庫頁島——北方四島：擇捉島之旅
承上 post，嚟到庫頁島之後打算只係留幾日，然後準備下一個目的地，亦係呢次旅程的主角：北方四島。北方四島係一個有主權爭議的地方，包含齒舞群島、色丹島、國後島、擇捉島在內，日本一直宣稱擁有該四島的主權，在歷史上自 1945 年 8 月蘇聯入侵北方四島後，就一直管治該四島至今。有關北方四島的爭議問題不在此詳細解說，有興趣可以上網搵資料。
要到訪北方四島並非易事，非該島的居民均需申請邊防證才可到訪，至於日本人呢，即使係疫情之前，日本政府係唔鼓勵國民用入境俄羅斯的方式到訪北方四島，以前每年都會舉辦幾次的「自由訪問」，讓日本人以無需簽證入境到訪北方四島，以進行掃墓、或兩地居民的交流活動。但有關「自由訪問」已隨疫情同戰事而暫停至今。
回正題，今次旅程原定係由庫頁島搭飛機前往擇捉島（俄羅斯稱為 Iturup 伊圖魯普島），在島上逗留 3 日，然後搭船前往國後島（俄羅斯稱為 Kunashir庫納施爾島，再係島上逗留 4 日後搭飛機返回庫頁島，係一個跟團的方式，全程由當地人帶領遊覽，所以關於北方四島的機票食住同埋邊防證的問題我係冇擔心，只係畀錢搞掂。不過旅程並唔係一帆風順，因為仲有第二個不可抗力的因素：天氣。
出發當日係 4 月 17 日（請記住日期，對之後的內容有用），當日庫頁島天色不佳，有幾陣雨。
南庫頁島機場的國內線客運大樓，於 2023 年 8 月落成啟用，比起舊果個客運大樓（現改為只供國際線使用）現代化咗好多。
國內線出發水牌，當日我搭果班機繼續係極光航空Aurora Airlines 營運，編號 HZ4603，目的地寫上了「Kurilsk」，為擇捉島上最大的城市，俄羅斯稱為庫里爾斯克，日本則稱紗那村。
極光航空提供來往南庫頁島至擇捉島，以及國後島的航班，每日各飛一班，亦係出入兩島的唯一交通工具。
當日航班原定會係朝早 11:10 起飛，Check in 櫃位會係朝早 10:10 開始，但去到 10:10 櫃位仍未開始運作，無耐就宣佈航班會延至 12:00 起飛，叫我地朝早 11:10 再嚟櫃位。
機場內有間日本便當餐廳，叫咗個吉列豬扒便當（650 盧布，約HKD65），再加一支俄羅斯可口可樂（200 盧布，約HKD20），呢隻可樂就係可口可樂公司撤出俄羅斯市場後的後繼品牌。
機場亦有間日本雜貨店
入面全部都係日本貨，一個日版杯麵約港幣 $25-$40，左上角的正麵更要索價 $59。
去到朝早 11:00 後仍未見Check in 櫃位有任何活動，已經心知不妙，打定輸數，最後航空公司宣佈今日班機取消，原因係擇捉島上有溫帶氣旋。
然後叫你聽日中午 12:40 再嚟。
極光航空對受影響的乘客，提供免費過夜酒店，當然亦有提供接送。
酒店位於機場附近的新發展區，新到應該係啱啱起好果種，不過我覺得佢似 Serviced Apartment 多啲，因為附近同樣的建築物係住宅區嚟。
房間好大，亦分開客廳同起居室，算係咁。
機場附近擺放咗架 An-24
突然係庫頁島上又多咗一日，所以決定包架車，去一處兩小時車程的地方。
離開酒店時已經係下午 4 點幾，不過庫頁島成夜晚 8 點半先日落，所以有足夠時間玩。
距離市區 125 公里車程的東白浦神社，係現存係庫頁島上的最後一座鳥居，係昔日日本管治庫頁島（日本稱為樺太）的見證。
神社的奉獻台遺蹟
神社附近亦有一架退役了的 Kiha 58 火車，90 年代由日本贈送予俄羅斯庫頁島，行駛至千禧年。
返到酒店已經晚上 11 點，本身已經係出面食埋嘢先返，結果發現原來航空公司有提供埋伙食（酒店前台講的）。
4 月 18 日，當日庫頁島天氣非常晴朗
航空公司有提供埋早餐
其實酒店所在的位置，附近係完全冇任何商店，所以都感恩有提供簡單的飯盒。
食完早餐就準備搭航空公司的接送巴士前往機場。
雖然都係同一航班編號 HZ4603
不過今日班機係 14:40 起飛，我地中午 12:30 已經到咗機場，又係等待Check in 櫃位係中午 12:40 開放，仲見到櫃位已經出哂航班編號（琴日係直頭冇出），滿心歡喜今次得啦掛？
最後都係臨門射失，班機又取消了！
庫頁島雖然好天，但擇捉島上因為有海霧，安全起見最後都係唔飛。
去返機場間日本餐廳買個手卷食，其實間餐廳味道唔錯，不過冇乜心情食乜都冇味道。
同一個畫面，同一架巴士，同一間酒店，係咁。
不過都既然注定有多一日，無理由留係酒店繼續鑽牛角尖，所以又出咗去搵火車，兩存係機場附近的 Kiha 58 火車。
夜晚去咗市區的一間日本餐廳食飯，其實庫頁島係有好多日本餐廳的。
價錢方面，其實同香港高級少少的散叫日本餐廳差唔多。
4 月 19 日，陰陰地天，如果到今日班機都係起飛唔到嘅話，就會打算結束行程，早日回港，食埋航空公司提供的早餐就出發。但之後就發生咗第一單好刺激的事，就係接送巴士冇嚟！
好彩我地識得 call 車，即刻拿拿林 call 架車去到機場，去到機場已經係下午 2:00，呢日原定班機，係會由下午 15:30 起飛。
第二單好刺激的事，就係當日飛機會順利出發，Check in櫃位已經開放緊。
由於已經連續兩日都取消咗班機，所以今日航空公司會一次過開三班機，而且三班機編號都係 HZ4603！
第三單好刺激的事就嚟啦，就係三班機都係唔同時間起飛！
根據我後來的了解，原來當日航空公司係咁樣安排的：
4 月 17 日的 HZ4603 會係 14:45 起飛
4 月 18 日的 HZ4603 會係 15:00 起飛
至於原定當日出發的 HZ4603 先至係 15:30 起飛。
我地原定係 4 月 17 日出發嘅，所以理應係要搭 14:45 果班機，而唔係 15:30 果班，但係我地一直以來收到的資訊都係坐 15:30，由於冇接送車去到機場已經係 14:00 後，去到Check in櫃位時 14:45 班機己經截此 check in。
不過乜都唔理，照去排隊 check in，最後安排到 15:00 第二班機畀我。
經過一輪的延誤同埋過山車式的事件，終於都攞到張機票，即刻衝入閘。
入閘後見到 14:45 果班機。
我搭果班機要行出去上機，原本以為都係平常用開果隻 Dash-8 Q400，即係我由哈爾濱坐去庫頁島果架，但係 …
原來係 Dash-8 Q300！
查看資料極光航空只得一隻 Q300，平時都好少攞嚟行，相信係因為加得太多班機了。
航班 HZ4603（第二班機）
用機 Dash-8 Q300（RA-67253）
編定起飛時間 15:00 (UTC+11)
編定到達時間 16:25 (UTC+11)
螺旋漿飛機我只坐過 ATR72 同埋 Q400，Q300 都係第一次坐。
Q300 比 Q400 再短啲，只有 50 個座位，極光航空冇好似 Q400 咁係 Q300 設置商務座位，反而係機頭居然有個倒頭位，而且係以「SPACE+」的加闊座位出售。
我的座位係 12D
原來已經係最後一排。
機內的座位比 Q400 更舊
Safety Card
呢班機全程只係見到一個空姐服務，辛苦哂
座位上仍留有煙灰缸
滑行期間見到的米格直昇機
終於起飛了
短短一小時的機程提供一杯飲品
見到擇捉島的雪山了！
準備降落
見到島上的海霧，好彩最後都順利降落。
降落擇捉島了
機場的 Arrival 訊息顯示今日係有三班 HZ4603 到達，另有特別注明 Flight Since
延誤咗兩日，終於都成功登陸擇捉島。
雖然最後都係大幅改變行程，取消前往國後島，不過都叫去到其中一個北方四島。
（下文再續回程航班）
最後係擇捉島上留咗 6 日，原定的國後島所有行程都取消，一來係因為擇捉島去國後島既船有故障又延誤咗，二來係因為國後島既飛機更加唔穏定。出發當日原定飛去國後島的航班繼續取消，即係已經連續取消 5 日 …
先分享少少擇捉島的圖片。
擇捉島上的最大城市，日本叫紗那村，俄羅斯則稱為庫里爾斯克。
6 日行程都靠哂佢，係四驅版的豐田 Coaster
擇捉島市區最常望到的雪山：散布山，高1500米
擇捉島有幾座活火山，近幾百年來有爆發過，近廿年來附近亦都有地震過。
位於指臼山上的天然溫泉
登上雪山一隅
擇捉島著名景點：單冠灣
1941 年日軍就係由單冠灣集合出發，準備偷襲珍珠港。
單冠灣一帶仍留有大量日軍年代的子彈
擇捉島上部署咗 S-300 飛彈防禦系統
同埋 K-300P 反艦導彈
（放心，問過可以影）
擇捉島近天寧飛行場的 IL-14 飛機殘骸
網上只有零星的俄文資訊，大致係講飛機原本打算係做餐廳
擇捉島上的日本人墳場（紗那墓地）
大部分墓地都係明治、大正年代，昭和只佔少數。
而墳場係近年的「自由訪問」都會到訪的地方
位於留別村的墓地，同埋慰靈碑
Apple 天氣無法辦識呢個地方叫咩名，只係單純一堆座標。
而且天氣時間亦係慢咗 2 個鐘，即係日本時間啦 …
返到擇捉島機場
當日飛機都係順利起飛
係呢 6 日裏面我每一日都有留意航班情況
自我出發的 4 月 19 日之後，4 月 20 同埋 4 月 21 日航班都係又取消咗。
擇捉島機場就係咁細，落機之後同埋 Check in 都係同一個地方。
回程機票
航班係 HZ4604。
之後做安檢，入到去一個房仔的空間就係候機室。
直接行出去上機
擇捉島機場由於部署咗戰機，除咗客機呢一邊之外另一邊全部都係戰機，事前已經溫馨提示咗唔好影相，最後發現有啲俄羅斯人照影相，然後就畀人的走咗。
航班 HZ4604
用機 Dash-8 Q400（RA-67262）
編定起飛時間 13:05 (UTC+11)
編定到達時間 14:20 (UTC+11)
題外話，如果你從 Flightradar24 查呢班機的資訊，會發現佢擇捉島的時間用咗 UTC+12
起飛了
再見擇捉島
可能呢世都未必有機會再來。
望多一次紗那村。
都係簡單的飲品供應。
無耐就望到庫頁島
降落之前會經過南庫頁島機場的上空
南庫頁島一帶的雪山
南庫頁島市區
過去日治時期呢度被稱為豐原市
今次程機冇乜點影相
反而最後臨走果下影咗 Q400 的 1+2 商務艙座位
想睇返更新 Q400 的內籠可以睇返我上一份報告
落機了
回望返舊客運大樓
國內線客運大樓的行李輸送帶
俄羅斯周圍都佈滿 5 月 9 日勝利日的文宣
再一次回望國內線客運大樓
後記：今次呢篇飛行報告係極長，又多圖（超過100張），而且有關飛的完素可能只得一半。能夠到訪北方四島係自己一個好大的心願，咁啱復活節檔期有個難得的機會，雖然日後到訪俄羅斯的機會係多，但能夠去到北方四島的機會可能只得呢一次。所以想分享埋呢次旅程的前中後一點一滴，令呢份報告完整啲。
最後，辛苦你地睇到最後，祝願戰爭能早日結束。
呢間公司真係唔話得喎，啲cancel後續都做得好足
Again，樓主真係好勇喎，提醒咗都夠膽影相，爭少少呢度少咗位師兄 :hug:
同埋唔知點解凝住個感覺唔係好日本，即使其實呢啲普通雪山景喺可能北陸/北海道都會見到，但係個感覺就係唔似日本:L 我暫時最有興趣係，北方四島咁多日本餐廳、日本雜貨店，係咪真係日本人或者日本公司經營同打理？又有幾多日本人生意？
間雜貨店門口塊牌仲寫殘體中文，睇怕預左唔少旅客都係中国人，有趣有趣:handshake
本帖最後由 DIH 於 2025-5-9 17:47 編輯
S3BL100 發表於 2025-5-7 19:26
我暫時最有興趣係，北方四島咁多日本餐廳、日本雜貨店，係咪真係日本人或者日本公司經營同打理？又有幾多日 ...
樓主所攝日本餐廳同雜貨店位於庫頁島，經濟比較發達，唔係北方四島。戰後蘇聯進佔時曾經趕走日本人，可能係近代再移民。
雜貨店門口中文似係電腦翻譯，應該唔係中文母語者打理。我估計，庫頁島等地區於俄羅斯人眼中係日本遺物（島上1,067mm軌距鐵道於2019年才完全改軌成1,524mm，最後一班窄軌車於2020年9月開出），日本人則視為故土，俄烏戰爭前札幌新千歲有航班去南薩哈林斯克，可見兩地交往頻繁。 航空公司安排嘅巴士收咗車, 係咪可以向有關公司索償? 本帖最後由 Waiyin12 於 2025-5-12 08:15 編輯
Fuk19805 發表於 2025-5-7 00:50
呢間公司真係唔話得喎，啲cancel後續都做得好足
Again，樓主真係好勇喎，提醒咗都夠膽影相，爭少少呢度少 ...
的確堆雪山望落同日本國內嘅冬季景色甚為相似，我啱啱個冬天去長野縣志賀高原滑雪，影出嚟嘅雪山都係咁款 XD
不過建築物嘅 style 就明顯西化，似北歐 / 加拿大多過日本
比起影軍車、導彈，我覺得影人地墳墓需要嘅勇氣仲大
本帖最後由 Waiyin12 於 2025-5-12 08:16 編輯
S3BL417 發表於 2025-5-6 23:48
最後係擇捉島上留咗 6 日，原定的國後島所有行程都取消，一來係因為擇捉島去國後島既船有故障又延誤咗， ...
有點好奇本身兩個島 3+4 日行程，delay 2 日 + 一個島留 6 日，去到當地嘅旅行團，同回程返庫頁島、香港嘅行程點安排？
航空公司賠足酒店、食物，除咗最後一日接駁車無出現，都算照顧周到；
不過此類 weather delay 相信時有發生，擇捉島三日先飛到一班機，國後島五日都飛唔到一班，聯外交通聽落係極不穩定；如果當地居民每次出門都隨時等三五日先飛到出去，回程又要再用三五日賭飛唔飛到，諗下都覺得煩 :_
而且航空公司似乎完全無意 reschedule 去一個（預測）天氣會比較好嘅時間起飛，每次宣佈 delay，分分鐘香港掛一次 8 號風球，都唔駛拖咁耐 島之間係咪完全沒有船服務?
另外擇捉島上面係跟日本右軚行車? Waiyin12 發表於 2025-5-12 07:53
有點好奇本身兩個島 3+4 日行程，delay 2 日 + 一個島留 6 日，去到當地嘅旅行團，同回程返庫頁島、香港嘅 ...
本身有預多三日 stay behind 係庫頁島既時間，然後先返香港，冇諗過最後預到盡，回程返到庫頁島第二日就要走了 :handshake
機票係航班延誤果時去櫃枱搞，當然交比當地導遊負責，最後回程改到機票就無問題了 ;P
個「旅行團」因為其實都係自己訂製行程的，只需比多少少錢個導遊，當係加長行程同多咗的酒店費用。
相信擇捉島的旅館都唔會好似市區咁多 booking，原本住3晚變5晚，佢地都可以安排到。反而國後島所有酒店錢就要倒落海了。
頁:
[1]
2