論輕鐵路面交匯處加設閃燈燈號及遮斷器之利弊

輕鐵係香港唯一會同路面交通交匯既高速列車, 最高時速可達70公里(電車時速較低, 大部分亦是共享路面行走既路段, 而且電車沿線空間有限, 難以加裝有關裝置, 故不在此討論)


自輕鐵通車, 不時會發生同行人/ 路面車輛相撞既意外, 輕則受傷, 而致死既意外亦時有所聞,
意外既原因往往係行人/ 路面車輛或輕鐵其中一方不依交通燈號橫過交匯處所致,
因為輕鐵重量大, 慣性亦高, 故發現有人/ 車衝出路面時亦難以煞車, 容易造成意外
輕鐵車長為避免意外發生, 駛近交匯處時亦需降低車速同留意周圍環境,
咁樣除左會對輕鐵車長造成巨大既負擔同壓力, 亦會降低輕鐵既速度同效率,
而香港人既守法程度亦低, 行人衝紅燈既情況屢見不鮮, 咁樣除左危害自己既生命, 萬一意外發生, 亦會對各方造成阻礙
故本人建議在部分高危既輕鐵路面交匯處加設閃燈燈號同遮斷器, 以讓駕駛者同行人提高警覺

首先, 在輕鐵車站附近既橫過路軌既過路處, 本人建議增設閃燈燈號同發聲警號, 如情況許可及有需要
(例如彎位旁既過路處, 行人難以察看輕鐵接近, 同輕鐵班次較疏落既位置) 亦可考慮增設遮斷器, 增加安全性
特別係青山公路 - 元朗段 (元朗大馬路) 既路段, 故本人建議係該段輕鐵路面交匯處加設閃燈燈號同發聲警號, 理由如下:
1. 該處輕鐵班次頻密, 行人亦非常多, 經常出現人車爭路同胡亂橫過馬路既情況, 輕鐵經過時亦需不停響鈴甚至響號提醒行人
2. 加設閃燈燈號同發聲警號, 可以增加警告既成分, 提醒行人及車輛注意輕鐵列車

不過該處就唔建議設遮斷器, 因為:
1. 該處輕鐵班次十分頻密, 遮斷器會經常開關, 易造成損壞, 而且遮斷器開關需時, 會阻礙行人同車輛正常橫過路軌
2. 該處行人較多, 設遮斷器既話, 當遮斷器下降時有機會因行人過多而擊中等候過路既行人
3. 該處輕鐵車速較低, 危險性較低

而青山公路 - 屏山/ 洪水橋/ 藍地段同龍門路附近既輕鐵路段車速較高, 故係可行情況下,
本人建議係該段輕鐵路面交匯處加設閃燈燈號, 發聲警號同遮斷器, 理由如下:
1. 該處輕鐵路段車速較高, 煞車距離亦較長, 對行人/ 車輛危險性大
2. 如裝設遮斷器, 可以使輕鐵車長安心以較高速度通過交匯處, 縮短行車時間同增加效率
3. 該處橫過輕鐵路軌既道路車流量較低, 裝設遮斷器對車輛影響不大
4. 輕鐵路面交匯處既交通燈號較複雜, 外來車輛容易因不習慣而誤看燈號衝入路軌

針對閃燈燈號, 發聲警號同遮斷器既設計, 本人有以下建議:
1. 應設立類似消防局門外既閃燈燈號, 配以類似日本平交道既聲響, 聲響發生裝置可用現有行人過路燈既款式
2. 遮斷器應採用類似日本平交道既軟桿, 萬一車輛被困路軌, 亦方便離開路軌範圍
3. 交匯處應設燈號顯示輕鐵列車方向, 使行人注意
4. 遮斷器同燈號觸發系統可以參考現有既"輕鐵過路優先權"登記裝置
5. 建議遮斷器只設置係面向車流既一方, 減少遮斷器開關時間
6. 加設緊急按扭, 在緊急時 (如車輛無法離開路軌時) 按動按扭通知接近既輕鐵列車

參考資料:
現有"輕鐵過路優先權"登記裝置既運作方法
日本平交道既"軟桿"同車輛被困路軌時既做法

閃燈燈號及遮斷器設計建議一 (亦可不設遮斷器)

說明:
燈號為現有消防局外既警告燈號, 發聲裝置為現有行人過路燈既裝置
為標準樣式設計, 警告效果較佳, 適合用於與汽車交匯路段

好處:
1. 可沿用現有燈號同發聲裝置, 降低成本
2. 發聲裝置具音量調節功能, 降底夜間音量, 減少滋擾
3. 遮斷器上既紅燈可增加警示功能, 使駕駛者注意

閃燈燈號及遮斷器設計建議二 (亦可不設遮斷器)

說明:
燈號為現有交通燈所用既燈號, 發聲裝置為現有行人過路燈既裝置
為小型樣式設計, 警告效果較弱, 適合用於行人過路處或狹窄位置

好處:
1. 可沿用現有燈號同發聲裝置, 降低成本
2. 發聲裝置具音量調節功能, 降底夜間音量, 減少滋擾
3. 直立式燈號減少需要空間, 適合設置在狹窄位置

設立遮斷器既範例


好處:
1. 只需控制兩組遮斷器, 減少開關時間
2. 為免不熟悉既駕駛者被困路軌範圍而阻礙列車運作

以下歡迎各版友討論

圖入面，輕鐵行車方向掉轉了。

一不做二不休，天水圍、屯門區內燈位亦可考慮設置。

我覺得係唔錯的提議，我建議你直接向運輸署提出。不過政府可能會以意外率不高為由推搪。

有啲車衝燈尾會撞閘，反而仲多意外

DIH 發表於 2017-11-29 09:26
圖入面，輕鐵行車方向掉轉了。

一不做二不休，天水圍、屯門區內燈位亦可考慮設置。

行車方向指示器已修改, 多謝指正

另外, 天水圍、屯門區既交匯處我亦建議係可行情況下增設閃燈燈號同遮斷器, 上文只係提及既地方只係地區上既例子

至於, 向運輸署提出提議係而家相信係言之尚早, 因為呢份建議始終過於簡單, 未能提出詳細既建議,
其實近呢幾年已經有報章同區議員向運輸署提出類似建議, 不過現時為止似乎運輸署仍未有相關措施
反而港鐵公司整左D冇乜用既膠柱, 嘥錢又阻住人

如果要向運輸署提出提議, 相信如果同時提交輕鐵車長既有關意見, 詳細既規格同向有關區議員求助, 向協助運輸署施壓的話, 相信效果會更好,
但礙於學業同工作問題, 詳細既報告我恐怕冇能力做到, 而且本人亦非輕鐵專區內既居民, 所以亦難以向有關既區議員求助

如果有版友有興趣, 歡迎借用呢份建議既內容

284 發表於 2017-11-29 13:29
有啲車衝燈尾會撞閘，反而仲多意外

衝燈尾正正就係做成意外既其中一個原因, 不過我相信只要遮斷機經常適當調較, 發生碰撞既機會亦係唔高既
就算發生碰撞, 只要採用折損防止器, 亦只會對車輛造成輕微損害, 而對遮斷桿本身係冇損害既

http://www.yoshiwara.co.jp/products/pdf/crossing.pdf
上列網址既第5頁說明左折損防止器結構

(輕鐵繪圖由友壇版友evo18hk~~ASV28製作)

呢個係系統運作既示意圖, 可以見到有足夠既時間比車"衝燈尾", 唔會有碰撞既發生, 除非佢衝紅燈,
而且系統運作既時間亦同現時既相近, 並唔會加長等候信號既時間

你真係太睇少廢中廢老

佢地本身都唔跟紅燈過馬路既

而家只係將紅燈變成一條柱

佢地以為無車咪係照踎低行過去

佢地既心態先係問題，有車？夠膽你咪撞埋黎囉，呠我做咩

佢地仲會慢慢妹下妹下咁行添

dogdog002 發表於 2017-11-29 23:00
你真係太睇少廢中廢老

佢地本身都唔跟紅燈過馬路既

廢中廢老既問題本來就係無解, 重以為自己係小明, 跑得快過輕鐵, 呢D自己想死就無謂阻住佢啦

不過有時係有唔少既人過馬路時唔專心, 可能係睇緊手機或者做其他野
特別或者突出既警號可能會吸引到佢地既注意力, 令佢地唔會盲中中衝出路軌,
就算真係唔覺, 都可以用遮斷機攔住佢地, 不致成為輪下亡魂

另外, 有部份過路處係處於彎路附近, 輕鐵車長同行人都難以察看交通位置,
閃燈同警號就有助行人及早得悉輕鐵列車既動向

同埋係極端情況下, 遮斷機亦可以保障輕鐵車長, 以輕鐵1013號既車禍為例,
如果當時有設置遮斷機, 貨櫃車司機就可以及時察覺有輕鐵列車接近, 而唔會通過路軌, 從而避免意外