大阪→名古屋路線巴士之旅（多圖）

呢輯相已經係小弟上年6月影。通常如果起大阪去名古屋嘅話，都會選擇新幹線、近鐵特急或者高速巴士。但係，基於曾經睇過日本一個電視節目：ローカル路線バス乗り継ぎの旅，所以開始左路線巴士之旅。當然小弟做唔到起電視節目嘅玩法，要起當地即時揾路線同Book酒店。所以就起未出發前Plan好所有路線同當晚嘅酒店。起鐵路非常發達嘅日本，基本上路線巴士（路線バス、唔會上高速公路嘅巴士路線）通常都只會服務城市內，又或者鐵路站連駁線。所以當我Plan緊個時都比較花時間。結果透過由大阪搭路線巴士去名古屋嘅路線預計係要用兩日半嘅時間。
【第一日】
第一日由大阪京橋站出發，向奈良縣方向進發，第一程巴士係大阪City Bus 36系統去地下鐵門真南
大阪市營地下鐵其實已經起上年四月轉為大阪Metro（大阪市營巴士則轉為大阪City Bus），但係沿路都見到有D圖示未改成大阪Metro

路線中途經過鶴見綠地

最後到達地下鐵門真南

落車後影番架巴士

同埋之後會搭個架京阪巴士

小弟覺得呢款日產巴士有潛力成為香港（超低地台）小巴

之後到達門真團地。

當日都係咁落雨（當時日本正值梅雨季節），所以都冇乜點影相。之後一路轉車經過四條畷，進入奈良縣，連續搭左八程奈良交通嘅巴士



從奈良市出發，開始轉向南方，前往天理站、櫻井站




到左近鐵榛原站，下一程係社區巴士（コミュニティバス）奥宇陀わくわくバス，但係由奈良交通營運，所以實際上係搭左九程奈良交通，九程車貫穿奈良縣。

呢架車行經嘅地方有部分係狹窄單程路



最後到左御杖村嘅一家民宿完成第一日嘅行程。民宿主人知道我玩緊路線巴士之旅，之後就幫手睇下本身Plan好第二日嘅行程。當於第二日頭幾程嘅轉乘時間唔夾，要等成差唔多一個鐘，所以佢地提議用私家車送我去第二日第二程起點巴士站【敷津】，搭早一班車，之後轉乘嘅時間就少好多，唔洗等咁耐。
【第二日】
第二日一早，我已經搭巴士離開左奈良縣，到達三重縣，三重縣第一個轉乘點起伊勢奧津站。

起呢個站轉乘津市社區巴士

其實津市社區巴士都係三重交通營運

之後再轉番出市區，去近鐵久居站。如圖所示，本身我係需要等幾個鐘搭12:30嘅巴士，由於搭早一班車，所以可以唔洗等幾個鐘，搭到07:58嘅班次。

久居站


起久居站再搭三重交通巴士，經過津站、椋本、龜山站、平田町站，到達四日市，第二日行程嘅終點



呢個Esso油站應該有好耐歷史



【第三日】
第三日第一程車係三岐鐵路巴士，呢間地區鐵路公司規模唔大，所以佢係唔收IC卡，所以上車一定要攞整理卷

到達三岐鐵路山城站，之後轉乘社區巴士一路向三重縣東員町進發


起三重縣鄉村地方，一個車站都有四個站牌

其實我係想上呢架車，因為呢個車目的地係名古屋嘅榮，可惜係高速巴士

之後發生左一件大事，就黎起東員町出桑名站架巴士延遲到達，起我Plan嘅行程上面，桑名站得四分鐘轉乘，但係巴士遲左七分鐘，根據之前Plan如果Miss左呢班巴士，之後ge車程有嚴重影響，唔可以起第三日完畢前到名古屋嘅酒店，所以就破左例，Skip左二程巴士，搭近鐵（最慢嘅準急/普通列車）去彌富站。

但係因為搭左鐵路，使到行程比預定嘅時間快左好多，所以起彌富站等車都等左45分鐘。
為左今次日本巴士之旅，就算有錢，我都特登唔帶行李喼，做個背包客。

禰富市社區巴士係一架小巴黎

之後起龜池轉飛島巴士，進入飛島村

飛島村其實大部分地方都係工業區同埋港口，而下一個轉乘點公民館分館附近差唔多全部車同建築物都係貨櫃車同埋工業區


尾二個程巴士係成個旅程最特別。都係飛島巴士營運，但係使用車輛係高速巴士，同埋係少數路線巴士/社區巴士行走高速公路嘅路線


行走高速公路部分只限過左名港西大橋呢一段，一過完橋就落公路

最後入到名古屋市稻永站，呢個站係特登落車

因為為左食無添壽司

最後一程當然係搭名古屋市營巴士入名古屋站


整個大阪至名古屋嘅旅程到此完結。歡迎分享與討論。

你呢個行程值得我下一次去日本試下咁樣玩

最近呢兩年我都有去日本自由行,
不過真係唔係自駕就新幹線.

只係可惜小弟日文能力真係好有限,
需要再加以學習先可以走入郊區玩得盡興啲.
(岩岩起東北/北海道玩完返黎, 雖然 body language 或者 simple english 係 work, 不過始終離開左東京識日文係著數好多) ...