英國航空 London Heathrow - Gibraltar 差啲轉飛西班牙
本帖最後由 S3BL417 於 2023-3-1 07:42 編輯直布羅陀位於歐洲南端，面向非洲大陸，為英國的海外領土。
有一座全球少數難飛的機場，更加有條好罕見的飛機平交道，早係 2019 年已經聽過好快會起好條隧道，到時就冇得再係跑道上面行，後來畀疫情搞到冇機會飛，本來都以為應該都冇機會感受下，點知去到 2023 年條隧道都仲係未通車，所以就造就咗呢次體驗。
日期：30-1-2023
航班：BA490 (LHR>GIB)
預計起飛時間：12:55 (UTC)
預計降落時間：16:55 (UTC+1)
機型：Airbus A320 (G-EUUG)
雖然 Heathrow 機場英航主要係用 T5，不過呢班機就係用 T3，出發前已經做咗 Check in 兼且放咗機票落手機度，所以去到機場做完 Bag Drop 攞咗張單就走得。
T3 入面有幅香港嘅壁畫
留意下背景啲建築物相信張相大約係 90 年代尾
一種好親切的感覺
當日登機閘係 3 號
當日用機 G-EUUG
直布羅陀機場出名難飛的原因，除咗機師要做特別訓練之外，更加因為當地經常性大風，一大風就要轉飛西班牙 Malaga
就算唔使轉飛西班牙，都仲仍有機會需要 Go-around。
冇錯，當日一入到閘口就有地勤提醒呢班機要轉飛西班牙 Malaga。
當日飛直布羅陀的另一班機，顯示飛機需要 Go-around 再兜咗幾個圈先至成功降落到。
果下其實個心有啲亂，除咗體會唔到機場的感受，更加因為行程上會有滯後
事關 Malaga 距離直布羅陀都有兩至三個鐘的車程
分分鐘去到直布羅陀已經好夜。
最後上到飛機，機長開咪話我地會照飛直布羅陀
果下先開始放鬆咗少少，但一日未降落到一日都仲有變數。
起飛後無耐派咗啲小食
英航 A320 都有收費的 WiFi 服務，不過 2 個鐘都要 8 鎊幾，當然就唔會買
飛機飛到西班牙的雪山上空
臨降落之前機長又再一次開咪
表示「我地會試下降落，我地已經做過好多次訓練，你地可以放心」
機上傳出一陣笑聲
見到直布羅陀
飛機從跑道西邊降落
換言之需要環繞直布羅陀一週先可以降落
所以坐右邊的話就可以欣賞到直布羅陀的全景
最後都成功降落了
機上傳來少少的拍掌聲
降落之後為求盡快清客，所以開哂前後兩邊門畀人走
不過事實上好多人都好似我呢啲遊客咁
落到地都仲要係咁影返架機
搞到啲地勤都要趕人走
直布羅陀機場只得一條行李運輸帶
不過其實機場一日最多都係得 3 班機左右
甚至全日只有一班機
所以係絕對夠做
呢度的海關都係分咗 EU 同 All Passport 隊
不過 EU 條隊係超級長
我地揸 BNO 既其實都冇得排 EU 隊
所以好快就過關
題外話，揸 BNO 入境都係冇打印落你本 Passport 度，反而揸特衰就有打印
直布羅陀機場的新客運大樓，係 2012 年啟用
入境之後第一樣要做既野
就係行！機場！跑道！
當日直布羅陀吹緊 27 公里風
所以其實都真係幾大風下
行果陣係狂畀風打落塊面
飛機臨起飛之前會落幾次閘，唔比人同車過幾分鐘
果幾次落閘主要係畀機場車輛巡視跑道同清理垃圾
到飛機要滑行既時候落閘就會落到起飛果下，大概要等10分鐘
飛機滑行經過平交道
飛機需要行到西邊跑道尾掉頭再起飛
起飛無耐之後就會開返閘，一切回復正常
直布羅陀面積只有 6 平方公里大
但都有 10 條公共巴士服務
當地居民搭巴士是免費的
順便分享下直布羅陀的巴士
直布羅陀同香港一樣
都有興建相應的公屋 / 居屋
順便分享下呢度的公共房屋
直布羅陀的交通燈
郵筒
呢條就係講咗好多年的機場隧道
位於機場的最東面
本來應該早幾年就已經通車
但因為不明的工程延誤
最新的講法係 2023 年夏季啟用
到時車輛就無法直接橫過機場跑道了
亦因為機場隧道帶的日後的繁忙新機遇
呢片東部荒無地方近年亦都大興土木發展緊新樓.
最後送上回程返 Heathrow 的少量機場照片
回程就冇乜野寫了，都係差唔多。
謝謝點閲. 多謝分享，實在難得一見。
其實平時轉飛 Malaga 機會有幾大？好奇一問，如果真係轉飛，原本由 GIB 出發果班客又會點樣安排？
想問Gilbratar去西班牙洗唔洗過關？定係好似神根咁自由出入？ 本帖最後由 VL952 於 2023-3-1 20:03 編輯
Fuk19805 發表於 2023-3-1 09:15
想問Gilbratar去西班牙洗唔洗過關？定係好似神根咁自由出入？
要
直布羅陀去 La Linea 要過西班牙入境
La Linea 返直布羅陀要過西班牙出境再入境
想儲印仔嘅話 用英國護照入境直布羅陀唔會吸印 要出入西班牙先有:lol
S3BL100 發表於 2023-3-1 01:21
多謝分享，實在難得一見。
其實平時轉飛 Malaga 機會有幾大？好奇一問，如果真係轉飛，原本由 GIB 出發果 ...
2月頭果時直布羅天氣麻麻地，大風兼大雨，然後留意到成個星期有3日都要轉飛 Malaga，睇嚟只要有少少陣風就已經唔落得。
順便留意埋班機轉飛之後會點，英航嘅話架機就會泊過夜，去到第二日下午先至飛返倫敦。至於另一間 EasyJet 就留意到係夜晚 7 點幾降落 Malaga，然後係深夜 2 點幾起飛。
相信既然航空公司會安排巴士接送乘客去直布羅陀，就應該會車返返去。
反而有樣野想知道的就是如果有人只有英國簽證但冇西班牙簽證會點處理的？ Fuk19805 發表於 2023-3-1 09:15
想問Gilbratar去西班牙洗唔洗過關？定係好似神根咁自由出入？
聽講以前係掂行掂過，就算 show 特區都係
不過而家就真係有櫃位要逐個逐個睇，但我自己都留意到揸西班牙護照都係就咁行過。 19年去過，真係好正，當年都多航班。日日Check著用邊條跑道落book好位機場都廣播埋邊個方向著陸之後轉方向影唔到坐山:'(當年仲有幾架老巴士。起晒樓感覺唔同晒了
4年前我都係因為條隧道就黎開張先專登去...
不過去程係經西班牙入，回程直飛回倫敦
好唔好彩delay左4個鐘，亦都係因為咁樣收到EU規定的Compensation變相張機票回本有突
https://www.hkitalk.net/HKiTalk2/thread-1155537-1-1.html OTIS401 發表於 2023-3-4 20:45
4年前我都係因為條隧道就黎開張先專登去...
不過去程係經西班牙入，回程直飛回倫敦
好唔好彩delay左4個鐘， ...
Me too
OTIS401 發表於 2023-3-4 20:45
4年前我都係因為條隧道就黎開張先專登去...
不過去程係經西班牙入，回程直飛回倫敦
好唔好彩delay左4個鐘， ...
機件問題延誤算好彩，如果純天氣問題應該唔會有 EU 261
頁:
[1]