本帖最後由 HZ8186 於 2018-10-6 23:21 編輯
不怕神一般的對手, 只怕鹹魚般的乘客?
--- 前言 ---
"一六年中,小弟獲悉已被英國大學收錄時,小弟許左個願望-就係嘗試搭唔同既航空公司,家長話咩野因航安全呀,因航可以儲Asiamiles呀,全部都唔係小弟既concern"
今次旅程則比較例外 - 雖然小弟係上面講過小弟係會甚少因為積分計畫而挑選航空公司, 不過今次適逢小弟老竇係 United 個邊既Miles就快過期, 咁好自然地, 小弟今次可以挑選既航空公司都係 Lufthansa Group 旗下的 LH,LX及OS。
本身小弟係想嘗試換領漢沙經法蘭克福前往百明翰 (B748+A20N), 或瑞士經蘇黎世前往倫敦 LCY (B77W+BCS1) 既機票, 可惜LH同LX 可以換既位一早已經被人換曬。 係別無他選既情況下, 小弟則決定乘搭奧地利航空。
實話實說, 本身小弟對今次旅程係有幾高期望既 - 話說小弟之前係有搭過 Swiss, 當時的提供服務同機艙清潔度為非常好。 既然兩間公司又係漢沙旗下, 又係 Skytrax 四星, 兩間公司既 Econony Class Product 應該唔會差得好遠姐?
--- Flight Info ---
OS58 13/1 HKG-VIE
OE-LPB B777-2Z9 ER
ETD 11:00 ATD 11:50 (GMT+8)
ETA 16:15 ATA 16:07 (GMT+1)
OS455 13/1 VIE-LHR
OE-LDB A319-112
ETD 17:15 ATD 17:26 (GMT+1)
ETA 18:40 ATA 18:29 (GMT+0)
--- Check-In ---
小弟當天一早八點幾便乘 A21 抵達機場 - 雖然航班於十一點先起飛, 不過由於小弟有一個時間感好強既家長, 小弟七點幾已經俾人踢左出門口 - 既然咁早到達機場, 小弟預辦登機後就去左行 T2。
機場 Check-In 亦相當輕鬆 - 雖然今日航班既Loading都幾高, 不過排左廿分鐘之後小弟已經預辦左登機手續。 小弟前晚係網上check-in 時已經揀左位, 而今次小弟左既位係38A, 係臨近機尾既兩個位一排既位。 另外, 今日呢個航班亦有一個目測半本地半內地既旅行團。
地勤亦要求所有乘客將手提行李放上個輸送帶上鎊重, 鎊完之後地勤亦掛左個 luggage tag 係個袋上面, 以作記認。 (Cabin Bag Limit 為八公斤) 作為一間歐洲既航空公司, 此舉其實係十分之常見, 不過將一件隨身既袋放上個行李輸送帶上面, 唔用一個獨立既鎊, 感覺上就唔係好衛生咯。
今次 OS58 則於 206 號閘口登機 - 雖然小弟係首次使用中場, 不過呢個客運廊又真係幾正 - 空間感同光度都同舊既客運大樓相若, 而整體上, 佢係俾到小弟一個好乾淨, 好清新既感覺。
小弟初次報到中場，多多指教
Today's Bird - OE-LPB--- 登機 ---
航班於10:30左右開始登機 - 由於小弟比較少手提行李, 無必要使用頂置既行李架, 因此小弟則故意等到條隊開始消散既時候才去排。
等候登機既秩序都良好既, 不過係小弟差唔多排到櫃檯既時候, 有位操強烈北方口音既長者強行插入小弟同排小弟前面既人之間既個半個身位。 呢位長者插左入條隊之後第一毫秒已經用普通話彈句 "不好意思" 出黎
實不相瞞, 其實小弟係非常佩服呢位長者 - 插左隊之後第一時間就扮同你道歉, 你受佢道歉就係縱容, 而你唔受佢道歉就係你唔夠包容... 小弟眼前既根本就係一位大師 - 一位專業既插隊大師。 地勤見狀都走左過黎講左句 "唔該去隊尾排隊唔該", 不過前方呢位來自北方既大媽有否理會, 相信大家心中有數啦。
登機既程序亦異常地混亂 - 由於呢班機上面有一個大約二十人既旅行團, 呢d團友就係登機時企正係個走廊中心慢慢揀位坐 - 到呢個團所有人士都安坐好既時候, 飛機已經被逼延遲半個小時起飛。
當日亦有不少前往英國既留學生乘坐同一班機
搭長途機最怕就係遇上一d自以為是既乘客 - 上機時有位乘客嘗試'提醒'小弟頭排既 Overhead Bin 已經滿左, 並要求我去後排擺放手提行李 (但係明明個櫃仲有好多位), 臨降落時, 佢仲夠膽死叫人關窗, 話咁樣會阻住人瞓覺, 小弟真係佩服到一個點
別了的日子 像拔去這倒刺
遇各種對手 配上更好鑰匙
--- 膳食 ---
今次既膳食則令小弟大跌眼鏡 - 無論食物既質素同份量上, Austrian 係餐飲上都係比其姊妹公司 Swiss 輸蝕 - 呢個航班既午餐則有沙律及餐包作前菜, 主菜有漢堡扒配薯蓉及時蔬, 而甜品方面就有泡芙; 而晚餐則只有餐包, 芝士醬長通粉 (類似 Pasta Bake 既菜色) 及一件蜂蜜蛋糕。味道方面我覺得呢兩餐則勉強可以接受 -午餐既漢堡扒係得個鹹味, 而個泡芙根本係軟既。 晚餐就比較正常, 個長通粉同個蛋糕用飛機餐既標準黎講係做得幾好食既。
食物既賣相都幾獨特 - Austrian 係使用一個三角形既紙盤上菜 - 雖然外觀同好唔好食係兩回事, 不過個賣相感覺上就幾新鮮既. 食物既份量都算少 - 午餐既份量係偏少, 不過晚餐既份量就真係少得好離譜。 晚餐係降落維也納前兩個小時派發 (香港時間大約晚上九點左右; 奧地利時間兩點左右), 當然, 用歐洲時間黎講, 呢個 'Second Lunch' 既份量係偏細, 但係對於一位已經餓左八個鐘既乘客黎講, 呢個 '午餐' 既份量真係細得好過份。
OS58 Welcoming Snack & Drink
賣相其實係做得幾好，不過份餐既味道則欠佳
份量極不人道的晚餐
--- IFE ---
Austrian 既 IFE 系統則同 Swiss 既 IFE 差唔多質素, 相信兩者既椅背屏幕都係同一型號。 畫質係非常之高既, 而個系統係非常容易上手 - 佢唯一既問題同 Swiss 既 IFE 一樣 - 由於個屏幕並不可以上下調教水平, 身高既人士只可以斜住睇個螢幕。
Austrian 既 IFE 相比 Swiss, 佢既 IFE 內容則比較豐富。 電影有大約一百套, 而大部分都有外語翻譯, 並唔似得 Swiss 咁有電影會只係提供德文或法文。 電視劇同音樂既選擇都算幾多元化, 而遊戲則有 Soduku 等經典 (不過實話實說 - 係一個椅背觸碰式螢幕玩 Soduku... 相信坐前面既乘客想瞓既話真係多得你唔少咯)
小弟今次則睇左 Kingsman 同 Statesman 兩套電影 - 其餘時間則花係篇寫上一回搭國泰 J 去首爾既 浸鹹水遇溺記。
IFE System
Flight Map
--- 座椅 ---
呢部 777-200ER 既座椅係非常難坐 - 雖然Seat Pitch 係有31吋, 不過個座位本身則比較薄同硬 - 坐得個五個小時小弟已經開始覺得有少少腰痛... (其實上次小弟乘坐 Swiss 既 77W 前往蘇黎世時, 其 Cabin Configuration 都係一模一樣, 唔知係張櫈難坐定係小弟已經開始老既關係, 今次呢程機真係難忍受好多 O.O) 張檯感覺上則唔係太硬淨之外, 個座位既 recline 亦嚴重不足, 就算將張櫈調教到最低, 小弟都係難以入睡。
燙衫板.jpg
To be fair, 其實網上有唔少網評都話 Austrian 既商務艙係做得幾好, 可惜 the same cannot be said for the economy class product
唔知大家prefer "myAustrian" 定 "Austrian" 呢個品牌名稱呢? 
安全卡及其 inflight magazine
--- 服務 ---
Austrian 提供既 Cabin Service 同 Swiss 既服務亦差唔多。 Flight Attendants 既態度係好 helpful 同 caring, 不過由於人手不足既關係, 因此佢既服務係同小弟預期中既有些少落差。
--- 維也納 ---
經過十一個鐘既航班之後, 小弟乘坐既 OS57 則順利抵達奧地利既首都 - 維也納。 可惜由於今次小弟係維也納轉機既時間比較短暫, 小弟經過保安檢查進入 air-side 之後就直接前往閘口。 閘口亦有一個非正式既證件檢查 - 閘口人員確認乘客有一個正式既簽證或有回程機票後, 乘客才獲放行登機。
雖然圖中 Vienna 既 Airside 係比較陰沉, 不過其 minimalistic 既 approach 小弟係幾欣賞
其實的確今次小弟只係預留左五十分鐘既轉機時間 - 雖然個轉機時間係非常緊湊, 不過由於 OS 455 為當日最後一班前往倫敦既航班, 因此小弟只好硬住頭皮照換呢張機票
--- OS455 ---
OS455 則係一程非常標準既歐洲內陸航班 - A319 既機艙係採用一個 3+3 既 Layout, 而比較特別既係呢個航班係有提供收費流動上網服務, 不過價錢就算係偏高既。 膳食方面, Austrian 則提供左一個巧克力餅乾 (反觀英航既 M&S Buy on Board, 其實呢趟歐洲短途機有嘢食已經好過佢既對手一大步 xd) 座椅則不過不失 - 感覺上呢部 319 既座椅係同部 772ER 既座椅差唔多, 不過用一個短途機既標準黎講 呢張座椅則還可以~~
OS455 於兩小時候順利抵達希斯羅機場, 為呢個十六小時既旅程畫上句號。 希斯羅今日係奇怪地高效率 - 小弟等左十分鐘就已經入左境, 而小弟既行李係十分鐘後已經係個輸送帶上面出現。
OS455 上的小食
安全卡及其 inflight wifi 的說明書
Patience is a virtue~~
--- Verdict ---
總括而言, 今次既飛行體現真係令小弟感到失望 - 雖然 Austrian 係一間 Skytrax 既四星航空公司, 不過其經濟艙既 Product 真係俾唔到小弟一個四星既感覺。 同時, 遇上行為上多名比較自我既乘客, 令成件事雪上加霜。 相信日後除非小弟既目的地為奧地利, 小弟都未必再次乘坐奧地利航空。
P.S. 下一回 浸鹹水遇溺記 小弟會去 Filton 既 Aerospace Bristol 探訪已保留既和諧號客機 - G-BOAF - Stay tuned!
小弟既其他飛行報告 浸鹹水遇溺記 第一回 LX139 LX460 HKG-ZRH-LCY 巧遇 Avro RJ100 的故事 浸鹹水遇溺記 第二回 BE1429 SOU-EMA 一個乘搭 Repositioning Flight 的故事 浸鹹水遇溺記 第三回 KL888 KL1515 HKG-AMS-NWI 尋找 Fokker 70 的故事 浸鹹水遇溺記 第四回 KL1426 KL887 BHX-AMS-HKG 被 Avro RJ 尋找的故事 |
樓主