（轉載）啟德現代化電車系統有無得諗？

啟德單軌系統經歷咗十幾年嘅詳細研究後，終於喺2020年正式被政府擱置。其主要死因係成本過高及觀塘段嘅高架系統違反消防安全要求。而政府提出嘅後備方案 — 多元組合系統，說穿了只係電動巴士配上行人電梯網絡，其運載能力明顯遠遜於有軌交通，亦遠遠未能照顧日益增加嘅啟德居民及大量東九上班族嘅通勤需要。

其實早在2013年，電車公司曾建議政府採用現代化電車系統取代單軌列車（圖一）。由於不需建造高架設施，當時建議嘅電車系統造價只係單軌系統嘅四份之一，而且電車嘅班次及載客量可因應需要而靈活調節，令此計劃係社會上收獲不少支持聲音。可惜嘅係，當年政府指電車系統由於需要佔用大量路面空間，會令早已迫爆嘅路面交通更為擠塞，所以執意放棄現代化電車計劃，轉投聚焦已證實係掘頭路嘅單軌系統。

但電車系統是否真如政府所說，必然要佔用車道呢？答案係否定嘅。根據政府文件，雙線電車軌需佔用嘅闊道約7米（圖二）。實地考察過啟德、九龍灣及觀塘嘅道路情況後，發現只要將電車走線適當調整，大部份嘅電車軌道其實不需佔用車道（圖三紅色走線）。

例如由啟德體育園，經啟德車站廣場，至沐翠街一帶本身已預留大量行人道或花圃位置以興建環保連接系統。而跑道區一帶，電車軌道可建於面向啟德內海嘅海濱走道（圖四）。至於係觀塘區，只要將現時觀塘海濱走廊嘅綠化地帶作少量改建，即可容納雙線電車軌道（圖五），令電車網絡可延伸至觀塘行動區。唯獨九龍灣商業區一帶嘅走線無可避免地要走進現行車道（圖三藍色走線）。因此，建議此段路可採用混合路權，雖然會因而減慢電車嘅行進速度，但卻可大幅減少對路面交通嘅影響。

當然，針無兩頭利，利用海濱走廊作電車專線會佔用了原本行人道及單車徑嘅空間。但其實啟德新區本身嘅行人路同單車徑已經好充足，例如跑道區承豐道已建設行人專用嘅空中花園，以及跑道前排向維港一面嘅海濱亦已規劃了闊數十米嘅行人道及共融單車徑。所以即使電車佔用了部份內海海濱走廊嘅位置，對行人及單車前往啟德跑道嘅暢達程度影響相當輕微。

由此可見，只要重組走線，現代化電車對路面交通嘅負荷其實遠低於政府早前嘅預估。希望現屆政府及社會能重新考慮採用啟德現代化電車系統，及早改善啟德及東九龍嘅交通。

作者Facebook專頁：啟德跑道日誌

https://www.bastillepost.com/hongkong/article/11036989-啟德現代化電車系統有無得諗？





之前政府ban電車公司嘅方案係假設電車線一定要佔用車道，但新提議係將重心擺係海濱，取替原有係海濱嘅單車徑。成件事成本平過單軌，而且觀塘部份路段唔佔用車路，效率高好多。大家點睇？

觀塘段駁唔到鐵又唔到核心區 = 曬氣

九龍灣段過跑道區嗰段睇怕都要隧道/架空，政府咁懶一定唔想搞

slsso 發表於 2022-8-31 09:44
觀塘段駁唔到鐵又唔到核心區 = 曬氣

九龍灣段過跑道區嗰段睇怕都要隧道/架空，政府咁懶一定唔想搞 ...

海濱道現正規劃緊係勵業街建有蓋行人天橋駁去牛頭角站，步距300米內。另外將觀塘南嘅上班族分港到屯馬點都可以紓緩觀塘核心嘅擠塞問題。九龍灣過啟德橋全程都可以行地面，地面有足夠空間起多條電車專線。

唔覺得啟德車站廣場同沐翠街容納到電車及相關人流