[First LCC] HK Express HKG - Fukuoka: A321/A320neo
本帖最後由 Waiyin12 於 2023-4-2 04:56 編輯邊個話去咗英國就唔會去日本旅行架?
時間回到 2022 年 9月下旬，一星期內香港宣佈 9月26日 起取消入境酒店隔離，日本則宣佈 10月11日 起恢復外國旅客自遊行入境旅遊；眾所周知，日本乃不少港人“鄉下”，小弟對上一次到日本爲 2019年7月（當時連 italk account 都未註冊，當然無任何飛行/鐵路報告）；接近4年內，不論香港、日本以至小弟本人都經歷巨大轉變；不變的是，小弟同家人都係咁響往日本旅行，所以決定 12 月返香港時順便飛轉日本，公佈開關後幾日內，已經訂好機票酒店，而當時價格尚未飆升。
Why Fukuoka？
對小弟家人而言，東京大阪等大城市以經去到厭，同香港一樣污煙漳氣，食宿亦比較貴；2018 同 2019 年夏天去日本時，行程分別包括上高地、新穗高纜車、八ヶ岳、日立海濱公園，及安曇野（大系線沿線一個鄉村）、白馬、立山黑部。不過，3 年無去日本加上今次旅程時間不多，想去返啲相對大路的景點，而不少日本小型城市直航香港之航線，已於疫情期間無限期停止。
而飛福岡航程短過大部分其他城市，小弟亦未去過福岡，當然不會反對。
Why HK Express？
一個字，平。
（按：小弟家人長年對 CX 日本航線服務不甚滿意，甚至派 Haggen Dazs 雪糕都可以成為批評理由之一，促成佢地寧願搭 UO、順便節省旅費。）
---
當日朝早小弟約咗朋友喺青衣食早餐，之後搭機場快線入機場。
青衣入機場真係好方便
2022年12月的離境大堂，人流明顯比 2021/22 年夏天時多，氣氛唔再係充滿離愁別緒，多了一份出外旅遊的興奮
細心留意會發現上圖有位女士著住 “小藍”（意指藍色保護袍，款式類似香港衛生署人員之 PPE，保護力略遜於大陸常見之 “大白” 全身式防護衣），但估計其嘅背景、目的地同較常見著 “大白” 之人士無異
機場免稅店陸續重開，但人流同疫情前無得比
- 天際走廊、北衛星客運廊 -
2022年11月落成之天際走廊，雖則一星期前搭 Finnair 返香港時見到，但今次飛福岡才首次登上
中間玻璃用以分隔離港/抵港旅客，5 日後小弟回港落機時就喺另一面行返 T1
天際走廊之高度容許 A380 從下方通過，當日小弟並無刻意等待，但綜合之後喺侯機室觀察，至少 30 分鐘內都無飛機從下通過天際走廊；以香港國際機場現時航班運量，唔好話 A380，等一架普通飛機通過都有排。事實上，現時每日只此一班 Emirates HKG - BKK - DXB 由 A380 執飛，其他包括 British Airways, Lufthansa, Koreanair, Singapore Airlines 等曾經的 A380 常客，現時統統絕跡香港，直至另行通知。唔好賴疫情引致 A380 停飛，BA、LH 現時有 A380 飛緊 trans-Atlantic，只係未重返 FRA/LHR - HKG。
觀景設施唔少得嘅玻璃地板，小弟並飛畏高人士，行喺上面都係 easy job
起到咁高就代表兩端要用唔少時間上落電梯
天際走廊連接 T1 離境/入境大堂及北衛星客運廊，走廊落成前北衛星客運廊為獨立建築物，先前一直靠接駁巴士連接 T1 客運大樓；唯小弟記憶入面，HKG 用 outer bay、搭兩個站無人駕駛列車去中場客運廊都試過，就係無去過北衛星；以前未對航空產生興趣，有段時間甚至以爲北衛星 = outer bay 上機
HK Express 作爲 LCC，停泊閘口一般會較偏僻，多為 outer bay、北衛星、中場 三選一，是日用上北衛星
（按：下列三張相攝於 2022年7月返香港時，抵港仍要於機場檢測待行，確認 RAT 陰性後往酒店隔離7日；當時整個中場客運廊改用作檢測中心，及供衛生署職員印製、簽發檢疫令，停機坪泊滿閒置中的國泰、港航、快運航機；唔知中場客運廊幾時先會回復一般客機上落？不過以香港機場現時客運量，應該未有實際需要。）
當時北衛星客運廊之觀景臺尚未開放，最近見有新聞話以經啟用？
不過以之前中場客運廊的經驗，應該會淪為戶外吸煙區。
真係想睇飛機升降，飛機維修區、欣澳、沙螺灣等或者會更適合；唔知機管局會唔會打算参考 NRT、NGO 等，起返個真正的 “機場觀景臺”？
- UO 668 -
Route: Hong Kong Int'l Airport (HKG) - Fukuoka Airport (FUK)
Scheduled Time: 12:50 - 17:00 (3 hours 10 minutes)
Actual Time (pushback - gate arrival): 13:24 - 17:33
Seat：20D > 20F
Aircraft: Airbus A321
Reg. number: B-LEL
訂機票時機型顯示為 A320-200，當日改為 A321；呢個 last minute equipment change 係幾啱我心意，因爲幾年前搭過 HX NRT - HKG 用 A320，但就未搭過 A321～
北衛星客運廊四邊外圍劃為抵港旅客專用通道，由侯機室影飛機會有段距離
另一閘口往馬尼拉之 CX A321 neo，港龍航空結業後，母公司國泰終於有窄體客機
小弟一行三人本身付費劃咗 25 DEF，但換機型後 A321 25排後方爲 emergency exit 及機組人員座位，25 排每邊僅有兩個位，所以自助 check-in 時獲編排 20D + 25 DE；登機時 20 D、E 被 E、F 位之一對父子罷佔，家母要求對方讓出路口位，惟對方面色並不願意；不過其實我唔介意坐入去 F 位，有窗口位坐我仲開心（25E 係 missing window，要分前面 24F 隻窗），所以決定調位，對方亦可以 keep 住路口位，win-win～
登機完畢後有工程人員出入駕駛艙，當刻擔心發生機件故障飛唔到，好彩最後有驚無險，只係 delay 了半小時
中國國際航空 A330-300
中場客運廊依舊係國泰機庫，中間一部 A321 neo 非常明顯，narrow body 機身矮過 wide body 一截
路過 Air Canada A330-300, YVR/YYZ - HKG 都唔係用 A333，係飛嚟香港維修，或客機當貨機用？
封存中的天津航空、香港航空客機
後方有一部 Finnair A359 Marimekko livery，Finnair 喺機上用品以至機身途裝都有芬蘭時裝品牌 Marimekko 聯乘
小弟係搭 Finnair LHR - HEL - HKG 返香港，但來回共4程都搭唔中 Marimekko 花機，反而 HKG - HEL 搭到 Oneworld livery，飛行報告會順序推出
港龍航空已經不存在，想見其客機理應唔容易，仲要係港龍上一代途裝，連紅色魚翅都未噴，應該有返咁上下歷史
Runway 07R 起飛，疫情期間無得去旅行，試過唔止一次約朋友去網外的南環路睇飛機、夕陽西下，今次終於可以去旅行!!
竹篙灣檢疫中心/社區隔離設施上空，成文之時有消息指，隔離政策取消後，隔離設施會改為簡約公屋？
之後直插雲層以上，無緣欣賞香港景色
Buy Onboard menu：同年搭過 Lufthansa 同 Finnair 由 LHR 飛 FRA/HEL 轉機回港，對此並不陌生。
HK Express 機上所有飲品、食物均會額外收費，包括清水（盛惠 $10 一杯）
機上可以即場購買的主食只有海南雞飯、熱狗，及杯麵等小食，其他如咖哩雞飯、白汁通粉僅限網上預定；選擇亦比 under HX 年代少，見板友分享幾年前搭 UO 機上有牛肉飯便當、點心拼盤等，現已全數功成身退。
A321 Safety Card
餐檯，唔知個設計係咩事，一大個㝫仲要係向中間擴大，好容易跌野落去；之前搭過其他 narrow-body 同樣用 slimeline 凳，但餐檯都無咁不人性化
UO 無論邊款機型，都係 3-3 排法，全機單一客艙
飛過台灣上空，但由於未有 location data，機上亦不設 flight map，無從得知確實位置，只知為中部山區；同時估計係天色、登光或機窗清潔度影響，肉眼睇係清晰的一個個綠色山峰，影出來原來係唔清...
A320 變 A321 即係機上會多出幾十個空位，但 HK Express 未有安排乘客盡量分散就座、減低機上感染風險，而係機艙頭段滿座，最尾有幾排完全空置；就算部分空位留予機組人員休息，都唔需要 5-6 排掛？
降落前已經日落；到步再出到福岡市區，已經夠鐘食晚飯，咁就完咗第一日；可見這個航班時間不太理想...
（最初訂 UO 668 係 11:00 - 15:00 咁上下，之後收到電郵話改遲兩個鐘飛 :/）
誠言 HK Express 機身深紅、深紫色美感欠奉，紅色 sharklets 簡直係破壞緊個夕陽...
不過搭得快運唔會 care 咁多，小弟 gallery 亦影落唔少更靚的 magic moment wallpaper
開始下降；但 location data 失準（下降中但地點顯示為宮崎）；目測可能係長崎九十九島，或其他島嶼/湖泊
福岡空港位處市區，搭地下鐵空港線最快5分鐘到 JR 博多站，交通方便過東京成田、大阪關西等大部分其他日本機場
今次出發前要到 Visit Japan Web 填寫個人資料、上載疫苗紀錄 / PCR negative report (check-in 時有要求出示登記完成 QR code)，以前飛日本時要填嘅入境（填寫航班資料、住宿地點等）及海關申報表皆可網上完成；降落後要喺機場行大運，但有 Visit Japan Web QR code 基本上可以無額外手續要做；等得最耐係過入國檢查 passport control（as always...）
(待續...)
回程報告見 #7 本帖最後由 Waiyin12 於 2023-1-29 05:03 編輯
今次大部分景點都係搭鐵路往返，相關列車、行程體驗將會在 R3 板發文分享，在此僅貼出部分景點圖片 -
福岡 Marinona City Outlet
JR 博多 City 天台展望台
JR 博多站外聖誕裝飾，巨型聖誕樹 + Christmas Market
博多運河城
下關市唐戶市場
下關名物河豚刺身，及拖羅；一個鮮甜一個肥美
史跡春帆樓 - 日清講和談判場；甲午戰爭後，滿清、日本代表在此簽定《馬關條約》
關門海峽 + 連落船
九洲鐵路紀念館
門司港：建築風格偏向歐陸風格，後方為關門大橋、舊門司稅關
熊本城，現已重新開放入內参觀
天守閣展望；向阿蘇山一帶，但天色不算太清
水前寺成趣園
特急由布院之森
路經慈恩瀑布，列車放慢速度
湯之坪街道
金麟湖；當日下午飄雪但唔算多，相片近乎影唔到，用 live photo / video 清楚好多
夢想園；貸切風呂，可以望住由布岳浸
是我的問題嗎？很多相片看不到。 中國國際航空 B777-300 ER架CA係333， 唔係77W
Waiyin12 發表於 2023-1-29 05:01
今次大部分景點都係搭鐵路往返，相關列車、行程體驗將會在 R3 板發文分享，在此僅貼出部分景點圖片 -
福 ...
我4年前去福岡都冇咁正,只係去左唔知乜鬼海岸公園,係博多坐個幾鐘電車先到.
福岡機場係正市區,非常方便.
本帖最後由 Waiyin12 於 2023-4-2 06:30 編輯
開心的時光過得特別快；玩咗5日（其實唔太夠喉... but anyway, 夠鐘上飛機返香港。
國際線大樓
福岡空港外景觀，位於福岡市區
是日 HK Express 福岡之地勤由 Swissport 代理，唔知何時開始棄用 ANA
未有營業之土產店
過關並不多人排隊，好快入到侯機室
福岡機場國際線侯機室面積不大，大概係10個閘口一字排開，中間同兩旁有少量商店
中間嘅免稅店（非圖中）大排長龍，人流多過 5 日行程中任何一處商店
另一邊有間便利店，但食品類（飯團、冷麵、沙律）等絕全部售罄，只淨少量 frozen meal 及即沖湯品（其實應該影低如此其景，但唔記得），不曉得係因同時段幾班機出發，定未準備好開關時人流急增、存貨不足。
Philippine Airlines A321
- UO 669 -
Route: Fukuoka Airport (FUK) - HK Int'l Airport (HKG)
Scheduled time: 16:05 - 19:00 (3 hours 55 minutes)
Actual time (pushback - gate arrival): 16:00 - 18:57
Aircraft: Airbus A320 neo
Reg. no.: B-LCP
A320 neo 之前 Lufthansa LHR - Frankfurt 搭過，喺 A321 LR/neo 投入服務之前，HK Express 唔會在機型上有任何吸引力（反而大灣區航空有 B737-800...）
當日喺福岡天神 Solaria 地下街食午餐時唔爲意時間搞耐咗，結果起飛前 1.5 小時才到機場，應該係最後幾位 check-in 之乘客，地勤表示電腦劃的座位並非三連位，但出登機證時離起飛少於一小時，未能修改，為此致歉。（其實我好奇，UO 買機票時揀位要加錢，但到起飛前網上 check-in 選位仲要唔要加錢？今次我回程前一晚嘗試登入 online check-in，但到選擇座位，唔比錢就落唔到下一步，即完成唔到 check-in 手續。）
當時獲分配 31F、32BC（全機左、右兩邊最後一排，快運 A320 neo 左邊去到 32 排，右邊只到 31）；但 30 排打後全部 missing window，登機完畢後 31E 有陌生人就座，反而 30/31 A-C 兩排全空，決定轉去 30 排坐
Air Seoul A321
Air Busan A320，感覺到目前為止全部都係 narrow-body？
機內不設公用螢幕，由空服親身進行安全示範
感覺快運空少/空姐在指示安全門等動作時，合拍程度不及疫情前搭國泰/港航時所見
跑道另一邊得國內線航廈，形成國內線比國際線繁忙的現像？
一張相已有5間航空公司，比國際線一邊所見多，JAL 係廣體 A350-900
Starflyer 星悅航空（唔好同台灣嘅星宇航空 Starlux Airlines 混淆!!
機身同 Air New Zealand 一樣為全黑，幾易認
以我所知係一間以北九州空港（位於小倉）為基地之精品航空，現時主要提供日本國內線，疫情前曾開辦 北九州、名古屋中部 - 台北桃園 之定期航班（現時停航中），亦曾以包機型式飛行 北九州 - 香港；據當時閱讀的飛行報告，飛機餐供應精緻日式便當、青森蘋果汁，所用之 A320 全機經濟艙共 150 座（同機型港航 174 座，快運 180 座），每座位 legroom 34-36’...
聽落各方面都非常吸引，唔知幾時有幾會親身搭?
等待起飛，ANA Wings DHC-8-400
J-Air Embraer 170
天草航空 ATR 42
起飛，福岡近郊
爬升及向南飛，久留米市上空（不知準確與否）
噴煙的應該係阿蘇火山？
同樣係從高俯瞰，感覺日本的 settlements 密集過西歐 (?
下方睇落似九州新幹線高架橋及車站，但未能判斷係邊個站
鹿兒島灣、櫻島火山
是次旅程未有到訪南九州（最南只至熊本），但有機會係機上欣賞鹿兒島地標，係開心嘅～
枕崎、指宿半島
離開九州島，進入東海上空後，雲量立即增多（唔緊要，至少唔係調返轉，飛出一片汪洋上空後先放晴）
Safety card - A320 neo
機上服務同去程相同，就係咩都無，不需多作介紹。
A320 neo lavatory， 唔知係咪新機改用 LED 照明？
（neo 除咗解咗 New Engine Option, 就咁指新型號、有 upgrade 亦可～）
Evening magic moment
開始下降、穿過雲層
今次降落 Runway 07L（即 “第三跑”）；上兩次返香港都係用第三跑，夏天時用 25R，12 月頭已經變為 07L
降落時天色已經全黑，加上坐 A 位窗外沒有任何建築物，隱約見到對岸屯門龍鼓灘、海面一些貨櫃船，無影落任何見得人的相。
泊位同去程一樣喺北衛星，經過天際走廊返回入境大堂
當時（2022 年 12 月中）仍要進行抵港檢測，測出陽性必需隔離最少 5 天；成文之時，抵港檢測、確診者隔離等政策已先後取消，除口罩令（取消無期，聽聞3-4月會放寬?）及學生上學前快測（暫定維持至 28/2）外，香港基本上無任何防疫措施。
旅程其中一天，行政長官李家超宣佈取消黃碼政策，即晚凌晨生效，變相實行 0+0，入境者不再受黃碼限制（抵港時檢測陽性另計），即係落地後可以喺機場食晚飯～
（呢個行程亦係小弟的 birthday trip，可以話係特首送嘅生日禮物? 要謝主隆恩喎!!
不過我 2021 年 8 月飛英國，抵達後已毋須隔離...）
以前去完旅行夜晚返到香港，通常都會喺機場食埋飯先返屋企；就算係搭國泰、港航（2019 年中前）有完整飛機餐供應都係咁話，家人成日表示飛機餐食唔飽。上兩次返香港，一次落地後直接 “押送” 往檢疫酒店強制隔離，一次要受三日黃碼唔入得餐廳，今次終於頗大程度地 “復常”
按：官方係對 0+0 隻字不提，不過明眼人應該知係咩料?
- Comments -
如果有睇過小弟其他飛行報告，應該會見我喺疫情期間，搭過唔止一次 HKG - LHR or reverse；作爲（入坑未深的）飛機迷，可以講係其一（額外）的收獲，亦感恩喺疫情高峰期都有機會可以飛上天，計返大概得接近兩年無飛過（2019.11 - 2021.8），短過香港封關時間。所以今次搭 UO，感受其實不多，反而重回日本，搭到三款新幹線、D&S/其他特急，及其他九州景點、美食，意義大過兩程 3.5 小時的航機。
家人對國泰無好感，情願搭快運節節省旅費，我係理解的；搭得 LCC 就預咗無任何服務，當係一架會飛上天的巴士即可，類似的 LCC 式服務，之前搭歐州以內的航班（就算係 FSC）都領教過。就算係 HKG-based 感受亦相當有限，有廣東話廣播親切少少咁解；唔知係疫情影響定轉手後無心經營，機上付費餐飲選擇比疫情前、under 港航年代失色不少，我連試伏的意慾都無；其他機上娛樂、座位舒適度等，無期望就唔會失望。最近有討論指 UO 復活節來會東京機票索價近 $8000，比起我近幾次倫敦來回香港仲要貴，真心痴線的；返港後日本一度禁止香港航班著陸福岡等空港，又要求航空公司縮減航班數目（感覺成件事好有 2020 年，疫情初期的味道），快運更有航機飛往福岡途中，遇上氣壓問題緊急折返，都慶幸喺開關措施公佈後立刻訂好機票、機票並非天文數字，旅程亦無遇上嚴重阻滯，稱得上十分順利（除咗一個景點去到摸門釘，稍後會在 R3 版貼文分享）。
同時樂見短短一年，香港 “外防輸入” 政策作出重大改變，2022 年 1 月時外國回港須酒店隔離整整 21 天，英美澳加等地航班、旅客（包括香港永久居民）禁止入境香港，經過 14 晚、7 晚（暑假回港、搭 Lufthansa 之行）、3+4、0+3（酒店隔離壽終正寢，亦促成是次福岡旅程）不出一年，12 月中開始 0+0（算係一個驚喜），到今時今日連抵港檢測、確診隔離都全數走入歷史，經過 2020 - 2023，“疫情” 在香港離終點不遠矣，如無意外，快將走入歷史～
疫情可說成一件特別事件，不過呢段日子，有生之年經歷一次已經係 more than enough。
報告完畢，歡迎討論～
希望 2023 年，航空業、出外旅遊會係回復到疫情前的美好光景
過往飛行報告：
(2022/Dec) [北方雪國] Finnair A320 + A359: London Heathrow - Helsinki - Hong Kong
(2022/Sep) Lufthansa A320 neo: FRA - LHR
(2022/Sep) [都係逃不過 Delay] Lufthansa: A343 HKG - FRA
(2022/Jul) [回港之路不容易] Lufthansa FRA - HKG + 我在法蘭克福的17小時
(2022/Jul) [典型歐洲航班] Lufthansa LHR - FRA
(2021/Aug) British Airways B77W: HKG - LHR
(2019/Nov) Emirates: HKG - Dubai - Edinburgh (首試A380)
本帖最後由 DIH 於 2023-2-4 12:06 編輯
多謝分享，我都籌備緊，福岡機場近，博多好多野食，唔使搭好耐車就有溫泉，真係去極都唔厭。
以我所知，快運任何時候揀位都要畀錢，唔想畀錢就由地勤 assign，所以我通常都會畀錢揀埋唔使煩。
之前海航收購 Swissport，HX 同 UO 地勤就轉去 Swissport，唔知 CX 在日本用邊間，而家 UO 繼續用 Swissport 可能係未完約？
復活節賞櫻季 + 餓得耐 + 唔係個個想冬天出發 + 日本限航班，呢個時候重唔有大食大咩，如果 UO 要八千，可能 CX 已過萬。;P
本帖最後由 limited 於 2023-2-20 00:14 編輯
2月福岡坐UO669返嚟, 少少相片補充
國際綫離境層上一層兩端, 有半露天觀景台
睇到國內綫飛機升降
UO668抵達FUK
機場實在太細, 睇埋班機停定先落去排安檢入禁區, 到閘口都係15分鐘
傍晚唯一在禁區開的食肆
國際綫Terminal 有定期班車去九州中部至北部
疫情前有經博多去天神的巴士, 但可能因交通擠塞關係現在只到博多
去博多搭直達巴士是不二之選, 有Coach 和低地台巴士(沒有行李架)行走
去國內Terminal 同福岡機場地鐵站就用Benz (Citaro)掛接行, 行車時間約十分鐘
但連埋行落去地鐵月台時間, 坐巴士都已經到博多
頁:
[1]
2