屯門去紅磡成人八達通單程票價(未計車費折扣)係$21.7,新路段由何文田一直去到石門,票價都唔會過$21.7,即係話全月通理論上去到石門站都應該冇問題。
只係話,因為全月通嘅錢其實就入哂九鐵嘅帳目度,而唔係港鐵。即使屯馬綫全綫通車,建議路線都已經改為全部都係九鐵路段,唔會經地鐵路段,單程票又好,月票又好,盤數都係入哂九鐵,但佢唔能確保啲客全部都係屯馬綫一程過。由屯門出發去鑽石山,可能會有客喺美孚、太子轉車。咁對港鐵嚟講,咪蝕咗囉。建議路綫係屯馬綫一程過,所以個客嘅錢都會100% K-split。喺會計考慮下,佢仲點會延長適用路段呢。
點解上水至尖東嗰度又適用?因為新嗰幾個站喺正呢段路中間,第一,冇得佢唔加。第二,去得呢幾個新站,都幾近冇可能會走咗入地鐵路段。咁對港鐵嚟講,佢冇蝕喎,係九鐵因為多人用月票所以收少咗錢咋嘛。