本帖最後由 VocaloidMikuBus 於 2021-10-21 15:53 編輯
(麻帆良市心跳巴士迷俱樂部會長 Monika 報導)
新世界第一巴士服務有限公司 (新巴) 自 1998 年 9 月 1 日接管前中巴嘅路線專營權起,
不斷引進新巴士以替換中巴嘅舊車車隊, 除左向 Dennis 訂購 Trident 超低地台雙層巴士之外,
亦向其他車廠引入新巴士來港服務。1999 年, 新巴向德國 Neoplan 車廠
訂購 30 部 Centroliner N4026/3 雙層巴士, 係繼對岸嘅九巴之後,
第二間引入 Neoplan Centroliner 嘅巴士公司, 亦係新巴首款德國製雙層巴士。
呢批巴士喺 2000 年由德國運抵香港, 新巴給予佢地車隊編號為 6001 - 6030,
並且為佢地命名為「新里程新巴」對外宣傳, 並於 2000 年底至 2001 年初投入服務,
率先分配到 8P 線, 其後 2X 同 720 等路線都可以見到佢地嘅蹤影,
都係行駛東區走廊來往港島東區及銅鑼灣一帶嘅特快巴士路線。
隨住車齡漸高, 呢款巴士喺 2017年起開始陸續退役, 隨住新巴訂購嘅新巴士陸續抵港,
最後服役於新巴嘅 Neoplan Centroliner 巴士, 亦喺 2019 年 2 月全數退役。
今日, 心跳巴士迷俱樂部隆重歡迎新巴 Neoplan Centroliner 登場!
Neoplan 呢個名字, 對 Super Bus 嚟講印象最深莫過於佢同廠出品嘅雙層長途客車 --
Neoplan Skyliner 「天行者」, 仲有以前啟德機場使用嘅兩頭機場接駁巴士,
喺香港嘅專利巴士車隊中出現, 喺當時係難以想像嘅事情,
直至 1997 年, 呢個局面終於被打破! 當年香港為測試車長達 15m 嘅四軸巴士,
喺香港運作嘅可行性, 於是由廠方運來一架 Neoplan Megashuttle 來港,
並且喺香港作路面測試, 但係最終都因為香港法例嘅限制而冇作出購買計劃,
不過亦因為呢架 Megashuttle, 造就同廠出品 -- Centroliner 喺香港落籍,
令 Neoplan 呢個德國品牌, 首次喺香港嘅專利巴士車隊中出現,
Super Bus 初初睇到相片時, 更形容佢係巴士版嘅 Skylier,
皆因其車頭上下層嘅大銀幕設計, 比佢有強烈嘅 Skyliner 味道,
亦比起當時配上 Alexander 同 Duple 車身嘅 Dennis Trident 更加趨時,
加上佢帶來多種前所未有嘅先進設備, 難怪九巴當時為佢命名為 「超時代巴士」啦,
後來新巴亦引入, 仲為佢地命名為「新里程新巴」,
皆因佢地係當時係香港專利巴士車款中, 設計最先進嘅,
亦令 Super Bus 一眼就鍾意上呢款巴士, 佢仲話雖然佢地渡過左達廿年嘅服役生涯,
但係佢地嘅車身設計到今時今日睇番亦唔覺有半點落後。
2001 年 Drunwell 推出左新巴 Neoplan Centroliner 巴士模型,
以當時唯一兩架配上「波浪色」嘅其中一架同款巴士 6008 作藍本,
身為呢款巴士嘅粉絲, Super Bus 自然唔會放過啦,
估唔到廿年之後, 又有另一間廠商推出同款巴士,
而且仲同樣係配上「波浪色」嘅 6008, 初時 Super Bus 亦一番內心掙扎,
始終已經有一架, 仲入多架做乜? 但係十年人事幾番新,
廿年前推出嘅模型, 同今日嘅標準相比已經不可同日而語,
精細度亦不可相比, 經過一番思量, Super Bus 終於決定入手,
今日 Monika 就同 Super Bus 一齊,
同大家一睹呢架新巴 Neoplan Centroliner 嘅風采!
隆重歡迎! 新巴 Neoplan Centroliner, 6008, 見參!!
 (Monika)Um...Super Bus, 係咪好似有啲野攪錯左呢?
 (Super Bus) Oops! Sorry, here we go!
證書編號 0021, 全球限量推出 1200 架
正式落地!! 餓左咁耐, 今日我地個 Club 終於都有新巴士玩啦!!
同廿年前推出嘅同款巴士相會
正所謂有對比就有傷害, 同樣係 6008, 但係唔同時代,
唔同廠商推出, 到底爭幾多? 邊架出得好?
一齊來對比下~
M1 車頂有做到骨位, 呢點舊版冇
新版車底做埋保險欄, 呢樣亦係舊版所冇嘅
就咁比較新模好過舊模多啲啵
但係我覺得舊模其實都唔差嘅, 唔好唔記得係廿年前嘅出品呀,
以當時嚟講出到咁嘅質素已經算係交足功課啦~
同新巴 Volvo Super Olympian 相會
唔同嘅車款, 同樣新落地仕樣, 同樣又係行 2X
真車相, 車隊之首 6001, 附有「新里程新巴」宣傳廣告,
相比波浪色, 個人更希望出呢架 6001,
全數 30 架新巴 Centroliner 中, 只有兩架上有「波浪色」拉花,
另一架係 6018
~~Xtra~~
作為當時得令嘅最新車款
九巴嘅電視宣傳廣告, 主角當然唔少得呢款紅星啦!
好多 Centroliner 呀! XDD
Thanks for reading~! |
