你地認為讀書係講求天份定努力？

小弟係2015DSE考生，今日考完所有core科目
我唔係一個非常勤奮既人，不過自從中五開始每日都有溫1-3hrs既書，study leave就大約5-7hrs一日（睇到呢度應該有大量AL人士恥笑DSE雞 ）
我係用得最多時間溫英文既，其次就係Maths,2科都有補習
而中文同LS我都好少會抽時間溫，甚至連pp都冇點特登操過
不過考完呢4科後，eng同maths表現可謂強差人意 即係高中用左好多時間去操，但表現永遠只不過係“猛”理想成績既“車邊”甚至比平日更差（當然我知道語文科係要浸，好難一朝一夕提升到）
反而最少溫既Ls同埋中文，學校老師都有比唔錯既期望，考完都覺得都還可以（至少感覺上係）
當然我知道一日未放榜都未決定，考完唔好太執著etc.既道理

不過我諗起小學既時候，中文常識又係唔洗溫都拎到優異既成績
反而eng同maths點溫都會唔合格，成績差，勢估唔到黎到高中考DSE前一刻都係咁（當然無以前差得咁離譜）
所以我始終覺得讀書真係好講天份，幾乎天生就決定你係邊一個範疇叻既人。
努力只不過係錦上添花而已，但最終都係講天份。無天份真係死讀爛讀，任憑你一日溫12個鐘書都冇用。

其實小弟打咁大段野出黎，除左係發泄一下之外，我都知呢度有好多身經AL百戰，甚至人生已經成功一半既人士，其實，我真係好想聽下你地既經歷，等我可以用更多既角度去考慮我未來既前境

[ 本帖最後由 E21A 於 2015-4-15 22:31 編輯 ]

你係講讀書定考試先？

我覺得好大程度係要靠努力，不過係 hard work with strategy…

講真，小學讀得掂，唔代表中學讀得掂；
中學讀得掂，唔代表大學讀得掂；
大學讀得掂，唔代表研究院讀得掂，更唔代表出來社會一定更著數。
越讀上去，就會發覺好多野唔係死記硬背，而係要讀得明、讀得通，識得舉一反三，
懂得如何思考分析，懂得如何尋覓知識。

祝好運~

努力係緊要，問題係點樣努力先係個大問題。
反之部份人根本只係上下堂，考試前睇下書都會考得好過哂班死溫難溫 o既人 ……

講真，我自己認為某程度上讀書根本就唔應該為考試，而考試呢個制度根本就係教壞學生。
事實上書本根本就係為知識，如果下下用黎比較分數根本就係搵返學生黎分等級，從而扼殺左部份學生 o既潛力。

當然我了解社會分級對整個社會 o既重要性，但係當探討教育呢個角度上整件事就唔應該咁睇；
我會睇考試只係為分級而分級，反之我會認為「天份」呢樣先係決定一個人 o既能力－即用於社會分級。

當一個人唔需要考試 o既時候，完全冇壓力 o既情況下，
如果可以將吸收 o既智識去 apply 出去現實世界之上，我會認為佢係成功，並且值得比佢移上再上一級 o既層次，
但一個人根本係冇天份，當試過努力吸收，仍然難於理解時，倒不如早日轉行／科，搵個一份對自己有興趣 o既科目並專注研究好過。

天份都有分先天同後天, 即使先天都仲有得細分, 係對某些科目有先天興趣, 還是對讀書
有先天了解, 前者對於唔係好識讀書的人係天大喜訊, 只要俾少少努力就可以考到高分,
但講到尾只局限對某些科目有用, 而擁有後者呢, 係講緊任何科目都有用, 哪怕你對讀書
完全冇興趣, 有呢種先天技能喺手, 咩博士碩士都難你唔到, 要有社會地位唔難.

後天唔係完全冇機會, 但最起碼真係有人話到俾個小朋友知道, 讀書對將來幾有用之外,
提供讀書竅門亦只係其中一環, 比如有人話溫書時讀出聲有用過就咁睇, 或者係一堆文字
入面揀重點嚟睇, 或者真正去試過/接觸過所學的知識, 呢啲都係其中方法. 而我就相信有
自信同有理想, 係好能夠推動到一個人去明白讀書背後嘅意義, 加上要明白讀書只係人生
起步點, 而唔係決定你一生全部的時候, 再依循一些實用的讀書方法, 清楚了解自己邊啲
科目係弱項, 再重點去操, 唔掂就盡快諗適合自己的辦法, 要同時間競賽, 但不要同其他人
比較, 到最後(踏入社會前最後一次學校考試/公開試)無論成績係點樣, 過程同結果都係
你自己經歷過, 係終生受用的經驗, 對將來做事一定有幫助.

另外, 讀書同考試係兩回事, 唔能夠畫上等號, 讀書平時在家.自修室.課室, 比較在試場時係
壓力細好多. 讀書方法其實係包括埋你識唔識點樣處理壓力, 屋企俾嘅壓力, 自己俾嘅壓力,
試場上嘅壓力等等, 其實有可能蠶食緊你曾經溫過嘅書, 牢牢記住嘅答案, 到其時你答唔出
一粒字, 係肥左就肥左, 冇得返轉頭, 所以識得讀書方法同懂得處理壓力同樣重要.

簡而言之, 「讀書」都係一種學問, 除左有人天生就明白「讀書」為何物, 其他人都只能
靠後天慢慢學習去領略箇中意義, 利用適合自己的讀書方法, 排除壓力, 去應付一個又一個
考試, 完成人生的學習階段, 迎接一個擁有無限可能的自己.

p.s. 小弟讀書堅唔叻, 咩預科咩大學完全碰不到邊...... 知道時間唔會倒轉行, 惟有盡快把握
現在, 不斷裝備自己(內在), 去得人欣賞和認同, 對得起人, 對得起自己.