本帖最後由 okt05032 於 2020-8-13 20:12 編輯
背景: 小弟係英國玩咗10日終於要返香港。呢份飛行報告就會介紹國泰新嘅J Class service同埋佢地係倫敦希斯路機場嘅自家貴賓室。
航班編號:CX254 飛行日期:17-01-2020 座位:12A 飛行時間:11h07m 計劃出發時間STD/實際出發時間ATD:22:05 (GMT)/ 22:56(GMT) 降落時間:18:03(GMT +8)
國泰航空嘅航班係由三號客運大樓出發。Terminal 3 亦都係 VS、部份One World 成員(例如AA,QF,部分BA航班)同其他唔屬於任何航空聯盟航空公司用嘅客運大樓。 因為小弟今次坐商務艙,就可以用LHR嘅特快出境通道 國泰航空倫敦希斯路機場貴賓室 CX係LHR T3有佢自己嘅貴賓候機室,就係T3 11號閘口附近,去到門口坐電梯上一層就到。值得一提嘅係,呢個貴賓候機室係國泰唯一一個有頭等貴賓室嘅外地貴賓室。呢個Lounge係2016年翻新過,新裝修嘅設計風格就好似香港嘅玉衡堂同埋玲瓏堂。整體來講,貴賓室嘅設計用咗比較深嘅色調同柔和嘅燈光,比人一種好溫暖嘅感覺。 經過洗手間同淋浴間後,小弟就去到國泰貴賓室最出名嘅Noodle Bar。當日除咗有即製擔擔麵同點心拼盤外、亦都有雲吞麵、魚蛋粉、麵豉湯同埋雞肉炒飯。 Noodle Bar 對出就係用膳區。二人枱同四人枱就佔多數,中間就有兩張長枱。每一個卡位上面都有一盞枱燈,應該就用嚟補光嘅。 小弟就叫咗份點心拼盤同埋擔擔面。碗擔擔麵嘅花生味都幾重同埋個湯就比較杰,同埋唔係幾夠鹹。不過小弟都幾鍾意呢個煮法,我差啲想叫多碗。個點心拼盤就各有一隻蝦餃、素蒸餃、叉燒包。個叉燒包係唯一一件合格嘅點心,最少個包啲叉燒有適當嘅調味,同埋個包係蒸得啱啱好嘅。至於個兩粒餃都蒸得好乾,甚至乎粒蝦餃係穿晒窿,不過啲蝦都幾彈牙嘅~ 小弟食完嘢之後就入去貴賓室嘅休息區坐下。呢度就有個小型嘅Buffet Area供應啲飲品同凍/熱食,例如星洲炒米、沙律、Jing 茶包等等。 呢一度亦都有好多soft drink俾你揀仲有嘉士伯生啤,可惜當日部機壞咗所以冇得試。 呢個貴賓室亦配備一個酒吧,除咗有基本嘅酒水外,Cathya Delight 同Oriental Breeze呢兩款國泰嘅招牌飲品亦都係度搵到。小弟就叫咗一杯Cathay Delight同一杯Cosmopolitan。 小弟最鍾意呢個Lounge嘅坐位擺法。有好多位都對正落地玻璃,而出面就係停機坪。景觀都幾開揚。大部分對正停機坪嘅位都係連Leg Rest嘅梳化,坐係度一路飲杯野一路睇飛機簡直一流。 呢隻位小弟都幾鍾意。主要貪佢嘅私隱度高同埋好舒服,如果有埋Leg Rest就Perfect啦。 喺貴賓室嘅盡頭就有一個Business Center,呢度就放咗幾部iMac同Printer比人用。 洗手間亦都用上Aesop產品 小弟原本打算沖個涼先上機。不過浴室係超級無敵多人排隊。小弟登記嘅時候有16個人排係我面前。大約過咗1個鐘頭後都仲有大約10個。所以想用浴室嘅,小弟建議預留時間早啲到機場同埋一入到Lounge去登記排隊啦~ 個日CX254用34號閘口,同Lounge距離15分鐘路程。又係需要預留體力同時間行去閘口。因為前一班嘅CX253 delay咗所以連帶CX254都延遲左。 今次帶小弟返香港嘅就係呢架六歲半嘅777-300ER,註冊號係B-KQG。呢架機亦已經翻新咗,加咗Wi-Fi,Y Class變咗做3-4-3,J Class IFE轉咗新介面,F Class就換咗新椅套、高清mon同類似 CX A350 J class個款遙控。 呢隻77W嘅商務艙分開咗兩部份(前面8個位,後面45個位,total 53個位)座椅就用咗2010年尾推出嘅 Zodiac Cirrus 反魚骨式座椅。個位嘅闊度有21吋闊,而pitch更加有成82吋,較平之後就會變成一張長約2米嘅床。 小弟嘅座位12K,枕頭,床單同埋被鋪已經一早放咗喺個位上面。Compartment入面就放咗一份Bamford amenity kit,一支鑽石能量水同埋一副Noise canceling 耳機。 架機翻身完之後IFE介面都更新咗,但係個螢幕就冇轉做高清,咁所以就會出現Y class有高清Mon但係J class就冇嘅搞笑現象。
CX J Class 嘅Amenity kit係2019年開始轉咗由英國嘅Bamford提供。Amenity kit入面就包左以上呢幾樣野,嗰三支綠色嘅嘢分別係潤膚霜、保濕噴霧、唇膏。
新J class service加入嘅拖鞋同埋新設計嘅餐單
上機之後小弟就收到熱毛巾同welcome drink
呢一份就係國泰新設計嘅餐單,同一份免費報紙差唔多咁大。入面除咗會講呢班機有咩食有咩飲之外,仲會介紹唔同地方嘅特色餐廳,CX嘅飛機餐等等。就好似睇緊一本雜誌咁樣。
呢一張卡就係同FA講要唔要早餐,如果要嘅你就可以揀你想要乜嘢。有一個位小弟覺得貼心嘅係,你可以揀如果你仲瞓緊就唔會俾人叫醒食早餐。咁你就可以爭取時間瞓耐啲。小弟揀好咗份早餐要啲乜之後, FA就喺起飛前收就以張卡。
喺新嘅meal service下,客人可以係六款主菜入面揀一份。FA會喺起飛前為所有乘客點餐同埋記錄低所有乘客嘅要求然後逐個逐個送餐。換言之如果客人想休息嘅就可以同空務講聲,咁就可以起飛後直接瞓。呢個方法小弟係好欣賞,多數客人都一早係Lounge食飽咗之後就上機瞓。咁就唔使好似以前咁等到全艙嘅客人食完先熄燈瞓覺。小弟就揀咗燴牛臉頰肉配薯蓉同辣麵團。份牛肉燴得好軟熟,食落口就比較散,不過個擺盤都好靚。整體來講算不過不失啦。
甜品:蛋白檸檬杏仁酥
晚餐之後小弟都仲覺得有啲肚餓,所以就叫咗個漢堡包食。漢堡包入邊有芝士,牛肉同埋牛油果蓉,另外配上沙律同薯條。如果係熱辣辣嘅話應該都幾好食,可惜份漢堡包整得唔係幾夠熱,小弟食落口嘅時候發現個包係凍嘅。
食完飯之後,小弟就將個位調較成一張床。新J class service最大嘅升級莫過於提供床單同埋被鋪,啲寢具亦都係由Bamford供應。小弟覺得最正嘅係佢哋新出嘅羽絨被,又䁔又舒服。
小弟瞓咗大約六個鐘頭之後就醒咗,呢個時候仲有兩個鐘頭就會降落香港
起身之後又再收到一塊熱毛巾
小弟起飛前order嘅早餐,係降落前大約兩個鐘頭就送咗過嚟。呢一份係蕃茄牛油果蛋白omelette配煙三文魚,另加一份水果、牛角酥同埋朱古力丹麥酥。小弟都幾鍾意佢哋啲三文魚嘅。用蛋白嚟整嘅omelette小弟都係第一次食。呢種就比較鬆化,冇普通omelette咁實。但係比較油,如果啲油少啲應該都幾好食。
總結:
CX LHR嘅貴賓室係一個好舒服嘅貴賓室,硬件方面其實做得唔差。不過啲嘢食只係中等,仲有進步嘅空間。曾經有人講過坐商務艙係可以將所有坐飛機嘅問題解決晒。今次小弟終於明白呢個道理。雖然啲嘢食質素的確有待改善,但係張凳真係非常之舒服。總係覺得今次旅程嘅時間過得特別快。飛完呢班機之後,我就發現CX嘅硬件係做得好,但係軟件就差小小。
小弟比較少寫飛行報告,請各位多多指教,謝謝。
|