金魚一問

除了係金魚鋪買之外，有無咩水域可以捉到 / 釣到金魚？

另外，金魚鋪賣既金魚係咪係香港 / 大陸水域搵番o黎？

因為好似從來都未聽過養野生金魚…

Thank you!

首先，我想搞清楚你係問緊金魚定錦鯉，金魚係圓碌碌的，錦鯉係長型的。

金魚係人工培育魚種，在野外難以生存，所以在野外應該唔會搵到金魚。
就算放生佢，因為野外的捕獵者等關係，物競天擇下，
金魚會變返原始個樣，即係暗灰色，畀你見到都唔知佢祖先係金魚。
金魚舖賣的金魚係養殖場大量繁殖的。

原帖由 DIH 於 2010-9-12 17:36 發表
首先，我想搞清楚你係問緊金魚定錦鯉，金魚係圓碌碌的，錦鯉係長型的。

金魚係人工培育魚種，在野外難以生存，所以在野外應該唔會搵到金魚。
就算放生佢，因為野外的捕獵者等關係，物競天擇下，
金魚會變返原始個樣，即係暗灰色，畀你見 ...

係金魚。
因為我諗每一樣人養既野，都係從大自然來的，所以睇下金魚會唔會係某地方運過來。
好似 金毛尋回、松鼠狗 o個d 唔知會唔會都有野生

原帖由 fm1234 於 2010-9-12 17:50 發表


係金魚。
因為我諗每一樣人養既野，都係從大自然來的，所以睇下金魚會唔會係某地方運過來。
好似 金毛尋回、松鼠狗 o個d 唔知會唔會都有野生 ...

狗的例子都係一樣，毛太長、嘴太短，或品性太溫馴，在野外都係生存唔到，都係會被淘汰。
睇下澳洲的野狗（Dingo），係歐洲人帶去的家狗的後代；以及中國的唐狗等，你就諗到野生狗會係咩樣。

狗、貓、金魚，都係被人類馴養及配種產生今日你見到的各種形態；
即使植物方面，所有穀類、紅蘿蔔、生菜、椰菜花等等，都係由幾千年的配種而成。

「配種」簡單而言，即係見到某生物有人類需要的特質（例如穀物生得大粒），
人類就會抽取這些特質再繁殖，世代積存下來，這些特質會越來越顯著，與野生同類越拉越遠；
但同時，有時會損失了在野外生存的基因（如粟米已經不能自己繁殖，必須人工授粉）。

「每一樣人養既野，都係從大自然來的」，冇講錯，不過所謂來自大自然，
已經係幾百年前（金魚）甚至幾千年前（穀物）的事，剛好在你所舉的例子（金魚和狗），
人的配種行為（一種selection）已經使些這生物的外型和習性與野生同類差異甚大（但仍然可以交互繁殖），
所以你會搵到基因上的野生種，但唔會搵到外型上相似的野生狗／魚。
就算有，都係相對短時間前（幾年至幾十年）離開人工環境，包括自行逃離或人為放生。
時間一耐，就會在適者生存下，減少花巧，增加「獸性」，逐漸和野外環境融為一體。
這些由人工環境回歸大自然的生物，稱為feral organisms。

如果有唔明，歡迎再問。

[ 本帖最後由 DIH 於 2010-9-13 00:10 編輯 ]

原帖由 DIH 於 2010-9-13 00:03 發表

狗的例子都係一樣，毛太長、嘴太短，或品性太溫馴，在野外都係生存唔到，都係會被淘汰。
睇下澳洲的野狗（Dingo），係歐洲人帶去的家狗的後代；以及中國的唐狗等，你就諗到野生狗會係咩樣。

狗、貓、金魚，都係被人類馴養及配種產生今 ...

多謝詳細解答。

假設幾百年前，有10萬隻野生金毛尋回犬係世上，但無理由10萬隻都俾人收養，如果只有9萬隻被養，
另外1萬隻不是會繼續野外繁殖，理論上應仲會有野生尋回犬，是甚麼使到所有野生尋回犬都消失 (野生金魚都係一樣)？

原帖由 fm1234 於 2010-9-13 18:45 發表


多謝詳細解答。

假設幾百年前，有10萬隻野生金毛尋回犬係世上，但無理由10萬隻都俾人收養，如果只有9萬隻被養，
另外1萬隻不是會繼續野外繁殖，理論上應仲會有野生尋回犬，是甚麼使到所有野生尋回犬都消失 (野生金 ...

我的知識能夠幫到人，我都好欣慰。
但請容我不客氣地指出，你這個問題有問題，主要在第一句。

金毛尋回犬或金魚，原本在野外不存在，是人類介入生物演化而造成的「新發明」。

將你的問題改一改之後繼續作答。

假設而家，有10萬隻野生金毛尋回犬係世上，但未必10萬隻都俾人收養，如果只有9萬隻被養，
另外1萬隻放晒佢出去野外繁殖，理論上應仲會有野生尋回犬，是甚麼使到所有野生尋回犬都消失？

本來想簡介一下演化論，但之前打到一半個電腦出問題乜都冇晒。
既然達爾文要用成本書先講到個開頭，我都係唔好不自量力，
就用返金毛尋回犬個例子，好籠統咁講返。

所有家犬，係同灰狼同種（Canis lupus），可以互相繁殖。
但係，點解家犬有各種各樣的形態，但狼就來來去去都係一個樣呢？

狼在野外生活，有一套既定環境規限，例如要防皮膚病（冇人會帶佢睇獸醫）、
要識得捕獵（冇人會餵狗糧畀佢）、感官要敏銳、唔可以畀獵物發現等，
所以狼都係直毛、兇猛、耳朵豎起、毛色灰白、嘴長（可以探入獵物體內食肉）。

先講來源：
古人由馴養野狼，到繁殖成家犬，過程中將狼群中性格溫馴、聽話、獸性較少的個體選擇出來，
並進行配種，令這些特質越來越明顯，到後來有了基本的家犬後，
再因為基因變異，出現了人類喜愛的特質，其中一套特質，就搞搞下變成金毛尋回犬，
金毛尋回犬只有不超過三百年歷史。

再講去向：
放歸野外的金毛尋回犬，假如不能與野狼或野狗繁殖，
披住一身阻頭阻勢的厚毛，又唔夠其他獵獸惡，可能就此全族餓死，唔使再講落去。
又或者，如果能夠遇到一群野狗收留，就另一套講法。
野生動物只會搵群中最強壯的成員交配，而狗群中這些強壯成員就係成隻狼咁樣。
金毛尋回犬，毛長、毛色白或金黃、耳大而垂、嘴短、性格溫馴。
這些特質，在野外係好蝕底的。若有幸同群中成員交配，這些特質很快就會溝稀晒，
我個人估計，過一兩代後，已經看不出甚麼金毛尋回犬的痕跡了。
再者，在遺傳學而言，金毛尋回犬這些在野狗中看不見的特質，
是由少數基因突變事件，再近親交配而成，好大可能係隱性基因，野狗身上係顯性基因，
隱性一同顯性溝埋，就會係顯性佔優，隱性基因會越溝越少。

睇過書講...
金魚本來係野外河中的"魚即"魚,萬中無一的基因突變種
人類係刻意對呢d原始變色魚作選擇性交配, 只選擇有突變的魚互相配種
好殘酷地,所有冇變色的後代全會被淘汰
橙色基因盤因此更穩定左,"即"魚後代先會"更大機會"(並唔係絕對)係橙色

所以我地會見到,市面賣的金魚,由於一定係次等/低等級(高級會賣成幾十萬一條做鑑賞用)
幾千蚊一條蘭壽/青文/丹頂都已唔係上級了.
廿蚊條果d已係極普通級數,如 琉金/和金/獅頭(尾唔靚/頭唔大)
10蚊包果d係用來餵食人魚/龍吐珠的.唔係比你養的.所以果d唔會玩得長就死

全都係之前所講劣等遺傳, 身上面係仍帶有黑色/白色/灰色(係有的.只係睇多定少)
而據書講, 金魚放於野外環境,約2代已開始野化,4代開始已完全變回"即"魚形態
即係灰灰黑黑

仲有.金魚係配種為觀賞.所以配的種魚都係又肥又短但腫頭長尾的魚,
游水能力極差
即魚卻係野外河流的魚,極靈活生猛
所以物競天擇,野外係絕對冇可能會出現金魚仲要係多量.
有兩條k型都唔會生存得耐.
另外據書本講, 野外淡水魚一般唔會有光亮色,因為光亮色惹鳥類/獸類捕捉
咁亦正正解釋左,點解野外唔會有橙化左的即魚出現.

咁你現在明未? 係山澗見到金魚,一係就萬中無一的K型
一係就有無良主人放生的.

*香港的金魚來源多數係大陸/台灣(劣至中等,及普通品種),如壽星,獅子, 琉,和
少量係來自日本,係高級質素(日本配種質素噬選上好高技巧), 好似朱文,清文,茶金, 蘭壽,珍珠鱗.
(以前睇的書係台灣野,稱呼可能有分別)

而我,冇錢所以只係玩獅頭已好開心. 不過有興趣所以研究過
如果appreciate我的info不妨加下分吧

[ 本帖最後由 cn2661_2d32 於 2010-9-14 02:22 編輯 ]

原帖由 cn2661_2d32 於 2010-9-14 00:07 發表
睇過書講...
金魚本來係野外河中的"魚即"魚,萬中無一的基因突變種
人類係刻意對呢d原始變色魚作選擇性交配, 只選擇有突變的魚互相配種
好殘酷地,所有冇變色的後代全會被淘汰
橙色基因盤因此更穩定左,"即"魚後代先會" ...

同樣道理，其他如孔雀魚、斑馬魚等，假如放歸野外／或自行繁殖但同缸有其他魚會食幼魚，
倖存下來的都會係色彩黯淡、「鰭」「翅」不鮮明，「靚」在野外係一重負累。
人工養魚想繁殖唔難，但要繁殖到靚魚就難，所以靚魚先會咁貴。

原帖由 DIH 於 2010-9-14 09:13 發表

同樣道理，其他如孔雀魚、斑馬魚等，假如放歸野外／或自行繁殖但同缸有其他魚會食幼魚，
倖存下來的都會係色彩黯淡、「鰭」「翅」不鮮明，「靚」在野外係一重負累。
人工養魚想繁殖唔難，但要繁殖到靚魚就難，所以靚魚先會咁貴。: ...

某程度上,我覺得人類培養觀賞動物都係借助某物種的突變缺陷
誇張少少的比喻,係刻意將左手特別短/身特別短仲要肌肉特別冇力但又皮膚綠色的人類加以繁殖咁,
帶出訊息係: 自然入面可能求生能力奇低. 自然下冇可能會存活同繁顯.
唔計佢比人養唔識搵食.淨講形態
波斯貓,臘腸狗,凸眼金魚放出野外,兩下就比人擔左去.

配種係養動物發燒友的終極興趣
點去用配種"優生學"配得出手腳身毛同時都最靚體態的比例同組合,係佢地最大成就

貓狗魚馬都係.所以種魚/種馬等,名種係可以好貴好貴
好多出名的靚狗靚魚靚馬都係同一個老祖. 為左遺傳佢同一個特質
例如貪佢個頭夠大,貪佢條尾夠長.
集各家靚種的後代(唔可以係隻種本身.因為基因未穩定,可能會消失左),
可能經過三五七代, 先有好微機會有晒理想中的靚腳靚身頭尾,又要靚毛好力.

[ 本帖最後由 cn2661_2d32 於 2010-9-14 12:11 編輯 ]