北環線南延走線及服務地區探討

係本站同其他交流平台, 都有提及過政府要求港鐵研究北環線地底走線方案, 以代替其原來之高架方案。地底方案於錦上路站會預留南延往市區之條件, 舒緩屯馬線 (西鐵線) 大欖隧道一段嘅擠迫情況。以大西北嘅發展規模同係屯馬線不停加站嘅情況下, 我認為北環線南延市區反而有其迫切性, 希望呢個帖可以拋磚引玉。

錦田/八鄉一段走線
北環線錦上路站如無意外會係現時預留位置嘅地底, 故走線由南面引出後會先經過八鄉維修中心地底, 大致同屯馬線平行。因應八鄉維修中心會有上蓋物業發展, 可考慮先於走線附近先興建近似於古洞站之預留結構 (shell station), 再按上蓋物業發展時間將車站裝修投入服務。穿越大欖郊野公園之隧道走線會於屯馬線大欖隧道以西。

荃灣一段走線
屯馬線荃灣西站地處邊陲, 雖然西站現時有上蓋物業, 及楊屋道以南一帶私樓支持, 但對於傳統市中心一帶仍然頗遠。加上屯馬線下一轉乘點於美孚, 未能覆蓋荃灣及葵涌之客源。北環線南延理應更早提供與荃灣線之轉乘去彌補, 同加強服務荃灣市中心一帶。

如果單純以轉車為考慮, 可以將走線拉近曹公潭, 擴建荃灣線尾軌為車站提供轉車服務, 該車站亦可服務荃景圍及愉景新城一帶居民。呢個車站興建會較為簡單, 建設期間亦似乎唔需要收樓, 但可能要暫時使用荃灣車廠嘅部份用地。呢個方案對於荃灣線服務影響較細, 但車站覆蓋嘅範圍有一半係山, 服務人口相當有限。

荃灣一帶可供鐵路行經之走線相當有限, 如果又要服務市中心同保留服務上葵嘅可能性, 除左上面提到嘅純轉車方案, 似乎唔能夠將走線設定行經青山公路。我認為可以考慮途經沙咀道地底, 於沙咀道球場一帶轉彎上大河道。車站設置係大河道地底, 北面利用荃灣站月台層興建轉車通道往北環線大堂。呢個方案建設難度非常高, 因車站上方為大河道天橋及荃灣行人天橋系統, 對路面交通影響會非常大。周圍可以提供建設工地嘅地方唔多, 有可能要先徵用沙咀道球場、西樓角路花園作為工地。由於走線穿過荃灣車站扇型軌道地底, 亦有可能影響荃灣車廠運作。

走線經過荃灣車廠後會於荃錦交匯處下方穿過, 並於石圍角路石圍角商場地底設置石圍角站。我糾結左好耐是否應該設置石圍角站, 石圍角邨周邊人口唔太足夠 (即使包括埋象鼻山路以北嘅村落), 但考慮埋地勢上嘅落差又同慈雲山/鑽石山嘅關係有啲似。係我呢個方案先保留設站嘅可能先。

係石圍角之後走線會先穿過城門谷公園同運動場地底, 於象山邨南面經過, 再係介乎象山同梨木樹中間設置梨木樹站。政府有計劃將荃灣二號食水配水庫搬入岩洞, 並已經將象山同梨木樹之間嘅土地改劃為住宅用途。如果以新地段作為象山邨重建嘅安置屋邨, 再將象山邨重建, 加上梨木樹邨理應可以支持到一個重鐵車站。





上葵一帶走線
離開梨木樹站之後, 走線會折向東南, 穿過伍若瑜夫人健康院地底, 再沿大白田街預留道路空間去石蔭站。石蔭站設置於大白田街, 介乎安捷街足球場及遊樂場之間。車站選址應可惠及石蔭及安蔭一帶之乘客及學生, 及上葵涌工貿地段之通勤需要, 但於興建時可能要先徵用前述之設施作為工地。足球場重置後可以考慮於透邊設置扶手電梯系統, 方便安蔭居民到鐵路車站及石蔭邨, 再往梨木道一帶。

走線於離開石蔭站後將經過石蘺二邨東部, 於石蘺二邨商場及街市北面大隴街設置石蘺站。石蘺一帶居民可以利用現時之屋邨通道經商場/街市到達鐵路站, 而往和宜合道一帶嘅通勤客可以經現時大隴街遊樂場旁通道往返, 甚至經石英徑橫跨青山公路行人天橋往大連排一帶。

上葵之後要點行
去到呢度走線就唔係咁明朗, 因為山下面大連排一帶已經係葵興、葵芳兩站嘅可服務範圍, 而且往南走已無發展區域需要服務。最接近就係拉去美孚, 但美孚大有可能係2030+南北走廊嘅連接點, 除非再打荔枝角公園主意, 否則都係唔夠地方起。另一個考慮因素係以長遠計, 北環線南延是否應該同其他規劃路線整合, 令佢唔需要好似屯馬線咁兜大圈而服務到九龍中東部呢? 我相信需要先分析上葵一帶居民通勤習慣數據, 先可以搞清楚條鐵路深入市區之後要點行。

叫上葵涌班人兜去荃灣轉荃灣線經葵芳出市區,我不好繼續搭巴士去葵芳轉好過

HU6455 發表於 2020-11-22 20:36
叫上葵涌班人兜去荃灣轉荃灣線經葵芳出市區,我不好繼續搭巴士去葵芳轉好過 ...

上面講左上葵之後走線真係好難搞, 最直接緊係出美孚啦, 但美孚之後可以點行呢?

荃灣有兩條大坑渠，如果地底興建鐵路並設站估計要掘得有一定深度，但如此一來就要考慮如何有效接駁位於地面的荃灣地鐵站，同時列車能否順利爬升至石圍角以至梨木樹

另外一點係北環線預計採用西鐵規格？咁樣嘅話建築成本會比地鐵規格為高，是否適合於荃灣葵涌一帶設置如此數量嘅地底車站值得討論

若果北環線出市區應該唔會走去上葵涌設站，車程慢過現有路線就唔會起到分流作用

clivetock 發表於 2020-11-22 21:22
荃灣有兩條大坑渠，如果地底興建鐵路並設站估計要掘得有一定深度，但如此一來就要考慮如何有效接駁位於地面 ...

若果北環線採全地底方案的話, 就唔一定需要用返屯馬線規格
荃灣一段係一定需要深過大涌道及另外一條地底暗渠, 至於石圍角/象山一段應該無東九龍線咁深
爬升的確會對定線有影響, 的確需要再考慮

rickywk 發表於 2020-11-22 21:36
若果北環線出市區應該唔會走去上葵涌設站，車程慢過現有路線就唔會起到分流作用 ...

北環線出市區想快, 就會犧牲左分流嘅可能性
咁倒不如簡單D想方法複線化屯馬線就已經得
上葵一向都有想要鐵路服務嘅呼聲, 我覺得北環線可以俾佢地一個機會吧

北環線唔用屯馬線規格
分流作用有限,北環線好大機會
繼續用八鄉車廠,千九砌個少卡啲
嘅版本而另建隧道出荃灣效益成疑。

將屯馬線複線化經上葵,除非
客量支持到用八卡車嚟行,現錦上路
到荃灣西的確負荷最大,一條唔夠用,
整多條相若喺隔離又似乎多得滯。

eternalflame 發表於 2020-11-22 22:32
北環線出市區想快, 就會犧牲左分流嘅可能性
咁倒不如簡單D想方法複線化屯馬線就已經得
上葵一向都有想要 ...

咁樓主你當初既目的就係想減輕大欖隧道客量
應該用lee樣野優先行rather than係北葵兜大圈

如果北環線直接駁落荃灣站效果應該會幾好
甚或唔介意極速慢既做埋直通
咁成個大西北都有得益

其實地底方案好似冇講過北環綫會南延出市區？地底方案應該只係指北環綫新田站直接落地底伸延去新皇崗口岸？