[2022.11/12] HX618/619 香港<>關西 [疫後首飛]

前言

經歷近三年疫情，日本政府於 2022 年 9 月 22 日宣布由 10 月 11 日起全面開放自由行，而香港亦於翌日宣布自 9 月 26 日開始實施「0+3」安排，取消酒店隔離，我同家人急不及待上網訂機票。考慮到復航需時，選擇比疫前少，國泰及快運價格高企，經過格價後，於 9 月 28 日扑鎚訂購香港航空 11 月尾大阪機票，來回連稅及 20 kg 行李收費 $4,399。為免爆買失控，我自己一個畀多 $130 升級至回程 30 kg，事後證明呢個決定非常正確。價錢比起 2015 年去北海道更高，但物以罕為貴之下已經算抵。訂購時見到香港航空每日有一對大阪航班，直至臨近出發前加多一對，但時間太夜，都係我呢對好。訂票後才見到清盤官司新聞，求神拜佛千祈唔好出事。

官方而言疫情尚未過去，兩地入境亦增加不少手續，為免添煩添亂，暫時唔帶年邁父母去。前往日本前，首先要在 Visit Japan Web 登記，基本上等於將入境審查、海關申報及檢疫表格改成電子版，摸熟之後尚算易用。雖然該網表示優先處理兩周內抵達日本的申請，但我一直要到出發前 7 日至成功上載護照及針紙。

根據 airfleets.net，出發時香港航空只有 9 架活躍客機，包括 6 架 A320-214 及 3 架 A330-343X，另加 5 架 A330-243F。訂票後 HX618/619 曾有一段時間由 A330 執飛，令我有一絲希望疫後首程係廣體機，但到出發一周卻改成 A320，只能迫沙甸魚。返港後佢又改返做 A330，吹脹。

今次係我第五次搭香港航空、第五次用關西機場，但就係首次搭香港航空到關西，亦係第 22 次去日本。三年無飛，軟硬件都已大幅改變，今次報告加埋機場探索，相片眾多，煩請忍耐。

香港機場探索

▼港航 app 顯示「由於乘客需於機場為相關文件作核對，因此網上辦理登機手續服務將暫停直至另行通知」，惟有提前到機場預備。家人開車接送，實際抵達時間係 9 點，即出發前 2.5 小時。


▼港航登記櫃檯在一號客運大樓 K 區


▼T1 擴建工程已完成，多出一排登記櫃檯。


▼排隊唔算太耐，職員非常熟手，我唔想坐機翼，於是安排我地坐機尾。我亦查詢回程安排，職員話起飛前 3 小時開放櫃檯，我地都預 3 個鐘頭前到機場。


▼四塊板顯示全日航班，比起最冷清時已熱鬧不少。


▼班機在 19 號閘，即要經天際走廊到 T1 衞星客運廊，前稱北衞星客運廊。


▼訂票時港航聲稱不提供機上餐飲，但後來已放寬，從其他板友得知有個包食，不過份量一定唔夠，而香港機場禁區內營業餐廳唔多，未入禁區前去抵港層 Delifrance 食個早餐先。


▼抵港層人流稀少






▼餐後返上離港層，唔少商舖仍然關閉。



▼北面離境閘口唔開，全部要去南面。



▼大約 14 分鐘後完成安檢。本來唔使咁耐，但我前面一對男女可能太耐冇搭飛機，兩人都有樽裝飲品在手提行李，被關員截住處理，連帶我都要等佢地處理完先出得。


▼名店仍在等它的客人


▼Gordon Ramsay 餐廳，希望將來有機會可以試下。人地係做正經野，不過如果以鬧人 meme 為賣點應該會幾好玩。


▼有一間壽司店，感覺上禁區內餐廳格調比以前提升不少，但唔少食肆經營時間有限，未能仔細評論。由 1998 年開始進駐的 Popeyes 機場店已撤出，不過旺角仍有。


▼前方 10/11 號閘附近有字牌位置即係「綠區」（往中國內地）及「橙區」（往其他地區）分界，過此界後為橙區，不能回頭。我去日本，當然頭也不回地通過。


▼聞名不如見面，天際走廊就在眼前。上次見到時只係放在遠方的組件，如今已開放使用。我有中學同學投身工程界，有份興建天際走廊，疫後首飛即能使用實在心情興奮。


▼天際走廊入口在 12 及 24 號閘口之間


▼首先上電梯


▼長榮航空 B777-35EER B-16706，當時台灣尚未開放港人自由行，然而長榮派出最大容量機種，可能轉機往東北亞或北美者甚多。



▼一路搭電梯一路望住


▼到電梯頂


▼再過兩個閘口就係菲律賓航空 B777-3F6ER RP-C7775


▼視野開揚


▼透明地板


▼清潔機械人


▼由近至遠分別係香港快運 A320-271N B-LCS、A320-232 B-LCF 及即將乘搭的香港航空 B-LPQ。遠方的快運 A321 仍在封存煨番薯。



▼回望來時路，唔想行可以搭自動行人道。玻璃另一邊應該係入境通道。


▼落電梯




▼落緊電梯見到國泰 A330-343X B-LAA 經過橋下，早知留多陣。



▼衞星客運廊頗為冷清








▼航班顯示板


▼有趣發現

去程
日期：2022-11-25
航班：HX618
表定：11:30 HKG – 16:05 KIX，3h35m
實際：11:30 HKG – 16:02 KIX，3h32m（後推至埋閘），極之準時
用機：A320-214 B-LPQ，2016-03-03 首飛，同年 4 月 21 日交付香港航空

▼衞星客運廊登機閘仍然用緊上一代顯示屏，亦唔似 T1 或中場客運廊有條柱標示閘口號碼，影唔到「標準打卡相」。



▼準備登機最多人



▼是次航班用機


▼登機通道上攝



▼埋位就坐


▼2021年版安全須知



▼Legroom 唔多


▼座椅無任何 USB 或電源插口


▼全機滿座


▼11:30 準時離閘後推，11:35 啟動引擎，機艙內隨即充斥濃烈燃油味，隔住口罩都覺得刺鼻，過了幾分鐘才消散。空中服務員全程戴外科手套及口罩，迎賓、推車仔及送客時戴埋護目鏡，但做安全示範時無戴護目鏡。個身就只着制服，唔使着大白裝。


▼新加坡航空 B787-10 9V-SCJ


▼國泰 A350-1041


▼國泰 A350-941


▼國泰 A321-251NX B-HPI


▼大灣區航空入鏡


▼UPS B747-8F 起飛


▼Cargolux B747-467F LX-ICL，前身係國泰貨機 B-HUP。


▼ACT Airlines B747-412FSCD TC-MCT，前身係新加坡航空貨機 9V-SFJ。旁邊係香港航空 A330-243F。


▼DHL A330-200F


▼長榮航空 B-16706 起飛


▼HAECO 外一排飛機


▼啟動引擎後一直滑行無停過，後面亦無其他機跟隊，11:49 直接從 07R 跑道起飛。


▼半復活的香港機場




▼新 T2 及航天城地盤


▼起飛影片，相隔三年再次衝上雲霄，本應心情興奮，不過坐住架又窄又迫的 A320 就麻麻地囉。


▼到達巡航高度就開始派餐，一個菠蘿叉燒包、一支西藏水、一杯自選飲品，我要蘋果汁。


▼知道機上無娛樂，所以出發前已在 tablet 下載電影諗住上機睇，但睇唔夠一個鐘就覺得有少少作暈作嘔，即刻熄機食藥閉目養神。我一般唔會暈機浪，但當日一直都有氣流，架機又震又搖，又驚係唔係個包有問題，好彩落地後無事。


▼飛行 2.5 小時後見到四万十市


▼五分鐘後見到高知市


▼高知龍馬空港


▼經過四國山區，可能係劍山或附近。


▼徳島市


▼徳島阿波おどり空港


▼大鳴門橋


▼橋下為鳴門漩渦


▼臨降落前連明石大橋都見到


▼日本時間 15:50 降落関西空港 06L 跑道


▼降落後見到樂桃航空 A320-251N JA209P，樂桃要到 2023-01-21 才復飛香港。（後來又因日本限航令而延遲至 2 月初）


▼中原龍浩航空 B737-8ASBCF B-220N，逾 17 年機齡，經歷幾次轉手，首任用戶係 Ryanair。


▼日本雖已開放自由行，関西亦在疫情期間一直容許國際航班升降，但停機坪仍然頗為冷清。



▼韓亞航空 B777-28EER HL8254


▼國泰 A350-941 B-LRF


▼16:02 停泊 14 號閘，16:11 落機，回望韓亞 HL8254。


▼大樓另一邊有架 Scoot，以上就係同期抵達関西的幾班機，排隊入境時除香港人外，見到大量韓國及新加坡客。


▼唔使搭無人駕駛


▼按照職員指示落下層，如之前未於 Visit Japan Web 取得 QR code 就要在此處理，我地已截圖就直過。


▼入境由填紙變成 QR code，好多人都唔熟，反而要用更多時間處理。16:49 過完入境，行李已全部取出放在地上排好。之後又要再排隊撳機掃海關 code，落機後大約一個鐘終於離開大樓。



▼航程資料及航線圖，取自 flightradar24。

部分行程相片

▼箕面滝道



▼瀧安寺



▼當日朝早多雲，猶幸下晝轉晴。


▼箕面大滝


▼好多人


▼落山時見到日本大鯢，第一次親眼見到野生娃娃魚。


▼夕照紅葉



▼電梯塔通往大江戸温泉物語酒店


▼箕面駅外





▼三田酒店外之平谷池



▼和田山酒店望雲海



▼遠眺竹田城跡


▼登上竹田城跡





▼回望朝來市



▼竹田城下町


▼沿着円山川駛往城崎温泉





▼城崎温泉






▼玄武洞


▼神戶明太子遊樂園


▼麒麟啤神戶工場



▼道の駅神戸フルーツ・ フラワーパーク大沢（Kobe Fruit Flower Park Osawa Rest Area），設有酒店、花園、餐廳及機動遊戲，猶如主題樂園。





▼有馬温泉











▼六甲山牧場眺望


▼見到神戸空港


▼天馬航空 Skymark Airlines B737-800


▼另一觀景台再望


▼神戸空港



▼連関空都見到


▼北野異人館：風見鶏の館


▼北野異人館：萌黄の館


▼北野異人館：ラインの館


▼三宮神社鳥居


▼元町步行街





▼其中一條街轉出去係南京町，日本三大中華街之一。

回程
日期：2022-12-02
航班：HX619
表定：17:05 KIX – 20:35 HKG，4h30m
實際：16:58 KIX – 20:27 HKG，4h29m（後推至埋閘），同樣非常準時
用機：A320-214 B-LPQ，與去程一樣

回程冇得 48 小時前網上 check-in，換成因應香港政府要求在起飛前 24 小時內做快測及申報。過程尚算順利，而取得綠碼要立即截圖，否則離開頁面後必須重新輸入資料。輸入資料務須準確，去到機場地勤會同護照／身份證核對。

▼12:30 從神戶出發，原本目標係出發前 3 個鐘到機場。


▼查到關西機場全層食肆封閉，決定還車前去臨空城 Outlet 午餐，可以遠眺関空及連絡橋。如此一來就一定會比原定時間較遲到達機場。




▼最後一程車，我同家人不約而同感嘆香港無法見到如此廣闊天空。


▼還車後拉住行李入大樓



▼香港航空在 A 區，抵達時已經係出發前兩個鐘。今次我冇出聲要求，結果一樣坐機尾。行李限額夾埋剛剛好，我買 30 kg，磅到 30.9 kg，買野已經唔算多，事後檢討係太耐冇去旅行帶多了無謂衣物。


▼辦完手續後影下其他櫃檯



▼當日下午離境航班，10 班首爾、3 班釡山、4 班台北、4 班香港，亦有往檀香山、開恩斯、杜拜等長途航班。睇 fb 見到大阪京都勁多韓國人。


▼落 2 樓，僅餘買到野食的只有麥記及 Lawson。



▼由於禁區內大部分店舖關門，最後衝刺買手信靠呢度。


▼返上去，之前都冇認真睇下関空的室內建築。



▼安檢多人但暢順


▼日本出境手續已電子化，只須將護照放在機上掃瞄，不經人手亦無印仔，不出 20 分鐘就去到 18 號閘口。



▼再望連絡橋


▼Stargate Hotel，將來有機會我想住。


▼摩天輪


▼樂桃航空 A320-214 JA815P 離陸


▼閘口位置


▼日本唔似香港以法律規定戴口罩，我去日本期間，政府立場係室外少人可以唔戴，近距離與人交談及進入室內或交通工具時鼓勵要戴。日本人一般室內室外都一直戴，遊客就在室外少戴。我在室外一般唔戴，室內會戴，但旅程最後三日氣溫下降，我就戴罩保暖。香港的航空公司受香港法律規限，一定要戴口罩。


▼旁邊的國泰 A350-1041 B-HXN


▼用機同去程一樣


▼機頭特寫


▼引擎特寫


▼全日空 B737-881 離陸


▼長榮航空彩繪機 A330-302 B-16333


▼16:30 開始登機


▼今次坐右邊


▼韓亞航空 B777-28EER HL7791


▼國泰 B777-31H B-HNS，來自 Emirates 的二手機，剛於 7 月解封。國泰兩班機用 35K 及 773，提供極多容量。


▼HL7791 與旁邊的馬航客機同時後推。該班馬航應為 MH53，本應 09:55 起飛，延遲 7 個鐘。


▼大韓航空 B737-8MAX HL8348


▼我地班機於 16:58 後推，17:03 啟動，跟住 HL7791 滑行。


▼下晝 5 點已經夕陽西下


▼希望下次來時関空已回復熱鬧


▼17:09 於 06R 跑道起飛，想採光較佳所以用手機拍片，不過收音就冇咁澎湃。


▼高松市


▼晚餐係雞尾包


▼接近華南時見到沿岸城市燈光，但偏偏香港上空多雲，只見一片強光。


▼香港時間 20:10 降落新 07L 跑道，即三跑。我拍低由降落滑行至閘口全段影片，大部分時間都黑麻麻，聊作記錄。兩程起飛都唔使排隊，降落亦無後機跟尾，總覺有點失落。


▼滑行 17 分鐘後於 20:27 停泊 40 號閘，旁為國泰 A350-941 B-LRK。


▼一落機就係檢測站，按照職員指示，出示網上申報綠碼，取得一張有 barcode 的掛頸綠卡及樣本樽，往前做撩口 PCR，之後走得，20 分鐘內完成，然後如平時一樣去搭無人駕駛。


▼搭完無人駕駛之後過e-道及取行李，由於航班少及排隊檢測用了一些時間，抵達輸送帶時行李已送到。落機後大約 40 分鐘出關，接機大堂已擺好聖誕裝飾。臨出到接機大堂處有個桶回收掛頸綠卡。


▼食肆已閂門，當時 0+3 黃碼我都冇得食。


▼抵港層仍然冷清



▼航程資料及航線圖，取自 flightradar24。






返屋企後每日上載快測結果 7 日，但 Day 6 即 12 月 8 日政府宣布翌日起只需 5 日快測，系統自動刪除最後兩日的申報；Day 2 即 12 月 4 日星期日去做多次 PCR，Day 3 即 12 月 5 日正常返工，朝早已轉返藍碼。

感想

疫後首飛，我的心情是複雜的。一開始滿心期待，不過上機後覺得又迫又焗，乘坐感欠佳。當其他航空公司恢復供應全餐，HX 只係得個包真係好 cheap。現時 HX 經營模式已接近廉航，基本票價唔包寄艙行李，預先揀位又要加錢，機上亦無娛樂提供。既然快運已賣走，我建議佢不如直情做廉航，起碼知道有乜食—之前講過我好鍾意食，飛機餐係飛行體驗重要一環。然而，之所以會揀 HX 係因為佢平，CX/UO 計埋都要六千開外，佢開價四千幾，剛復飛供應不足惟有硬食，假如有得坐 A330 可能我冇咁灰。希望之後航班陸續增加，其他公司也復飛香港，可以降低票價及提供更多選擇。

旅行方面，今次故意避開人潮，完全不入大阪京都，所以亦無去太多著名景點。睇到箕面紅葉、竹田城跡，浸過兩個溫泉共 8 次，食過多餐美味佳餚，已算完成目標，只嫌隔得太耐唔夠喉。今次係家人規劃自駕遊，下次我想自己安排去搭火車，同埋都想唔使戴口罩。

回顧三年疫情，2020 年 3 月左右開始實施海外入境隔離，當初以為好似 SARS 一樣可於夏天重開，點知事與願違，越封越多，生活上又諸多限制，心情跌落谷底，整個2020年我連屋企的飛機書都唔想睇。到了 2021 年，心理上已接受長期封關，諗起以前唔開心會去睇飛機，於是把握三跑未開之前只用南跑道升降的時機去睇飛機，亦睇返飛機書，又用了差唔多一年時間整理陳年報告娛人娛己，清貨之後終於盼得入境限制放寬。今次兩地都只係剛放寬入境政策無耐，機場飛機唔多，影唔到好多相，始終略嫌失色。

近日政策急轉彎，香港政府宣布於 12 月 14 日起取消掃安心出行及黃碼制度，但入境 PCR 及 5 日快測仍然維持。希望不久將來解除更多防疫措施，機場回復五光十色。

全文完，多謝觀賞。

另見：
鐵路雜攝
巴士雜攝

——————————
飛行報告系列：
2022.11 HX 関西　2019.10 HX 札幌　2019.07 CX 倫敦　2018.12 HX 沖繩　2018.09 UO 関西　
2017.09 UO 成田　2017.05 HX 米子　2017.03 UO 福岡　2016.09 UO 廣島　2016.04 CX 成田　
2015.10 HX 札幌　2015.06 BR 台北　2015.04 UO 東京　2014.10 CI 高松　2014.06 QR 法蘭克福　
2013.06 CX 中部/関西　2012.08 CX 札幌　2011.11/2012.04 KA 福岡　2010.09 AI 関西　2009.10 JL 東京　
2009.03 KA 北京　2008.06 CX 法蘭克福　2007.05 NH 成田　2006.06 MU 山東　2005.07 CX 仁川　
2004.06 MU 雲南　2004.02 CX 台北

航拍系列：
2021.11　2021.01　

恭喜樓主相隔多時終於有得再次衝上雲霄。隔咁耐無飛，第一次飛既感覺一定係特別的

不過就咁派個餐包真係好 cheap。如果係唔派正餐，我個人立場係寧願好似美國或者歐洲內陸機，派件好食少少既 packaged snack 好過

日本航空業復常一定快過香港好多，至低限度歐美主要航空公司，呢段期間一直都維持緊基本往來東京服務，亦已經有晒計劃回復疫前班次；反觀香港，好多都已經撤走，撤走左就好難再返來，未撤走既好似 UA 都要等到最早三月先有得復飛

我疫後已經飛緊唔少次，而家觀望緊幾時有機會搵到藉口可以出國旅行

S3BL100 發表於 2022-12-16 22:08
恭喜樓主相隔多時終於有得再次衝上雲霄。隔咁耐無飛，第一次飛既感覺一定係特別的

不過就咁派 ...

香港咁慢某程度上係ground handler 人手嚴重不足所致

隔咗接近三年，終於可以正常咁去日本旅行、正常咁飛返香港，係頗為感動...

幾年前搭過一次 HX 607 (NRT - HKG) 用 A320 執飛，當時仲有飛機餐（full meal），亦有公家螢幕播下電視節目；機上不設 AVOD，可能解釋到呢班賣得較平嘅原因

而家個飽好有多年前 CX HKG - TPE 嘅味道
但如果 HX 疊埋心水做 LCC，變相香港會得返 CX 一間 full fare; HX, UO 同 HB 三間定位都係 LCC, 個人認為未必係好事
以前 HX 一個賣點係可以用較低價格但照有 full service, 當然質素會差過國泰，但叫做有齊 IFE, checked baggage, 飛機餐等
不過而家大量香港人等住重新出發去日本，就算 UO 收到接近同 ANA 同價都應該唔憂做

此外樓主嘅行程都算冷門，城崎温泉同神戶算多人認識，箕面山我直頭係第一次聽；anyway 感謝分享~
仲見到紅葉靚景算幾好彩，我遲 10 日左右到日本，已經枯得七七八八

Waiyin12 發表於 2022-12-17 18:56
隔咗接近三年，終於可以正常咁去日本旅行、正常咁飛返香港，係頗為感動...

幾年前搭過一次 HX 607 (NRT -  ...

航班逐漸增加，而家睇三四個月後價格已比我買時稍低，相信之後都會回穩。

行程唔係我 plan，箕面我都係第一次聽，去到發現幾多遊客，本地與外國人都有。城崎温泉好多香港人。
今次旅程有兩日住三田市 Woody Town，係當地 1980-90 年代發展的新市鎮，買下衫食下野，過住好 local 的生活。

去得咁偏都有幾個理由：唔想中招返香港好煩；大量遊客一下子重臨，加上日本政府推出國內旅行支援，搶到酒店好貴；日圓雖然貶值，但當地使費其實高咗，例如以前酒店加早餐係 1000 円左右，但而家要 1500-2000 円，所以我地除温泉酒店外其他都唔食早餐，自己出去食好過，有架車就可以住比較冷門的地方。

S3BL100 發表於 2022-12-16 22:08
恭喜樓主相隔多時終於有得再次衝上雲霄。隔咁耐無飛，第一次飛既感覺一定係特別的

不過就咁派 ...

日本有國內線，航空公司總算保留到一定程度運作；加上急需推動經濟，日本自從肯開關之後就放得好快。雖然如此，日籍航空公司當中，暫時 ANA 同 JAL 只有東京飛香港，疫前 ANA 去名古屋及大阪航線未恢復，將來唔知會否以 Zipair Air Japan 名義提供其他選擇；而香草及樂桃合併後無耐就爆發疫情，疫後樂桃如何部署有待觀察。同時，Jetstar Japan 會否重臨香港仍是未知數，日本唔少細 port 國際線都未恢復。

宏觀而言，暫時始終係香港人想出去多過外地人想入來，起飛時見到成個機場幾乎淨係得 CX 獨力支撐都倒抽一口涼氣。

GOOD REPORT我都係同你同一日返HK,不過回程搭CX507實際飛左4小時多D,可能大機關係?