本帖最後由 DIH 於 2020-8-8 22:24 編輯

前言

2015年，我同朋友去日本東北，慶祝生日順便賞櫻。豈料遇上一連串不幸事件，令我一直耿耿於懷，甚至將旅程回憶封印住，而無心機整理分享。事隔五年，在疫情下久久未能「回鄉」，就趁長假執下相，重新評價當年的旅程。

通常去日本都係一個禮拜就夠，但當年上司「慫恿」我放夠10日，所以旅程係由4月23日去到5月2日，諗住在黃金週早段離開應該冇問題。

行程牽涉鄉下（東北）同市區（東京），其實Golden Rule係應該去完鄉下先返市區（鄉下地方要較多腳骨力及應變力適宜早段去，市區放最後方便掃貨），但由於同期另一名朋友去睇JAL見學覺得幾好玩，我又想試下，book到4月24日去ANA，就因為咁而將行程調轉，去完東京先上東北。出發前的櫻情報話東北櫻花開到4月下旬。

東北最初想住盛岡，咁就可以在合理時間內去到仙台及青森又唔使轉酒店，但盛岡酒店爆滿，其他好多車站附近的酒店都爆滿或超貴，結果要住到去「北上」，諗住有新幹線，就算要轉車都算方便，而且旁邊就係北上展勝地可以賞櫻。

只係估唔到，以上的行程安排，就係一連串不幸事件的前設，下文再述。

——————————

第一日：京急、三鷹、涉谷、新宿

日本時間04:55已經落機，當年重係轉型期的舊色快運。


搭京急去泉岳寺，落車買東京地鐵Pass再上車，行程剛開始少少不便唔係大問題，不過搞到自己之後成日在地底兜來兜去……







住東横INN浅草蔵前雷門（現稱浅草蔵前1），貪佢間房在東京來講算大。酒店位置在淺草線蔵前與淺草之間，搭到去淺草行返轉頭。


放低行李後搭大江戸線去築地



之後再到東中野轉中央総武緩行線去三鷹，重遊吉卜力美術館。




搭京王井の頭線出涉谷




涉谷站外舊東急5000系



八千公


首次搭副都心線，副都心線涉谷站採用彎形側式月台。







經過原宿舊站舍




明治神宮




都庁展望台



行一大段路去丸の內線搭一個站過新宿三丁目搵食



影片
京急：https://youtu.be/XT5HPpndIcU
東中野至荻窪：https://youtu.be/as9D9JBo_Z4
井の頭線及地下鉄：https://youtu.be/x5ha6sK6yEw

本帖最後由 DIH 於 2020-5-9 16:08 編輯

第二日：東京單軌

去羽田睇ANA見學，要搭單軌去新整備場，首程搭中1000系。新整備場只有「普通」停站，去到昭和島被快速超越，感覺不是味兒。





見學可以影相，但未得ANA同意唔可以公開分享，所以貼幾張飛機模型算喇。





回程時覺得搭普通實在太慢，搭一個站去到國際線大樓轉区間快速出浜松町。














之後去秋葉原


夜晚上東京鐵塔




影片
東京單軌及地鐵：https://youtu.be/dIAin1E7Gzo

不幸事件之一：
是日由於要遷就13:00去ANA見學，時間運用麻麻，見學前未肚餓就唔食午餐，之後去到秋葉原食「early dinner」係16:45左右，臨瞓又覺得肚餓所以在酒店附近便利店買個麵食，當時係22:45。咁就出事喇，我又餓又攰，唔知有冇睇錯標籤，以為個麵可以凍食，冇叮到，結果半夜痾嘔大作，次日行程幾近作廢。

本帖最後由 DIH 於 2020-5-4 21:31 編輯

第三日：晴空塔

我真係好想去晴空塔，啪了止痾丸，瞓到十一點幾覺得可以試下出去。結果在塔上都要幫襯個廁所多一次，係完全忍唔到話出就要出，若在香港根本應該sick leave邊度都唔去。當時點會諗到兩年半後在2017年9月我就再返來。


東武200系


晴空塔上拍攝東武淺草駅及列車




望向東北，車站係東武曳舟，東武伊勢崎線由曳舟通往畫面下方往淺草，並分支出經過橋底的亀戸線；橋上則是京成押上線。


京成押上線列車


東武亀戸線列車


東武伊勢崎線100系Spacia，列車下方係直通地下鉄半蔵門線的軌道。


勉強遊埋淺草寺，未天黑就返歸繼續瞓，叫朋友幫我買寶礦力。不幸中之大幸係痾晒嘔晒就停止，冇發燒冇其他後遺症，之後一日可以出到去，亦都好彩我連住四晚，未使轉酒店。

本帖最後由 DIH 於 2020-5-7 13:18 編輯

第四日：小田急、箱根

見身體冇乜問題就照原定計劃去箱根一日遊。搭當年新開的上野東京ライン到東京，轉中央線快速去新宿。酒店唔近JR站，要特別搭shuttle出去。






當時尚未退役的小田急7000形LSE



用小田急箱根Free Pass，包晒新宿至箱根小田急車程及箱根區內各種交通工具，有效期兩日。搭特急要畀附加費，所以我只係去程搭。


在小田原見到JR East 251系Super View Odoriko


E231及E233系併結


接近箱根的彎道


到達箱根湯本


月台勁窄，左為1號月台，右為2號月台，都係小田急用的窄軌。


旁邊係小田急1000形


2號月台窄軌及通往前面4號月台的標準軌。2號月台前方隔住幅牆係標準軌3號月台。3/4號月台的標準軌由箱根登山鉄道使用。在箱根湯本以東，標準軌及窄軌以三軌條形式共行至入生田以通往入生田車庫，但一直至到小田原都係箱根登山鉄道的路線。話雖如此，箱根登山鉄道列車通常只運行強羅至箱根湯本之間，箱根湯本至小田原係由小田急派車。


再攝7000形


箱根湯本駅外觀


呢個角度有少少荃灣站的感覺


小田急1000形


之後搭巴士到元箱根


箱根駒岳索道，由於不在小田急傘下所以Pass唔包，我地亦無時間上去。


搭海盜船到桃源台


再搭箱根索道往大涌谷








大涌谷係3000年前火山爆發留低的噴氣口，至今仍不斷噴出蒸氣及火山氣體。Little did I know，當時箱根火山開始有頻繁地震，一星期後（亦即我回港第一日）大涌谷出現蒸氣井暴噴，隨即封山，直至11月才解除進入限制，而且至今一直未能再開放上山的步道。我在2017年9月同家人自駕再來，當日煙雨迷濛，成個大涌谷乜都睇唔到。








之後搭吊車往早雲山回程


在不斷噴出有毒熱氣的火山口及鬆軟山坡上架設觀光索道，係日本先做得出。





山腳早雲山駅


轉箱根登山纜車往強羅



前面展望



錶板


會車


到強羅



箱根登山鉄道與行走Bernina Express的瑞士RhB結成姊妹關係


モニ1形事業用電車


搭箱根登山鉄道落返箱根湯本，遇着古董104-106-108編組，其中104/106係1919年製造，108係1927年製造，各車於1950年由木製換成鋼製車體，至今仍在行駛。



前面展望


話明登山鉄道，有些彎位非常窄。


2000形St. Moritz號


1000形Bernina號


又來一列2000形


在「大平台」附近有兩個折返位


第一個折返位


落一段後從右方軌道到達第二個折返位，列車之後轉往左方軌道繼續落山。



到達箱根湯本


小田急3000形EXE，好後悔唔畀多少少錢搭佢，快好多……


我地結果係搭1000形各停出小田原，再轉快速返新宿，之後重要搭多程大江戸線先返到酒店。




影片
上野東京ライン：https://youtu.be/voS47KliSrA
中央特快：https://youtu.be/VxMKqklNOcQ
箱根登山纜車：https://youtu.be/vR0IQaYjg-4
箱根登山鉄道：https://youtu.be/ZwY5KRZPFsM

好彩呢一日走完成個行程都冇唔舒服，翌日就要搬酒店喇。

本帖最後由 DIH 於 2020-5-4 21:48 編輯

第五日：日光

搭的士到東武淺草駅


100系Spacia Kinugawa，我係去日光，加上趕唔切買飛，所以唔搭佢。


6050系日光線快速



6節車廂分別去3個目的地


車內都有方向幕


現金買飛，我第二日才開JR East Pass，可以搭埋日光及鬼怒川區內的東武線。


車庫


到下今市，前方四卡開走往鬼怒川線。


下一班Spacia都到了


到東武日光駅放低行李


搭巴士去日光東照宮，當時陽明門在維修，可以走上去棚頂通道睇工匠施工。


前一日去箱根凍到着羽絨，呢日熱浪來襲，熱到我除剩件短袖，櫻花都出晒葉喇。


東照宮唐門


再搭巴士上中禪寺湖



男体山


華嚴瀑布


睇完搭返巴士落東武日光，搭車去下今市再轉去鬼怒川温泉。



去到鬼怒川温泉見到金色100系




呢次係我第一次浸溫泉，之後就開竅鍾意浸溫泉喇。


不幸事件之二：
當時未到黃金週，算係淡季閒日，酒店主動幫我upgrade到川側和洋室。本來係好事，不過夜晚好大風，吹到個窗係咁震，出面鬼怒川激流亦好嘈，間房的洋室在向河一邊，我在床上幾個鐘都瞓唔着，之前已經經歷過凌晨機、痾嘔，呢日又在高溫下行好多路，無得休息個人好忟。結果我要去和室拉榻榻米出來瞓，四點幾先瞓着，第二朝都係七八點起身。經此一役知道點解可以七千幾円兩人一泊二食，之後book酒店我一定睇清楚review。

影片
東武日光快速，春日部＞東武動物公園：https://youtu.be/s1p-lf-IdUg
東武鬼怒川線，大桑＞小佐越：https://youtu.be/mbCWwCEuBxA

係咪開始北上啦, 期待東北部分~

本帖最後由 DIH 於 2020-5-9 18:44 編輯

第六日：東武世界廣場、北上

朝早去東武世界廣場（Tobu World Square），有唔少得意的火車模型，主角當然係東武。






JR都有



宏偉的東京站


睇完返鬼怒川温泉搭Spacia Kinugawa出下今市。是日開JR East Pass，可以任搭鬼怒川及日光之間的東武線，亦可無須補錢搭Spacia，落到新宿都得，不過我只搭短程。



轉東武日光線去日光攞返放在locker的行李。又係一個教訓，因為唔想拎住行李去溫泉酒店，將大喼放日光站（反正要返來搭JR），但執出來的衫褲毛巾都唔少，孭住行其實好重負擔。這次之後，「如何安置行李」成為我計劃行程的首要考慮。



1890年開業、1912年改建成如今模樣的JR日光駅




205系600番台（攝於宇都宮）


半自動車門


在宇都宮搭E2系やまびこ（Yamabiko／山彦）往北上


停站較多，車速唔太快，如果住盛岡搭はやぶさ（Hayabusa／隼）會爽好多。


在福島見到E3系。該次旅程之前我完全未去過東北，連仙台都係第一次去，之後先至慢慢建立對東北的認識。


到達北上



理想圖片




貴為東北三大賞櫻名所之一的北上，車站內都有櫻花裝飾。


東北本線701系


不幸事件之三：出到去發現，由於熱浪關係，全個展勝地所有櫻花都落晒。



只有枝垂櫻撐到最後


櫻花謝晒，北上櫻花祭都提早超過一星期完結（上面poster話到5月6日，呢日係4月28日），渡河小舟孤寂地泊在一旁。


影片
東武世界廣場：https://youtu.be/rAuxFvk6XTs
東武，新高徳＞下今市＞上今市：https://youtu.be/siyPQ2Sx5kY
日光線，下野大沢＞文挟：https://youtu.be/EKwlPSNGEho
新幹線E2系Yamabiko 53號，宇都宮発車：https://youtu.be/s9HdNLQhM9Y

之後開始東北行程，稍後繼續。

本帖最後由 DIH 於 2020-5-6 22:53 編輯