hkitalk.net 香港交通資訊網

標題: 有議員倡經洪水橋建快綫連接港深機場 [打印本頁]

---

作者: rheneaschoi    時間: 2023-10-21 00:32
標題: 有議員倡經洪水橋建快綫連接港深機場

有議員建議利用正規劃的洪水橋前海鐵路及港島西至洪水橋鐵路，興建一條快綫連接深圳及香港機場。
A4聯盟張欣宇、楊永杰、林素蔚及梁文廣聯合倡議興建支綫，由深圳機場經前海、深圳灣進入本港後經洪水橋、欣澳直達機場，建議透過一地兩檢更快速過關，預計由香港機場到深圳灣口岸只需25分鐘。
前特首林鄭月娥曾提過考慮於洪水橋前海鐵路引入其他鐵路公司興建，張欣宇說不是壞事，又說現時的青馬大橋路軌仍有空餘運力可承載多一條鐵路線。
新界北（香港新方向）議員張欣宇：「訊號系統一小時行32班車是沒問題，變相現時由欣澳，即青衣之後往機場，包括欣澳往機場，這段都是最多行24班車，其實未用盡路段的容量。所以將這條新機場快綫加入，最多都可以做到一小時8班車，對一條機場快綫而言不用10分鐘就有一班車，相當夠用。」

(, 下載次數: 726)

上傳

點擊文件名下載附件


https://www.i-cable.com/%E6%96%B ... JocEwN6E5sQbGL2-5yU

from 有線新聞

---

作者: eternalflame    時間: 2023-10-21 03:45
呢位議員發完夢未？連條新線用咩規格都未知，就可以信口雌黃？

---

作者: garyz    時間: 2023-10-21 09:18
hkitalk 唔少朋友都係鐵路和規劃方面專家，所以詳細少少介紹下個構思，大家聽完再闹都唔遲...=）

新機場快線2.0，並非一項需要數百上千億興建既全新項目，反而係利用政府已經計劃要起既洪水橋-前海鐵路（洪前鐵路），以及洪水橋-港島西鐵路（交椅洲人工島優先鐵路）走線，僅僅需要在欣澳附近，興建一條聯絡線與現有機場快線接駁，即可實現。正正由於洪前鐵路和交椅洲人工島優先鐵路均仍處於前期規劃階段，規格和工程參數都仲有好大調整空間，因此將聯絡線納入規劃當中，對本身項目整體成本影響非常有限，所以可以話係「以巧博大」。

第二條機場鐵路雖然本身造價唔高，但一旦落成，卻可以對香港機場在區內龍頭地位以及未來機場城市發展目標，起到策略性提升作用，同時都完全配合洪水橋作為未來新現代商住區定位。而現有機場快線受制於青馬大橋運力樽頸，實際上機場至欣澳段並未能發揮全部運力，恰巧讓機場鐵路2.0可以善用運力，發揮作用。

大家又對呢條「以巧博大」既機場快線2.0有咩看法和建議呢？歡迎交換意見！

---

作者: Toz    時間: 2023-10-21 09:53


港深機場鐵路比較重要既作用係方便轉機，係需要禁區到禁區，駁機場快線做唔到呢個效果。

---

作者: DIH    時間: 2023-10-21 11:07

garyz 發表於 2023-10-21 09:18
hkitalk 唔少朋友都係鐵路和規劃方面專家，所以詳細少少介紹下個構思，大家聽完再闹都唔遲...=）

新機場快 ...

欣澳至小蠔灣一段雙軌仍然會限制班次，未計東涌綫加站及遠期北港島綫的影響。必須先對北港島綫「有個說法」，知道對大嶼山段有何影響，之後再諗有無剩餘空間。就算係做，欣澳至小蠔灣應加多一對軌。

另外，洪水橋可以去到機場，咁又使唔使加埋去東涌的本地服務？當「洪交鐵路」係機鐵及西鐵分流路線得唔得？

---

作者: garyz    時間: 2023-10-21 11:11

Toz 發表於 2023-10-21 09:53
港深機場鐵路比較重要既作用係方便轉機，係需要禁區到禁區，駁機場快線做唔到呢個效果。 ...

反而覺得機場駁機場只係錦上添花，對香港機場最眼前實際意義，是能够方便吸引到前海/深圳灣兩大核心商務區啲客來香港飛國際。所以在前海深圳灣做一地兩檢都够用了

---

作者: kay    時間: 2023-10-21 11:47

garyz 發表於 2023-10-21 09:18
hkitalk 唔少朋友都係鐵路和規劃方面專家，所以詳細少少介紹下個構思，大家聽完再闹都唔遲...=）

新機場快 ...

想問你係唔係張議員/議員助手?
張議員都係Gary Zhang

---

作者: SV3077    時間: 2023-10-21 12:39

garyz 發表於 2023-10-21 09:18
hkitalk 唔少朋友都係鐵路和規劃方面專家，所以詳細少少介紹下個構思，大家聽完再闹都唔遲...=）

新機場快 ...

點解條機場快線一定要先兜欣澳然後去洪水橋? 唔可以直接由博覽館站拉去洪水橋站? 用意何在?

---

作者: garyz    時間: 2023-10-21 18:22

kay 發表於 2023-10-21 11:47
想問你係唔係張議員/議員助手?
張議員都係Gary Zhang

我本身就係交通迷，純以個人身份混跡不同平臺學習交流

---

作者: he_01    時間: 2023-10-21 18:25

SV3077 發表於 2023-10-21 12:39
點解條機場快線一定要先兜欣澳然後去洪水橋? 唔可以直接由博覽館站拉去洪水橋站? 用意何在?
...

本身條線嘅主菜係去交椅洲 經欣澳直接好多
機場只係議員提議搭單做埋

---

作者: garyz    時間: 2023-10-21 18:26

DIH 發表於 2023-10-21 11:07
欣澳至小蠔灣一段雙軌仍然會限制班次，未計東涌綫加站及遠期北港島綫的影響。必須先對北港島綫「有個說法 ...

TCLAEL樽頸始終在青馬大橋，無論點加站，都係行 24tph 所以欣澳-機場段，每小時會有 8tph 的剩餘運力，呢個班次作為通勤線路當然唔够，但反而作為機場快線2.0就十分適合...

---

作者: garyz    時間: 2023-10-21 18:30

SV3077 發表於 2023-10-21 12:39
點解條機場快線一定要先兜欣澳然後去洪水橋? 唔可以直接由博覽館站拉去洪水橋站? 用意何在?
...

如果完全重新起一條洪水橋機場鐵路，當然係無必要兜欣澳。但因為 欣澳-洪水橋 呢一段鐵係本身就計劃佐起，所以善用機遇，靠聯絡線駁埋機鐵，雖然路程比直線連通要遠，車程會長幾分鐘，但造價方面大大減少，幾乎只係一個零頭...

---

作者: he_01    時間: 2023-10-21 18:40

garyz 發表於 2023-10-21 18:30
如果完全重新起一條洪水橋機場鐵路，當然係無必要兜欣澳。但因為 欣澳-洪水橋 呢一段鐵係本身就計劃佐起 ...

好奇一問 前排有報導指港深西部鐵路有機會採用輕軌系統
其實同現有機場快綫/URL規格係咪相容？

---

作者: garyz    時間: 2023-10-21 19:42

he_01 發表於 2023-10-21 18:40
好奇一問 前排有報導指港深西部鐵路有機會採用輕軌系統
其實同現有機場快綫/URL規格係咪相容？ ...

唔知啲料邊度來...
一條跨都市線若果以輕軌規格設計，難以想象，不太令人信服

---

作者: nokia    時間: 2023-10-21 19:57
遲早屯門16區站
加條線經望后石，去機場/東涌

---

作者: Toz    時間: 2023-10-21 22:06

garyz 發表於 2023-10-21 11:11
反而覺得機場駁機場只係錦上添花，對香港機場最眼前實際意義，是能够方便吸引到前海/深圳灣兩大核心商務 ...

要方便，即係要一次出境就上得飛機，一樣要直入禁區。
現時機場來往內地既渡輪就係咁玩法。

---

作者: garyz    時間: 2023-10-21 22:24

Toz 發表於 2023-10-21 22:06
要方便，即係要一次出境就上得飛機，一樣要直入禁區。
現時機場來往內地既渡輪就係咁玩法。

可以直入禁區，少一道出入境當然最完美

不過考慮到其實香港機場出境手續本身係極有效率，根本上從來唔需要排隊，如果將來將登記易安排擴展到內地旅客，建議方案無得直入禁區既劣勢，其實實際影響都無想像咁大

同一時間，唔入禁區都有唔入既好，就係有機會可以引啲客去機場城市sky city購物遊玩，呢個本身都係機場既發展策略

---

作者: Toz    時間: 2023-10-21 22:36

garyz 發表於 2023-10-21 22:24
可以直入禁區，少一道出入境當然最完美

不過考慮到其實香港機場出境手續本身係極有效率，根本上從來唔需 ...

可以直入禁區，不等於唔可以係禁區外設站。而機鐵係肯定不可以直入禁區。

而且，新起一條仲可以順道連通港珠澳。

---

作者: eternalflame    時間: 2023-10-21 22:37

garyz 發表於 2023-10-21 09:18
hkitalk 唔少朋友都係鐵路和規劃方面專家，所以詳細少少介紹下個構思，大家聽完再闹都唔遲...=）

新機場快 ...

1. 如果要實現你嘅建議，是否代表東大嶼鐵路及前海鐵路均需要使用LAR機電及列車規格？
2. 根據正苦俾出嘅東大嶼鐵路走線係行海底隧道，是否已經得知由海底隧道至北大嶼山段渡線之建設成本？
3. LAR除欣澳站前後及將小蠔灣站以西外，均為雙線設計。增加新列車類型是否會影響日後東涌線班次？係你嘅考慮入面有無係班次上面有認真編排過？如需複線化LAR成本為多少？
4. 如果我係深圳市民，點解要去香港機場而捨棄更近更方便之深圳機場？唔通深圳宜家無國際航班？
5. 當年WEL係研究個陣已經講緊玩空鐵聯運，深圳出境後坐鐵路直達香港機場禁區範圍，香港機場車站整合港珠澳大橋香港口岸，乘客落車後只需轉乘機場APM直達登機閘口。按照你嘅計劃，深圳居民需要先出境再入境先可以登上列車，去到香港機場要再辦理出境手續，點解你會覺得咁樣做依然有吸引力？

P.S. 見到殘體「鬧」字已經見到個誠意係邊啦呀乜議員

---

作者: eternalflame    時間: 2023-10-21 22:43

garyz 發表於 2023-10-21 22:24
可以直入禁區，少一道出入境當然最完美

不過考慮到其實香港機場出境手續本身係極有效率，根本上從來唔需 ...

其實你知唔知未清關旅客係香港法例下係一定要用bonded vehicle直接送入airside？
如果你個建議成立，即係機場站要擴建分開airside同non-airside，而深圳入黎嘅列車係唔可以接載其他乘客
咁樣個經濟效益係邊度？用盡條路班次就得？會唔會天真左？

---

作者: eternalflame    時間: 2023-10-21 22:45

garyz 發表於 2023-10-21 18:30
如果完全重新起一條洪水橋機場鐵路，當然係無必要兜欣澳。但因為 欣澳-洪水橋 呢一段鐵係本身就計劃佐起 ...

幾乎只係一個零頭係點計出黎，是否有詳細breakdown可供參考及討論？
我唔信你交個proposal上正苦／垃圾會只係開空頭支票

---

作者: Kelvin15190    時間: 2023-10-21 23:18

eternalflame 發表於 2023-10-21 22:37
1. 如果要實現你嘅建議，是否代表東大嶼鐵路及前海鐵路均需要使用LAR機電及列車規格？
2. 根據正苦俾出嘅 ...

講得好，深圳本身已經有11號線係可以直達寶安機場，洗搭呢條連接深圳同香港嘅機場快綫。

---

作者: garyz    時間: 2023-10-21 23:42

eternalflame 發表於 2023-10-21 22:43
其實你知唔知未清關旅客係香港法例下係一定要用bonded vehicle直接送入airside？
如果你個建議成立，即係 ...

想澄清下，建議方案並唔涉及直入 airside。內地旅客在前海或深圳灣完成一地兩檢通關後上新機鐵，到達香港機場後，如果要搭飛機，照樣通過安檢過關。

簡單來講，只係在現時機鐵 platform 多佐一種目的地，除佐有車可以去青衣九龍香港，都另外有車去洪水橋深圳灣前海

---

作者: SV3077    時間: 2023-10-21 23:48

garyz 發表於 2023-10-21 09:18
hkitalk 唔少朋友都係鐵路和規劃方面專家，所以詳細少少介紹下個構思，大家聽完再闹都唔遲...=）

新機場快 ...

條港島西 - 前海鐵路淨係去到HKU就算? 點解唔延長至金鐘同東鐵直通? 難道想加劇港島線HKU至金鐘站的負荷?

---

作者: garyz    時間: 2023-10-21 23:49

eternalflame 發表於 2023-10-21 22:45
幾乎只係一個零頭係點計出黎，是否有詳細breakdown可供參考及討論？
我唔信你交個proposal上正苦／垃圾會 ...

建議一條走線有幾個唔同層次同階段，從 conceptual planning 到 feasibility 到 detailed design，我哋唔係鐵路公司更不是 consultant ，現階段當然只能做下原則性估計。但過往都算在鐵路工程方面有一定實際經驗，提出方案前亦都同鐵路工程行業師兄師弟們有過交流，都有信心可以講咁樣做connection造價遠低于一條全新線路

---

作者: garyz    時間: 2023-10-21 23:53

SV3077 發表於 2023-10-21 23:48
條港島西 - 前海鐵路淨係去到HKU就算? 點解唔延長至金鐘同東鐵直通? 難道想加劇港島線HKU至金鐘站的負荷?
...

so far 見到政府計劃都係話去到 HKU 或 KET，所以呢部分無特別著墨，當然值得探討是否有可行性進一步延伸到港島 CBD

另外 Priority Rail Link 直通東鐵暫時唔係太睇到有幾多好處，但通機場確實可以對機場吸客帶來立竿見影好處

---

作者: eternalflame    時間: 2023-10-21 23:58

garyz 發表於 2023-10-21 23:42
想澄清下，建議方案並唔涉及直入 airside。內地旅客在前海或深圳灣完成一地兩檢通關後上新機鐵，到達香港 ...

咁我係前海點解唔直接坐11號線去深圳機場？如果前海無一地兩檢，我係前海坐一個站去深圳灣過左關先可以再上車
你真係咁肯定咁樣夠誘因去令你個base case成立？

---

作者: eternalflame    時間: 2023-10-22 00:04

garyz 發表於 2023-10-21 23:49
建議一條走線有幾個唔同層次同階段，從 conceptual planning 到 feasibility 到 detailed design，我哋唔 ...

其實你個建議係連conceptual都未算，只係同民建聯畫地圖式建議無分別。
係鐵路工程方面有實際經驗，係交通規劃、土木工程定係電機工程方面？
你提到曾經問過業內人士，除左認為少錢過起一條全新鐵路，有無認真考慮過對原來東大嶼及前海鐵路線的容量、班次等有咩影響？

---

作者: garyz    時間: 2023-10-22 00:08

eternalflame 發表於 2023-10-21 22:37
1. 如果要實現你嘅建議，是否代表東大嶼鐵路及前海鐵路均需要使用LAR機電及列車規格？
2. 根據正苦俾出嘅 ...

1 閣下講得無錯，如要配合支線直通機場，洪前 & Priority link 基建上需要按照 1500V 直流供電設計
2 欣澳附近 constructability 在鐵路工程中已經算係足够空間，要做 bifurcation 然後靠渡線駁機鐵，有幾種不同位置方案，當然需要更詳細可行性分析，但原則性睇唔到太大施工上不可逾越的限制
3 A&T 我理解在機場-青馬大橋段，信號系統設計上係可以行到 32tph，但青馬橋限住終極都只有 24tph，因此欣澳至機場之間，在不影響 A&T 運作前提下， 有8tph餘力可以俾建議之新線使用，已經好够用
4 香港機場對深圳乃至莞惠客，一向非常具吸引力，深機雖然銳意發展國際線，但始終航權同價格，同港機比仍然相差甚遠。前海，深圳灣都係深圳總部同商務最集中片區，附近亦都係高端住宅區，呢啲客確實係港機客源。
5 禁區問題在其他 post 有分享過，不累述

另外手機用輸入法確實有時出現個別字繁簡不分，謝謝提醒，日後會更留意

---

作者: garyz    時間: 2023-10-22 00:16

eternalflame 發表於 2023-10-22 00:04
其實你個建議係連conceptual都未算，只係同民建聯畫地圖式建議無分別。
係鐵路工程方面有實際經驗，係交通 ...

MHKIE&MICE. CMILT，加上過往都做過車務/站務經理，所以主要對土木工程同車務比較熟。

當然鐵路行業博大精深，所以經常都會在呢度學到唔少我工作上都未必經常接觸既野。閣下發言一直都有深度，過往已經有較深印象。

---

作者: garyz    時間: 2023-10-22 00:24

eternalflame 發表於 2023-10-21 23:58
咁我係前海點解唔直接坐11號線去深圳機場？如果前海無一地兩檢，我係前海坐一個站去深圳灣過左關先可以再 ...

以我所知，目前港深兩地關於洪前鐵路專責組，一直都將前海實施一地兩檢作為一個主要考慮選項。建議呢條走線，都以呢個為配套前提。確實如您所講，如果前海無得做一地兩檢，咁成件事會大打折扣。

關於深機同港機對客源既吸引同比較，另 post 已分享。但概括講就係，香港機場同空運已經係屬於香港所剩為數不多在區內有明顯難以取代競爭優勢，所以我地出發點都只係希望盡可能加強同鞏固呢種優勢。如果令深圳核心商圈客，可以大約半個鐘直達港機，好似由中環去機場咁便捷，相信對我地機場大有好處。

---

作者: qunow    時間: 2023-10-22 00:26

garyz 發表於 2023-10-21 11:11
反而覺得機場駁機場只係錦上添花，對香港機場最眼前實際意義，是能够方便吸引到前海/深圳灣兩大核心商務 ...

深圳旅客要飛國際，好多時都已經係經欣澳飛
至於呢個建議，個人認為叫機鐵喺欣澳加站會實際過跨線去同跨劃中的城際鐵路搞直通，造成班次樽頸+擴大延誤影響+使運行系統複雜化+人工島方向都有得用

---

作者: 巴士的膠    時間: 2023-10-22 00:27

garyz 發表於 2023-10-21 18:22
我本身就係交通迷，純以個人身份混跡不同平臺學習交流

問幾個問題：

1 洪水橋-前海係前海直接接通國國鐵制式嘅穗莞深城際定獨立運作？洪水橋係直通交椅洲線定又獨立運作？咁以巧博大嘅車長闊高係國鐵規格定地鐵規格？國內有冇交直兩用嘅車？無嘅買外國貨會唔會有國安風險？定搵個柴油車頭拖？

2 交椅州線喺欣澳因為要跨海，唔係高架就係海底，條聯絡線要幾長去克服個高差？咁長嘅線
可以點兜？

3 當佛莞都因為股權問題曬咗幾年太陽，條線牽涉咁多持份者，分帳要傾幾耐？傾唔掂有冇Plan B？

---

作者: eternalflame    時間: 2023-10-22 00:27

garyz 發表於 2023-10-22 00:08
1 閣下講得無錯，如要配合支線直通機場，洪前 & Priority link 基建上需要按照 1500V 直流供電設計
2 欣 ...

1. 想問下現時東大嶼鐵路及前海鐵路機電規格上是否已經採用直流電設計？如果制式不能兼容的話，是否代表你的建議不成立？
2. 欣澳填海仍然做緊研究，而根據正苦初步規劃，欣澳係東大嶼線車廠所在。你嘅原則性規劃是否使用出入車廠路線？呢個設計是否會影響到欣澳填海土地規劃及其他工程（如P1公路）？
3. 你個估計係基於現時訊號系統最高可編排班次「塞得就塞」，但有否估算日後東涌、小蠔灣車廠、機場城市、香港口岸上蓋發展、欣澳填海等帶黎嘅客量？呢8tph會否係你實現計劃之前，已經要用黎設置東涌－欣澳短棍俾乘客盡早轉乘東大嶼線？
4. 國鐵將來有更多高鐵線接入深圳機場，加上珠三角城際急促發展，由莞惠一帶黎嘅乘客將來可以非常順路地去到深圳機場。前海究竟有幾多公司同商務客進駐都係一個問題，你嘅客量估計係wishful thinking定係有確切數字（包括香港及中國官方估算），令你個conceptual plan不致於淪為大白象？

---

作者: eternalflame    時間: 2023-10-22 00:34

garyz 發表於 2023-10-22 00:16
MHKIE&MICE. CMILT，加上過往都做過車務/站務經理，所以主要對土木工程同車務比較熟。

當然鐵路行業博大 ...

係土木工程及車務安排上有經驗當然係好事
但鐵路線最重要就係乘客，無客嘅話性價比同經濟回報率會好低好低
而且你係原有路線上增加跨線列車，唔多唔少會對另一條鐵路嘅可行性及回報率有影響

---

作者: eternalflame    時間: 2023-10-22 00:40

garyz 發表於 2023-10-22 00:24
以我所知，目前港深兩地關於洪前鐵路專責組，一直都將前海實施一地兩檢作為一個主要考慮選項。建議呢條走 ...

係初代WEL已經有晒圖紙前海站個設計係點，但中國發展一日千里，無人能擔保佢地個思路係點
香港方面入境處又是否同意增設多個一地兩檢口岸呢？

疫情後香港嘅航班數量仍未回復到2019年水平，再者國際大環境上見到香港嘅國際地位已不可同一而語
鐵路講緊係要起十年八載嘅工程，你對於香港機場未來10年嘅客流量同國際乘客水平，又是否仍然樂觀呢？

---

作者: 巴士的膠    時間: 2023-10-22 00:44

garyz 發表於 2023-10-21 23:53
so far 見到政府計劃都係話去到 HKU 或 KET，所以呢部分無特別著墨，當然值得探討是否有可行性進一步延伸 ...

馬鐵、西鐵直通做屯馬線，去哂全個港鐵網絡最多只係要轉兩次，現在建議嘅版本去中環要轉一次，旺角兩次，觀塘轉夠三次。

---

作者: 巴士的膠    時間: 2023-10-22 00:56

eternalflame 發表於 2023-10-22 00:40
係初代WEL已經有晒圖紙前海站個設計係點，但中國發展一日千里，無人能擔保佢地個思路係點
香港方面入境處 ...

或者要諗下到時係咪香港人去深圳機場搭飛機😂。香港個優勢除咗無國內空管，仲有幾多剩？

唔計珠江東岸，駛咗幾百億起港珠澳，由拱北/珠海站出發，去到香港機場過關連轉車都要近兩個鐘，香港機場即使如佢所講出咗接機大堂坐半個鐘就到前海，但係深11呢個時間差唔多去到福田，到時係咪又跨埋屯馬、北環線、北環線支線去搵客？

---

作者: 巴士的膠    時間: 2023-10-22 01:08

garyz 發表於 2023-10-22 00:24
以我所知，目前港深兩地關於洪前鐵路專責組，一直都將前海實施一地兩檢作為一個主要考慮選項。建議呢條走 ...

機場坐A43/P轉火車/黃巴，去到關口都未駛一個鐘，亦真係有過境客用，你條鐵唔計去福田/羅湖用唔著，比起機場去深圳灣快到幾多？鐵路經欣澳、洪水橋比巴士經屯赤（將來仲有繞道直上深圳灣公路）長，除非鐵路車速快好多，否則時間上差幾多？

假設你兩條線俾到市域/城際嘅160-200km/h，咁短距離其實都跑唔起，中間飛站超車嘅話，又變成類似以前東鐵直通車一樣，搞到本地線甩班。

---

作者: eternalflame    時間: 2023-10-22 01:15

巴士的膠 發表於 2023-10-22 00:56
或者要諗下到時係咪香港人去深圳機場搭飛機😂。香港個優勢除咗無國內空管，仲有幾多剩？

唔計珠江東岸， ...

深中通道下年通車，珠江西岸就有路直接去到深圳機場
真係除左個少少國際線優勢，時間上絕對係深圳機場win
要佢地一地兩檢完黎到香港機場再出境？會唔會太天真？

香港關過得快係因為行永久居民條隊
訪港旅客行人肉通道其實唔快囉

---

作者: eternalflame    時間: 2023-10-22 01:22

巴士的膠 發表於 2023-10-22 01:08
機場坐A43/P轉火車/黃巴，去到關口都未駛一個鐘，亦真係有過境客用，你條鐵唔計去福田/羅湖用唔著，比起 ...

屯門繞道講緊2033年通車，隨時俾佢條鐵路早幾年就有得用
既然都係要一地兩檢入香港境，開跑狗深圳灣直去機場T1已經搞掂

---

作者: garyz    時間: 2023-10-22 01:41

巴士的膠 發表於 2023-10-22 00:27
問幾個問題：

1 洪水橋-前海係前海直接接通國國鐵制式嘅穗莞深城際定獨立運作？洪水橋係直通交椅洲線定 ...

1 目前機鐵 2.0 走線主要跟洪前鐵路方向，去到前海就終點站。但不排除如果將來有需要覺得一定要直通深機，咁可能就要用到交直兩用客車（前海至港機直流，前海至深機交流），中車長客已經有相關技術，相信到真係有兩機直通果日，相關技術會更為成熟。但兩個機場駁通始終本身機場運作層面就有太多論證要首先完全，不太是今次呢個新機鐵既考慮範疇。

2 以大約2.5%坡度計，假設行隧道方案，欣澳水深大約 8 米，條隧道深度應該大約在海平面下深約 15～18 米左右，需要約幾百米長度將隧道由最深處升至地面，以欣澳空間環境來講，不會是太困難。事實上交椅洲線車廠本身都計劃設立在欣澳，其實都預佐列車要在欣澳去翻地面 level

---

作者: garyz    時間: 2023-10-22 01:47

巴士的膠 發表於 2023-10-22 01:08
機場坐A43/P轉火車/黃巴，去到關口都未駛一個鐘，亦真係有過境客用，你條鐵唔計去福田/羅湖用唔著，比起 ...

路面快，不代表機鐵就無價值，中環飛車入機場都唔會慢得過機鐵太多，難道AEL唔應該存在？

當然，呢個方案最大前提在於，就係用翻未來本身會起既基建機遇，降低成本，就可能相對抵玩。如果幾百億起多條全新路線，又唔係快過路面太多，我都唔認同值得咁做

---

作者: eternalflame    時間: 2023-10-22 02:52

garyz 發表於 2023-10-22 01:47
路面快，不代表機鐵就無價值，中環飛車入機場都唔會慢得過機鐵太多，難道AEL唔應該存在？

當然，呢個方 ...

港島去機場，機快係時間、價格同方便程度有優勢。反而你不斷地推銷咩野「機遇」，後面完全無數據去支持。既然你聲稱自己有物流及運輸專業資格，可否使用正苦現有規劃參數，論證一下陸路運輸及鐵路兩個方案嘅回報率？

---

作者: 巴士的膠    時間: 2023-10-22 09:57

garyz 發表於 2023-10-22 01:47
路面快，不代表機鐵就無價值，中環飛車入機場都唔會慢得過機鐵太多，難道AEL唔應該存在？

當然，呢個方 ...

唔係唔應該存在，係要考慮埋對其他人乘客影響。條線假如仲有8tph運力而預計東涌加完三個新站會爆滿，就要諗下點樣最近。

1 如其他版友所講，開東涌西-欣澳。
2 開東涌西-欣澳再經交椅州去港島嘅車
3 開機場去前海嘅車

1最簡單，2應該最多人用（假設交椅州係CBD，一樣需要去機場），3效益能否超過1同2？

又假設交椅州線會同時喺小欖俾返條支線屯門，即係同時有中聯辦-前海同中聯辦-屯門嘅列車，咁即使好理想地欣澳-小欖段可以30班車過海，減咗8班機鐵後每邊最多只有11班車，班次仲疏過東涌線，新界西北居民會唔會接受，夠唔夠用？

---

作者: 巴士的膠    時間: 2023-10-22 10:07

eternalflame 發表於 2023-10-22 02:52
港島去機場，機快係時間、價格同方便程度有優勢。反而你不斷地推銷咩野「機遇」，後面完全無數據去支持。 ...

所以仲要討論埋由莞惠去香港機場會點搭。以東莞為例，廣深释諧號最密。接駁嘅東鐵同A43都密。唔計較價錢嘅，搭高鐵去西九由於線路速度快，廣深港虎門定東莞南/常平都好快，一地兩檢完對面馬路就係九龍站。

咁都可以話開多幾班高鐵同機鐵加卡成本更低。始終依家福田-香港高鐵班次唔太密又唔太平均。

---

作者: mak5052    時間: 2023-10-22 10:13

garyz 發表於 2023-10-21 23:53
so far 見到政府計劃都係話去到 HKU 或 KET，所以呢部分無特別著墨，當然值得探討是否有可行性進一步延伸 ...

或者可以重新考慮沙中線維園方案？
1：北港島線繼續交匯方案，改在維園交滙（將軍澳線延伸一站至維園，東涌線延伸兩站至維園）
2：西部外走廊到西區後，沿沙中線維園方案走向到維園（建議在蘭桂坊、金鐘、跑馬地設站）
3：中鐵線到九龍塘後，直往何文田或紅磡，過海以維園為終點站
4：將軍澳線、西部外走廊可考慮直通（或兩線在交椅洲 A 島交匯，將軍澳線服務交椅洲三島）

---

作者: helloabc    時間: 2023-10-22 11:31

巴士的膠 發表於 2023-10-22 00:44
馬鐵、西鐵直通做屯馬線，去哂全個港鐵網絡最多只係要轉兩次，現在建議嘅版本去中環要轉一次，旺角兩次， ...

題外話 要解決交椅洲綫去九龍市區要轉兩三次車嘅問題 如果唔行北港島綫換綫方案 可以諗吓西延將軍澳綫去會展之後 繼續西延至港大站同交椅洲綫同層轉乘 甚至直通成為交將快綫

咁樣觀塘綫可以去油塘站 東鐵綫可以去會展站 轉一程交將快綫就可以來往交椅洲北都洪水橋前海 有呢條替代路綫就可以紓緩屯馬綫中鐵綫同埋港島綫嘅擠塞情況 而東九龍綫同啟德跑道區系統如果駁到去油塘站嘅話都可以受惠

將綫延伸至港大唔使喺港島核心區揾地起新站 而港大站本身交椅洲綫都要起新月台 只係好似會展站咁起多一層月台就得 成本效益可以最大化

---

作者: 20160424    時間: 2023-10-22 12:28
若呢條鐵成事，咁樣睇屯門真係一個好神奇既地方黎，坐鐵去親邊度都係要兜大圈

---

作者: 20160424    時間: 2023-10-22 12:39

helloabc 發表於 2023-10-22 11:31
題外話 要解決交椅洲綫去九龍市區要轉兩三次車嘅問題 如果唔行北港島綫換綫方案 可以諗吓西延將軍澳綫去 ...

你方案即係前海無左直車去西環?咁樣政治不正確，妹仔大過主人婆，請重做!

---

作者: helloabc    時間: 2023-10-22 14:10

20160424 發表於 2023-10-22 12:39
你方案即係前海無左直車去西環?咁樣政治不正確，妹仔大過主人婆，請重做!
...

咁又冇話過港大站同會展站中間唔可以加番個西營盤站同添馬站嘅 有錢克服到工程難度就得

---

作者: Kelvin15190    時間: 2023-10-22 14:32

garyz 發表於 2023-10-22 00:24
以我所知，目前港深兩地關於洪前鐵路專責組，一直都將前海實施一地兩檢作為一個主要考慮選項。建議呢條走 ...

我都想知深圳同香港到底係合作定競爭嘅關係。係1978年，港府已經決定係赤鱲角起機場，之後84年深圳就話要係黃田附近起機場，兩個機場本來就唔太遠，相距大約40公里。到90年代香港要起機場，係邊個係嗰時呱呱嘈，話會耗盡香港財富，甚或當時有人提議啲人要搭飛機唔該返深圳搭。唔通你覺得深圳會想將自己嘅客送給香港；仲有，其實深圳宜家起緊第三條跑道，擺明要同香港三跑競爭。

---

作者: 天空之神    時間: 2023-10-22 14:41

Kelvin15190 發表於 2023-10-22 14:32
我都想知深圳同香港到底係合作定競爭嘅關係。係1978年，港府已經決定係赤鱲角起機場，之後84年深圳就話要 ...

其實三跑空域問題，就知幾大機場唔會放

---

作者: garyz    時間: 2023-10-22 15:28

helloabc 發表於 2023-10-22 11:31
題外話 要解決交椅洲綫去九龍市區要轉兩三次車嘅問題 如果唔行北港島綫換綫方案 可以諗吓西延將軍澳綫去 ...

有見地👍

---

作者: mak5052    時間: 2023-10-22 16:39

helloabc 發表於 2023-10-22 11:31
題外話 要解決交椅洲綫去九龍市區要轉兩三次車嘅問題 如果唔行北港島綫換綫方案 可以諗吓西延將軍澳綫去 ...

會展站之後, 沒有適合走線予將軍澳線繼續西延 (不是穿過政總, 就是下穿是歷史建築的香港大會堂), 只能是直通東涌線或就此為止或者可以考慮天后之後改為向山邊走往西環? (重提九十年代北港島線只到天后及沙中線維園方案)

圖一: 北港島線 + 將軍澳線西延走線
(, 下載次數: 120)

上傳

點擊文件名下載附件
圖二: 建議天后站佈局
(, 下載次數: 107)

上傳

點擊文件名下載附件

---

作者: 巴士的膠    時間: 2023-10-22 19:36

Kelvin15190 發表於 2023-10-22 14:32
我都想知深圳同香港到底係合作定競爭嘅關係。係1978年，港府已經決定係赤鱲角起機場，之後84年深圳就話要 ...

廣湛、廣汕都起得快過深湛同深汕，東莞吹咗廿年跨市地鐵，一粒泥都未掘過。呢啲問題，只可以話too simple, sometime naive.

---

作者: 天空之神    時間: 2023-10-22 20:09

mak5052 發表於 2023-10-22 16:39
會展站之後, 沒有適合走線予將軍澳線繼續西延 (不是穿過政總, 就是下穿是歷史建築的香港大會堂), 只能是 ...

如果我無記錯，將線北角站其實係寶馬山面
你估計下轉車通道就知


不過支持將線延長，同時北角以西限定停車站

---

作者: eternalflame    時間: 2023-10-22 20:29

Kelvin15190 發表於 2023-10-22 14:32
我都想知深圳同香港到底係合作定競爭嘅關係。係1978年，港府已經決定係赤鱲角起機場，之後84年深圳就話要 ...

講多少少背景：2007/08年嘅WEL規劃，定位係將深圳定位做國內線，香港定位做國際線機場。所以WEL係會一班車做晒airside同non-airside

---

作者: 巴士的膠    時間: 2023-10-22 22:37

eternalflame 發表於 2023-10-22 20:29
講多少少背景：2007/08年嘅WEL規劃，定位係將深圳定位做國內線，香港定位做國際線機場。所以WEL係會一班 ...

用返以小博大個原則，走Airside就要諗埋係咪直通埋深圳11號線再直通埋入人哋Airside。😂

---

作者: TYChow    時間: 2023-10-23 03:37

巴士的膠 發表於 2023-10-22 22:37
用返以小博大個原則，走Airside就要諗埋係咪直通埋深圳11號線再直通埋入人哋Airside。😂 ...

其實港深西部鐵路要服務三類乘客，只有當三類乘客都同時兼顧，成條鐵路先至為之有效益：

第一類乘客（特急列車）：大灣區各機場之間的「空側」連接（航空過境限制區範圍內）

我的想法是深圳機場至「大橋香港口岸」，香港口岸嘅「禁區範圍」可以免入境轉乘「金巴」去澳門、珠海嘅大橋口岸，空側列車是可以配備IATA嘅航班編號，方便行李直掛。

香港國際機場起完「三跑」之後，再上就已經係「沙龍海岸公園」，當航空流量再增加，唔通就填平海岸公園同趕走白海豚去起「四跑」？

相比之下，利用澳門國際機場作為HKIA嘅「四跑」會比較合適，所以欣澳並非合適的轉駁位置。（事實上疫情前已經有香港人因為機票價錢問題，而取道MFM起飛之航班前往東南亞）

此外，即使由大橋香港口岸出發，金巴車程已經要45分鐘，之後仲有澳門入境手續，以及要過橋先至可以去到氹仔以及「金光大道」各娛樂場，至少要兩個鐘，既然澳氹過橋交通繁忙，故此長遠而言，「空側列車」亦都應該可跨越伶仃洋（以港珠澳大澳嘅「極南線」方案），於大澳出海前往澳門國際機場（MFM）及珠海金灣機場，然後以「深港澳」同「港澳珠」兩條路線行走。

（不過，以鐵路連接HKIA同MFM，建造成本就會係天文數字喇！橫跨伶仃洋嘅部份都係要等HZMB開始飽和先至有得諗，但初期嘅深港空側列車，用一列四卡城際列車去行，每小時一班，總會有客掛！）

第二類乘客（快速）：深港之間嘅跨境非航空旅客

假設用返「兩地兩檢」，深圳與香港之間各有三個設有「CIQ」的車站，模式可以係：

深圳機場－前海灣－深圳灣（另設月台只作內地CIQ）－洪水橋－望后石（視情況需要）－大橋香港口岸

出入境安排參考以前紅磡站港穗直通車，離境手續→登車→落車→入境手續，購票時劃位，班次參考以前澳門渡輪般，每半小時一班。

（由於航空安全考慮，深圳機場站及香港口岸站，宜分開航空旅客與非航空旅客所使用之月台，並作單向人流管制）

第三類乘客（普通列車）：香港本地境內旅客（深圳灣「一地兩檢」）

跟東鐵電氣化列車一樣，無須劃位，停站時可隨意上落車，大約3至5分鐘一班

停站建議：深圳灣（港方範圍）－流浮山－廈村－洪水橋－（屯門西北）－望后石－大橋口岸（最遠可至大澳）

如果我用日本常見的「特急」、「快速」、「普通」列車等級來描述，大家會唔會容易理解啲呢！

如果當成條路線嘅終極首要目標係「深港澳」以及「港澳珠」，而且具有IATA航班編號方便行李直掛嘅「空側列車」要去營運嘅時候，加上屯門內河碼頭重建後，望后石附近所帶動的新增通勤需求，港深西部鐵路要兜欣澳嘅話，概念上必然是錯誤！「欣澳聯絡線」根本就係多餘！

---

作者: TYChow    時間: 2023-10-23 11:33

mak5052 發表於 2023-10-22 16:39
會展站之後, 沒有適合走線予將軍澳線繼續西延 (不是穿過政總, 就是下穿是歷史建築的香港大會堂), 只能是 ...

真係多得你諗到將軍澳綫拉去維園草坪同網球場地底，再接駁天后站同東涌綫，睇下幾時會傳到去樂景街同CGO入面嘅TLB先啦！

不過，未來嘅將軍澳線又點樣喺天后站同聖保祿附近去兩次穿過港島綫路軌？

如果天后站做到東涌綫、將軍澳綫同港島綫交匯嘅話，而且將軍澳綫同東涌綫都可以繼續再延長，咁北港島綫交匯方案就會少好多人反對喇！

---

作者: Kelvin15190    時間: 2023-10-23 12:23

TYChow 發表於 2023-10-23 03:37
其實港深西部鐵路要服務三類乘客，只有當三類乘客都同時兼顧，成條鐵路先至為之有效益：

第一類乘客（特 ...

第一個可以考慮，宜家由深圳去澳門同珠海如能經香港口岸到達係會好方便，可以用大型旅遊巴配合。
第二個有保留，首先呢個走綫並非接駁香港市中心，吸引力成疑，然後近期高鐵要引入站票增加載客能力，其角色同高鐵有衝突。如是這樣，倒不如叫深圳引入廣州地鐵18同22號綫所使用嘅列車，讓深圳重要路綫可以高速（時速160公里以上）直通香港西九龍站，咁樣效益會更高。

---

作者: Kelvin15190    時間: 2023-10-23 12:30

TYChow 發表於 2023-10-23 03:37
其實港深西部鐵路要服務三類乘客，只有當三類乘客都同時兼顧，成條鐵路先至為之有效益：

第一類乘客（特 ...

至於第3個我都要保留，畢竟落馬洲口岸嘅清關能力未用盡，同埋宜家嘅赤鱲角屯門隧道都已經好夠用，大嶼山嘅過境需求我反而傾向利用高鐵解決，他們可以不用轉車直達九龍站。

---

作者: eternalflame    時間: 2023-10-23 20:37

TYChow 發表於 2023-10-23 03:37
其實港深西部鐵路要服務三類乘客，只有當三類乘客都同時兼顧，成條鐵路先至為之有效益：

第一類乘客（特 ...

三跑起好仲有咁多國際客先算啦
起到天花龍鳳都好無客用就係大白象

---

作者: eternalflame    時間: 2023-10-23 20:40

Kelvin15190 發表於 2023-10-23 12:23
第一個可以考慮，宜家由深圳去澳門同珠海如能經香港口岸到達係會好方便，可以用大型旅遊巴配合。
第二個 ...

深圳去珠西下年行深中通道就得
兜一兜香港有咩吸引力？

---

作者: Kelvin15190    時間: 2023-10-23 23:13

eternalflame 發表於 2023-10-23 20:40
深圳去珠西下年行深中通道就得
兜一兜香港有咩吸引力？

謝提醒有深中通，如果有深中通，甘呢條鐵路除非能駁通深港澳機場（i.e. impractical)，否則完全沒有興建的價值。

---

作者: 33606    時間: 2023-10-24 10:39
深圳機場機票較平，如果洪水橋有深機快線直達更理想。

---

作者: 巴士的膠    時間: 2023-10-24 10:44

eternalflame 發表於 2023-10-23 20:40
深圳去珠西下年行深中通道就得
兜一兜香港有咩吸引力？

遠期仲劃咗條深珠城際，可見將來，都可以話無需要諗港澳鐵路。

如果起第二條機鐵，反而屯馬過海去機場、東涌可能仲多大西北人受惠（食AE33/34/36/37系），一樣可以開前海-機場，同時現有硬件仲容許開天水圍短棍，唔影響大欖同馬鞍山。假設開4班機場-前海/小時，咁只要屯馬開4班天水圍-烏溪沙、交椅州線開4班洪水橋-中聯辦就可以補返新界-市區最大化運力。

如果講駁埋港澳Airside，開船會係最簡單。當然實際安保係咪容許就⋯⋯

---

作者: 巴士的膠    時間: 2023-10-24 14:42

33606 發表於 2023-10-24 10:39
深圳機場機票較平，如果洪水橋有深機快線直達更理想。

唔計香港會唔會再被䚉劃更多城際/高鐵，西九龍站坐高鐵經深圳北站、深湛聯絡線去深圳機場東站都係半個鐘多少少，所以如果要計起鐵路嘅效益，應該要諗下可以快到幾多。

假設交椅洲線真係可以直入前海先過關，前海一出就有深圳11號線去機場。咁即使港島同屯馬沿線都只係要轉兩次就到深圳機場，叫做港九新界都唔係好隔涉。

依家情況係好多人來往深港，噚晚無論巴士定鐵都爆滿，咁先加大呢個容量似乎比較迫切。假如MTR真係想福田-香港西九地鐵化，係咪加多少少班次（甚至現有班次加站）。當深圳個個口岸都有地鐵，香港得一條鐵幾條巴士就明顯唔夠用。

---

作者: hoaaa    時間: 2023-10-25 18:04
呢條線目的，會不會在於施政報告前畀各位ff一下。 但現在新的新界東北線，是不是最終極的走線，唔太明確。 會唔會再向西南經 林村去荃灣，東涌做第2條機場接駁線？ ff 中。。

---

作者: eternalflame    時間: 2023-10-25 19:35

hoaaa 發表於 2023-10-25 18:04
呢條線目的，會不會在於施政報告前畀各位ff一下。 但現在新的新界東北線，是不是最終極的走線，唔太明確。  ...

NENTL係由《香港2030+》新界北新市鎮規劃入面嘅NSRail變出黎

---

作者: 巴士的膠    時間: 2023-10-26 16:44

hoaaa 發表於 2023-10-25 18:04
呢條線目的，會不會在於施政報告前畀各位ff一下。 但現在新的新界東北線，是不是最終極的走線，唔太明確。  ...

真係FF我寧願佢真係起條環線出嚟，北環線向東經新界北新市鎮、皇后山、大埔中心、白石角、大水坑、科大、137區、油塘、觀塘碼頭、九龍灣西、啟德、九龍塘、中鐵線駁返北環線。

咁起碼所有新界東去九龍港島東嘅客都多一個唔經鑽石山-九龍灣段觀塘線嘅選擇。而且騰出更多空間俾東九龍綫同啟德綫接駁。

反正都倒一千幾百億落海，鐵路個效益比增加平行公路大。

---

作者: Waiyin12    時間: 2023-10-27 06:51

eternalflame 發表於 2023-10-22 01:22
屯門繞道講緊2033年通車，隨時俾佢條鐵路早幾年就有得用
既然都係要一地兩檢入香港境，開跑狗深圳灣直去 ...

疫情期間聽朋友講過，可以香港機場落機、拎行李後直上專車、經港珠澳大橋返澳門，直接入境澳門

如果以而家情況，可以開 shuttle bus 連接香港機場（air side）同深圳灣口岸，車上旅客當作已離境/未入境（法律上同金巴行駛途中一樣），直至到達深圳灣入境

回程就深圳灣出境後行特別通道，繞過香港入境櫃位，上旅遊巴直到香港機場 air side

如果計劃係做 SZX HKG change of airport transfer，亦可以用旅遊巴連接兩個機場 air side，旅客唔當入境中國/香港

呢類需求其實一條旅遊巴車隊、每部車一位相關紀律部隊隨車，比幾個月兩地政府部門協調已經搞掂，何必用幾千億、等十年八載起條鐵路?

我唔反對鐵路連接深圳灣，但唔需要扯埋香港、深圳兩個機場，再加 land side/air side 落去

---

作者: eternalflame    時間: 2023-10-27 14:31

Waiyin12 發表於 2023-10-27 06:51
疫情期間聽朋友講過，可以香港機場落機、拎行李後直上專車、經港珠澳大橋返澳門，直接入境澳門

如果以而 ...

商場管理局一路都有搞bonded vehicle，唔係點解要係海天個度起多幢巴士站同條橋駁過去HKBCF？
前面都有提過airside transfer因為旅客未清關，所以法律上係唔准bonded vehicle經過non-airside，先有個條行車天橋出現

係之前環評報告有講過，除左違反現行法律之外，保安局仲因為保安問題反對bonded vehicle行普通道路
所以你個提議現時係做唔到

---

作者: DIH    時間: 2023-10-27 17:55

eternalflame 發表於 2023-10-27 14:31
商場管理局一路都有搞bonded vehicle，唔係點解要係海天個度起多幢巴士站同條橋駁過去HKBCF？
前面都有提 ...

同埋我覺得起條鐵路連接港深機場，需求係好脆弱，香港第時開晒三條跑道，有大把容量畀人同場轉機，又何需再搭地面交通去深圳機場？如果最終目的地係無國際線內陸機場，亦可以經北上廣深等大port由國際轉國內，價格相信比經香港更平，亦更方便，國內大機場對入境問題／航班延誤的支援相信亦比港深陸路口岸為佳。反之亦然，內陸要出國都係經國內大port在同一套文化內完成較有吸引力。畀着我，先不論過關問題，任何行程若牽涉inter-airport transfer都係可免則免。

任何連接港／深機場的基建，最理想的客路係連接其中一邊機場至對家市內，即香港市內—深圳機場（供香港人乘搭較平或較多的內陸航班），或深圳市內—香港機場（供內地客乘搭香港較多的國際航班），所以我覺得港深機場之間不應直接由一條鐵路連接，只需在連接市中心的城際鐵路基礎上做好接駁，方便有需要人士去到機場就夠。

---

作者: 巴士的膠    時間: 2023-11-1 11:08

DIH 發表於 2023-10-27 17:55
同埋我覺得起條鐵路連接港深機場，需求係好脆弱，香港第時開晒三條跑道，有大把容量畀人同場轉機，又何需 ...

睇返呢度： https://www.ditiee.com/forum.php?mod=viewthread&tid=14038&mobile=2

如果唔計接駁兩邊Airside，由福田去香港機場，搭深11去前海轉東大嶼線，再喺欣澳轉東涌線，再駁機場-東涌東。

中環-深圳機場就港島綫轉東大嶼綫轉深11，兩者個時間差都係一個鐘多少少，都相當合理。

反而香港因為東西向鐵路同道路都唔發達，由馬鞍山/將軍澳去機場可能仲慢過深圳。

---

作者: lrv1092    時間: 2023-11-3 04:10
依家班議員質素真係笑死人，為左快就要起條鐵路，快得幾多呀？
一日入面有幾多人要去第二個機場飛？加埋夠唔夠坐滿十班車？
深圳既人要落黎香港飛，咁香港有幾多人要去深圳飛？
只係做單向班次呀？想蝕死營辦商咩
仲要講到人地機場係香港自己管咁，高鐵班次都要大陸預批啦，話開就開咩？
對深圳對香港有咩好處呀？
條走線仲要經欣澳，兜到咁會快得去邊？

---

作者: helloabc    時間: 2023-11-7 12:22

TYChow 發表於 2023-10-23 11:33
真係多得你諗到將軍澳綫拉去維園草坪同網球場地底，再接駁天后站同東涌綫，睇下幾時會傳到去樂景街同CGO ...

類似嘅港島三條平行綫方案 十幾年前都有師兄諗到 並提交有關當局考慮 未知有否記錄在案 以供研究交椅洲綫港島東延方案時作參考

https://www.legco.gov.hk/yr12-13/chinese/panels/tp/tp_rdp/papers/tp_rdp0503cb1-931-1-c.pdf

「8.8 復用《鐵路發展策略2000 》沙田至中環線的「維園方案」走線 ：把將軍澳線由北角站延伸，經禮頓山、灣仔南、香港公園，到達中環南站(或可改為在灣仔南站後前往金鐘站)，以便提供多一條平行路線，紓緩港島線銅鑼灣 段的負擔。

此方案可作為北港島線的替代方案，尤其如果「換線」方案和「東涌線-將軍澳線合併」方案在技術上難以實行時，本人認為此替代方案可取代效益較低的「交匯」方案。

此方案亦可與北港島線各自實施：東涌線由香港站延長至炮台山站，而將軍澳線則由北角站沿上述走線延長至金鐘站或中環南站，形成港島北岸有三條平行路線的格局，進一步分流港島線銅鑼灣段的交通量。北港島線和上述延線可以分期實行，分別作為近期項目和長遠項目。」

---

作者: eternalflame    時間: 2023-11-7 17:25

helloabc 發表於 2023-11-7 12:22
類似嘅港島三條平行綫方案 十幾年前都有師兄諗到 並提交有關當局考慮 未知有否記錄在案 以供研究交椅洲綫 ...

東大嶼線都幾乎肯定係摩星嶺上岸，條路廊一定係港島線以南
所以抄返SCL維園舊方案條走線，甚至係SCL-OWC唔可以話無機會
但東大嶼線過左HKU之後要插到幾入都似乎仲有角力

上一個版本只係兼顧屯門南部、掃管笏同交椅洲
呢一個版本放棄屯門，但要食深圳、洪水橋、廈村、部份天水圍，亦要考慮是否同大灣區城際貫通
規劃參數不同、是否需要同城際share track、條城際要插到幾入，都會左右成條線嘅規劃同成本
但有一點肯定嘅，就係港島線一定食唔晒東大嶼線同南港島線西段嘅轉乘客流

調返轉將線用SCL維園舊方案，個阻力位應該係造價問題
若果東大嶼線係用交流電/國鐵規格，就更加唔可能同將線直通
最後都係要搵個位俾佢地兩個做轉乘
無論係近海邊定係山入面，都唔見得吸引

---

作者: TYChow    時間: 2023-11-7 20:29

eternalflame 發表於 2023-11-7 17:25
東大嶼線都幾乎肯定係摩星嶺上岸，條路廊一定係港島線以南
所以抄返SCL維園舊方案條走線，甚至係SCL-OWC ...

其實成條線最迫切嘅其實係交椅洲至港島西嘅一段，交椅洲填海之後又唔會即刻有幾十萬人搬入去住，如果車廠喺欣澳（打水灣），咁最迫切要喺2033至2036年之間起好（欣澳）交椅洲去到港島西嗰段（用25kV交流電兼容東鐵綫），之後再慢慢駁去屯門同中環。

之前我自己都有諗過，屯門至港島鐵路喺港島區點樣行呢？長遠嚟講又唔能夠只係依賴堅尼地城或者HKU接駁港島綫，又要考慮南港島綫西段嘅接駁，又要考慮將軍澳綫向西面延長，仲要考慮港島區各轉車站可以容納嘅轉車流量……

所以我覺得最理想應該係用東鐵綫「金鐘火車站」向西面繼續延長，穿過西半山，利用「洪水橋至港島鐵路線」再「潛水」去交椅洲、欣澳、掃管笏再去洪水橋，以25kV交流電及可兼容現有東鐵九卡「R-Train」火車行走，以至內地直通車及貨卡亦可使用。（事關東鐵嘅「金鐘火車站」L5層嘅7、8號月台有較多空間接收轉車乘客）

不過，現時屯門街坊對「洪水橋至港島鐵路線」不進入屯門市中心感到非常不滿，而且屯門至港島鐵路點樣行到入中環都係難題呀！

再加上屯門往邊境及上水嘅客量又正在增加，所以我嘅幻想終極目標，就係設法喺洪水橋繼續延伸到元朗南（十八鄉）、錦上路站再搵條路去返羅湖而形成另一條「環迴鐵路」，但中間仍有一些難以用「三言兩語」去解說的「技術問題」，將來再詳述。

---

作者: he_01    時間: 2023-11-7 20:54

TYChow 發表於 2023-11-7 20:29
其實成條線最迫切嘅其實係交椅洲至港島西嘅一段，交椅洲填海之後又唔會即刻有幾十萬人搬入去住，如果車廠 ...

本身去內河碼頭條西部海岸鐵路都唔經屯門市中心

---

作者: eternalflame    時間: 2023-11-7 21:32

TYChow 發表於 2023-11-7 20:29
其實成條線最迫切嘅其實係交椅洲至港島西嘅一段，交椅洲填海之後又唔會即刻有幾十萬人搬入去住，如果車廠 ...

你講緊就係SCL-OWC，但宜家過海個段應該無咩可能再行直通車
貨運列車唔需要再考慮，因為另外一邊接駁嘅係城際
洪水橋理論上都係2033年要起好部份，所有野最終都會炒埋一碟
一起就起晒洪水橋至HKU
同埋因為有北環線，新界再有一條環迴鐵路係好難

唔經屯門問題之前正苦話會研究係屯門東拆支線
做返之前西部海岸鐵路個一部份
但無人知呢條支線包唔包係RMR2030+份最終報告入面

---

作者: TYChow    時間: 2023-11-7 21:38

he_01 發表於 2023-11-7 20:54
本身去內河碼頭條西部海岸鐵路都唔經屯門市中心

其實應該係話：

屯門居民不滿「洪水橋至港島鐵路」在屯門新市鎮以東掠過，没有進入屯門新市鎮及橫越屯門河、青山灣，鐵路公司前任主席「田二少」要「誓死反對」！

如果要搞，其實可以考慮喺豐景園、「十六區」以及屯門西北面加站，之後先至向北面鏟上洪水橋！

---

作者: TYChow    時間: 2023-11-7 23:21

eternalflame 發表於 2023-11-7 21:32
你講緊就係SCL-OWC，但宜家過海個段應該無咩可能再行直通車
貨運列車唔需要再考慮，因為另外一邊接駁嘅係 ...

其實最大嘅問題係運輸及物流局是否理解「鐵粉」們要求鐵路加線、加站嘅原因，「北環線+中鐵線+東部鐵路」如是，「SCL+OWC」也如是，但當中亦涉及發展局、房屋局、甚至創科局嘅跨局協作，所以我會覺得呢啲問題可能係要上到「FS」先到搞得通。

喺中國內地嘅角度，鐵路亦要服務解放軍，所以鐵路唔會只係載客，或多或少都會有貨運用途，就算係今時今日嘅東鐵電氣化火車，一樣會存在乘客㩦帶嘅「貨物」。

之前疫情封關令粤港貨運不暢，結果令到內地鐵路部門同港鐵需要利用平湖及羅湖編組場暫時重啟鐵路貨運服務運貨櫃，所以東鐵無可能完全無考慮跨境客貨運嘅問題，只係貨場、客站同出入境設施嘅設置問題，以內地嘅體制，要做嘅話就一定會做到！而實際上只要羅湖橋無拆，都一樣會存在鐵路貨運。


洪水橋可能喺2033年會起到，但係到時都可能會先用「青龍大橋」解決，過多N年之後先至有屯門至港島區鐵路。

至於龍鼓灘填海也不知何年何月（可能到時就係長洲南面填海起貨櫃碼頭），但係就算將所有嘢炒埋一碟，但其實亦都唔係無辦法解決，不過又唔好重複以前嘅錯誤！例如以前「公共專業聯盟」所講嘅高鐵錦上路方案接駁線，以及近期嗰位做過地鐵站站長嘅民選工程師議員所提出嘅「欣澳聯絡線」，都係明顯不可行嘅「設計錯誤」！

不過我又要講多一句，《施政報告》同「北都綱領」所提出嘅「新田科技城」同「沙嶺數據城」，遲早實會有人（尤其有科技背景嘅建制派人士）要求同白石角科學園甚至中環商業區連埋一齊！

咁如果又有「SCL-OWC」，之後又有洪水橋、唐人新村嘅物流園、再加上「科技城」、「數碼城」、馬草壟發展，咁終極嘅「環迴東鐵綫」並非不可能的事，既然已經預視到，倒不如早啲思考，早啲爭取，令到財政司同物流局明白大家嘅諗法囉！

---

作者: eternalflame    時間: 2023-11-8 02:51

TYChow 發表於 2023-11-7 21:38
其實應該係話：

屯門居民不滿「洪水橋至港島鐵路」在屯門新市鎮以東掠過，没有進入屯門新市鎮及橫越屯門 ...

正苦嘅功課係要前海去港島30分鐘到
中間再加站meet唔到落成時間
造價好有可能以倍數上升
亦要諗諗使唔使加passing loop之類俾城際爬頭

---

作者: TYChow    時間: 2023-11-8 15:53

eternalflame 發表於 2023-11-8 02:51
正苦嘅功課係要前海去港島30分鐘到
中間再加站meet唔到落成時間
造價好有可能以倍數上升

但係深圳地鐵嘅「前海灣站」同香港地鐵嘅堅尼地城站，航空直線距離都有大約50公里。
就算喺中間拉一條直線由前海灣起「地鐵」去到香港島，㗎「列車」至少都要連續30分鐘行到100km/h嘅速度，而且完全不停站先至做到30分鐘往內前海及港島嘅時空目標！

但係真正要往來前海同港島之間嘅人數究竟又有幾多？而家上環去蛇口／福永，以及深圳灣去灣仔啲「跑狗」有幾多人搭呢？

係咪大部份人都要喺「30分鐘」之內由前海出發去到港島區？而假設「兩地兩檢」，入境處又是否同意喺上環「港澳客輪碼頭」以外嘅港島區內其他地方設置「出入境管制站」？

如果大部份人都只係要求60至90分鐘左右由前海去到港島區，咁其實用深圳灣「跑狗」巴士（改行11號幹線、青龍大橋及交椅洲），其實都可以做到，

而七人私家車就可以快15-20分鐘左右，如果沿途交通及通關暢順，其實45至60分鐘都可以由前海去到港島區，而且仲要可以做到「門對門」，減省喺港島區內轉車所需等候嘅時間。

如果真係持續有人要喺「30分鐘」之內由前海去到港島區，咁其實就應該係由內地當局喺前海興建跨境直升機場連出入境設施，飛去上環信德中心同澳門外港碼頭，咁先至係最有效咁滿足個交通需求囉！

另外，其實「正苦」遲早都會鼓勵商界將部份金融同專業服務移師到洪水橋，咁喺「七除八扣」之後，其實仲有無咁多人，同咁大需求要由前海去到港島區呢？

---

作者: TYChow    時間: 2023-11-8 16:17

helloabc 發表於 2023-11-7 12:22
類似嘅港島三條平行綫方案 十幾年前都有師兄諗到 並提交有關當局考慮 未知有否記錄在案 以供研究交椅洲綫 ...

諮詢RDS-2014嘅時候，都未有交椅洲、北部都會區，以至「大灣區」及「躍動港島南」嘅概念。

喺没有交椅洲，而港島區常住人口又持續下跌嘅情況下，優先以原有基建去滿足過海通勤交通需求嘅「換線方案」就係優先選擇。

但係十年之後，又有港島南、交椅洲、北都及大灣區規劃嘅共同影響之下，以新建過海鐵路去接駁地鐵港島綫反而就係最佳選擇。

不過，對客流管理最理想嘅選項，應該係港島線換膠轆，再由柴灣「直通運轉」去到黃竹坑，如果解決到興華邨商場同美華樓，就由黃竹坑駁返去柴灣，又再形成多一條環迴鐵路。

---

作者: eternalflame    時間: 2023-11-8 17:38

TYChow 發表於 2023-11-8 15:53
但係深圳地鐵嘅「前海灣站」同香港地鐵嘅堅尼地城站，航空直線距離都有大約50公里。
就算喺中間拉一條直 ...

你分析得無錯架，實際上真係有幾多人有需要深港30分鐘往返先
就正如我前面回覆尊貴議員一樣，根本睇唔到有實際數據支持
你話宜家已經滿到瀉，又或者真係有projection見到會發生就話要起啫

但宜家呢個時代，政治任務同戰略意義大於實際
用對家個角度去諗，前海能夠快速去到東大愚同宇宙中心
那怕每日只得一班車都要做

---

作者: eternalflame    時間: 2023-11-8 17:51

TYChow 發表於 2023-11-8 16:17
諮詢RDS-2014嘅時候，都未有交椅洲、北部都會區，以至「大灣區」及「躍動港島南」嘅概念。

喺没有交椅洲 ...

Lantau tomorrow同RDS-2014/RDS-2U大約係同期，但由個陣開始正苦好鐘意分開做規劃
搞到個全局支離破碎，而正苦搵顧問做feasibility/preliminary studies，做完出黎之後個規劃又唔同晒

北都如果拆返開睇亦唔係新野，例如坪輋打鼓嶺最初包括係新界東北新市鎮規劃
後來先行發展粉嶺北同古洞北而剔除左，但就繼續係《香港2030+》研究深化
再變成新界北新市鎮，同一個研究亦包括左新田、河套同文錦渡一帶

2030+ 本身亦定左北創科南金融規劃方向，只係基建個度同原先2030+規劃唔同左

---

作者: helloabc    時間: 2023-11-8 18:58

eternalflame 發表於 2023-11-8 17:38
你分析得無錯架，實際上真係有幾多人有需要深港30分鐘往返先
就正如我前面回覆尊貴議員一樣，根本睇唔到 ...

廣深高鐵可以直達西九龍核心商業區 咁前海直通車剩係去到港大止步一定唔夠喉 至少要拉到去金鐘或者會展核心地帶先叫做似番啲樣

---

作者: eternalflame    時間: 2023-11-8 19:48

helloabc 發表於 2023-11-8 18:58
廣深高鐵可以直達西九龍核心商業區 咁前海直通車剩係去到港大止步一定唔夠喉 至少要拉到去金鐘或者會展核 ...

10年前WEL規劃過經東大愚去上環 or 灣仔，加埋高鐵過海

宜家個方向就似係咁：

• 前海、深圳灣一地兩檢
• 前海至港大一程車過，但預留將來可直通珠三角城際
  

---

作者: helloabc    時間: 2023-11-17 23:34

TYChow 發表於 2023-11-8 16:17
諮詢RDS-2014嘅時候，都未有交椅洲、北部都會區，以至「大灣區」及「躍動港島南」嘅概念。

喺没有交椅洲 ...

年底前公佈北港島綫同埋將軍澳137區過海綫的最新規劃
https://youtu.be/H6-PY05Zgis?t=2673
https://youtu.be/H6-PY05Zgis&t=3509

---

作者: MrLau    時間: 2023-11-19 21:03

DIH 發表於 2023-10-27 17:55
同埋我覺得起條鐵路連接港深機場，需求係好脆弱，香港第時開晒三條跑道，有大把容量畀人同場轉機，又何需 ...

相鄰機場之間連接的確有需求,如成都天府同雙流有即將開通嘅19號線二期有直達班次,上海虹橋浦東有機場聯絡線,北京首都大興遠期有20號線,羽田成田有互轉巴士。香港機場係珠江三角洲主要對外國際航空樞紐,深圳寶安同廣州白雲為副,香港有較多國際航班,深圳較多國內航班(而且更平),兩機場有互轉需求。班次無需多,但直達互轉服務最好有,應該有。

---

作者: 巴士的膠    時間: 2023-11-19 23:08

MrLau 發表於 2023-11-19 21:03
相鄰機場之間連接的確有需求,如成都天府同雙流有即將開通嘅19號線二期有直達班次,上海虹橋浦東有機場聯絡 ...

咁都唔一定要用到鐵路，可以用巴士搞掂，依家AEL出九龍站都係半個鐘，HSR由西九去深圳機場東都係半個鐘，最耐都係過關用咗45分鐘。因為東大嶼線要做本地通勤，即使起咗聯絡線都唔慌開得快，睇返之前深圳段選線果篇文，東大嶼線用地鐵規格嘅機會似乎亦比較高。

---

作者: eternalflame    時間: 2023-11-19 23:29

MrLau 發表於 2023-11-19 21:03
相鄰機場之間連接的確有需求,如成都天府同雙流有即將開通嘅19號線二期有直達班次,上海虹橋浦東有機場聯絡 ...

之前同尊貴議員都有討論過需求問題，但佢俾唔到數據支持喎
需求唔係用把口講就有，就算有都係睇餸食飯唔係整隻大白象出黎
你話日日都有6位數字人次要做機場間轉運的話就要考慮啫

---

作者: 巴士的膠    時間: 2023-11-20 10:59

eternalflame 發表於 2023-11-19 23:29
之前同尊貴議員都有討論過需求問題，但佢俾唔到數據支持喎
需求唔係用把口講就有，就算有都係睇餸食飯唔 ...

其實內地個空鐵聯運，都係做緊每個機場去市中心嘅接駁，而唔會主業做轉機客。

依家香港由亂入治，由治及興再融埋入大灣區，隨咗寶安同白雲機場，仲有個即將開工嘅高明機場，係咪咁多人會過香港搭機都係問題，畢竟由深北經深江鐵路同珠肇過去高明應該都係一個鐘。香港最大劣勢係過關呢個動作，進入一小時生活圈時代就顯得慢，但又係咪連關都想拆埋佢？

---

歡迎光臨 hkitalk.net 香港交通資訊網 (https://www.hkitalk.net/HKiTalk2/)

Powered by Discuz! X3.4