本帖最後由 okt05032 於 2020-8-13 20:11 編輯
航班編號:BA2759
飛行日期:08-01-2020 機型: A319-100 註冊號: G-DBCD
座位:23E 飛行時間:46分鐘
計劃出發時間STD/實際出發時間ATD:10:55/11:18 GMT+1
降落時間:11:05 GMT
背景
阿姆斯特丹並唔係小弟嘅最終目的地。喺阿姆斯特丹等候左五個鐘頭後,小弟乘搭英航飛往倫敦格域機場。呢份報告除咗會分享小弟成搭英航嘅經歷之外,亦都會分享其中一個可以比Priority Pass 進入嘅貴賓室; 位於41號閘口嘅 Aspire Lounge
乘客係阿姆斯特丹轉機需要再過多次安檢.。佢哋嘅安檢係非常之嚴格,除咗要將你嘅衫褲袋清空同除皮帶之外,著靴嘅更加要除咗佢過安檢。史基普機場係超級大,所以大家最好預留時間同埋體力行上機。
Priority Pass持卡人喺史基普機場非神根公約區域可以選擇入Aspire Lounge 或者British Airways Lounge。小弟今次選擇咗前者。呢個貴賓室佔地範圍比較細,目測細過香港嘅Plaza Premium First Lounge。呢個貴賓室都有同唔少嘅航空公司合作,例如阿聯酋航空,土耳其航空同埋新加坡航空。其中SQ更加有獨立嘅位置比佢哋。正因為咁樣所以呢個貴賓室係非常之繁忙。雖然呢個貴賓室比較細,不過啲位都幾闊落,就算個貴賓室滿咗你都唔會覺得好擠迫。 新加坡航空專屬區域 大約9:00左右,小弟見到個貴賓室坐到人嘅地方都坐滿晒人。之後仲見到出邊寫住塊牌話唔俾貴賓室會籍嘅持卡人入嚟。可想言之係幾咁繁忙。
Aspire Lounge嘅服務比較簡單,佢就提供輕食為主例如西湯,麵包,沙律等等。除咗茶、咖啡同汽水之外亦都有少量烈酒提供。除此之外亦都提供報章雜誌比旅客閱讀。
另外值得一讚嘅係呢個貴賓室係對正停機坪,提供一個非常之開掦嘅景觀。用來做Plane Spotting簡直一流。 趁班機未起飛,小弟走咗去其他閘口影機。 Transavia Boeing 737-800 Delta Boeing 767-300ER KLM Boeing 747-400M KLM Boeing 787-9 British Airways A321 Level Airbus A321-200 Air Astana Airbus A321-200 今次載小弟去倫敦嘅係呢架15歲嘅Airbus A319-100,註冊號G-DBCD。 呢一班機亦都係客滿嘅,連位都調唔到。亦都因為咁所以持有Boarding Group 5機票嘅乘客需要將佢哋嘅手提喼寄倉。成個登記過程都幾混亂下,係未將所有行李寄艙後就已經開始叫Boarding Group 4嘅乘客登機,同時間Boarding Group 1, 2, 3嘅乘客又未上晒機,所以呢個分類可以話完全冇用。
上到機之後,呢個機比小弟嘅第一個印象就係比較窄。椅距應該得30吋左右,張凳好傾嘅角度比較有限。不過今次既飛行時間只係個幾鐘頭,對小弟來講已經足夠。
BA由2017年開始將佢地由LHR同LGW出發嘅英國內陸同歐洲航班嘅免費餐飲取消咗。所有飲食都要比錢買,唔會再免費供應,而機上嘅餐飲就變咗由瑪莎(M&S)負責。目測見到機上有三分之一嘅人都有課金比英航。因為出於好奇心,小弟買咗份煙肉雞三文治(盛惠4.65英鎊)。份三文治係乜味都冇之餘仲要超級無敵乾。小弟真心建議各位忍忍口,上機前或者落機後去買三文治食,分分鍾仲好過佢。
總結
ASPIRE LOUNGE對小弟黎講都算合格嘅,嘢食同環境都唔錯,唯獨是係呢個貴賓室太多人。而今次BA比我嘅印象都唔係幾好,亦都有唔少嘅進步空間。不過小弟係第一次飛歐洲內陸線,我相信仲有好多好過同差過BA嘅航空公司等緊小弟發掘。下一份飛行報告會分享小弟坐因航由倫敦希斯路直航返香港嘅經歷,敬請期待!
小弟比較少寫飛行報告,請各位多多指教,謝謝。 |