本帖最後由 HZ8186 於 2020-3-8 08:39 編輯
係香港渡過三個月暑假後, 小弟係時候翻英國展開小弟既最後一年留學生崖。今次小弟唔會直接飛英國, 而會先搭 Finnair 去阿姆斯特丹遊玩四日, 再搭 Flybe 前往 East Midlands Airport。今個飛行報告係記錄小弟 RIX-HEL-HKG-HEL-AMS Multi-City Itenary 既下半部, 如閣下有興趣, 不妨睇埋小弟上回遇溺記 ~~
-- TLDR --
1. 芬蘭航空既 A350 經濟艙係非常好坐 - 座位既 recline 係非常足夠, 而座位設計亦係為長途航班設計, 小弟亦係航班上瞓足六小時。 2. 唯芬蘭航空 ex-HKG 既派餐則比較弱 - 份量係足夠, 唯晚餐同早餐係味道上則有改進空間
3. 由於飛機遇上軟件問題, 航班最終係延誤八十分鐘到達赫爾辛基, 唯芬蘭航空既處理係做得好好 - 係準備降落既時候已經宣佈航班接駁安排, 而芬航亦特意延誤小弟既接駁航班, 確保乘客有足夠時間轉乘~~
4. 小弟認為芬蘭航空既價格係非常合理 - 呢個 RIX-HEL-HKG-HEL-AMS 既 Multi-City Itenary 埋單只係 €500 (連稅) - 係歐元匯價長期低迷既情況下, 呢四張機票只係用咗 $4400 鬆少少
--Flight Info--
AY100 HKG-HEL OH-LWE Airbus A350-900 STD 0025 ATD 0256 (GMT+8) STA 0600 ATA 0721 (GMT+3)
AY1301 HEL-AMS OH-LZC Airbus A321-200 STD 0810 ATD 0825 (GMT+3) STA 0940 ATA 0947 (GMT+2)
-- 香港國際機場 (HKG) --
相信睇呢篇 遇溺記 既讀者大多都係香港人, 赤鱲角機場我係呢度就唔多詳細介紹啦 - 當晚小弟係登機閘口 whatsapp 同家人報咗平安之後, 就再次登上 Finnair 既 A350, 等候芬蘭航空把小弟送到位於 7821km 外既赫爾辛基。雖然小弟係急不及待前往荷蘭遊玩, 不過睇黎部飛機係想係香港留多陣 - 飛機於凌晨準時 pushback, 唯滑行到 HAECO 對出等候起飛時, 機組人員遇上軟件問題。回到停機坪處理軟件問題後, 航班最終係香港時間凌晨三點起飛, 並往芬蘭進發。
--AY100--
今日 AY099 航班係由 OH-LWE 執飛, 呢部一部三歲半既 A350-900 同其他芬蘭航空既 A350 一樣, 機上都係用一個 46JCL, 43PEY, 208YCL 既座位佈局 - 經濟艙係一個 3-3-3 既座位排位, 而每排座位皆有 32 吋既櫈距。由於座位係有一個 'generous recline', 座位舒適度係非常高既。同時, 每個座位都有一個 USB 同 Universal Power Outlet, 而上機時每個座位上都有毛氈, 枕頭, 耳機同一樽屈臣氏蒸餾水。
機上膳食方面, 芬蘭航空提供既晚餐同早餐都只係一般 - 晚餐有一份沙律, 餐包同蛋糕, 主菜為咕嚕肉飯配娃娃菜, 而早餐為英式 - 有一份俺列, 腸仔, 薯仔, 茄汁豆同菠菜, 配一份生果,餐包同奶酪。份量上, 呢兩個餐係啱啱好既, 唯味道上佢有唔少改善空間 - 晚餐既調味係偏淡, 而早餐既菠菜係帶有苦澀味。另外, 由於機上係實行一個半 Buy Onboard 既政策, 除咗兩個正餐之外, 經濟艙既乘客係要自行付費購買小食同酒精類飲品 - 如果閣下係比較大食既, 小弟會建議閣下帶少少零食同乾糧上機食~~
機上既 IFE 個 User Interface 係容易使用既, 唯 IFE 係內容上係比較缺乏既 - 如上回 遇溺記 提到, 其 IFE 系統係只有少量紀錄片同電視劇可供點播, 而唔少記錄片同電視劇係只有外語配音同字幕, 連英文字幕都無, 因此芬航既 IFE 選擇係相對上較貧乏既~~ 小弟反而幾欣賞 IFE 既首頁 - 除咗顯示航班資料之外, 芬航既 IFE 首頁亦有顯示機上服務既時間序 - 呢個資訊係非常實用 - 除咗可以知道幾時開飯之外, 乘客亦會知機組人員會幾時調暗機艙燈光, 準備於機上小睡。
即使航班遇上強烈既尾流, 航班最後係當地時間 07:20 抵達赫爾辛基, 比原定降落時間延誤八十分鐘。機組人員亦於準備降落時作出廣播, 向各乘客提供接駁航班既資訊 - 有唔少前往中歐既乘客係被 rebook 上漢沙集團既航班, 改經法蘭克福或漢堡轉機前往最終目的地, 而芬蘭航空亦特意推遲倫敦及阿姆斯特丹既起飛時間, 以確保乘客有足夠時間穿過入境及安全檢查。
-- Helsinki Vantaa (HEL) --
航班於當地時間 07:20 降落赫爾辛基, 不過今次小弟係無機會慢慢享受 Helsinki Vantaa Airport - 穿過入境同安全檢查小弟就直接前往 AY1301 既閘口。係赫爾辛基入境係唔駛等咁滯, 唯小弟當日排隊等候安全檢查則等咗二十分鐘左右。
-- AY1301 --
今日 AY1301 係用 OH-LZC 執飛, 為一部十九歲既 A321 - 機上係有 36 排 3-3 既座位, 櫈距為 31吋, 而整體上小弟都係坐得舒服既。一個比較大既缺點則源自飛機既年齡 - LZC 已經十九歲, 而機艙內有唔少配置, 例如飛機既 overhead tv 等, 都係好有懷舊風, 而機艙內亦有唔少旁板顏色偏黃。 當然, 呢個問題純粹係影響感官而已 - 相信衛生同保養上芬蘭航空都做得足既, 不過呢樣嘢則令小弟扣咗佢少少印象分咯~~
Finnair 既 inflight service 係同小弟三個月前乘搭既 RIX-HEL AY1072 一樣 - 航班係會提供飲料, 唯酒水同小食則要另外自費購買, 而小弟依舊叫咗杯藍莓汁飲。唯小弟係當晚只係瞓咗六小時, 最後小弟都係不敵睡意, 並瞓足呢 2h30 既航程。
-- Amsterdam Schiphol (AMS) --
AY1301 於當地時間 0940 降落阿姆斯特丹史基浦機場, 為小弟既芬航體驗作一個總結。由於航班係 intra-schengen 既關係, 落機後乘客係可以直接再進入 Airside ,無須再次通過安全檢查。攞翻行李後, 小弟買咗張 Amsterdam Region Pass, 並展開小弟既四日三夜荷蘭之遊。
小弟係今次荷蘭之遊係有拜訪唔少航空迷勝地 - 除咗去 Schiphol 打雀同光顧飛機模型批發商 Aviation Mega Store 之外, 小弟亦有拜訪位於 Lelystad 既 Aviodrome 博物館 - 呢個博物館係收藏唔少同荷蘭航空業相關既展品, 例如 Fokker 同 KLM 既客機。小弟正為呢個旅程寫博物館報告, 敬請各位期待~~
-- Verdict --
整體上, AY099 同 AY1301 既飛行體驗只屬一般 - 雖然芬蘭航空 A350 既座位同機艙舒適度係偏高, 不過其膳食同 IFE 皆有唔少進步空間。當然, 係一個 red eye 航班上, IFE 同膳食未必會係航班既重點, 不過如果閣下係搭日間既 AY101/AY102 小弟會建議閣下自備娛樂。 不過如閣下唸住搭晚間既 AY099/AY100, Finnair 既 A350 係幾適合既~~ (如閣下早已經刨曬 Marvel 既戲 - 搭 Finnair 會係一個溫書既好選擇添)
究竟 A350 係咪係乘客體驗上比上一代客機有進步呢? 小弟係可以好肯定咁答 - 有。雖然小弟第一次搭 A350 時候唔係太覺, 不過小弟係九月頭搭咗三次 B757 後再次踏上 A350 既時候, A350 既優點反而好明顯。機艙設計同窗口大小係上文提過, 不過 A350 機上既空氣濕度同氣壓真係令小弟佩服。搭 Air Astana 既 757 既時候, 小弟瞓咗四小時已經覺得喉嚨乾; 反而今程 A350 小弟搭足全程都唔覺口乾, 可見 A350 機上既氣壓同濕度都比上一代客機有進步~~
唯小弟則覺得芬蘭航空既 Branding 有少少過量單調同無變化。我明白呢間北歐既航空公司會用白色同深藍色做主調,不過 A350 機艙入面基本上係咩顏色都無, 真係有 "芬蘭航空" 影子既物品真係少至有少。芬蘭航空係有同當地時裝品牌 marimekko 做合作, 而用餐時到處都會見到佢既身影, 不過小弟反而覺得佢有少許喧賓奪主 - 究竟小弟而家搭緊 Finnair 定係 marimekko air 先?
Finnair 既 Buy Onboard 概念對小弟而言係幾得意既 - 芬蘭航空並非第一間於長途航線上轉為提供 Buy Onboard 既傳統航空公司, 不過近年開始有唔少航空公司跟隨呢個方向修改長途經濟艙既服務, 相信 SAS 同 Etihad 就係一個好例子。當然, 呢類型改動都係以縮減開支為主, 不過當各航空公司都向呢個方向走既時候, 唔知十年後既 "標準長途經濟艙" 體驗會係點呢? 而屆時 小食,酒精類飲品等 會否被標為經濟艙入面既奢侈品呢?
Finnair 既 Business Case 亦幾得意既 - 芬蘭航空近年以 "Fly the short northern route" 為招徠, 利用地理優勢 積極發掘亞洲-歐洲既客源。係呢個發展方針下, 除咗服務香港, 曼谷, 東京等傳統航點之外, 芬蘭航空係亞太區亦有唔少二線城市航點, 例如 南京 西安 名古屋等, 而芬蘭航空於未來亦會服務札幌新千歲, 釜山等城市。雖然芬蘭航空既規模係遠遠不及歐洲既航空業大頭 Lufthansa Group, AF-KLM 或 IAG 等, 不過 Finnair 似乎成功係一個極度飽和既歐洲航空市場入面搵到一個屬於自己既定位, 而呢點係可喜可賀既。
總括呢篇飛行報告, 小弟既芬蘭航空經濟艙體驗係正面既 - 如果閣下係由香港前往北歐既, 相信芬航會係一個唔錯既選擇~~
唔知點解小弟每次行過塊地氈都覺得個感覺既熟悉又生疏... 小弟今年第四年出國讀書, 或許已經對呢塊地氈既質感唔陌生, 唯每次小弟搭上呢塊地氈則代表小弟會離家半年, 搭上呢塊地氈既時候心情無疑係有少少沉重既。
雖然小弟係急不及待前往荷蘭, 唯部機睇黎有少少留戀香港... 航班滑行十分鐘後就 Ground Return
小弟係非常鐘意呢個版面 - 唔少有用資料可以係呢個版面搵到, 而呢個介面係簡單易明
芬航 ex-HKG 晚餐: 咕嚕肉飯配娃娃菜, 配沙律, 餐包及蛋糕 - 份量上啱啱好, 唯味道上則有改善空間
芬蘭航空簡潔易明既安全卡
芬航 ex-HKG 既早餐: 俺列腸仔配薯仔茄汁豆同菠菜 - 其實煮熟咗既菠菜真係唔擺 - 質地做到一 pat 嘢咁, 仲帶有苦味添
[手機相請見諒] A350 既 Aileron 會於降落時同擾流器一齊升起, 以達致 lift-dumping 同增加阻力既效果
Finnair 既 A350 經濟艙係採用一個標準既 3-3-3 排位, 而 Seat Pitch 則為 32"
Helsinki Airport, Schengen Area - 同所有歐洲機場中型一樣, 呢個機場都係 Compact & Navigatable~~
Helsinki Airport, Aukio - 呢個空間會播放芬蘭郊區既景色同聲音, 而地點同季節會每十分鐘轉一次。旅客可以係呢度小休片刻之餘, 亦可以感受芬蘭既大自然~~
小弟既第二程機會由一部 A321 執飛 - 呢種機型係歐洲內既中短途線上係非常常見, 而呢部機係一共裝有 209 張經濟艙座位
又不是八十年代 寂寞芳心的愛 係吖, 不過機上配置係九十年代咯
同 A350 既安全卡一樣, 芬蘭航空 A321 既安全卡都係簡潔易明既
對 確實有一場干戈 再 也沒法倒如當初 其實倆心清楚 如像摧毀溫室的猛火
降落 AMS - 留意客運大樓上面有一部 KLM Fokker 100 - Schiphol 係天台設置一個 Observation Deck, 無疑係一個飛機迷必去既攝點黎~~
Finnair 既 A321 係採用一個標準既 3-3 全經濟艙排位, 而 Seat Pitch 則為 31"
由於航班係一個 intra-Schengen flight 既關係, 乘客到達阿姆斯特丹之後係可以直接步入 Schengen 部份既 Airside, 而無須再次經過安全檢查
到達阿姆斯特丹之後, 小弟第一件事就係黎咗呢間 Aviation MegaStore 朝聖 - 唔知有無版友黎過呢度傾家蕩產呢?
小弟既飛行報告就係呢度暫告一段落 - 多謝大家收睇小弟既第十六回 遇溺記, 小弟之後會推出荷蘭航空博物館 Aviodrome 既博物館報告, 希望大家繼續支持~~
如果閣下鐘意小弟既飛行報告既話, 不妨睇埋小弟之前寫落既浸鹹水遇溺記~~ 第七回 BE7671 NCL-BHD-IOM 尋找 Jetstream 41 的故事 - 不日推出 第八回 BA3287 IOM-LCY 一個避完稅走去翻學既故事 - 不日推出 第十六回 AY100 AY1301 HKG-HEL-AMS 阿姆斯特丹夜機 第十七回 拜訪荷蘭航空博物館 Aviodrome - 不日推出 第十八回 BE1094 AMS-EMA 重逢 Dash 8 的故事 - 不日推出 第十九回 拜訪協和號試驗機 - IWM Duxford - 不日推出 第二十回 拜訪 RAF Museum - Cosford - 不日推出 第二十一回 拜訪協和號試驗機 - Brooklands - 不日推出 第二十三回 SN2093 BRU-LHR 初嘗布魯塞爾航空 - 不日推出 第二十四回 EI283 LCY-DUB 尋找 Avro RJ 的故事 - 不日推出 第二十五回 FR534 DUB-EMA 初嘗瑞恩航空的故事 - 不日推出
|
樓主
