平時三唔識七果D死訊, 總會有人入來係咁咦都留番句RIP, 今次已經兩日半, 仲未有人入來留言, 少有,
證明新一代對蘇杏璇冇乜印象.
連日來各媒體講述佢生平, 只能夠用千篇一律去形容, 電視劇作只提及《新紮師兄》同《義不容情》,
其他的只係輕輕帶過, 有的更加隻字不提, 角色上淨係話佢演慈母, 其他可以無視晒; 生前冇想過結婚,
點知遇著生前(現任)丈夫結左婚, 仲生左一對仔女, 聽到厭, 有傳媒仲只係睇住維基百科讀出來,
真係...俾佢聽到, 死都嚇番生.
至於我, 對佢比較有印象的劇作有無線《壹號皇庭》系列和亞視《美麗傳說》, 兩套都唔係演慈母,
後者角色係格衰嘴賤, 貪生怕死o既上等八婆, 演得入木三分, 係我對佢最欣賞的角色; 在前者中演
陶大宇媽媽, 亦係律師, 說話振振有詞, 字字鏗鏘, 比演慈母角色更有睇頭, 可能之前演得慈母多,
已經深入民心, 大眾對有其他演技要求的劇作反而無乜印象, 實屬可惜!! |
