本帖最後由 okt05032 於 2022-11-21 05:06 編輯
因為新冠肺炎疫情,令大家差唔多成兩年都冇坐過飛機出去玩,小弟亦都唔例外。但係估唔到相隔兩年後第一次坐飛機竟然係因為要去外國留學,今次係小弟第一次乘坐新加坡航空公司嘅商務艙,經新加坡樟宜機場前往倫敦希斯路機場,亦係近十年來第一次選乘星空聯盟嘅航空公司。航班編號:SQ895
飛行日期:17-09-2022
座位:12K
機型: B777-300ER
註冊號: 9V-SWW
飛行時間:3小時50分鐘
計劃出發時間STD/實際出發時間ATD:18:50/20:10 GMT+8
降落時間:18-09-2022 00:00 GMT +8
雖然出發當日新航總共有兩班機由香港前往新加坡,但係佢哋嘅貴賓室仍然關閉。取而代之佢哋就使用環亞貴賓室(Plaza Premium Lounge),今次小弟就選擇咗60號閘口嘅PP lounge,亦都係綠區入邊唯一一間開嘅環亞貴賓室。
因為各大航空公司嘅頭等/商務艙乘客同埋高級會員都擁晒去呢度,跟住仲要招呼信用卡同埋Priority Pass會員。就如圖中所見,呢個貴賓室可以話係人滿為患。小弟建議大家去咗橙區近1號閘嘅環亞貴賓室先(嗰度大間啲),喺航班起飛之前先由貴賓室行去你嘅登機閘口。
雖然嗰日貴賓室非常之多人,但係成個環境都係乾淨企理,呢個值得一讚。基本酒水同烈酒佢哋都有,可惜嘅係提供嘅嘢食選擇有限。加上佢哋個冷氣壞咗,小弟留咗唔係好耐就走咗。
今次呢班機就用25號閘口。 因為前一班嘅SQ894延遲咗,所以連帶我哋SQ895都冇得準時起飛。
Load Factor 如下:
(sold tickets/ capacity)
F: 4/4
J : 45/48
Y+: 27/28
Y: 166/184
順帶一提,當日仲有好多乘客都係新加坡轉SQ322前往倫敦,本身中轉時間只係得50分鐘。所以如果呢班機延遲咗肯定趕唔到,不過好幸運SQ322都延遲, 呢班客唔使改搭另一班機。
今次帶我去新加坡嘅就係註冊號9V-SWW嘅波音777-300ER,佢喺2014年3月交付到新加坡航空手上。
小弟嘅座位12K,新加坡航空嘅商務艙由Jamco生產,採用1-2-1配置。座位闊度亦去到28吋,比一般航空公司嘅商務艙闊落。佢可以180度打平變成一張78吋長嘅睡床, 不過要由凳背反落去先至可以鋪平, 相對其他座椅冇咁方便。座位提供一個18吋嘅Panasonic Ex3電視螢幕,以及多個USB插頭。
IFE嘅內容都好 Update,連Top Gun: Maverick都有, 選擇都唔少。 不過美中不足嘅係冇中文字幕提供,同埋比較少華語嘅專輯同埋電影。
迎賓飲品方面,小弟選擇咗杯香檳。
洗手間嘅用品就用上嚟自英國嘅品牌Penhaligon's
航班大概係20:30 Push Back 之後就滑行到新嘅25R跑道起飛。
航班於起飛後15分鐘開始供應晚餐。前菜就固定咗,主菜就三揀一,之後仲有水果、芝士盤、同埋蛋糕任你選擇。
前菜:炙燒胡椒香脆吞拿魚配蟹肉。
吞拿魚食落都幾新鮮冇腥味,配搭檸檬汁同埋蟹肉沙律非常之開胃。
主菜:炒米粉
去到英國未必成日有得食東南亞嘢,所以小弟特登揀咗呢個炒米粉。米粉配上魚片、明蝦、豆腐乾,再配上叄巴醬, 不禁令小弟諗返起以前去新加坡玩嘅回憶。
甜品:棗泥布甸蛋糕以及水果盤。
食完飯小弟決定飲番杯薄荷茶消吓滯。
大約凌晨12點,飛機就降落新加坡樟宜機場並且停泊喺3號客運大樓。由於小弟嘅Layover 時間長達14個鐘,所以我就出咗境去酒店瞓。今次英國之旅就暫一段落。 下一篇飛行報告,小弟將會分享我由新加坡飛去倫敦嘅經歷, 敬請期待!