體驗就真係乎合所謂五星航空公司嘅表現，空姐有禮而且主動協助，餐飲服務乎合預期，坐到完全唔想落機，如果有閑錢我會考慮有下次。嚟緊回程就唔係坐長榮，而係最熟悉嘅國泰，希望一切順利吧！
2020飛行預告：
2月 國泰航空 特選經濟艙體驗
5月 日本航空 Sky Suite 777商務艙體驗
5月 日本航空 國內線體驗
5月國泰航空 短途商務艙餐飮報告
頁:
[1]