返到香港就話想再去日本，夏天全日本都熱，於是就話去北海道。
因為屋企人想去網走睇流冰館同食壽司，行程中一定要包括網走，
但睇時刻表見去網走郁下都要四個鐘車程，唯有要拎住行李搭車，中途經過富良野，
又好彩臨出發前一個禮拜左右發現中富良野有間士多可以寄存行李，
唔使在旭川博有冇locker又要好趕咁去搭車。
行程大致run as planned，美中不足係第一晚在札幌無上到藻岩山（應該夠時間的），
結果札幌市電、登山吊車同山頂的小型纜車冇搭到。
但當時距離之前坐長崎市電只係四個幾月，
對札幌市電冇特別期待，我食完個湯咖哩就懵下懵下冇上到山。
另外在釧路冇去到酒店食抵食晚餐。
北海道真係同日本其他地區好唔同，地廣人稀，
鐵路方面就表現在單線、非電化路段極多，
城際特急比較疏、編組短，而且有不少季節性列車。
像我今次旅程，便搭了季內最後一日營運的旭山動物園號、富良野美瑛Norokko號，
又搭了季內第一日營運的富良野紅葉特急、秋之南富良野Norokko號，
另外亦搭了釧路濕原Norokko號，都各有特色。
點解我會想寫遊後感，講真靚景靚車大家有相睇，
但遊完今次個感覺就係，日本經濟真係唔係幾掂。
全北海道最旺的札幌，大部分店舖都係7pm閂門，
只有食肆繼續營業，連居酒屋、爐端燒那些都好少。
有些如富良野的地區，做旅遊其實做到爛，一棵樹、一間學校都可以係景點，
特登開幾條Twinkle Bus整幾個bus tour去串連，恕我唔識欣賞，我覺得好「泡沫」，
換個角度睇，其實同大陸某條村有舊石又係景點、某條橋有個雕像又係景點如出一轍。
花田就真係靚既，而做得最大的幾個農場都有多種不同季節開花的品程同周邊產品。
最灰都係釧路，我地去漁人碼頭MOO，商場旁邊的爐端燒攤檔，
到了開門時間都沒有營業的跡象（鬼咩，除了我一家之外根本無外來客），
商場入面directory話二樓有好多食肆，結果全部失蹤只有一個展覽區，商場2-3樓似政府合署多過似商場。
返酒店條街，站前大道車都唔多架，兩旁寫字樓十室九空，
睇情況應該都唔係近來的事，年輕人大多出去大城市工作，
市內一來請唔到人，二來根本各種業務都冇存在的必要了。
連接釧路與札幌的特急車程要四個鐘，一日得幾對，如果要去札幌打工都冇得住返釧路。
北海道搭火車自遊行，似乎幾個年輕的朋友去會比較容易，
我帶住三位女士真係身心俱疲，最慘係景點分散得太遠，
無得返轉頭、要不斷睇住時間表做人，真係辛苦架。
歡迎發表任何有關北海道鐵路的高見。
頁:
1
[2]