專線小巴 新里程: 低地台專線小巴首航54M全紀錄

為響應政府呼籲, 提升專線小巴服務,
進智公交 (AMS) 特別引進來自英國 Optare Solo SR 低地台,
並改良為17座小巴, 成為第一款後直引擎兼低地台小巴......
(*Optare 係收購 MCW 巴士部後發展巴士業務,
呢款車車頭有少少都城騎士的影子, 當然而家更靚仔)....

架車本身就半年前到港, 不過因為有唔少規格同原本小巴的標準有別,
須要運輸處一些時間執行程序去為呢款車開綠燈;
(亦可能遇正立會換屆, 令審核程序延後左).....

終於到今個星期, 就傳出架車會首航消息,
亦很快就有網上消息話架車終於出牌......
出牌後就有兩日去為司機操車.......

到左尋日, 香港開埠日, 架車終於正式首航醫院線 54M,
我就把握機會, 去堅城站為呢個里程碑留下定鏡,
並在放工後坐來回一轉......

下面再分享架車表現同埋內籠留影~~~

我在晚上六點半上車, 剛岩架車坐滿, 可以試真架車的表現....

去瑪麗就有長命斜上, 起步加速係不俗, 都算爽,
只係 Allison 波箱反應好快, 令架車好快轉下個波段,
令上斜有少少笠 (因為好快轉波), 最終架車都順利到瑪麗....

到瑪麗就好多人排, 我都趁機去留影先, 再等下一轉車程,
等果陣原來另有兩位行家都係同一目標, 就吹左陣水,
到架車再返來後再落堅城......

司機落斜時係就住的, 又穩又定咁到堅城站,
之後再轉一個大圈先返站頭,
亦都趁機影內籠, 輪椅位同錶板

架車比普通的小巴有較大較開揚, 又夠光猛,
司機都話架車好渣, 之後我再留影, 並坐多一單上山,
就愉快地完成今次呢個低地台小巴遊.....

希望今次試車可以成功, 令同類車可以開枝散業,
提升小巴服務水平, 令車款多元化, 多謝收睇....