【問】私人交易二手車安排

我的朋友準備換車，在網上找到了一部02年11月既日產march，
已約過出來試車，大致滿意，我亦將vin給某位大昌工作既
朋友托他找同事起起部車個底，亦冇乜嚴重維修紀錄(未過
保養期)里數亦很少(7700公里)賣方稱新牌買回來少渣，所以
出讓。經還價後傾掂hk$57000(我朋友打算一筆過唔上會)，
賣方會包一次番代理做一次大驗，我們同意如果大驗裏發現
嚴重問題導致交易不能繼續我們承擔1/3驗車費，如果冇問
題佢會包晒。將會扑搥進行交易。想問：

1. 雙方純屬私人交易完全唔經任何車行，想問如何安排一
個可以保障雙方既手續？正確的交易部驟如何？(我知要先
出份臨時保單，去運署check有冇告票，落訂，最後轉名同
過尾數)保險公司會否有關交易提供協助？

2. 賣方表示返大昌有得做細驗同大驗，佢應承包大驗，有冇
人知所謂細驗同大驗包d乜？兩者費用分別多少？

3. 部車有個小問題：試車當日落雨，發覺車頭燈罩內有一浸
倒汗霧氣，不過開左一陣燈就散左，想問為何如此？是正常
現象定是否撞過換左野？

先謝各位！

[ Last edited by fai on 2005-8-30 at 10:35 ]

1. 基本手續你已經做齊, 雖然口頭承諾O係法律上都算有效, 但係最好都係白紙黑字寫明原車主轉讓架車比你, 當中應包括你上面所講既細節, 舊車主同新車主ID NO.,簽名, 若日後有任何差錯, 呢張紙仔可以免去好多麻煩.

香港既保險公司只識問你攞$$$, 其他野一概唔理, 就算大吉利是果句, 有乜衫長褲短, 保險公司賠錢比你仲慢過阿婆行路, 佢追你錢就快過劉易施!

2. 大驗係全車既詳細檢查, 細微至大陣有冇扭曲, 四個轆平唔平衡, 車底有冇穿都幫你CHECK; 至於細驗, 只會幫你做基本功夫, 例如換偈油火咀風隔油隔等等, 價錢? 梗係爭一大截啦! 起碼係三個位同四個位既分別.

3. 現時有D下價車款為左減低成本, 採用非密封式大燈, 所以連場大雨或者洗完車之後, 大燈裏面有機會入水.

我唔肯定MARCH係咪用呢種大燈, 但係如果架車係用密封式大燈既話, 即係支燈有缺口或者爆左而入水; 小弟架LUCIDA其中一支燈都有同樣命運, 都唔知上手車主點整.....