(麻帆良市時報記者鹿目まどか報導)
踏入 1970 年代, 香港人口持續急劇增長, 市民對公共交通嘅需求亦有增無減,
當時嘅九巴同中巴喺 1970 年代初期積極增購新巴士, 以應付龐大需求,
但係英國本土喺 1960 年代末起全面推行一人控制嘅巴士運作模式,
呢一個決定令各巴士生產商放棄左前置引擎巴士嘅生產線, 改而全面發展適合一人控制嘅後置引擎巴士。
面對人口增長同海底隧道通車嘅壓力之下, 中巴同九巴先後購入合共近 800 部第一代後置引擎巴士 --
Daimler Fleetline 丹拿 "珍寶", 並且希望可以喺香港依樣畫葫蘆, 推行一人控制巴士模式以減低運作成本。
可惜珍寶巴士喺使用左一段時間之後出現 "水土不服" 嘅現象, 佢地喺長期超載嘅情況下,
底盤副架同傳動軸經常不勝負荷而斷裂, 巴士嘅引擎同細小嘅水箱都設置喺車尾,
雖然令車廂環境較寧靜, 但係喺香港嘅亞熱帶氣候之下, 引擎冷卻效果十分差勁,
再者, 珍寶巴士亦欠缺駛上斜路嘅能耐, 喺香港山多平地少嘅環境下，珍寶巴士顯然力不從心,
尤其是喺 1970 年代開始, 政府全力發展新市鎮、港島東區及南區, 當年來往市區同呢尐新發展區嘅路線,
好多都需要攀山越嶺, 例如途經大埔公路、青山公路、獅子山隧道九龍塘入口、薄扶林道及柴灣道,
各巴士公司亦因而認定前置引擎巴士喺當時始終係一個比較可靠嘅選擇。
但係受制於當時嘅法例規定, 巴士公司必須購買由英國或者英聯邦國家生產嘅巴士,
以保障英國工業利益, 而英國嘅巴士製造商又已經停產前置引擎巴士, 喺呢個青黃不接嘅情況下,
九巴同中巴除左引進二手嘅前置引擎巴士以解決一時嘅同時, 亦持續要求英國嘅巴士生產商可以提供一款前置引擎、
可作一人控制模式及高載客量嘅巴士, 比香港市場使用。適時英國嘅 Dennis 車廠,
喺 1977 年為九巴提供一款符合九巴要求嘅新巴士 -- Jubilant,
經九巴試用之後感到非常滿意, 於是向 Dennis 大量訂購 Jubilant 新巴士。
作為當時 "一廠獨大" 嘅 Leyland 車廠, 眼見對手 Dennis 同九巴嘅呢一切舉動亦感到壓力,
恐怕 Leyland 巴士產品喺香港嘅市場佔有率亦會隨之下降, 於是亦不甘示弱,。
喺呢個背景之下, 一款專為香港特殊嘅運作環境而設計, 亦成為後來喺香港家傳戶曉嘅巴士車款 --
利蘭勝利二型 (Leyland Victory 2) 亦因而誕生。
英國 Leyland 車廠喺 1978 - 1981 年間一共生產左 716 架勝利二型巴士,
比中巴同九巴, 以及後來嘅新大嶼山巴士使用, 並且喺 1979 - 1983 年間陸續投入服務。
呢款巴士以九巴喺 1976 年由南非引入同試用, 外號 "非洲牛" 嘅 Guy Victory J 型 (九巴編號 G1 -4)
雙層巴士底盤改良而來, 因為其底盤設計基本上係附合九巴嘅運作要求,
只係車身地台太高同操控性能較為惡劣。Leyland 除左將底盤高度降低 114mm 之外
(Guy Victory 原本係單層巴士底盤, 車身地台超高),
亦配有馬力更大嘅 10450cc Gardner 6LXB 引擎 (178 匹馬力),
連接由西德 Voith 提供, 附有內罝減速器嘅 DIWA 851 三前速全自動波箱,
同時附有液壓輔助轉向系統 (油壓呔), 令車長喺行走彎多路窄嘅地段時操控更容易。
其中中巴一共引入 167 架勝利二型巴士, 當中喺 1981 年購買嘅最後一批為數 20 部,
車隊編號 LV148 - LV167 嘅勝利二型巴士, 使用左由 "都普" (Duple Metsec) 提供嘅車身,
有別於其他使用由 Walter Alexander 提供車身嘅同款巴士,
外型更同九巴喺 1981 -1982 年間引入, 同樣係前置引擎設計嘅 150 架 Dennis Jubilant
(N214 - N363) 完全一樣。雖然載客量比配 Alexander 車身嘅同僚稍遜
(都普車身上層有 60 座位, 下層 38 座位加 16 企位合共 114 人,
而配 Alexander 車身嘅勝利二型就係上層 60 座位, 下層 42 座位加 16 企位合共 118 人),
亦不失佢地擁有嘅高載客量, 同中巴車隊入面嘅其他勝利二型一樣,
呢批巴士一直都喺中巴入面扮演吃重嘅角色。呢批勝利二型雖然算係比較稀有嘅品種,
但係佢地卻係神出鬼沒, 甚至喺過海隧道線, 例如 109, 110, 111, 以至 170 同 182,
都可以見到佢地嘅蹤影。
隨住中巴喺 1998 年喪失專營權, 呢 20 架都普車身勝利二型巴士,
連同其他合共 163 架同僚 (有四架勝利二型喺中巴時代因為火災或者交通意外而退役,
所以中巴最後有 163 架勝利二型) 及其他中巴車隊嘅巴士,
喺當年 9 月 1 日開始成為新巴旗下嘅成員。雖然勝利二型嘅設計,
非常適合行走例如香港島呢種彎多路窄嘅地區, 加上中巴嘅勝利二型加裝左防滾桿,
行車時亦比九巴的嘅勝利二型更穩定, 因而得到中巴重用, 所以呢批巴士喺轉投新巴初期,
佢地嘅角色亦變動不大, 但係由於佢地始終都係前置引擎設計,
地台亦比其他款式嘅巴士為高, 喺當時超低地台巴士開始崛起嘅時代,
勝利二型嘅設計亦顯得非常過時, 加上當時新巴嘅積極革新,
勝利二型就成為新巴接手經營權後嘅首個被淘汰對象。
隨著新訂購嘅超低地台空調雙層巴士陸續交付新巴並且投入服務,
呢批曾經喺中巴同新巴立下汗馬功勞嘅巴士亦被陸續淘汰,
最後服役於新巴嘅勝利二型巴士, 喺千禧年全數退役,
同時亦代表住勝利二型喺香港服務市民長達廿載嘅光輝歲月正式結束。
今日, 麻帆良市正式歡迎中巴都普車身利蘭勝利二型登場!!
勝利二型呢款巴士對於七、八十後嘅人嚟講都應該唔會陌生,
尤其對於市長 Super Bus 嚟講, 呢款巴士更加係陪住佢長大,
勝利二型亦係佢自小學開始第一款認識嘅巴士名字,
佢話主要係拜喺 1986 年發生喺屯門嘅一宗致命九巴翻車事故所賜,
呢宗事故震撼當時社會各界, 令勝利二型成為各大報章嘅主角,
事實上勝利二型喺佢地服役嘅廿年生涯入面, 曾經發生過不下十宗嘅嚴重事故,
當中涉及翻車嘅亦佔相當部份, 引致唔同程度嘅傷亡已經不在話下,
皆因佢地車身底盤較高, 重心亦隨之提高, 令轉彎時顯得不穩定。
撇開佢地以往嘅意外紀錄, Super Bus 話, 佢個人對勝利二型其實都係又愛又恨,
愛者, 係因為佢嘅車身外型設計, Alexander 車身嘅流線設計令人討好,
恨者, 就係因為佢地嘅前置引擎設計, 令巴士行走時下層車廂震天價響,
當佢地行高速公路或者喺隧道入面高速行走果陣引擎聲仲勁過開演唱會!
坐喺最近引擎位置嘅 "導航位" (前軸後面有一個單丁位, 或者應該叫長者位) 更令耳仔受罪,
亦都佩服揸呢款巴士嘅車長, 每日係咁揸足成日都可次面不改容咁款,
Super Bus 打趣話: "如果你果日坐雞車* 只係坐一程, 夜晚瞓覺你喺床度就已經可以聽番果把凌厲嘅引擎聲,
喺你嘅腦海入面重播!" 不過如果以欣賞嘅角度睇, 其實都可以將之視為特色,
Super Bus 甚至將之視為享受, 坐喺 "導航位", 睇住車長喺高高在上嘅駕駛座扭扭呔盤,
攪攪門掣, 有尐車長就一邊楝起左腳一邊揸車, 夠 Cool 之餘亦有種 "揸雞車* 係車長嘅浪漫" 嘅感覺,
甚為有趣, 佢仲話, 以前坐 12A 返學放學, 成日都會坐到雞車* , 亦認識佢地嘅車長,
佢地話天時熱就一定會打開司機位門, 等行車果陣尐涼風撞入嚟, 咁先至冇咁熱,
不過呢一切隨住時代同車型嘅轉變, 今日坐巴士已經冇可能再見到呢尐畫面啦,
至於中巴嘅勝利二型, Super Bus 話雖然佢以前住紅磡, 但係都會過港島區,
佢地嘅勝利二型亦都坐過好幾次, 感覺同坐九巴嘅冇乜分別,
不外乎都係座椅嘅乘坐感覺唔同, 始終中巴嘅座椅係用硬椅背嘅,
佢話不過如果坐都普車身版嘅 "導航位", 就反而有一種特別嘅感覺,
或者係因為坐慣九巴使用同款車身, 俗稱 "黑金剛" 嘅 Dennis Jubilant 嘅 "導航位" 嘅關係啦,
坐上呢款巴士, 初時唔識分巴士型號嘅佢真係有一種 "唔知自己係坐緊雞車定鴨車* " 嘅感覺,
有一種掉轉左嘅感覺, 但係憑住高高在上嘅司機位
(勝利二型嘅司機位比 Dennis Jubilant 高係其中嘅最大分別),
先至知道自己係坐緊一架勝利二型, 但係司機位錶板同 Alexander 車身嘅就有些微分別,
而且亦比較細, 亦係中巴都普車身利蘭勝利二型嘅特色,
Super Bus 最記得佢同屋企人去完探親, 坐 72 號由華貴邨出銅鑼灣轉車,
其中一次坐中 "都普雞* ", 佢坐喺 "導航位" 睇住中巴師傅以熟練嘅駕車技術,
喺黃竹坑道同香港仔隧道奔馳嘅場面, 至今依然記憶猶新,
不過呢一切一切, 都只能成為追憶啦, Super Bus 仲話,
如果仲想依家親嘗乘坐勝利二型巴士嘅滋味都唔係完全冇可能,
因為新巴將車隊中嘅勝利二型巴士淘汰嘅時候, 將其中一部編號 LV36 嘅勝利二型巴士,
捐贈比英國蘇格蘭巴士博物館收藏, 有機會去參觀嘅朋友亦可以一睹呢架全球僅有,
配上 Alexander 車身嘅前中巴勝利二型嘅風采, 喺一尐場合,
佢地仲會揸呢架寶貝出嚟接載參觀人仕, 咁就睇你好唔好彩坐到佢啦!
http://www.hkbf.org/p2669505.htm
隆重歡迎! 中巴都普車身利蘭勝利二型, LV166, 見參!!
*巴士迷對呢兩款巴士嘅戲稱:
利蘭勝利二型 -- 主要稱為雞車, 高腳雞, 大跣雞,
都普車身嘅勝利二型就被巴士迷叫都普雞, 原因大概係因為呢款巴士嘅前身 --
Guy Victory J 嘅廠名 Guy 嘅中文諧音所致, 事實上,
中巴嘅第一架勝利二型巴士 LV1, 車頭亦配有 "GUY" 嘅車廠標誌,
同埋如果有留意司機位嘅油門腳踏有個 G 字, 亦係同 Guy 車廠有淵源
Dennis Jubilant -- 由於佢地同勝利二型嘅底盤設計幾乎如出一徹,
勝利二型叫 "雞車", Dennis Jubilant 就有相對嘅 "鴨車",
不過九巴中人對兩款唔同車身嘅 "鴨車" 又有唔同稱呼,
配都普車身嘅 "鴨車" 有個威猛嘅外號叫 "黑金剛",
Alexander 車身就因為佢地前後兩條粗大嘅泵把而得名 "大泵把"
証書編號 0234, 限量 600 架
正式落地!! 今次就由 "公廁" アスナ嚟迎接新車~ (Super Bus 正被アスナ狂插中)
LV166, 以前 109 都經常見到佢
雞車鴨車, 都係要打開司機位趟門先至有個性嘅~
同九巴 Dennis Jubilant 相會
唔同嘅車款, 但係配上同款車身, 會唔會令大家混淆呢?
來一個對比先~~
同中巴 LV1 相會, 中巴 167 架勝利二型之中, 只有最後 20 架係配都普車身,
令呢批巴士顯得更加特別
對住個引擎喺隔離, 一齊打開司機位門抖抖涼, 消消熱氣
真車相片
過檔新巴後嘅都普雞
勝利の光輝
And......勝型二型之事件簿
以下係部份喺 Youtube 揾到, 有關勝利二型巴士出事嘅新聞片段,
值得留意嘅係涉及翻車事故嘅勝利二型巴士都係九巴嘅居多,
相比之下, 中巴嘅勝利二型只係喺 1990 年喺鴨脷洲大橋翻過一次車,
造成包括司機在內共 18 人受傷, 而且只有不足 5 人需要留院,
或者就係因為中巴嘅勝利二型加裝左防滾桿,
令佢地行車時比九巴嘅同款巴士更穩定啦~
1981 年 8 月 23 日, 一架救護車沿屯門公路往荃灣方向近深井橋失控撞山,
越過對面行車線與行走 66M 號線往屯門方向嘅九巴勝利二型巴士 G94 迎頭相撞,
救護車內嘅氧氣樽受震盪下隨即爆炸着火並且波及肇事巴士, 兩車都嚴重焚毀,
事件造成 4 死 29 傷, 死者都係救護車內嘅救護員同一個女病人,
只有一位救護員因為被拋出車外而脫險, 而肇事嘅巴士 G94 亦因而宣告退役,
佢只係服役左近一年零七個月(1980 年 1 月 4 日出牌),
對在下來講, 雖然呢次事故同巴士本身設計有問題與否並扯唔上任何關係,
但係呢宗事故唔只可怕, 亦覺得好罕見...
https://www.youtube.com/watch?v=5AtdO6mSnYY
1982 年 11 月 14 日, 九巴 G440 行走 60M 往屯門方向,
喺屯門公路去到小欖附近撞山翻側, 司機同錢箱亦被拋出車外,
事件造成一名乘客死亡, 109人受傷, 呢次意外亦係香港傷亡人數最多嘅涉及單一車輛交通意外,
出事巴士事後亦被除牌, 而佢更係新車服役只有唔夠半年就因為車禍而退役 (1982 年 5 月 17 日出牌),
亦係繼上面嘅 G94 之後九巴另一架最短命嘅勝利二型。
呢單事故可以以驚險來形容, 因為事發後全車有三分之一車身擱喺公路嘅防撞欄之外,
仲爭少少就跌落青山公路, 到時死亡人數可能唔只一個咁多...
https://www.youtube.com/watch?v=R0lCSg-1VU8
1986 年 11 月 5 日, 一架行走 61A 嘅九巴勝利二型 G470 喺屯門石排頭路與鳴琴路交界翻側,
造成 5 死 58 人傷, 當中有兩名死者係途人, 其中一個仲係小童, 呢單事件令勝利二型成為新聞主角,
亦因為呢次車禍令在下認識勝利二型呢個巴士型號。值得一提嘅,
係出事嘅 G470 事後亦獲得修復並且繼續行走, 更喺九零年代經常行走當時嘅 1K 線,
仲上有港基國際銀行嘅全身廣告。在下當時上中學果陣, 有時放學都會搭到佢,
一直到 1K 被取消之後, 呢架 G470 就唔知去左邊條線, 不過印象中, 如無記錯之後都有見過行 12A,
同埋喺 30X 都有見過佢出現
https://www.youtube.com/watch?v=oKE393h-_LQ
事發後兩日, 時任九巴工程部經理潘強先生駕駛另一架同款巴士喺事發現場試車重組案情
(由 0:33 開始), 可見最後巴士亦出現甩尾現象, 據講連潘強先生本人事後亦一額冷汗!
https://www.youtube.com/watch?v=TrfvIvB5Wy4
1993年 7 月 25 日, 另一架九巴勝利二型 G305 行走 69M 喺屯門洪天路與屏廈路交界失事翻側,
造成車上40人受傷, 呢宗事故亦係九巴最後一宗涉及勝利二型翻車嘅事故, 巴士最後亦提早退役。
亦因為呢宗事故, 在下有一段時間坐呢款巴士果陣亦唔敢坐上層
尤其係在下果陣返中學要坐 12A, 呢條線正係以呢款巴士做主力...
https://www.youtube.com/watch?v=5CmelS6Nw30
後話: 相信一定又會有人講在下玩巴士玩到走火入魔啦,
每次出新車 Post 都一定長篇大論, 有幾多人睇?
本來都已經希望盡量精簡, 有尐地方盡可能輕輕帶過就算,
但係在下對呢款車嘅回憶實在太多, 最後都係決定講得幾多就幾多,
但係亦唔想太冗長免得悶親大家 (唔怪得勝型二型呢款車都可以出巴士書啦!)
唔理以往對佢地有幾多不喜歡, 有幾多厭惡,
勝利二型呢款巴士始終係陪伴住在下長大嘅巴士車款之一, 卻係不爭嘅事實,
以往有時會恨不得呢尐巴士同珍寶一樣快快手退哂去,
但係到你想去坐番佢地嘅時候, 已經了無機會。
隨住時代嘅變遷, 大家亦會有一尐身邊嘅事物, 以為係會必然地存在,
到佢地不言不語地消失, 我地發現嘅時候已經太遲,
"點解我地當初唔好好地珍惜?"
又當中資料可能亦有錯漏, 始終在下志在出於分享,
並唔係乜野專家, 請看官多多包涵
最後......
Thanks for reading~ |
|
|
|
|
|
|
|
|
|
Advertisement
Advertisement
Advertisement
Advertisement
Advertisement
|
