本帖最後由 VocaloidMikuBus 於 2017-5-11 21:31 編輯
(麻帆良市時報記者高坂 穂乃果報導)
倫敦運輸局 London Transport 喺 1969 - 1976 年間,
向英國 Daimler 車廠 (後來被 Leyland 收購) 購買合共 2646 架
Daimler Fleetline (DMS) 雙層巴士, 成為全球最大嘅 Daimler Fleetline 買家,
原意係替代當時服務已久嘅 AEC Regent (RT)、AEC Regal (RF)
同 Routemaster (RM) 巴士, 同引入一人控制運作模式,
初時 London Transport 對呢批新巴士抱有好高嘅期望,
甚至為佢地冠以 "Londoner" 嘅稱號, 希望得到有如當年 AEC Routemaster 嘅效果。
但係喺服役期問, 佢地喺倫敦嘅行車同運作表現,
都令倫敦市民、司機以至 London Transport 感到強差人意,
London Transport 保守嘅車輛維修制度, 更令呢批巴士唔適合 LT 嘅日常車務運作,
迫使 London Transport 喺 1978 年宣佈將呢批平均服役只有僅僅八年嘅 DMS 巴士提早退役,
並且流入二手市場放售, 香港作為海外使用 Daimler Fleetline 巴士嘅地方之一,
亦成為呢批倫敦棄將嘅落腳地, 香港嘅幾家巴士公司,
各自引入唔同數量嘅倫敦 DMS 巴士, 總數合共達 370 部之多。
踏入八十年代, 九巴車隊中嘅 Daimler CVG5 型巴士,
即係九巴內部稱為丹拿 A 型同 B 型嘅巴士已到退役之期,
面對因此而出現嘅車源短缺問題, 九巴亦睇中呢批由倫敦退下火線嘅壯丁,
喺 1981 - 1983 年間引入合共 100 架 DMS 巴士 (車隊編號 2D8 - 107),
同彼岸嘅中巴相比之下, 九巴喺呢批巴士上嘅改裝功夫來得更加徹底,
九巴喺呢批倫敦寶投入服務之前, 已經將所有絲絨座墊改為人造乳膠座墊,
而車箱內籠亦改為九巴標準嘅綠色 (後期翻油為淺棕色),
所有車窗 (除左下層擋風玻璃) 改為全幅式推拉式車窗,
以及將路線牌箱改為九巴標準嘅一整體模式,
(不過亦有部份喺投入服務初期仍然沿用原裝嘅牌箱, 後來先至被更換)。
喺使用左一段日子後又再作出更多改良, 包括將四頁式前閘嘅後半段移走,
並且換上傍板 (亦有部份冇被改裝), 下層車頭嘅擋風玻璃連前幅移走,
並且更換上可以開啟嘅車窗，以改善下層嘅通風,
不過亦有部份依然使用原裝頭幅同擋風玻璃直至退役。
而九巴喺選取呢批倫敦寶巴士嘅時候, 不論 MCW 定係 Park Royal 車身亦有選購,
唯獨喺引擎配搭方面, 九巴卻同中巴嘅取向南轅北轍,
"獨具慧眼" 地選配引擎容積較大嘅 Leyland O.680 引擎 DMS 同保留原來嘅全自動變速箱,
諷刺嘅係呢款引擎唔多適合香港嘅環境令壞車率偏高,
而且喺九巴車隊入面, 並冇任何一款巴士使用同款引擎,
以至引擎零件短缺又不能共用, 於是部份巴士後來被改用 Gardner 引擎,
而問題多多嘅全自動波箱, 亦被改為傳統嘅半自動波操作。
雖然 Gardner 引擎運作穩定同可靠, 但係改裝所牽涉嘅範疇太多唔合乎成本效益,
所以亦有相當部份嘅九巴 DMS 巴士沿用 Leyland 引擎直至退役。
九巴將呢批倫敦寶投放原來丹拿 A 同 B 型巴士行走而客量唔高嘅路線,
另外部份新開辦嘅地鐵接駁線同大埔區內線 72K 亦會見到呢款巴士出現,
到 80 年代中佢地更喺元朗區服務, 同埋以 "開荒牛" 嘅姿態,
服務馬鞍山同青衣等地嘅居民。雖然同九巴正手引入嘅 "珍寶" 巴士相比,
呢批倫敦寶設有風油軚令車長駕駛時輕鬆得多,
但係佢地嘅二手車身份加上車齡亦唔低,
部份用呢款巴士 "開荒" 行走嘅路線客量亦上升,
以其只有 94 人嘅載客量無疑無法應付客量需求。
隨住新巴士嘅引入, 除左因為交通意外而要提早退役之外, 九巴嘅倫敦寶巴士,
有部份喺 1983 - 1986 年間成為訓練巴士, 數目達二十多架, 作為訓練新進車長之用,
而繼續用作客運用途嘅, 大部份喺 1986 至 1989 年間退役,
最後服役嘅倫敦寶巴士, 喺 1990 年正式退役, 部份巴士退役後被運往內地繼續行走。
九巴購入 DMS 純為解決一時嘅車源緊張問題, 加上機械問題同當年嘅保養質素較低,
全數 100 架倫敦寶喺九巴客運車隊服役時間平均不足 6 年，
佢地喺九巴車隊嘅身份就猶如過客一樣。
今日, 麻帆良市正式歡迎九巴 Daimler Fleetline DMS "倫敦寶" 登場!!
九巴呢批倫敦寶 DMS 巴士比市長 Super Bus 以至香港市民印象最深刻嘅,
莫過於佢地嘅車身上上有 "超載屬違例 乘客請合作" 嘅宣傳標語,
提示乘客巴士滿載時切勿再強行登車, 而因此亦成為呢批巴士嘅最大特色,
但係諷刺嘅, 係佢地有時行走嘅路線客量較高,
以佢地只有 94 人嘅載客量, 遇有班次疏落,
唔想等下一班車嘅乘客亦依然故我, 實行霸王硬上弓照迫上車,
所以呢種洗腦式標語實屬無效。 話分兩頭,
呢批來自倫敦嘅二手巴士亦有佢地嘅可愛同可取之處,
皆因佢地使用 2+2 座位格局, 雖然相比起九巴車隊中,
使用 3+2 座位編排嘅正手珍寶, 載客量無疑差一大截,
但係卻可以為乘客提供較舒適嘅乘坐環境, 冇咁侷促,
而車身設計亦比九巴珍寶使用嘅 Metal Section 同 BACO 車身美觀得多,
雖然後來經過九巴嘅左修右補, 大部份都已經面目全非啦,
再加上佢地擁有原廠風油軚裝置, 令駕駛更加愜意得多,
相比九巴使用嘅正手珍寶巴士完全冇任何動力輔助裝置,
車長轉彎需要付出大量嘅體力消耗, 揸 DMS 無疑輕鬆得多,
更何況佢地只有 30 呎長嘅車身, 亦令佢地顯得比 33 呎長嘅九巴珍寶更加靈活,
可惜佢地始終都係二手車, 投入服務時已經有一定嘅車齡,
而且亦只係為解決一時嘅車源緊張,
再加上九巴嘅選車要求太 "獨特" 同當年嘅保養質素較低,
都令呢批倫敦寶巴士喺九巴服役嘅日子並唔長久,
更加唔及彼岸中巴引入嘅同款巴士, 可以喺港島區以至 "殺入" 九龍大展拳腳,
而且平均每架巴士嘅服役年期都有十年以上,
比喺倫敦服役嘅日子仲要長! Super Bus 仲話,
九巴嘅倫敦寶巴士, 以前喺九龍見得多但係坐得少,
最常見到佢地行 2C 同 7 號線, 14B 同 14C 亦經常見到佢地,
最記得有一次同亞嫲坐倫敦寶行 14C 由鯉魚門返出觀塘,
果次亦係佢坐九巴倫敦寶最有印象嘅一次。
今日呢架九巴倫敦寶, 亦希望可以勾起大家
對呢一批被遺忘嘅九巴過客一點一滴嘅回憶。
隆重歡迎! 九巴 Daimler Fleetline DMS "倫敦寶" , 見參!!
今日同時收到兩架新城新車 -- 城巴 Volvo Olympian 12m 656
同新巴 ADL Enviro500 MMC Facelift 12.8m 6104
九巴倫敦珍寶 DMS, 證書編號 0018, 限量 400 架
城巴 Volvo Olympian 12m 656
證書編號 0336, 限量 928 架
新巴 ADL Enviro500 MMC Facelift 12.8m 6104
證書編號 0066, 限量 800 架
正式落地!! 三架新車一齊出場盡現風采!!
九巴前倫敦 Daimler DMS,
今次有少少遺憾, 因為店方漏左比九巴 Logo 水貼,
不過已經聯絡店方並且會喺稍後補寄
行走 7A 往紅磡火車站, 布牌同樣經典,
可惜同九巴 DMS 一樣, 呢條路線亦已經成為歷史...
呢批巴士比一般市民印象最深刻嘅,
莫過於佢地車身上 "超 載 屬 違 例 乘 客 請 合 作" 嘅宣傳口號,
呢樣亦成為呢批巴士嘅最大特色
九巴珍寶, 三款車身設計, 你會鍾意邊款?
中巴 DMS 與九巴 DMS
同樣係被倫敦唾棄嘅巴士, 但係唔同嘅機械配搭,
兩巴唔同嘅揀車取向, 直接改變左佢地日後嘅命運
本文主角
跟住就係城巴 Volvo Olympian 12m 656 啦,
城巴喺 1999 年被英國第二大巴士公司 -- 捷達集團 (Stagecoach)收購,
令城巴成為首家獲得外資收購嘅本地專利巴士公司,
城巴於是為其旗下其中幾架巴士鬆上帶有英國 Stagecoach 企業色彩嘅車身塗裝,
但係依然保留以黃色為主調, 本文主角 656 號嘅 Volvo Olympian 12m 就係其中之一,
可惜香港政府推行鐵路為主嘅政策, 對專營巴士公司實施車輛配額限制,
限制專利巴士公司開拓新路線, 透過降低專營巴士嘅競爭力保護鐵路公司嘅投資,
加上 2003年香港爆發沙士疫情, 令外資無意繼續喺香港嘅專營巴士市場投資,
Stagecoach 最終於 2003 年 6 月 9 日宣佈將城巴轉售予新創建集團,
令新創建同時擁有新巴同城巴, 港島區巴士嘅激烈競爭因此宣告結束,
但係儘管如此, 佢地嘅 Stagecoach 車身色彩喺 "新城一家親"之後, 依然得到保留
與同樣油上捷達色彩嘅城巴 MAN 相會
East Meet West
最後就係新巴 ADL Enviro500 MMC Facelift 12.8m,
繼九巴、龍運同城巴之後, 新巴亦引入呢款巨無霸巴士,
行走高客量路線, 由於車身較長, 新巴亦規定呢批巴士只能行走指定嘅路線
同城巴巨無霸相會
Thanks for reading~ |
