hkitalk.net 香港交通資訊網

標題: （轉載）九巴龍運母公司「載通國際」的「以股代息」安排 [打印本頁]

作者: TYChow 時間: 2025-5-23 18:55
標題: （轉載）九巴龍運母公司「載通國際」的「以股代息」安排
本帖最後由 TYChow 於 2025-5-23 19:09 編輯

https://www1.hkexnews.hk/listedc ... 2025052301058_c.pdf

（以下內容以港元列示）

載通國際早前宣佈，將派發2024年度未期股息，每股港幣5毫，並已於2025年5月15日的股東大會中獲得通過。

參考過往的以股代息計算安排，即為除凈日及其後四個交易日（共五日）之平均收市價計算，本年度即為2025年5月19日至23日，其收市價及算式為：

(8.56+8.58+8.54+8.76+8.80)÷5=$8.648（四捨五入為$8.65）

當小股東喺截止過戶之前，每持有一手400股嘅「載通」股票，就可以得到$200股息，再除以「以股代息」基準價$8.65，即為……

可申請之最高以股代息股數：
(400×0.5)÷((8.56+8.58+8.54+8.76+8.80)÷5)=23.12……

申請「以股代息」之後的餘下現金股息：$200-(23×$8.65)=$1.05

即係話，每手400股嘅「載通國際」股東，最多可以申請攞返23股「以股代息」的「紅股」，再將股息總金額減返「以股代息」之金額，另加$1.05 的現金股息。

利申：於本文上載之日，本人已成為「載通國際」之登記股東，並持有該公司之股份權益

（以上數式，只作示例計算，謹供參考之用，不同股東之情況或有差異，若有需要，請尋求專業意見。）

作者: dominic023 時間: 2025-5-24 10:03
此文應該屬於B22區喎

作者: kay 時間: 2025-5-24 10:37
香港地暫時未可以一股股買賣
碎股未必係一個好選項

作者: GA6072 時間: 2025-5-24 11:04

kay 發表於 2025-5-24 10:37
香港地暫時未可以一股股買賣
碎股未必係一個好選項

屈你買多同碎股啲砌夠一手

作者: kei_hk 時間: 2025-5-24 12:30

GA6072 發表於 2025-5-24 11:04
屈你買多同碎股啲砌夠一手

現時﹐散戶想買 or 賣碎股﹐都係一個字 : 煩。
而且﹐賣得出亦蝕價位。
因為﹐要比市場價低才賣到。

散戶在有選擇的情況下﹐收錢好過收股。
除非..... 你本身的持股量﹐真係足夠派到完整1手給你啦。

作者: kay 時間: 2025-5-24 13:17

kei_hk 發表於 2025-5-24 12:30
現時﹐散戶想買 or 賣碎股﹐都係一個字 : 煩。
而且﹐賣得出亦蝕價位。
因為﹐要比市場價低才賣到。

400除23都係除唔盡
都係玩野

作者: GK3258 時間: 2025-5-24 13:54

dominic023 發表於 2025-5-24 10:03
此文應該屬於B22區喎

呢啲文根本無討論價值

作者: kay 時間: 2025-5-24 14:30

GK3258 發表於 2025-5-24 13:54
呢啲文根本無討論價值

都唔係
有人覺得以股代息好
但實際上收息除淨都係股價度扣

同埋拉長時間計
20年呢隻野股價都跌左8成
我合埋對眼買 qqq廿年都唔會跌8成
當然sqqq另計

作者: leungky0528 時間: 2025-5-24 14:34
想講載通呢個安排做左好多年，依家係咪要將呢樣野變成傳統次次都幫人計數

作者: kei_hk 時間: 2025-5-24 17:19

kay 發表於 2025-5-24 13:17
400除23都係除唔盡
都係玩野

睇你有幾多手囉

你有 N 手咪有機會砌到完整的1手(及其倍數)+碎股囉。

正常D就一係要晒錢﹐一係就要股(完整每手股數)+錢(碎股收錢)。

完全要晒股﹐多數都唔會係散戶。
又或者係無考慮過會賣股的散戶。

作者: EX-TL 時間: 2025-5-24 17:49
呢篇嘢放N板先啱啦, 以前講股板摺埋咗都係歸入N板, 點討論到巴士運作?

作者: TYChow 時間: 2025-5-24 18:45
本帖最後由 TYChow 於 2025-5-24 19:16 編輯

EX-TL 發表於 2025-5-24 17:49
呢篇嘢放N板先啱啦, 以前講股板摺埋咗都係歸入N板, 點討論到巴士運作?

（咁「載通國際」、「漢思集團」嘅主要業務其實都係專利巴土）咁巴士公司同佢哋所屬嘅上市控股集團嘅業績又可以喺B2版講……

其實有啲比較資深嘅「巴士迷」、「鐵路迷」已經進化咗，成為巴士公司同港鐵嘅小股東，亦會出席呢啲上市公司嘅股東大會。

咁呢啲公司嘅小股東喺股東大會上嘅提問，以及相關嘅企業行動、股東大會決議案又可唔可以講呢？（仲有就係巴士公司以前炒樓賺大錢……）

查實連買巴士呢啲「關聯交易」，一樣有人引用港交所披露易嘅通告……，而我哋已經再唔係只係識得瘋狂「追巴士」嘅「小朋友」巴士迷，亦都會開始去用股東身份就巴士公司運作提出意見。

（利申：於發文時，本人同時為「載通國際」及「漢思集團」之登記股東，並持有上述公司之股份權益）

作者: ksmbh 時間: 2025-5-24 21:03

TYChow 發表於 2025-5-24 18:45
（咁「載通國際」、「漢思集團」嘅主要業務其實都係專利巴土）咁巴士公司同佢哋所屬嘅上市控股集團嘅業績 ...

講佐多年的觀塘廠重建重建完又唔開商場
真係想問下管理層想點?

作者: TYChow 時間: 2025-5-24 22:31

ksmbh 發表於 2025-5-24 21:03
講佐多年的觀塘廠重建重建完又唔開商場
真係想問下管理層想點?

喺股東大會有人問過梁主席同 GM （ Roger ）：

佢哋話個商場今年年尾會開，只係需時挑選租客，30%商戶首次落戶東九龍，10%商戶首次登陸香港，而寫字樓就租出咗大約一半樓面。

（呢啲就係成為股東，去到股東大會可以聽到多少少嘅嘢喇！）

之後呢位股東又講到大欖隧道減價對隧道費基金以及緩減加價嘅影響，同埋要求喺八、九月份派返中期股息。

作者: admin69 時間: 2025-5-25 01:12

dominic023 發表於 2025-5-24 10:03
此文應該屬於B22區喎

本文最合適討論分板為本版(B2版)，巴士運作包括巴士公司（包括以巴士為主要業務的控股公司）的財務操作事宜。縱使有關公司每年都有「以股代息」安排，站友貼文討論恆常發生的事宜亦沒有違反站規。

另外再次提醒下列站友留意站規第14(b),15,36,37的規定：
dominic023,　EX-TL,　GK3258
如認為站友貼錯板，應向板主報告，而非自行作出裁斷。

admin69

作者: s3n370 時間: 2025-5-25 04:17
本帖最後由 s3n370 於 2025-5-24 20:22 編輯

kei_hk 發表於 2025-5-24 04:30
現時﹐散戶想買 or 賣碎股﹐都係一個字 : 煩。
而且﹐賣得出亦蝕價位。
因為﹐要比市場價低才賣到。

諗住買買賣賣嘅散戶，收碎股就話覺得煩會蝕水。

對於買股票黎儲嘅散戶就係另一回事。股息再投資嘅複利效應先至和味。
對於月供嘅散戶，買果下都碎啦，派碎股都唔爭在啦。儲儲下手數夠多，碎果部分蝕都只係小數目。
以上兩款散戶，都尚且係條路自己揀。
大股東建議供股搞到有碎股，跟隊有碎股，唔跟股權攤薄呢下先至頭痕。

作者: kay 時間: 2025-5-25 10:39

s3n370 發表於 2025-5-25 04:17
諗住買買賣賣嘅散戶，收碎股就話覺得煩會蝕水。

對於買股票黎儲嘅散戶就係另一回事。股息再投資嘅複利效 ...

其實收息都有前提
就係股價係咩方向
如果隻股票未來都係跌
收幾多息都抵唔返條數

不過間野市值都仲有40幾億
手上現金又未去到呢個水平
都仲未可以考慮私有化

作者: 吳宗錡 時間: 2025-5-25 20:25

kay 發表於 2025-5-25 10:39
其實收息都有前提
就係股價係咩方向
如果隻股票未來都係跌

當初新鴻基地產成立九巴控股（現載通國際）時，就應該將九巴私有化，踢走原有四大家族，而唔係向原有九巴股東換股

作者: clivetock 時間: 2025-5-25 22:34

s3n370 發表於 2025-5-25 04:17
諗住買買賣賣嘅散戶，收碎股就話覺得煩會蝕水。

對於買股票黎儲嘅散戶就係另一回事。股息再投資嘅複利效 ...

以前有碎股黨專門收集碎股搵食，不過載通股東似乎冇乜福利值得碎股黨入場？

如果有朝一日載通送九巴月票比股東，咁可能一堆巴士迷爭住收購碎股

作者: Ekin 時間: 2025-5-26 00:54

TYChow 發表於 2025-5-24 22:31
喺股東大會有人問過梁主席同 GM （ Roger ）：

佢哋話個商場今年年尾會開，只係需時挑選租客，30%商戶首 ...

呢位股東就係我.
我每年都會出席股東大會並提出問題.

90周年時, 我提出意見, 希望公司派發特別股息以示慶祝, 結果公司真的有考慮, 并派發了每股0.3元特別中期股息.

於早年前, 由于城巴成功申辦了九龍區20 / 22號路線, 九巴從此失去這2個編號. 我向管理層建議不要把編號複雜化, 例如X42C這些類型, 編號越簡單越好. 結果近年九巴儘量用了(重用)簡單的編號, 例如19 / 49 / 74, 以免被其他公司用了, 後悔莫及.

利申: 持有一萬股以上載通國際, 會接受部分以股代息, 長線投資.

作者: 3ASV174 時間: 2025-5-26 10:09

kay 發表於 2025-5-25 10:39
其實收息都有前提
就係股價係咩方向
如果隻股票未來都係跌

載通大股東只係揸住 43%
個格局都唔似係想私有化，亦睇唔到私有化有咩好處

以股代息通常都係公司保留現金嘅手段
又唔係供股，你揀收錢佢無得夾你收碎股嘅

作者: jpoon 時間: 2025-5-29 04:12

吳宗錡發表於 2025-5-25 20:25
當初新鴻基地產成立九巴控股（現載通國際）時，就應該將九巴私有化，踢走原有四大家族，而唔係向原有九巴 ...

私有化要畀現金買起晒其他人股份，換股可以唔駛出錢

作者: GA6072 時間: 2025-5-30 08:20

kay 發表於 2025-5-24 13:17
400除23都係除唔盡
都係玩野

之前某間補習機構係咁玩拆同合

用既number全部都係質數

作者: tkglobe 時間: 2025-5-30 09:24

ksmbh 發表於 2025-5-24 21:03
講佐多年的觀塘廠重建重建完又唔開商場
真係想問下管理層想點?

你估佢真係想唔開咩，作為咁大型旗艦商場，點都要去到某個出租率可以開，咁嘅時勢，唔係咁容易搵到人租，唔通開咗之後有大半舖頭都冇人租咩，唔係唯有拖到出租有返咁上下先開

作者: tkglobe 時間: 2025-5-30 09:26

吳宗錡發表於 2025-5-25 20:25
當初新鴻基地產成立九巴控股（現載通國際）時，就應該將九巴私有化，踢走原有四大家族，而唔係向原有九巴 ...

根本上毫無誘因要新鴻基全面私有化九巴，對佢嚟講亦都冇咁嘅需要，經營九巴本身就唔係佢嘅目的，只要持有一定數量股份，有控制權就可以

作者: TYChow 時間: 2025-5-30 18:07

leungky0528 發表於 2025-5-24 14:34
想講載通呢個安排做左好多年，依家係咪要將呢樣野變成傳統次次都幫人計數 ...

其實載通國際嘅「以股代息」安排，喺2016年初開始出現（派返2015年度未期股息），亦可能比人嘈或者爭取，先至開始有「以股代息」安排。

今年（2025年）係我第一年成為「載通國際」嘅登記股東，「成就解鎖」自然就會覺得比較興奮，所以就想同其他巴士迷分享一下喜悅，亦都希望其他巴士迷亦都能夠成為「巴士公司」嘅股東。

作者: TYChow 時間: 2025-5-30 18:27

tkglobe 發表於 2025-5-30 09:26
根本上毫無誘因要新鴻基全面私有化九巴，對佢嚟講亦都冇咁嘅需要，經營九巴本身就唔係佢嘅目的，只要持有 ...

2016年開始有以股代息計劃嘅時候，同今年2025年嘅比較：

新地同「藝湖」嘅持股比例由33%加到43%

台山伍氏家族就由5.2%加到5.8%

咁即係話，大股東想增加控制權，但係又唔想出錢，於是就「以股代息」，利用小股東想收現金股息嘅取態，而大股東就收股票，從而不費一分一毫就可以增加股權比例，所以我就Post返出嚟，幫大家計一計數。

作者: 吳宗錡 時間: 2025-5-30 18:57

tkglobe 發表於 2025-5-30 09:24
你估佢真係想唔開咩，作為咁大型旗艦商場，點都要去到某個出租率可以開，咁嘅時勢，唔係咁容易搵到人租， ...

咁新鴻基地產唔使還錢咩？會唔會債務到期之前，新鴻基就會將鋪位出售（即係變業權分散）？

作者: Waiyin12 時間: 2025-6-2 04:41

clivetock 發表於 2025-5-25 22:34
以前有碎股黨專門收集碎股搵食，不過載通股東似乎冇乜福利值得碎股黨入場？

如果有朝一日載通送九巴月票 ...

九巴月票每張 800 幾蚊，如果每個月送一張，一年 12 個月，加埋都接近 10000 蚊一年，唔知而家一年股息有無咁多？

亦都有少少好奇，載通會計師會點樣 value 一張派出去月票嘅價值？

作者: TYChow 時間: 2025-6-2 17:59

Waiyin12 發表於 2025-6-2 04:41
九巴月票每張 800 幾蚊，如果每個月送一張，一年 12 個月，加埋都接近 10000 蚊一年，唔知而家一年股息有 ...

其實我都有思考過「以年票代股息」嘅做法：

現時一張月票 $834 乘 12個月 = $10,008 ，當每股未期息係5毫……

10,008 元除 0.5 ，等於 20,016 股

即係 20,000 除每手 400 股 = 50手

所以如果有啲股東有50手 ( 20,000 股 ) 以上，

建議真係可以考慮一下載通「以年票代股息」，每年7月1日生效，至翌年6月30日，配合九巴專營權日期。

（利申：於本文上載之日，本人為「載通國際」之登記股東，並持有該公司之股份權益）

作者: s3n370 時間: 2025-6-2 22:31

TYChow 發表於 2025-5-30 10:27
2016年開始有以股代息計劃嘅時候，同今年2025年嘅比較：

新地同「藝湖」嘅持股比例由33%加到43%

新地及藝湖响呢十年間嘅股權增加佐30%，但係伍氏就只係增加佐11%。
當中係咪有買賣過/伍氏家族並沒有全數以股代息呢？

作者: s3n370 時間: 2025-6-2 22:40

clivetock 發表於 2025-5-25 14:34
以前有碎股黨專門收集碎股搵食，不過載通股東似乎冇乜福利值得碎股黨入場？

如果有朝一日載通送九巴月票 ...

邊駛月票啦，話唔定送D紀念品都夠

作者: s3n370 時間: 2025-6-2 22:49

kay 發表於 2025-5-25 02:39
其實收息都有前提
就係股價係咩方向
如果隻股票未來都係跌

運輸主業响香港被港鐵蠶食、人口老化、外流嚴重三重夾擊。
發展車廠地皮慢慢搣又唔似港鐵咁，會不斷有新線帶來嘅新發展。
千禧前後嘗試外闖過，近年唔似有類似嘅動作。
守只有慢慢失守，攻又唔太見有攻，唔係太睇得通有乜可以搞。

作者: TYChow 時間: 2025-6-7 18:08
本帖最後由 TYChow 於 2025-6-15 19:22 編輯

https://www.hkexnews.hk/listedco ... 2025052900563_c.pdf

載通國際喺2025年5月30日刊登咗《有關截至2024年12月31日止年度之末期股息之以股代息計劃》公告，我自己喺前一兩日亦都收到張Form，佢哋講到：

按記錄日期即係2025年5月21日已發行股份508,901,425股計算，若所有股東均選擇以現金收取末期股息，「巴士仔」要比嘅現金股息總額為254,450,712.50港元。如果所有合資格股東都選擇以新股代替現金的形式去收取末期股息，並按平均收市價計算，根據以股代息計劃可予發行新股之最高數目將為29,384,888股，佔於最後實際可行日期已發行股份總數約5.77%及緊隨發行該等新股後已發行股份總數約5.46%。

如果要申請以股代息嘅股票，就要按以下指示，喺2025年6月16日（星期一）香港時間16:30之前將「選擇表格」交返去合和中心17M樓嘅股份過戶處

如果只係要新股，唔要現金股息：只須將「選擇表格」簽名同填上日期，以及交返去股份過戶處

如果要新股另加現金股息，就要先計返你可以申請幾多股新股（我前面所講嘅「紅股」），然後再喺「選擇表格」丙欄寫返你想要幾多新股，並且喺「選擇表格」簽名同填上日期，以及交返去股份過戶處。

（注意：如果股東喺「選擇表格」丙欄入面無寫明想收取以股代息嘅「紅股」數目，又或者你所填寫嘅以股代息「紅股」數目多過你自已可以申請嘅上限，佢哋就會當你全部以股代息而唔收現金，所以一定要計下股息金額以及你可以申請嘅「紅股」數目上限架！）

另外，如果係美國股東，受規管所限，就只可以收現金作為股息，亦都唔會收到「選擇表格」，而打算以收現金作為股息嘅股東，亦都唔駛交返「選擇表格」

我喺「巴士仔」公司股東大會上面，見到有啲股東「哥哥」、「姐姐」，佢地似乎唔係好識計到股息同「紅股」，為咗方便大家計數，我就設計咗以下呢個表，方便參考，但係大家自己亦都應該計一計下數。

股息同「紅股」嘅關係可以理解為：

原有每股嘅未期股息為$0.5港元，「以股代息」嘅「紅股」發行價為$8.65港元

即係每18股原有股份，就可以申請1股「紅股」，另加$0.35嘅股息餘額；

而每手400股原有股份，就可以申請23股「紅股」，另加$1.05嘅股息

利申：於本文上載之日，本人已成為「載通國際」之登記股東，並持有該公司之股份權益

就個人而言，我自己會申請最高可以申請到嘅「紅股」數目，（因為「巴士仔」公司股價升咗），然後要求「巴士仔」寄埋「現金支票」比我存入銀行。

（以上數式，只作示例計算，謹供參考之用，不同股東之情況或有差異，若有需要，請尋求專業意見。）

作者: Waiyin12 時間: 2025-6-8 04:37

TYChow 發表於 2025-6-2 17:59
其實我都有思考過「以年票代股息」嘅做法：

現時一張月票 $834 乘 12個月 = $10,008 ，當每股未期息係5 ...

月票唔係現金，載通會計部理應唔會直接用售價去做一張月票嘅 valuation

如果一位股東住喺港島，或者自己揸車出入，好少會用到月票；對佢哋而言，用月票代股息 = 無股息，或者要轉賣出去先拎到錢，即係有一個唔細嘅 discount

我反而係諗緊類似日本嘅株主優待制，任何股民只要持多過某個數嘅股票，每年即可獲贈月票一張，或者可以登記一張八達通，搭任何九巴 / 龍運班次有九折之類

作者: 吳宗錡 時間: 2025-6-8 08:54

TYChow 發表於 2025-6-7 18:08
https://www.hkexnews.hk/listedco/listconews/sehk/2025/0529/2025052900563_c.pdf

載通國際喺2025年5月 ...

美國股東只可以以現金收息，係指經美國嘅交易所買載通股份，定指美國公民/居民？

作者: 吳宗錡 時間: 2025-6-8 09:06
本帖最後由吳宗錡於 2025-6-8 11:38 編輯

Waiyin12 發表於 2025-6-8 04:37
月票唔係現金，載通會計部理應唔會直接用售價去做一張月票嘅 valuation

如果一位股東住喺港島，或者自 ...

咁漢思集團又可以出咩株主優待？因為城巴本身並冇月票
利申：本人現為漢思集團控股有限公司登記股東，享有漢思集團股份權益；但並沒有持有任何載通國際控股有限公司股份。

作者: chung1118 時間: 2025-6-8 16:11

tkglobe 發表於 2025-5-30 09:24
你估佢真係想唔開咩，作為咁大型旗艦商場，點都要去到某個出租率可以開，咁嘅時勢，唔係咁容易搵到人租， ...

我諗新地都想快快趣趣開張做生意賺租，睇番新假前最早d稿，本身預上年第二季開，但搞搞下，講講下都就黎今年第二季尾，什至乎上面有版友話要年尾先開到
依d一線商場，要有番咁上下出租率先有人流，唔係變死場
以前新地一線，都係多數連鎖進駐，少小店，但依家有d都要keep番出租率，進駐一d以前少見ge品牌
仲有加埋佢地有綑綁租約都要拖足一年都儲唔齊品牌，可想而知其實都難租，始終個位唔近地鐵站，而發展局好似話有發展商入紙係牛頭角起天橋，應該似想打通番牛頭角個邊創紀系列，睇下會唔會好似當年yoho 咁，吉咗個場幾年先再開啦

作者: TYChow 時間: 2025-6-15 20:00
本帖最後由 TYChow 於 2025-6-15 20:08 編輯

Update 返小小野：（記得聽日去交表！）

我自己前幾日已經去到合和中心17M樓嘅「過戶處」交返「巴士仔」以股代息「選擇表格」
嗰度啲「姐姐」同我講，話以股代息「選擇表格」嘅「丙欄」（ Box C ）
係指你想將幾多股嘅原有股份去改做「以股代息」收取「紅股」

舉倒：如果你有一手400股「巴士仔」股票，每股派息0.5港元，以股代息「新股」發行價 $8.65
如果想攞盡「紅股」同現金股息，思路應該係：

Step 1) 400股乘每股股息0.5港元 = 總股息 $200 ( 確定股息金額 )
Step 2) 200元除「新股」發行價 $8.65 = 最高可申請 23 股 ( 確定最高可申請代息「紅股」數目 )
Step 3) 23股乘「新股」發行價 $8.65 = 所需金額 $198.95 ( 確定代息「紅股」所涉金額 )
Step 4) 代息「紅股」所需金額 $198.95 除每股股息0.5港元 = 397.9 向上調整為398股 (涉及改以「紅股」代息之原有股份數目)

Step 5) 以398股作為改以「以股代息」之股份數目並填寫於以股代息「選擇表格」嘅「丙欄」（ Box C ）
（「載通」所用字眼：「欲以收取新股方式收取末期股息之有關股份數目」、「漢思」用字：「將以代息股份支付末期股息之普通股股數」）
Step 6) 如無意外，「巴士仔」會寄返 23股「紅股」（以股代息股份），以及1蚊嘅股息支票比返我！

各位「巴士仔」股東，記得聽日（2025年6月16號）16時30分之前要去到合和中心「過戶處」交返「以股代息選擇表格」

如果遲咗交唔到或者無去交返份Form嘅話，「巴士仔」就只會寄返「股息支票」或者將股息存入你嘅銀行戶口度㗎喇！

利申：本人同時為「載通國際」及「漢思集團」之登記股東，並持有該兩間公司之股份權益，有關「漢思集團」之以股代息安排，將於另文再述

作者: kay 時間: 2025-6-15 21:49

chung1118 發表於 2025-6-8 16:11
我諗新地都想快快趣趣開張做生意賺租，睇番新假前最早d稿，本身預上年第二季開，但搞搞下，講講下都就黎 ...

問題係市道差同供過於求
不過載通本業都係巴士
收租都係佔少少
我覺得佢未必有迫切性

歡迎光臨 hkitalk.net 香港交通資訊網 (https://www.hkitalk.net/HKiTalk2/)