hkitalk.net 香港交通資訊網

標題: 區議員促建日出康城公營街市 [打印本頁]
作者: rheneaschoi    時間: 2025-3-14 12:45
標題: 區議員促建日出康城公營街市
將軍澳日出康城仍有期數尚未入伙或落成，屋苑現有居民連同石角路一帶住宅，估計一帶居住人口達10萬人。有西貢區議員指，一帶目前只有一間超市，無法滿足居民基本生活需求，建議在區內增建一個公營街市。食環署表示，將軍澳第67區聯用綜合大樓的工程預計最快2028年底完成，選址鄰近將軍澳港鐵站，交通便利，相信可方便經由這個交通樞紐出入的市民購買新鮮糧食。

日出康城居民常要到寶林買餸
現時日出康城商場「The LOHAS康城」，只有建華旗下的超級市場「FRESH新鮮生活」。西貢區議員方國珊與另外11名區議員提出討論事項指，日出康城和石角路一帶目前只有一間超市，無法滿足10萬名居民的基本生活需求，使他們經常要前往寶林、將軍澳市中心等地的街市買餸。為方便有關居民的日常生活，他們建議在擬建的將軍澳第86區政府聯用大樓旁邊的排水專用範圍及排污渠口保護區，興建低層的公營街市；西貢區議會食物環境衞生委員會今日開會將討論此事項。翻查資料，擬建的第86區政府聯用大樓位於日出康城晉海及領都對面，緊貼將軍澳工業邨。

食環署：正興建67區街市選址交通便利
政府目前正在將軍澳中心對面，動工興建附設街市的將軍澳第67區聯用綜合大樓。食環署回應委員會指，該綜合大樓預計最快2028年底完成工程，其選址毗連港鐵將軍澳站，並可經由多種其他公共交通工具如巴士及小巴到達，交通便利，因此67區新公眾街市投入服務後，其服務範圍將不僅是67區附近居民，同時包括經由這個交通樞紐出入將軍澳區市民，方便他們購買新鮮糧食。

渠務署回應指，排水及排污設計的保養及維修相當重要，有關土地和規劃部門有特定保護範圍保障該等設施可以在需要時進行維修工程，包括大型挖掘工作，確保渠道暢通。因此，在保護範圍內一般沒有建築物。署方又稱，現階段在未收到負責部門整體工程計劃和設計時，一般不會對假設性問題提供意見。


來源:am730

https://www.am730.com.hk/%E6%9C% ... %97%E5%B8%82/540941
作者: andy92    時間: 2025-3-14 16:42
俾唔起錢買餸唔好住康城

今日爭取街市，聽日可能又爭取體育館、圖書館、泳池、街症診所，沒完沒了
作者: SSBT    時間: 2025-3-17 22:13
選舉近了
哪叱今年選唔選呀
作者: JX9097    時間: 2025-3-18 09:16
SSBT 發表於 2025-3-17 22:13
選舉近了
哪叱今年選唔選呀

姣婆邊守到寡㗎
作者: EX-TL    時間: 2025-3-18 11:48
成日聽D人買康城原因因為好住, 地鐵站上蓋, 有大型商場...... 我真係唔明.

堆填區未關閉, 137區發展, 香港東部一定係潮濕, 座座樓四五十層高感覺重重圍困, 係就係地鐵站, 但大部份期數唔近出入口, 而且班次疏落......唔明有幾好住.

再入番正題, 搬得入去呢D英文名新屋苑, 後生佔比好高, 真正曉煮飯自然想買平餸, 但八九十後對價格又冇五六十後師奶咁敏感, 仲未講外傭買餐餸個價隨時嚇死僱主, 你市政大廈街市餸唔一定平, 用新一代標準去定價, 傳統師奶寧願搭車出去買, 定價平亦唔一定多人買, 日頭個個返晒工, 因為有好多無飯夫婦, 佢地放工求其買完就算, 如果到時原來冇想像中咁多人買, 生意少檔販少, 間街市遲早執咁款.

街市呢樣嘢有太多失敗例子, 感覺公屋區或平民區還好少少, 會專登搭車去買, 但你在私樓區起一個政府街市, 假設你鋪頭選擇多到有能力吸引晒坑寶將南調景嶺入嚟買, 你個區會變雜, 居民係咪想呢, 選擇少, 來來去去嗰兩三檔豬肉兩三檔菜兩三檔魚幾檔熟食一兩間士多, 咁係冇用, 最終命運有辦睇.

政府街市要起都唔係起喺最少人煮飯嘅私樓區, 以將軍澳鐵路便利程度, 市中心起一座市政大樓包括街市已經足夠, 冇理由側埋一邊去康城, 就好似天水圍政府街市, 選址天福路已經算係咁, 起好咗聚唔聚到人流真係聽天由命, 呢類本身冇得由墟市進化成街市大樓嘅區(例如青衣 東涌 將軍澳), 起政府街市係一個難題, 亦好難會成功.
作者: JX9097    時間: 2025-3-19 19:43
EX-TL 發表於 2025-3-18 11:48
成日聽D人買康城原因因為好住, 地鐵站上蓋, 有大型商場...... 我真係唔明.

堆填區未關閉, 137區發展, 香港 ...

由黨鐵站去LP6一出閘迫你萬人迫爆扶手梯
然後穿商場行平台
行餐飽先去到樓下𨋢口
計落隨時仲遠過我喺寶林行返景林尾


樓下商場好似好多選擇
但暗底都係太興，美心
（頂盡畀埋大家樂你「揀」）
只有劣食同更劣食
（呢個情況比將軍澳其他區更差
唯一係調景嶺可以同佢一戰）

一到回南天
食哂堆填區嘅「心曠神怡」
（呢幾年已經好咗唔少
當年仲係得首都領都嘅年代
臭到將軍澳站都好大陣酸餿味）

至於市政大廈呢
兩個可能會好啲
一個主力做將南，一個做將北
依家得一個，基本上絕大部份居民都要搭車先reach到
計番車錢時間隨時倒貼
作者: tamabaron    時間: 2025-3-20 16:07
EX-TL 發表於 2025-3-18 11:48
成日聽D人買康城原因因為好住, 地鐵站上蓋, 有大型商場...... 我真係唔明.

堆填區未關閉, 137區發展, 香港 ...

班人一聽以為地鐵站上蓋有商場就發達, 加上樓新其實又比較平, 但唔知等於無其他交通同購物選擇 (你見康城多人渣車就知其實唔方便)。其實班中慘有街市跟住又會覺得雜/污糟
其實67區都幾死位下, 基本上度度唔近 (除將中), 加上將廣/寶盈都有街市 (再加aeon / donki 等), 海皮區應該唔會特別去




作者: 巴士的膠    時間: 2025-3-20 16:48
tamabaron 發表於 2025-3-20 16:07
班人一聽以為地鐵站上蓋有商場就發達, 加上樓新其實又比較平, 但唔知等於無其他交通同購物選擇 (你見康城 ...

咁真係雙職家庭又想買餸煮飯，都仲可以去返工果區買，如觀塘、灣仔、鰂魚涌等都唔會貴過呢啲「超市」。而無論將軍澳、馬鞍山、東涌定天水圍最大敗筆就係一邨一街市，變咗規模同選擇都少，只係咁啱新都城同新港城街市都尚算可以，附近屋邨都係領展改造過先比較多選擇（但都唔係特別平）。天水圍去元朗、將軍澳去觀塘、馬鞍山去大圍/黃大仙都可以買到啲偏門食材，變咗最慘都係東涌。
作者: JX9097    時間: 2025-3-22 13:12
巴士的膠 發表於 2025-3-20 16:48
咁真係雙職家庭又想買餸煮飯，都仲可以去返工果區買，如觀塘、灣仔、鰂魚涌等都唔會貴過呢啲「超市」。而 ...

有時我都會星期六/ 日出去其他區買成個星期嘅餸算數（例如大成街/ 瑞和街/ 九龍城...）

不過話分兩頭
或者正正就係因為冇一個政府街市
所以每條邨都整一個街市去滿足自身需求
（將軍澳每條邨都唔算細
淨係山下，最細嘅景林都7棟樓，連浩明苑就8棟）
作者: 巴士的膠    時間: 2025-3-22 22:49
JX9097 發表於 2025-3-22 13:12
有時我都會星期六/ 日出去其他區買成個星期嘅餸算數（例如大成街/ 瑞和街/ 九龍城...）

不過話分兩頭

但係街市本身就係要有咁多人先有得做。講到景林，似乎個街市似小食街仲多過街市，貼住馬鞍山新港城嘅耀安，街市都係差唔多命運。反而自成一角嘅坑口、尚德都係一個中型街市。

但去到心曠神怡果度，好多單位連廚房都無，揀得呢度有幾多人煮飯？
作者: JX9097    時間: 2025-3-23 00:18
巴士的膠 發表於 2025-3-22 22:49
但係街市本身就係要有咁多人先有得做。講到景林，似乎個街市似小食街仲多過街市，貼住馬鞍山新港城嘅耀安 ...

你肯定景林食街work？
十二檔超過一半都吉咗
啲舖頭一到夜晚就落閘
真正想食宵夜嘅會去買炒麵
作者: busnrail_fans    時間: 2025-3-24 09:16
巴士的膠 發表於 2025-3-22 22:49
但係街市本身就係要有咁多人先有得做。講到景林，似乎個街市似小食街仲多過街市，貼住馬鞍山新港城嘅耀安 ...

景林街市都係拜新都城街市同埋領匯（領展）所賜，先至逐漸衰落
況且景楠同浩明行去新都城街市，仲近過去景林街市，兼且多啲選擇

作者: JX9097    時間: 2025-3-24 12:45
busnrail_fans 發表於 2025-3-24 09:16
景林街市都係拜新都城街市同埋領匯（領展）所賜，先至逐漸衰落
況且景楠同浩明行去新都城街市，仲近過去景 ...

做死景林街市嘅係民坊搞街市但又貴到趴喺度（依家十室九空咁滯）
搞單車駅唔夠一兩年就摺哂（得番一間單車舖）
結果斬咗一大部份去做24/7 gym room
作者: 巴士的膠    時間: 2025-3-24 17:02
咁都無法迴避大街市會虹吸附近嘅街市，好少兩個規模相近嘅街市並列，除非人口多或者規模相約（例如沙乙博各有一個街市，但河對面沙田同禾輋做得住，瀝源幾乎得返間佳寶。）
作者: JX9097    時間: 2025-3-26 10:49
巴士的膠 發表於 2025-3-24 17:02
咁都無法迴避大街市會虹吸附近嘅街市，好少兩個規模相近嘅街市並列，除非人口多或者規模相約（例如沙乙博各 ...

印象中乙明個街市都頹頹地




歡迎光臨 hkitalk.net 香港交通資訊網 (https://www.hkitalk.net/HKiTalk2/) Powered by Discuz! X3.4