本帖最後由 HZ8186 於 2018-10-4 18:48 編輯
"九月六號凌晨, 北海道發生一場六點七級地震, 震央係千歲以東南, 而地震深度係四十公里"
當晚小弟正係登別市留宿 - 起初我以為日本位於地震帶, 今次地震級數又唔係特別強, 應該無咩問題咁就翻入去酒店瞓覺啦。唯小弟八點起身睇手機時先知事態嚴重 - 原本安排左當天乘搭香港航空回港, 唯札幌機場關閉至少兩天既情況之下, 香港航空已表示候補機位最快要星期一甚至星期二先有機會有。本身小弟係唔介意等多四五日既, 唯家人有工作需要, 所以今次真係有需要星期日前翻到香港。 香港航空係日本既 Ticket Office 係完全打唔通, 而親友係香港辦理改機票經過好多次打電話, 斷線, 再打電話, 同再斷線後, HX 就俾我地星期六係成田出發返港, 不過落東京既交通費則要自付。
其實本身北海道新幹線一早已經因為颱風二十一號而停駛, 加上地震後北海道係整個島都停電既關係, 北海道新幹線 既復運基本上係遙遙無期。係陸空交通都癱瘓既情況下, 係北海道落本州則剩一個: 係苫小牧 (千歲以南) 或函館搭汽車郵輪走。 係苫小牧開既郵輪有幾個目的地 - 八戶, 仙台同大洗 , 係前兩個目的地既船都滿曬既情況下, 咁小弟則選擇乘搭呢班 "北海道直達首都圈" 既 MOL Ferry Sunflower, 0130 係苫小牧開, 十八個小時後到達大洗港, 每位各 ¥10,700。
雖然整個個北海道都係停電, 不過苫小牧既客運碼頭係有有限度既電力供應。 不過由於自動售票機都全部無開, 所有船票都係人手賣, 排隊購票都花左唔少時間。 同時, 基於停電既關係, 碼頭裡面所有鋪頭都係上左閘, 小弟則只好等上左船之後先買晚餐食。雖然班船係 01:30 開, 不過登船就係 22:30 開始。 由於登船橋係用電力驅動既, 今日登船係經過汽車甲板進入客艙既。 (留意翻一日係有兩班船行呢條航線, 一班開 18:45 而另一班開 01:30 - 18:45 個班既設施係比較完善, 唯小弟買唔到呢班船飛, 因此只好等多六個小時搭下一班船)
船上面既設施則一般 - 由於呢班船主要係設計搭載重型車輛, 呢部 Sunflower 既客艙都係簡樸務實為主, 而目測唔少乘客都係貨車司機。 同時, 船上亦有唔少駕車落本州既家庭, 亦有同小弟一樣無車只係搭船既旅人。
船上既寢室則算可接受。 雖然船上既普通房係要同另外三位共用 - 不過空間係足夠既, 而張床係舒服既。 每個床頭都有一個插頭同燈光, 而落左窗簾後個私隱度係ok既。另外, 船上係沒有獨立既梳洗設施 - 佢係有一個大浴場, 而呢個浴場既使用方法則同日式溫泉既浸法一樣。
船上並沒有餐廳, 取而代之既係一部部賣杯麵同叮飯既自動販賣機。 食品既價錢尚可 - 一個合味道賣 ¥210, 而叮飯則賣 ¥550~650 不等。 船上亦有多部售賣啤酒既販賣機, 唯船上有限制可以售賣酒精飲品既時段, 所以由晚上十一點至翌日五點, 呢幾部機係被鎖上既。
船上娛樂係非常有限 - 雖然船上係無 Wi-fi 提供, 不過船上係有一堆漫畫書同雜誌可供借閱。 同時, 船上亦設有幾部 Claw Machine 同 Slot Machine。 不過由於小弟睇唔明日文既關係, 小弟船上既娛樂係瞓覺, 打呢篇 "出北海道記" 同聽歌。 另外, 由於是日航程係沿本州既東岸行走, 因此小弟既手機偶然都會收到岸上既訊號。
係航行十八小時同食左三個杯麵之後, "Sunflower" 終於靠近大洗港, 為小弟既 "出北海道記" 畫上一個句號。 上岸後, 小弟搭巴士到水戶駅, 再轉乘常磐線去上野駅, 係上野留宿一晚, 等待翌日前往成田機場。
總括呢趟汽車郵輪既旅程, 呢個係一個幾難忘既體驗 - 之前經常會聽朋友講述係日本搭內陸機同新幹線係日本高速穿梭既經歷, 不過今次呢個慢船對小弟黎講係另一翻體驗。 就算閣下唔係逃離北海道, 呢班船都係值得一試既 (不過一定要搭早個班船)。
係船上無訊號既十八個鐘之間, HX 已經取消左小弟既 Bookings 而俾左個位另外幾名乘客。 係之後四日東京既航班都爆曬既情況下, 小弟最後係被逼明天搭 JR 去岡山搭九月八號既 HX 翻香港。 幸好小弟係有買旅遊保險, 如果唔係呢程 ¥10,000 既船同 ¥16,000 既新幹線真係貴到入肉
|