十四鄉落禾沙瘋狂起樓，第時沙田馬鞍山塞到爆？

十四鄉項目正動工中。其座數與柏麗灣相若，人口與愉景灣相若，樓盤規模可想而知。惟相應道路工程只包括擴闊十四鄉一段西沙路，附近幹道，如馬鞍山繞道、馬鞍山路並無任何擴闊措施。

更糟的是，附近的落禾沙近年亦大肆發展。十年前還是一片荒蕪的白石半島，近年陸續落成迎海、星璉海、雲海等樓盤，還有大量發展中項目。這些新盤以中產為主要住客，擁有私家車者眾多。

事實上，近年馬鞍山繁時的塞車問題已不斷惡化，這與上述發展明顯相關。大老山公路繁時的車龍愈來愈長、愈來愈早出現。毗鄰的沙田，各幹道於繁時的塞車狀況亦日趨惡劣，當中特別以大老山隧道情況為誇張。

令人遺憾的是，政府似乎並無任何即時計劃紓緩沙田/馬鞍山的塞車情況。單是一條T4幹道，至今仍然杳無音信。而當局盲目批准發展商在十四鄉及落禾沙瘋狂建屋，無視附近道路系統早不勝負荷，更見其計劃欠周全及視野欠全面。在十四鄉的泥頭車每天出出入入間，等待著馬鞍山與沙田居民的，似乎是個恐怖的未來－數目倍增的私家車、里數倍增的車龍、時間倍增的車程……這些情景，會成為十年後馬鞍山的實況嗎？

加大老山隧道費咁咪無咁易塞車

miklcct 發表於 2019-9-6 18:07
加大老山隧道費咁咪無咁易塞車

咁樣最多只係推翻啲車去獅隧塞。於事無補。

講嚟講去用私家車
成本太低,除非做到
最高層嗰幾%否則都幾難
返工地點有專用車位,電子
道路收費呢就預咗無法通過
㗎喇,巴士的士都話要一齊交,
商用車咪將佢計入成本之嘛,想
調升違泊罰款都係識「檢討」
停車場收費加加吓有啲地區仲
貴過牛肉乾,更甚就係敢抄唔敢
拖,Double park或阻塞路口亦然。

T4甚至新隧道都係唔夠
將牌照數量封頂有效。

kitarolo 發表於 2019-9-6 18:53
講嚟講去用私家車
成本太低,除非做到
最高層嗰幾%否則都幾難

馬鞍山淨係恆耀安堆單位，有七八成係居置屋，仲未計93年打後入伙嘅私樓同錦英山，我相信以馬鞍山情況嚟睇，實際上以公共交通工具出入嘅居民係冇可能佔少數（包括市中心/海皮 [但唔包括烏溪沙白石十四鄉] 嘅中產）。

而嗰堆私家車根本係沙士之後先至成為中產居民嘅主流用車，以馬鞍山道路設計嚟講，撇除私家車呢個外在因素，當年話T4冇迫切去起又唔係冇道理。

依家下繁搭轉大老山線，巴士反而變咗少數，而嗰堆私家車先至係做成大老山慣性塞成2km嘅主要原因，我仲未講嗰堆快線/切線L而做成不必要嘅塞車。

馬鞍山之所以近年咁塞車，咪就係多得嗰堆大地產商唔少，平均買一個烏溪沙單位送個半車位，就連泊車費都慳返，住得烏溪沙班中產，只要月入夠高，養得起私家車，跟本就唔會Show你條巴士線。成個烏溪沙私樓對交通有較大需求嘅就只有銀湖天峰同翠擁華庭，對面往得迎海嘅都非富則貴，有車代步，仲點會同你搭巴士慢慢兜。當年sell銀湖天峰嘅時候，我仲好記得係以馬鐵上蓋做賣點，反而巴士線就成為次要，對比前幾年迎海開賣時候嘅宣傳手法係完全唔同哂，結果就做成烏溪沙巴士線唔湯唔水嘅局面，一邊就對巴士線需求大，另一邊好唔爭氣咁揸車代步。

要巴士公司開線走去陪塞隧道口車龍，仲點會有心同你改善服務。

九月開學,新城市個位
晚上8點仍然龜速,暑假
一般1930就會順返,無理由
放學咁夜㗎……大量私家車由
沙田鄉事會路、火炭路、甚至
水警基地嗰邊轉返過去,尤其前
兩者有紅燈係倒塞主因,唔肯定
啲車係唔係全部返馬鞍山。

我比較常用大老山入馬鞍山嘅，我都留意咗好耐大老山公路入馬鞍山條慢線，間唔中都車多而行車緩慢，後少少大涌橋路直落公路條慢線，經常都要同巴士喺中線同慢線之間爭位入，令到堆巴士埋完濱景唔可以一次過過翠湖盞燈上埋迴旋處。

所以我都幾肯定大涌橋路直落公路慢線嘅好大機會係入馬鞍山，至於入去邊區就好難去深究。不過連同你所講嘅情況，似乎事出有因，唔多唔少都有關係。

十四鄉埋新盤，無咁快會起好，不過就算唔計十四鄉入伙，宜家大老山隧道出九龍都已塞到傻，尤其開咗學宜幾日更甚，朝早七點多啲已開始塞，最慘係近一星期搭鐵又有危險，搭巴士又塞住成粒鐘，真係去邊都死，相信只有小巴出大圍轉車一途比較好少少。

RyanPun 發表於 2019-9-6 20:21
馬鞍山淨係恆耀安堆單位，有七八成係居置屋，仲未計93年打後入伙嘅私樓同錦英山，我相信以馬鞍山情況嚟睇 ...

我又唔係完全同意。好多買落禾沙樓嘅人未必真係有錢，只係買細單位充大頭鬼嘅首置人士。所以烏溪沙站馬鐵同巴士近年都多咗好多人搭。當然亦有好多中產甚至大陸土豪買咗落禾沙樓，其實迎海有咁多座，只要一半住客有車都已經好大穫。所以當有四十幾座樓嘅十四鄉項目落成後，馬鞍山交通會變成點，我真係冇眼睇。

kitarolo 發表於 2019-9-6 18:53
講嚟講去用私家車
成本太低,除非做到
最高層嗰幾%否則都幾難

我非常贊成限制私家車數目增長。但究竟係咩原因，令政府連提都唔敢提呢樣嘢。