[2013.06] CX536 香港>名古屋、CX507 關西>香港

各國陸續復常，新鮮飛行報告開始回歸，我的陳年報告系列亦快將完成歷史任務。隨着疫後首個香港訪日旅行團於2022-06-22出發，我都趁機分享一次相隔多年後再次跟團的經歷。

2004年日本開放港人免簽證旅遊後，我就一直都係自由行，但家中尚有老人唔太適合此種模式，於是在2013年再次報團。當時距離上次跟團已有六年，跟團去日本更已相隔11年，大城市去過晒，一時之間茫無頭緒，睇報紙見到有立山黑部團，自己又未去過，一於試下。

去程
日期：2013-06-09
航班：CX536
時間：10:20 HKG – 15:10 NGO，表定航程約為3h50m
用機：A330-343X B-LAK，2011-01-28首飛，同年2月26日交付國泰航空，成文時仍在服役

▼呢班機時間算比較晏


▼熙來攘往


▼Popeyes早餐


▼航班用機，當時機齡只有一年多。


▼機頭特寫


▼該航班與JAL codeshare


▼推車已備


▼預備登機


▼當年非常時髦的座椅設計


▼唔太記得係唔係輕觸式熒幕


▼睇住上貨，遠處的國泰747、華航747、日航血旗都已成歷史。


▼衝上雲霄－時光飛逝，《衝上雲霄II》在呢次旅程之後一個月啟播，「雲外看花生脆」同Captain Cool都已經係9年前的事。2013年係香港近代航空史重要的一年，香港航空借贊助《衝上雲霄II》大打宣傳戰，並大幅調整網絡以專注於亞太區，而香港快運亦開始以廉航方式運作，開拓更多市場。兩間公司在之後幾年接連開辦多條日本航線，令旅客前往日本更為便利。可惜海航集團過度擴張加上疫情打擊，快運結果要賣畀國泰，廚叉亦風雨飄搖。世界格局大變，即使減少或取消入境隔離，本地航空業可以恢復到何種程度亦難以預料。


▼進入台灣


▼台灣上空多雲


▼在IFE懷舊—佢地當年成軍20周年，在荷里活星光大道留低手印，現在繼續邁向30周年。


▼佢地就曾經10周年重組，最後只能將整個十八寫進日記簿。


▼大約12:00派午餐，似係用叉燒包個餡伴飯。配菜方面，前一年去北海道都有蕎麥麵，呢年變成沙律菜，麵包變成獨立包裝酥餅。


▼西式係長通粉


▼日本上空一片白矇矇


▼三重県津市雲出鋼管町


▼日本時間14:51降落中部国際空港


▼觀景台上的人群


▼呢次係我暫時唯一一次到訪中部国際空港






▼等旅遊巴，之後直上高山市，無入名古屋市內。

部分行程相片

▼高山陣屋一帶





▼白川鄉





▼白川鄉某餐廳在門外水溝養鱒魚


立山黑部請參看「立山黑部春與秋」

▼金沢兼六園



▼金沢巴士



▼東尋坊




▼在休息站見到彩虹



▼途中攝ANA Wings Bombardier Dash 8 Q400 / DHC-8-400


▼大阪城


▼大阪城攝全日空某767


▼酒店在道頓堀


▼臨出發一朝早去心齋橋，唔知而家有幾多間留得住？

回程
日期：2013-06-13
航班：CX507
時間：18:05 KIX – 21:00 HKG，表定航程約為3h55m
用機：B777-267，編號不明（國泰只曾經有過五架，編號為B-HNL/A/B/C/D）

▼驅車前往関西空港，阪神高速4号湾岸線南行近三宝JCT由三線轉兩線，經常塞車。


▼過橋


▼我在2001、2010、2013、2018年去過関西空港，由於2001及2013年都係單次途經，故總共用過6次。2001年係跟團搭日航DC-10-40到関西，玩幾日後搭夜船到九州，然後由福岡搭日航767包機走，未到數碼年代所以無相。



▼航班顯示屏



▼搭無人駕駛Wing Shuttle



無人駕駛片段，太多人所以去唔到望飛機那邊：
https://youtu.be/N6tbYfux3sg

▼掛住掃手信，無影相，轉眼已坐在機上。


▼上一代椅背設計，仍有打橫掃卡槽。


▼呢張相係搭過B777-200的唯一證明，應該已由最初2-5-2改成3-3-3。


▼晚餐


▼在大阪買的冬甩及芝士蛋糕



感想（不計疫情因素)
大城市去到慣晒，個個都去自由行之下，旅行團係應該尋找新方向，例如開拓更多景點、入住優質酒店，以減少舟車勞頓免煩惱為賣點。呢次相隔六年再跟團，感覺唔錯，除了有時要早起身之外，行程大致暢順，車程唔算太長，導遊經驗豐富識得安排時間（例如行程表寫最後一日朝早去大阪城再去心齋橋，導遊見日照長天氣又好，將大阪城改在尾二日黃昏，心齋橋加時），餐膳亦不錯（例如在白川鄉品嘗當地特色朴葉味噌，金沢派每人1,500円自己搵食，最後一晚到阪急酒店食buffet），撩起之後間中報團的興緻。當年我自由行仍然以搭車為主，去立山黑部等相對遙遠及交通複雜的景點，跟團打個底好過自己盲摸摸，我都係去完呢次覺得景色壯麗，故分別於2017及2018年再去立山黑部及高山／白川鄉。航空方面，國泰IFE內容豐富係最大加分，但當年餐膳質素開始下降，跟團就幾好，但唔知散買要幾錢。

本文完，多謝點閱。

認同去一些較煩，例如唔識講當地語言的地方跟團真係方便D

跟團都可以唔買機票，會減返D錢給你，只需要約好在當地機場幾點集合就行了

(上次跟團去希臘自己買機票，結果其他團員都係坐同一班機到雅典，但我張飛平佢弟幾百美金，賺了)

今次個飛機餐都幾無誠意，拎返同樣出自樓主手筆嘅 KA 香港 - 福岡、ANA 香港 - 東京，甚至幾年後 CX 504/505，呢個餐明顯被比下去...
特別去程盒叉燒飯，話係 HKG - TPE 嘅餐我都會信 XD
不過當年 CX 台港線仲未有熱餐，只得例牌雞卷
日本線仲係水果，而唔係 Haggen dazs 雪糕

另外睇見東尋坊啲風景相，雖然去過兩次北陸（第一次仲係大阪搭 Thunderbird 直到富山嘅年代），白川鄉、兼六園、立山黑部都去過，但好似無去過任何福井縣嘅景點...
就算有機會再去，應該會變咗敦賀轉新幹線

Waiyin12 發表於 2022-6-29 08:30
今次個飛機餐都幾無誠意，拎返同樣出自樓主手筆嘅 KA 香港 - 福岡、ANA 香港 - 東京，甚至幾年後 CX 504/50 ...

港龍同ANA都係靚嘢，東京係旗艦線唔衰得，咪搵NGO同KIX祭旗。

東尋坊如果自由行去都幾隔涉，配埋蘆原溫泉會較全面，但香港人時間緊迫，多數都係直鏟上金澤。
該次跟團福井縣去埋越前人形館，睇竹織公仔，應該都係當地觀光局攝入行程，我就冇乜興趣。

Waiyin12 發表於 2022-6-29 08:30
今次個飛機餐都幾無誠意，拎返同樣出自樓主手筆嘅 KA 香港 - 福岡、ANA 香港 - 東京，甚至幾年後 CX 504/50 ...

504係早餐，冇乜特別。505係台北上餐，正正常常，唔差嘅。

carsonw34 發表於 2022-7-1 07:42
504係早餐，冇乜特別。505係台北上餐，正正常常，唔差嘅。

係喎，CX 504 9點幾起飛，之前搭過一次係早餐（類似一般 CX 長途線早餐）

CX 505 係接 CX 450 部機? 因為我有聽問聞過 CX 504 delay，部機未到 NRT，所以連帶 CX 505 遲飛（或者我記錯部航班編號?）

台北上餐，個餐又會唔會同 CX 521/549 又分別呢?

Waiyin12 發表於 2022-7-2 09:01
係喎，CX 504 9點幾起飛，之前搭過一次係早餐（類似一般 CX 長途線早餐）

CX 505 係接 CX 450 部機? 因 ...

451(NRT-TPE-HKG)接504隻機(HKG-NRT)
505(NRT-HKG)接450(HKG-TPE-NRT)

口味上就見仁見智, 個人覺得好食過香港上嘅
成個餐嘅格局就無分別(餐包,HaagenDazs,唔記得台灣 appetizer上生果定冷麵)