hkitalk.net 香港交通資訊網

標題: （純紀錄）英法隧道LeShuttle小記 [打印本頁]

作者: s3n370 時間: 2025-9-6 15:16
標題: （純紀錄）英法隧道LeShuttle小記
今夏難得四大長老難得聚首一堂，當要為興趣喜好各異嘅各人籌劃活動而頭痕時。
不如一嘗歐陸自駕游，一次滿足多人願望。

原本嘅計劃係一程火車一程船，體驗哂兩款截然不同嘅過大海方式。
不過訂票時發現來回票較實惠，且乘船需按人頭交附加費。
故決定來回都選用雖貴但省時得多嘅LeShuttle。

（註：以下照片均為副駕拍攝/車cam截圖，司機並無拍攝。
因截圖關係及後期加工質素稍差請見諒）

作者: S3BL100 時間: 2025-9-6 21:17
多謝分享。聽過呢個服務幾次，第一次見到報告，亦真係相當特別，睇來使用率都相當唔錯

諗返起美國呢邊 Amtrak 都有一條 auto train 路線，只得頭尾兩站可以上落但長途好多，由 DC 附近落到 Orlando, FL 附近要行足 17 小時。乘客要交低部車畀職員揸上運載汽車既雙層貨卡，然後走去坐普通載客車廂。Amtrak auto train 運載汽車貨卡設備一定無 LeShuttle 咁好，反正都唔預乘客坐喺車入面。不過我住既地方唔會用到呢個服務，亦無興趣試

就咁睇 LeShuttle 車卡應該本身有冷氣，似乎係預乘客揸車入車卡之後拉低車窗熄引擎坐喺車入面歎冷氣？唔知多唔多乘客會行來行去？除左洗手間之外仲有無其他 amenities？

作者: FBI2 時間: 2025-9-7 09:27

S3BL100 發表於 2025-9-6 21:17
多謝分享。聽過呢個服務幾次，第一次見到報告，亦真係相當特別，睇來使用率都相當唔錯

諗返起美國呢邊 Amt ...

我上年9月試過用LE SHUTTLE由LILLE返倫敦,車卡內是有冷氣的,可以行來行去,但唔俾食煙.

作者: s3n370 時間: 2025-9-7 20:37

S3BL100 發表於 2025-9-6 13:17
多謝分享。聽過呢個服務幾次，第一次見到報告，亦真係相當特別，睇來使用率都相當唔錯

諗返起美國呢邊 Amt ...

聽過暑假未算繁忙，復活節嘅term break仲誇張。
此外中學唔少遊學團，都會搭coach（多數搭船都有搭火車）過歐陸一邊。
法國一邊嘅物價比英國同類地區低唔少，比起倫敦更甚。
雖然應該唔會係香港同深圳果種差距，過一過“大海”程火車/船都唔係平。但係至少覺得值。

以上只係講客運，條線貨車先至係重點。班次密得多，
貨運高峰期甚至要將M20公路，
往Folkestone/Dover一段臨時撥黎做跨境貨車嘅排隊同檢查區。

至於amenities，車廂只係得廁所。
呢程車唔駛40分鐘，再加上設置逃生通道後，都無乜位剩。
LeShuttle要求停定車後熄匙及開車窗，冷氣無特別留意，
個感覺大概係唔太焗促但亦唔太覺有冷氣。

其實有螢幕嘅等候區，果度有如Motorway Service嘅廁所便利快餐店，
及過境前必有嘅duty free shop。
等候駛入月台前嘅等候區亦有廁所及自助售賣機。

估唔到美國Freeway及貨運鐵路網咁發達，都有運送車輛嘅鐵路服務，
個人都有興趣知點解生存到。

歐洲多國多年前亦有類似嘅motor rail service，不過早已陸續取消。
除咗英法隧道等地，鐵路係唯一嘅陸路外，歐陸應只剩德國仍有夏季限定，
只開幾班嘅運車往南歐嘅鐵路服務。

如果仲有呢D service，我諗我都會捧場。因為我唔鐘意揸長途，但係好多時唔揸唔得

作者: S3BL100 時間: 2025-9-7 22:06

s3n370 發表於 2025-9-7 20:37
聽過暑假未算繁忙，復活節嘅term break仲誇張。
此外中學唔少遊學團，都會搭coach（多數搭船都有搭火車） ...

多謝分享。

我其實都係幾年前睇到 YouTube 有人拍片介紹，先知道原來美國都有 auto train。我都好奇怪點解會做得住，但條線原來好似係 Amtrak 最賺錢長途線。喺 Amtrak 大部分路線都蝕本前提下，難得有錢賺當然會做落去

但重點係美國各地尤其東岸去 Orlando, FL 需求係無底深潭，我相信大部分都會係坐飛機，再唔係就自己揸落去。Auto train 唔會係主流但總有人想揸自己部車但又唔想揸足咁耐，由 DC 揸落 Orlando 時間未必同 auto train 差幾多，仲要係條咁繁忙既 I-95，只要有呢個服務點都一定吸到部分需求，可以輕輕鬆鬆坐 17 個鐘落去

唔講唔知歐洲多年前都有類似 motor rail，但純粹亂估，歐洲鐵路比起美國發達咁多，去到目的地一般都有完善公共交通，擁車成本又貴，又唔係咁多人真心想揸車或者負擔得起揸車，呢類服務就變成無強烈必要。相比之下美國客運鐵路網絡差，又好多人唔鍾意坐飛機要過 TSA 安檢，於是會多唔少人穿州過省開長途，彈性大好多。咁當然總有城巿人唔鍾意揸車，但 motor rail 應該都只係得 Orlando 呢類咁大需求巿場先做得住

美國人穿州過省開長途根本當食生菜，我自己而家平均每個月都會有一次因事要開單程三粒鐘 day trip，另外出差單程開六粒鐘都試過（但中間停幾個站）。如果有得揀，我都唔想揸咁耐。我暫時無咩興趣試 auto train，但呢類服務畀乘客去到目的地之後可以揸自己車、唔使租車但又提供到足夠彈性，中間又唔使揸咁耐，需求夠大係會有巿場。不過我果頭連 Amtrak 都無

作者: cx838 時間: 2025-9-8 11:31

S3BL100 發表於 2025-9-7 22:06
多謝分享。

我其實都係幾年前睇到 YouTube 有人拍片介紹，先知道原來美國都有 auto train。我都好奇怪點 ...

Amtrak 的auto train,生意多數係長者,特別係冬季,他們坐唔到飛機,又駕車不能太久的人.

作者: kei_hk 時間: 2025-9-8 17:13

S3BL100 發表於 2025-9-7 22:06
多謝分享。

我其實都係幾年前睇到 YouTube 有人拍片介紹，先知道原來美國都有 auto train。我都好奇怪點 ...

睇過youtube片﹐以前台灣都有這些汽車鐵路服務。

大既都係以前道路網未完善﹐跨市跨省的一類行程﹐所花的時間非常之長。

於是利用鐵路運車﹐各方面都好過由司機駕車。

但隨著道路網發展﹐汽車所需的行車時間大大縮縮。
用火車做駁腳的服務﹐需求就自然減少﹐最終不再提供此服務。

我估外國的情況都係相約﹐道路網及配套完善﹐大家就對限時限刻的火車班次不感興趣﹐寧可自己開長途車﹐出行時間變得靈活。

歡迎光臨 hkitalk.net 香港交通資訊網 (https://www.hkitalk.net/HKiTalk2/)