hkitalk.net 香港交通資訊網

 找回密碼
 會員申請加入


(B0)香港巴士車務及車廂設備 (B1)香港巴士廣告消息/廣告車行踪 (B2)香港巴士討論 [熱門] [精華] (B3)巴士攝影作品貼圖區 [熱門] [精華] (B3i)即拍即貼 -手機相&翻拍Mon相 (B4)兩岸三地巴士討論 [精華] (B5)外地巴士討論 [精華]

Advertisement


(B6)旅遊巴士及過境巴士 [精華] (B7)巴士特別所見 (B11)巴士精華區 (B22)巴士迷吹水區   (V)私家車,商用車,政府及特種車輛 [精華]
(A6)相片及短片分享/攝影技術 (A10)香港地方討論 [精華] (A11)消費著數及飲食資訊 (A16)建築物機電裝置及設備 (A19)問路專區 (N)其他討論題目  
(F1)交通路線建議 (C2)航空 [精華] (C3)海上交通及船隻 [精華] (D1)公共交通有關商品 [精華]   (Y)hkitalk.net會員福利部 (Z)站務資源中心
(R1)香港鐵路 [精華] (R2)香港電車 [精華] (R3)港外鐵路 [精華]   (O1)omsi討論區 (O2)omsi下載區 (O3)omsi教學及求助區
(M1)小型巴士綜合討論 (M2)小型巴士多媒體分享區 (M3)香港小型巴士字軌表        
 

Advertisement

 

hkitalk.net 香港交通資訊網»論壇 (C) Transport 交通討論區 航空(C2) 浸鹹水遇溺記 第三十四回 LH796 FRA-HKG 再一個歸家的故 ...
開啟左側

[飛行報告] 浸鹹水遇溺記 第三十四回 LH796 FRA-HKG 再一個歸家的故事

  [複製鏈接]
HZ8186 發表於 2022-8-20 16:36 | 顯示全部樓層 |閱讀模式

                                    Advertisement



本帖最後由 HZ8186 於 2022-8-20 16:38 編輯




-- Prelude --

雖然小弟既學業係兩年前結束,不過小弟同英國既緣分並未完結 - 事源小弟於英國就讀既大學決定將因為疫情影響而取消既畢業禮補辦 - 雖然小弟已經投入職場超過一年,不過既然小弟有機會為留學生涯畫上一個遲黎既句號,小弟便拎十日大假前往英國行禮,順便同大學同學敘舊,亦滿足下小弟既飛機癮啦。今次旅程小弟會先前往蘇格蘭遊玩,再前往英格蘭中部的大學行畢業禮,禮成後便前往希臘小島 Crete 渡假,再取道 Linz 及 Frankfurt 回港。

P.S. 小弟再再再喺呢度講翻聲唔好意思先 - 小弟本身係希望按時序將遇溺記推出,惟由於小弟希望趁入境程序未 outdate 之前將飛行報告推出供讀者參考,所以兩年前積落既兩篇 浸鹹水遇溺記,以及今趟旅程既幾篇遊記就要大家再等多陣啦。

-- Flight Info --

LH796 FRA-HKG D-AIFC
Airbus A340-313
STD 2050 ATD 2127 (CEST)
STA 1530 ATA 1600 (HKT)

-- The Start of the End --

小弟當日中午乘漢莎集團旗下既 Air Dolomiti 由位於奧地利北部城市 Linz 飛往法蘭克福機場後,便使用四個多小時既轉機時間遊走法蘭克福機場。參觀過位於 Terminal One 既 Visitors Centre 以及位於Terminal Two 既 Visitor Terrace 之後,小弟便再次通過安全檢查進入 airside,踏上今日既航班。

(FRA 既 Visitors Centre & Visitors' Terrace 將會係第三十三回 遇溺記 詳細介紹,唯留意 Visitor Centre & Airport Tour 兩個項目均需要預早預約,以及 Visitor's Terrace 既開放時間)

-- Frankfurt Airport (FRA/EDDF) --

LH796 預定於法蘭克福當地時間 2050 起飛,並於翌日香港時間 1530 到達 - 今日既航班由一部 A340-300 執飛,而航程則長達十二小時。值得留意既係 即使今日航班係篇定於當地時間 2050 起飛,不過漢莎航空係將登機時間定於 1920,早起飛時間足足九十分鐘。雖然小弟對呢個時間感到疑惑,不過小弟好快便發現呢個九十分鐘既登機時間並非無原因既...

由於漢莎航空應香港政府既要求為此航班既乘客作出特別安排,今日既航班係使用全機場最偏僻既 Z69 閘口。由 T1 既入口前往登機閘口既路程係需要步行十五分鐘以上,而小弟通過為閘口 A, Z 而設既安全檢查站時亦等左足足三十分鐘。(呢個並非因旅客人數眾多或員工數量少,而係檢查程序極度緩慢 - 基本上所有袋係會被抽查,而儘管排隊時 小弟目測 有五條 X 光機運作,以及前方只有五十位乘客左右,小弟亦用半小時才可進入禁區)

之外,漢莎航空亦係 Z64 閘口對出設立一個文件檢查站,為乘客核對證件,以及各項香港政府指明需要的文書。呢個文件檢查站既流程就比較順暢 - 向地勤人員出示

  • 距離抵港時間不少於 48 小時時做既 CoVID PCR 測試陰性證明
  • 檢疫酒店既房間訂單
  • 已接種兩針肺炎疫苗或以上既針卡證明

檢查後,地勤人員會係機票上作記號標明,而乘客就可於 Gate Z68 69 對出空間等候,惟不可以返回客運大樓其餘部份。

-- The Power of Family --

航班於八時二十分左右開始登機,而當日既登機過程係緩慢但有序 - 漢莎先邀請有小朋友既家庭登機,才邀請頭等,商務艙等乘客登機。當日應該有至少十個家庭湊住一家大小登機,而小弟般一般平民百姓則要等多二十分鐘後才開始登機。

完成登機程序後 飛機便 pushback & 準備起飛 - 機組人員向各乘客展示安全示範後,亦向各小朋友派發顏色筆同畫本。飛機滑行到跑道盡頭後便開始緩慢地加速 經過一段非常長既takeoff run 之後,便 rotate 及穩定地爬升,向香港出發。

-- Gander/Halifax --

小弟就先介紹今日用機啦 - 今日既飛機 D-AIFC 為一部 A340-300,配有四部 CFM-56 引擎,並由 2001 年服役至今。雖然漢莎為其 A340-300 機隊取一個德國城鎮既名字,不過 Foxtrot Charlie 則取名 “Gander/Halifax” - 事源 9/11 事件後 美國決定關閉空域,而加拿大則發起 Operation Yellow Ribbon,並將當事正前往美國既航班改降於加拿大各機場。由於當時既情勢未明朗,當局希望避免東岸既航班改降 Toronto 或 Montreal 等大型城市,因此 Gander, Halifax 兩個東岸城市 最終各接收四十部前往美國既航班,並為滯留當地既一萬三千名旅客提供食宿。

由於滯留人數眾多,當地既酒店業係不勝負荷 - 為暫時安置滯留既乘客,除左開放學校同社區會堂供乘客留宿之外,甚至有當地居民自發提供床位及膳食予滯留人士。事後有唔少報章報導講述呢兩個城市既居民既熱情招待,而為答謝呢兩個城市,漢莎航空於翌年將呢部 A340-300 取名 Gander/Halifax 以作紀念。

座位方面,漢莎航空既 A340-300 經濟艙係採用一個 2-4-2 既排位,同其 A330-300 & A340-600 產品睇齊。座位係舒適既,而除左座位闊度良好之外,座椅可以向後傾斜既角度亦相當大 - 雖然閣下會遇上 前方座位傾後後 IFE 螢幕處於低於 eye-level 既問題,不過由於 IFE 螢幕可以調較既角度比較大,因此遇上既問題係會比其他同類型經濟艙產品既小。

-- 4*hansa --

飛機到達巡航高度後,機組人員便開始今晚既 Meal Service。機組人員先向有預先預留特別晚餐既乘客派發晚餐,再向其餘既乘客派發正常晚餐 - 唯由於機組人員逐一送出特別餐,預留特別晚餐既乘客眾多,以及有預留特別晚餐既乘客擅自調位,最終由起飛計 一小時四十分鐘 後,小弟終於有晚餐食。

今日既晚餐並沒有選擇,而全部乘客都係獲得一份芝士焗通粉,沙律,芝士,餐包,以及一份杏仁蛋糕。配番茄汁既沙律同芝士焗通粉其實幾好食,而其他配菜都算係不過不失,惟漢莎提供飲品則比往年大幅減少。小弟三年前乘 LH797 前往歐洲時,酒類飲品,例如 Gin & Tonic 等係會免費提供,而今時今日只有通寧水免費提供 - 氈酒係要以 6eur 一小瓶購買,而機上免費提供既酒類則只限紅白兩個選項。

雖然食物同餐飲都算一般 ,不過最大既敗筆則源自用膳時間及安排 - 由於機組人員於派發晚餐不久後便開始收集餐盤,因此小弟實際既用膳時間其實半小時都無,而呢餐係食得幾狼狽既。(坐係機艙後經濟艙最後排既乘客 有十五分鐘食既話都偷笑)  如果唔係呢個低效率既派餐及高效率既收餐既話而扣分 (或者收餐都可以低效率少少)  其實漢莎既膳食都可以算係不過不失既。

晚飯過後,小弟便打開 Inflight Entertainment System 瀏覽,惟可惜 IFE 內容方面則比較簡單 - 系統內 英語內容同德語內容既比例係 2:1,不過英語內容方面對小弟而言並沒有特別吸引,而德文內容吸引力方面 小弟則無從得知。雖然系統設有電視直播 不過全程航班皆沒有信號,而小弟最後睇左一段介紹達卡拉力賽既電視節目後便入睡。

早餐既安排則同樣混亂 - 係一個 低效率派餐 高效率收餐 既情況下,小弟只係有二十分鐘用膳。經歷一個漫長既等待 (i.e. 職員為每一位有 '特別需要' 既乘客派餐) 之後,每位乘客都獲派發一個早餐盒 - 有芝士三文治,乳酪,穀物條,以及飲品一杯 - 小弟就唔介意三文治係偏西方口味,不過份三文治係非常乾 越食越覺得口水俾佢吸乾。

收回餐盤後,機組人員隨即為降落香港而作出準備 - 由於 木蘭 於一日前才於香港外圍略過,飛機於降落時遇上唔細既氣流 - 機組人員亦因而提早將安全帶燈號著起。航班於香港時間 1600 降落香港國際機場,意味著小弟既大學生涯完滿結束 - 唯小弟仲要等多兩小時才可以真正踏足香港,而亦要等多三日才可真正回家。

整體上漢莎既服務係周到既,惟航班上用膳安排則亂到爆。機組人員係照顧有特別需要既 (機組人員至少三次主動問候坐於小弟前方既一家六口),不過無特別需要既小弟無知點解就有少許被遺忘既感覺咯...

-- 檢疫 --

** 小弟於八月十一號經香港國際機場入境。據小弟理解,此安排與八月十二號及之後的入境安排並沒有分別,惟由於入境程序隨時會更改,下文內容只供大家參考 **

雖然小弟已經有兩年無踏足香港既入境大堂,不過同上次一樣既,迎接小弟既 並非小弟既親朋戚友,而係一排又一排既鐵馬 同戴上保護套裝既地勤人員。

乘客落機後隨即被帶往 Gate 40,乘 APM 前往中場客運大樓進行病毒測試同檢疫手續。旅客先被要求填寫一個電子申報表 填寫健康同檢疫酒店等資料,填寫後會有一個 QR Code,而向檢疫人員出示呢個 QR Code 後方可獲放行。 (註: 呢個電子問卷係可以預先填寫,如已預先填寫既話 只需向檢疫人員出示 QR Code 就可以直行直過)

沿鐵馬陣行多幾步路,檢疫人員就會為旅客掃描 QR Code,並提供一條供辨認使用既頸繩同一個為 RAT & PCR 測試既 Barcode。工作人員會同時為 PCR & RAT 檢測採樣,而 RAT 測試結果為陰性後,旅客就可以前往櫃檯索取檢疫令同相關文件。辦妥文件後,旅客就可以再次乘 APM 返回一號客運大樓處理入境手續,索取行李,並等候專車接送前往指定檢疫酒店,或自費乘搭檢疫的士前往。

雖然流程相當直接同易明,不過小弟由航班降落香港同小弟踏出 Arrivals Hall 就用左足足兩小時。由於旅客要前往中場處理檢疫手續,以及小弟當日排隊索取檢疫令用左至少 45 分鐘,因此呢個步驟係相當耗時既。同時間,由於呢個檢疫流程係要旅客步行整個中場既離境層,以及閣下有機會遇上長長既人龍,小弟會建議閣下預先係航班上拎定支水,以防等候核對文件時遇上長長既人龍時感到不適。

-- 如若迷失卻不能回家 --

雖然小弟今趟畢業旅行係相當精彩,不過回港路上遇上既檢疫措施真係令小弟一掃雅興。香港政府已局部放寬回港限制,並於暑假期間暫時停止熔斷機制,不過當小弟從新聞得知有颱風吹襲香港既時候,小弟亦為計畫替代安排而失眠整整兩晚。

從一個工程角度出發,小弟深深明白任何企劃皆不能以一個零風險既角度處理 - The cost of risk mitigation is inversely proportional to the amount of acceptable risk (i.e. 低可接受風險=貴;零可接受風險=無限貴) - 而因此往往所有工程項目都唔會務求完全排除所有風險,而係將風險控制到一個可接受,以及一個效用同預防措施成本成正比 既水平。希望香港政府可以盡快做出一個亞洲國際城市應做既決定,做翻一個邁向亞洲,邁向國際既城市。



由奧地利北部城市 Linz 飛抵法蘭克福後,小弟先到訪位於 T1 既 Visitor’s Center - 呢個展覽中心向參觀者介紹機場既運作以及正在建設既三號客運大樓,設有多個互動展覽同 family friendly 既活動,惟呢個中心既入場費則比較昂貴,以及入場係需要預先網上購買門票。



Frankfurt 既一號客運大樓雖然已經投入運作多年,不過面貌係保持得好好 - 雖然有唔少告示同設計係源自八十年代,不過小弟完全唔覺得佢老,而整體上客運大樓係整潔既。



黎得法蘭克福機場就當然要拜訪下佢既 Solari Board - 佢每 ____ 分鐘會更新一次,而上千塊顯示板一齊 ‘啪啪啪’ 既景象係非常之壯觀。留意部份漢莎班次並非航班 - 部份有同漢莎 Codeshare 既 ICE 班次亦有顯示在內。



遠征 Z Gate - 由火車站步行至 Z69 須時十五分鐘 (而小弟當日進行安全檢查亦額外用左三十分鐘) 因此閣下真係要預早時間步行前往。



由於使用 Z Gate 既航班不多,因此沿路小弟遇上唔少被圍封及停用既設施 - 真係難以想像以前人煙稠密既景況係如何



位於機場邊疆既免稅店 - 順帶一提,今日航班上並沒有免稅品售賣



文件檢查站 - 漢莎既地勤人員會係呢度為閣下既文件作最後檢查,而乘客要向職員出示肺炎檢測陰性證明,針卡,酒店訂房證明 等文件始獲放行



位於今日閘口旁 Gate Z68 既 D-AIGD - 留意位於圖片右方既石屎建築 - 呢個係漢莎既 Jumbo Hangar。呢個機庫於 1970 年啟用 為當時即將進入服務既 747 機隊而建設 - 呢座機庫當時係全球最大,而機庫外觀五十年後感覺依舊新穎。



登機中 - 今日既 A340-300 係冠上 Gander/Halifax 呢兩個加拿大東岸城市既名字 - 係民航發展初期,跨越大西洋既飛機常常會係呢度進行 technical stop。雖然今時今日大部分飛機可以直接飛越大西洋,不過呢兩個機場至今依然係美洲東岸上一個常用既 emergency diversion airport。



If the world was flat, could the A340-300 take off? Checkmate, flat-earthers.



漢莎既 A340-300 經濟艙採用一個 2-4-2 既座位排位,而 Seat Pitch 係一個標準既 31'。



今日晚餐為芝士焗通粉,並配上沙律,芝士,餐包,以及一份杏仁蛋糕。配番茄汁既沙律同芝士焗通粉其實幾好食,而其他配菜都算係不過不失。



漢莎既機上娛樂系統 - 系統內 英語內容同德語內容既比例係 2:1,不過英語內容方面對小弟而言並唔吸引。



漢莎既機上娛樂系統亦有介紹其公司既其他發展項目 - 呢段影片則講述漢莎同 Aviationtag 合作推出用飛機零件製作既鎖匙扣 - 可惜呢段短片係以德文介紹,有待小弟學好德文先再翻嚟評論呢段影片啦。



今日航班上既刊物 - 留意今日航班並沒有派發任何 Inflight Magazine 或介紹免稅品既刊物。



[吃飽就睡 睡醒就吃] 今日早餐有芝士三文治,乳酪,穀物條,以及飲品一杯 - 三文治係偏西方口味,不過塊麵包係非常乾 基本上係越食越覺得渴。



雖然小弟已經有兩年無踏足香港既入境大堂,不過同上次一樣既,迎接小弟既 並非小弟既親朋戚友,而係一排又一排既鐵馬 同戴上保護套裝既地勤人員。



旅客先被安排乘搭 APM 前往中場客運大樓 辦妥檢疫手續. 前往中場客運大樓後,旅客先被要求填寫一個電子申報表 填寫健康同檢疫酒店等資料,填寫後會有一個 QR Code,而向檢疫人員出示呢個 QR Code 後方可獲放行。 (註: 呢個電子問卷係可以預先填寫,如已預先填寫既話 只需向檢疫人員出示 QR Code 就可以直行直過)



沿鐵馬陣行多幾步路,檢疫人員就會為旅客掃描 QR Code,並提供一條供辨認使用既頸繩同一個為 RAT & PCR 測試用既文件 - PCR & RAT 測試會同時進行,唯 PCR 既結果三日後先收到



RAT 檢測結果確認為陰性之後,旅客就可以排隊領取檢疫令 - 唔知點解呢部份比較耗時 - 小弟當日係呢部份用左半個鐘排隊等候。



辦妥所有檢疫手續之後,旅客就可以進入抵港層,再乘 APM 返回客運大樓辦理入境程序。比較特別既係 旅客會通過一個登機閘口由離境層進入抵港層。



經過兩小時既 "密室逃脫" 之後,小弟終於嚟到最後一關 - 行李認領。



//海燕 就讓日子給我沉澱
京都之夜竟未發現
日後重遊鴨川小店
也許會很懷緬//

今回 遇溺記 就黎到呢度先 - 小弟今次英國之行會為大家帶嚟八篇新既 浸鹹水遇溺記 - 而餘下既七篇將會不日推出,希望大家多多支持啦~~


-- fin --


如果閣下鐘意小弟既飛行報告既話, 不妨睇埋小弟之前寫落既浸鹹水遇溺記~~


第七回 BE7671 NCL-BHD-IOM 尋找 Jetstream 41 的故事 - 不日推出
第八回 BA3287 IOM-LCY 一個避完稅走去翻學既故事 - 不日推出
第二十一回 拜訪協和號試驗機 - Brooklands - 不日推出
第二十四回 EI283 LCY-DUB 尋找 Avro RJ 的故事 - 不日推出
第二十七回 CX255 HKG-LHR 回到最初的起點  - 不日推出
第二十八回 BA1470 LHR-INV 北上的步伐  - 不日推出
第二十九回 LM391 LM398 EDI-KOI-EDI A Study of Tartans  - 不日推出
第三十回 LM711 KOI-PPW-WRY-KOI 全球最短航班  - 不日推出
第三十一回 LX425 WK348 BHX-ZRH-HER 青出於藍的雪絨花  - 不日推出
第三十二回 BUC8336 HER-LNZ McDonnell Madness  - 不日推出
第三十三回 EN8043 LNZ-FRA Air Dolomiti & 法蘭克福半日遊  - 不日推出
第三十四回 LH796 FRA-HKG 再一個歸家的故事





評分

參與人數 9aPower +27 HugeC +90 收起 理由
YY487 + 1 + 10 多謝分享
DIH + 5 + 10 有圖有真相
CRH5 + 5 + 10 多謝分享
Waiyin12 + 3 + 10 熟悉的場景
yuenpo + 2 + 10 給你一個like
cruisesnet + 4 + 10 多謝分享
fp8329 + 1 + 10 多謝分享
vilo + 1 + 10 多謝分享
S3BL100 + 5 + 10 多謝分享

查看全部評分

S3BL100 發表於 2022-8-20 21:25 | 顯示全部樓層
恭喜樓主有機會重返英國行畢業禮,暫時脫離香港呢個煉獄

早排另一位版友 Waiyin12 亦貼過 LH796 飛行報告,餐膳無分別。好味還好味,比起前幾年個人坐 LH 經驗的確差左唔少。當年仲有德國傳統美食供應,galley 仲有小食任取。而家?

不過 LH A343 內籠 keep 得好好就真,我有機會都想坐 A343,LH 其餘幾款神獸 (346 744 748) 我都已經坐過

FRA 機場算係唔錯,但對比起我用過既其他咁多個歐洲機場,基本上係接近包尾。至少硬係覺得無咁光猛。德國計 MUC 感覺好好多

期待其餘路段飛行報告~




fb.com/scientisthk2usa/
Fuk19805 發表於 2022-8-21 01:22 來自手機 | 顯示全部樓層
S3BL100 發表於 2022-8-20 13:25
恭喜樓主有機會重返英國行畢業禮,暫時脫離香港呢個煉獄

早排另一位版友 Waiyin12 亦貼過 LH796 飛行報告 ...

睇下樓主過往啲report就知佢唔會批評人哋到盡,點都會俾吓面嘅🤣
不過LH cut-cost係人都知㗎喇,除咗用340之外唔會吸引到我坐佢
Waiyin12 發表於 2022-8-21 22:01 來自手機 | 顯示全部樓層

                                    Advertisement



第一次睇 flight report 咁有親切感,因為除咗 Frankfurt 個 visitors centre,所有嘢(Frankfurt Int'l, LH 796, 香港機場)我喺唔夠一個月前先經歷完 XD
https://www.hkitalk.net/HKiTalk2/forum.php?mod=viewthread&tid=2148430&extra=page%3D1&mobile=2
不過我班機因為 delay,變咗日航機

我地個晚餐應該係一模一樣,但早餐有少少唔同,三文治餡料轉咗,當時亦係 Kit-Kat 朱古力而非 Energy Bar
(好奇 Lufthansa 幾耐換一次午/晚餐菜式?)

Lufthansa cut cost 真係 cut 得好緊要,我幾年前搭 LH 731/730 HKG - MUC (A346 執飛),當時有 hot dinner + hot breakfast,兩餐各有一中一西(一葷一素)
而家 Economy Class 長途得返一餐 hot meal,另一餐得 cold sandwich;兩餐都係 vegetarian meal,且無任何選擇,認真唔理想

而我返香港時仲需要7日隔離...
不過我當時篇飛行報告內容已經好多,所以無再分享香港入境檢疫程序,但同樓主嘅係一樣~
睇近期返香港既分享,好似如果填好健康申報,可以唔駛再去中場客運廊,喺 main terminal 做 RAT/PCR

想問下樓主飛英國時,係咪搭 LH 797 香港飛 Frankfurt 轉機?
聽聞 LH 出發嘅晚餐係港式頹飯,希望唔好係真...


 樓主| HZ8186 發表於 2022-8-22 20:46 | 顯示全部樓層
Waiyin12 發表於 2022-8-21 22:01
第一次睇 flight report 咁有親切感,因為除咗 Frankfurt 個 visitors centre,所有嘢(Frankfurt Int'l, L ...

的確係
小弟三年前搭過 HKG-FRA-LCY (LH797 當年係用緊 A346 執飛) 感覺都還好,今次真係有少少改觀 - 餐飲大家有目共睹啦 - 論機上娛樂方面,上次仲話有少少電影睇,今次直情係覺得悶 何況因為俄羅斯入侵烏克蘭既關係 航程比以往再多個幾小時...


去程就再特別少少 - 由於小弟出發當日遇上法蘭克福地勤人員罷工,漢莎最後係從一個 HKG-FRA-LHR 既 itenary 直接踢左小弟上 CX255 既 - 唔係壞事黎既,至少國泰可以提醒下小弟 一間真正 5* 既航空公司服務係應該係如何


您需要登錄後才可以回帖 登錄 | 會員申請加入

本版積分規則

Advertisement

Advertisement

Advertisement

Advertisement

Advertisement

站規|清理本站Cookies|hkitalk.net 香港交通資訊網

GMT+8, 2024-3-29 23:55

Powered by Discuz! X3.4

Copyright © 2001-2020, Tencent Cloud.

快速回復 返回頂部 返回列表