[長文注意][載空國際] 英國版6X - 黃巴士3x

Bournemouth嗰間黃巴士喺9月改咗時間表，當中有2項路線改動，同埋3條現有路線嘅時間表改動（另加11/12嘅季節性改動）。

單純時間表嘅改動包括1號線之前宣稱係因人手不足嘅臨時改動，一至五日間一半班次喺Tuckton折返而唔去Christchurch（同星期六一致），變成常規改動，令到Tuckton同Christchurch之間嘅班次由每10分鐘一班1、30分鐘一班1b、一個鐘一班11同一個鐘一班33，變成每20分鐘一班1、30分鐘一班1b、兩個鐘一班11（季節性改動）同一個鐘一班33。

而5/5a線先前暑假期間因人手不足，一至五日間班次由7-8分鐘一班減到10分鐘一班，而家還原返，而星期六就由15分鐘一班加到10分鐘一班。

而至於兩項路線改動分別係4a縮減服務，同埋3減班抽車開3x。4a原本係一至六日間每半個鐘一班，同4一齊係Bournemouth同Westover Retail Park之間提供每15分鐘嘅聯合班次（4a當時嘅賣點係唯一唔經火車站直達市中心嘅路線），而一至五部分班次延伸到Bear Cross，縮班之後只喺一至五非繁開一個鐘一班加繁忙時間少量班次，終點站縮短到Kinson，而且唔落Bournemouth Square而喺Bournemouth Triangle折返，同4完全無共同車站，變相將條4嘅班次減半。

至於呢度嘅重點係條3x，以下有長文描述：
喺呢個時間表改動，3嘅班次由原本一至六日間15分鐘一班改成20分鐘一班，而週日就維持20分鐘一班不變，同5/5a提供每10分鐘一班聯合班次；晚間服務則維持30分鐘一班，繼續同5/5a提供每15分鐘一班聯合班次。呢個改動令到3嘅平日日間用車數目由6部減到5部。

至於新嘅特快線3x，一般時段兩端終點分別係Bournemouth Square同Castlepoint，由Bournemouth Square開車之後經火車站，然後經A338特快直達醫院（3嘅終點站），之後兜返轉頭，3嘅相反方向折返Castlepoint。根據官方時間表，3x由火車站來往醫院嘅時間係11-12分鐘，比正線嘅時間24分鐘快足一半；而3x火車站來往Castlepoint嘅時間係18-19分鐘，但係正線只係16-17分鐘，即係條線嘅特快只係快在喺去醫院，要去Castlepoint嘅話搭返3好過。而實際上，醫院來往火車站嘅路程係7分鐘搞得掂，所以通常部車落公路之後會停返大約4分鐘先再開車。
3x一至五半個鐘一班，用2部車行，週末一個鐘一班，用1部車行，即係除星期六之外，成組路線加咗1部車落去。

至於繁忙時間部車唔去Castlepoint，而喺醫院做終點；另外亦有少量班次延伸到Branksome（朝早一至五頭兩班Branksome開去Castlepoint，週末一班；傍晚一至五兩班Castlepoint開去Branksome，週末一班，當中一班會開回程）。

咁一睇落去，我嘅直覺已經覺得條線註定載空嘅啦，好似當年九巴喺6嘅美孚特抽車開6X咁樣，特登開條空氣線出來做差條線，之後摺咗去就收咗部車去。點解咁講呢？首先睇下條路線。3x嘅喺市中心開車，一開車只係喺火車站轉一圈之後就直上公路，落醫院之後調頭返Castlepoint，結果去到Castlepoint重慢過條正線3，即係公路另一端唯一嘅價值係間醫院。

好啦，問題就喺呢度啦。市中心來往醫院本身對家morebus已經有4條特快路線做緊，分別係X1/X2/X3/X6。呢4條都係跨市長途路線，全部由其它城市開往Bournemouth，全部去到醫院之後上A338去市中心。當中X1/X2/X6係真直達，連火車站都唔入（但可以喺公路口個站行3分鐘左右去火車站），總站開車之後直劈醫院，X3係半特快，只係行半段A338，市中心開車之後要兜Boscombe先上公路。換句話說，3x嘅獨市位只有火車站呢一點去醫院呢一點，其餘所有路程對家都有更佳選擇（尤其係m1同3喺市中心同Castlepoint之間係完全一樣，3自己班次由15減咗落20，對家嘅m1開6-7分鐘一班）。

呢4條線嘅客量本身已經夠差，X1/X2/X6本身5個客內上公路係等閒事，最差嗰次日光日白我搭過2個客上公路嘅X6！！！！！4條線之中嘅客量只有條半特快X3叫做勉強見得人，正常都有十幾廿個客，主因係因為條線連接Bournemouth同Salisbury兩個重要地方（前者無城市之名但有城市之實，後者直情係一個城市），兩端之間係無火車直達，所以有一定嘅全程客支持。反觀X1同X2沿路都係火車沿線，其實只係一條假特快，做流水為主順便落埋市中心，而X6只係連接Verwood小鎮同兩個市中心，而且Ringwood同Bournemouth之間亦有X3服務，所以亦無乜客搭，部分班次甚至唔落Bournemouth而叫人喺Ringwood轉X3算數。

之後就睇埋時間表。首先睇下未有3x之前，對家嘅時間表。X1/X2屬同一組別路線，平日市中心去醫院13:35（校假為15:35）前半個鐘一班，之後一個鐘一班，直到18:35尾班車；回程醫院返市中心15:06（校假為16:06）前半個鐘一班，之後大約一個鐘一班，直到19:01尾班車。至於半特快X3，市中心同X1/X2一樣逢05/35開車，下繁拉疏少少，直到19:15之後就20:15，之後一車走天涯，開23:00尾班車；回程醫院開逢07/37（喺X1/X2之後1分鐘），下繁拉疏少少直到18:42（做19:15市中心開），之後19:51（做20:15市中心開），最後尾班開22:33（做23:00市中心開）。X6就大約每個鐘一班不規則班次，但唔會同X1/X2/X3一齊開。換言之，市中心去醫院，每逢05/35就會有一部特快同一部半特快一齊開；醫院返市中心就會每半個鐘逢06/36短時間內先有一部特快經過，再一部半特快。至於假日服務方面，X1只用2部車行，對開4班；X6只用1部車行，對開3班，X3就每個鐘一班，市中心開05，醫院開37。

之後睇埋條3x嘅時間表。3x繁忙時間唔去Castlepoint，只來往市中心同醫院，兩端開00/30；非繁忙時間就市中心開00/30，比對家早5分鐘（但係火車站個圈都用你3分鐘，再加上官方將段特快嘅行車時間煲大咗，結果喺醫院嘅編定時間係同對家遲5分鐘嘅特快一樣！），醫院開07/37，同對家嘅X車堆埋一齊行！即係只要有X1/X2服務嘅時間，呢條3x基本上係無價值！！！！！！！！！！！只有當下午繁忙時間，X1/X2拉疏到一個鐘一班，而X3亦開始拉疏班次嗰陣，條3x先至同對家隔開。而條線嘅最大優勢係佢嘅服務時間比對家長，頭班車市中心開05:30，重要早過正線，醫院開係06:00（對家頭車係市中心開06:50同醫院開06:27），而尾班車市中心開20:44，醫院開21:17，而呢個時間係對家無服務嘅。（3x最後幾班車係市中心18:30、19:00、19:30、20:44，醫院18:37、19:07、19:37、20:07、20:37、21:17；對家係市中心開18:20、18:35、18:45、19:15、20:15、23:00，醫院開18:42、19:01、19:51、22:33）。至於假日情況就比較好，同X3隔開大約半個鐘開車。

另外呢條線好衰唔衰，重要兩端大站嘅站位係跟返正線3，而唔係跟對家嘅特快線（呢度啲大站嘅普遍係相同目的地嘅車會停埋一齊，例如火車站3同對家m1係同一個站位）。喺市中心，呢條線係停Bournemouth Square，而唔係停對家嘅Westover Road，兩者相隔一大段距離，喺Westover Road等對家車嘅乘客係唔會見到3x出現；而醫院亦係停3同一個站位，同對家X1/X2/X3/X6隔兩條坑，再加上個時間表係對家佔優，所以實際上乘客基本上都會喺對家嘅站位等車，只有中途站先有機會執到雞。但係往醫院方向，Yellow Buses又要係同morebus唔同路，前者行Old Christchurch Road，後者行Bath Road，結果往醫院方向執雞站只有Lansdowne一個，重要只係執到X1/X2/X6嘅客而執唔到X3（而家Holdenhurst Road封路，Christchurch Road多咗個站同X3同站，不過X3停前面，3x/X1/X2/X6停後面嘅臨時站亦係問題）；而往市中心方向就除醫院外亦只有兩個執雞站，Littledown Centre同Cooper Dean Roundabout。前者係運動中心，好彩嘅話我開線嗰日見過執到一家大細上車，後者就鬼影都唔過，啲X車5次有4次都唔停。至於執流水客方面，醫院去Castlepoint係可以執到本身等3或者4嘅客嘅，但係火車站落市中心，雖然呢個路程正常係包有客，幾時都會有客上嘅，因為路面限制，落咗公路之後係停唔到係車海嗰個站位，只有非特快先停到，結果當然唔會有客上啦！

我而家住Lansdowne，平日20:00-21:00去Littledown練水大約4公里路程，如果可以喺19:45左右喺醫院落到車，入到去換衫就最理想；完咗之後沖涼着衫走，出到巴士站可以趕到21:15醫院開嘅巴士，但係21:10就未必得。喺未有3x之前，我最遲要搭19:15開嘅X3，去到醫院落車大約係19:34，去到重未夠鐘，但係因為之後下班特快車係一個鐘之後，如果搭下班非特快，19:27市中心開嘅3，編定去到醫院時間係19:54，係無可能趕得切準時開始。至於回程方面，啲X車直情成個鐘無服務，基本上係焗搭21:15嘅14，去到Castlepoint等轉21:25嘅m1（21:10之後下班去到市中心嘅車21:40先喺醫院開），返到屋企係21:45。而家嘅3x時間表可以係話啱啱好完美配合我需要。我可以搭19:30開嘅3x，編定去到醫院嘅時間係19:49，但實際上個時間預鬆咗，基本上19:46左右已經落得車，入到去體育館換完衫可以話係20:00前5分鐘之內嘅事；回程就直接搭21:17嘅3x返屋企，21:30已經落埋車返到門口（反觀以往焗搭14轉m1嘅日子，21:30嗰陣部車先啱啱轉入Broadway Tavern），來回比以往足足慳咗各15分鐘！！！！！！！！！而我之前買開morebus嘅月票搭車（主要用來搭50同X3），下個月開始我一定轉呔買黃巴月票，只要呢條線繼續存在而我又未搬離Bournemouth嘅話我都會繼續搭，喺X3唔開嘅時間用來搭3x（我預計一星期至少可以搭到來回3次甚至更多，因為無論泳會定係三鐵會都喺嗰度練習，而醫院隔籬重有間大型開24嘅Tesco超市）。

條線今個星期開咗啦，而我星期三又去練水，咁我當然即時轉用3x出入啦，再加上我星期四又要去Wimborne打牌（我張morebus月票只係A區，去唔到Wimborne），咁要再額外買巴士車票，咁就跟手買咗張黃巴Buster's Beach Bus嘅2日票，通用AB區嘅，會平過搭3x加6來回。結果我就星期三晚搭咗轉3x，而我星期四朝早又要去買餸，有張£2 Tesco折扣券今個星期到期，於是我又搭多一轉3x去超市掃貨，總共四程。


結果一如我所料，條線的確係載空國際！！！！！！！！！！！！！！！呢條線平日係一單一雙運作。我星期三練水來回係同一單層字軌，19:30市中心去Castlepoint嘅班次，連自己2個客上公路！之後回程21:10 Castlepoint返市中心嘅尾班車，我1個包哂成架車！！！而今日去超市，日光日白，客量係完全一樣！！！！我搭11:30市中心開嗰班車，單層，得我1個上公路！！！！！！不過醫院之後執到幾個去Castlepoint。回程情況亦一樣，亦應驗咗連雞都執唔到嘅事實！！！！！！！根據正常時間表，我應該搭對家嘅X2返屋企會最快。我喺X1/X2/X3/X6個站位等車，有另一個客想同樣去市中心，推住嬰兒車嘅，喺個X車個站位度睇時間表，我話佢知（12:36）部X2理應係最快到，不過部車過咗鐘，兩條坑之外可能會有部3x來先，嗰個客就決定企係X車嘅站位等車（反而以往我見過有客本來喺X車嘅站位等車，個ETA報緊要十幾分鐘先有車，跟住個客行過咗兩條坑搭特慢線）。結果部3x準時到，我即刻行過兩條坑上車，而同一時間部半特快X3亦都準時到，嗰個客亦都上咗車。兩間公司嘅車一齊起步，就喺我轉緊出去嗰陣部過鐘嘅X2亦準備轉入醫院。結果我上咗嗰部3x喺Littledown Centre執唔到客，Cooper Dean Roundabout一如所料無客，結果又係全車得我一個上公路！！！！！！！！！2部3x會喺A338嗰度互見對方，我望過對面線，部巴士基本上係載空氣嘅，一個客都見唔到，好可能係全程無客！

結果我搭過4程3x，1程2個客上公路，其餘3程包車！！！！！可以話係載空嘅典範！照咁落去，既然我最近已經成功換咗車牌，之後如果巴士公司摺線嘅話我可能真係入個car club，租車自己揸算數，反正佢係按鐘計，我里數又少（呢啲係短途特快，只係揸上段公路行80 km/h來回8公里），每次兩個鐘加埋里數費都只係£10左右，肯定平過自己養車（反正如果唔係為咗段特快嘅話真係搭巴士甚至踩單車出入好過，去遠少少嘅話就索性搭火車，會快過自己揸車，尤其呢度經常塞車）。

蝕得勁，巴士公司自然會cut線，點會隨意執左自己？

閣下篇文已經facebook周圍貼，
估吾到呢度都吾好彩見到。
你打咁大篇無乜人有興趣知嘅野吾知你想點，
你由始至終都吾明白巴士線存在意義，
貧僧勸你都係快D租車自己揸，
無乜必要都吾好再坐巴士。
多謝合作。

wrightap 發表於 2021-9-10 04:38
閣下篇文已經facebook周圍貼，
估吾到呢度都吾好彩見到。
你打咁大篇無乜人有興趣知嘅野吾知你想點，

如果呢條線最終真係做唔住（尤其喺對家X車唔開嘅時間，呢條線係唯一行A338嘅巴士線），咁就可以證實呢度嘅巴士係根本無得做，之後結果咪唯有個個揸車囉。
以往美孚去尖沙咀嗰條6X大家都知道係衰俾鐵路，但係呢段路係無鐵路競爭架。