本帖最後由 AVBWU291 於 2023-1-19 08:34 編輯

第一次寫 flying report，多多指教

13/1 CI31 YVR-TPE
14/1 CI903 TPE-HKG

前言
先講下點解會咁樣搭。小弟原先係買國泰來回，21/12/2022 CX838 HKG-YVR，14/1/2023 CX865 YVR-HKG。可惜，出發當日温哥華出現多年未見嘅暴風雪，誇張到積雪係破哂紀錄，機場都要臨時封閉。但係小弟未收過國泰通知，所以照去機場。bag drop 嗰陣地勤都只係話一定會 delay，但冇講會 cancel。結果，去到 boarding gate，到咗起飛時間先話會取消。冇計啦，打道回府。第二日就收到 CX email，安排小弟 26/12/2022 搭 CX410 去 ICN 轉 AC64。我又唔想等咁耐，唯有即刻揾 alternative route。好彩揾到班 23/12/2022 AC8，仲有啲位，即刻要咗佢。

咁國泰個 booking 就要取消，但因為係來回機票關係，連帶回程都要取消。咁又要再 book 啦，嘩，直航機不論國泰定加航，都貴到要成兩千加紙。於是，就揾到呢個千四加紙嘅轉機了。相約價綫仲有大韓喺 ICN 轉機，但時間好差，倒塔咁早飛，夜晚好夜先返到香港。

正文
由於航程中嘅三個機場，相信大家都非常熟悉，所以唔大篇幅介紹了。

登機證


第一程
13/1/2023 CI31 YVR-HKG，A350-941，B-18912
預定飛行時間：00:35 - 05:35(+1)
實際飛行時間：00:50 - 04:38(+1)

YVR terminal M bag drop


華航係要求乘客出示快測陰性證明先可以上機，據地勤講，國泰都係需要嘅。反而加航就唔使。


security check


是次用機


座位間距尚算合理，小弟腳長都唔會頂腳


架機上緊客嗰陣播緊聖誕同新年歌。

safety card


機載娛樂系統，由於小弟對非本地嘅電影、歌、劇集等等都冇乜研究，所以唔評論數量多少同選擇。不過又會有呢套闔家辣，算係比較新嘅片，反而其他同期港產片都唔見有。


歌方面，香港歌手得陳奕迅、陳蕾同 C AllStar，但都係得十首歌左右，而且出名嗰啲都冇。

第一餐
有雞肉飯同牛肉意粉揀，空姐當時係講 Chicken rice 同埋 Beef pasta，小弟下意識揀咗後者。但講完就有啲後悔，因為我唔係所有 pasta 都鍾意。果然，係長通粉，未去到唔想食，不過 prefer chicken rice 多啲。牛肉軟硬度適中，味道唔錯。另外附送提子乾包（好似係，我食唔出）、水果、沙律、KitKat 餅，同埋水一支。


瞓覺，不過唔會瞓得好，瞓下醒下咁。我坐喺機翼位，引擎聲唔嘈，隔音係遠好過 77W。

第二餐
先抱歉，小弟電話影相冇得影 raw，班機嘅燈較到橙色，所以影出嚟好 warm，較唔到 white balance。有火腿奄列同炒飯揀，我要咗炒飯。有少少肉，食落唔乾，都係唔錯。跟埋橙汁、乳酪、生果，同埋餐包。


最後，比預定時間早成粒鐘降落台北桃園。


長榮彩繪機


好快埋位，落機，轉機。不過轉機安檢排咗成廿分鐘，得一部機。


另外，原先第一班機係埋 Terminal 2，要搭捷運過 T1 轉第二程機，不過最後都喺 T1 埋位，省卻中間一段路程。


=====================================================

第二程
14/1/2023 CI93 YVR-HKG，A350-941，B-18903
預定飛行時間：08:00 - 09:55
實際飛行時間：08:49 - 10:13

用機


呢班機喺六點零鐘先埋位，係 CI54，由 AKL 經 BNE 過嚟 TPE，再做我搭嗰程機。大約 7:20 左右，地勤開咪廣播話地面作業關係，班機要 delay 一陣。最後搞咗大半個鐘先開閘比人上機。

一起飛冇耐就派飛機餐。小弟事前就揀咗要純淨素食餐 VOML，因為華航喺台灣（除咗台中）出飛嘅機，素食餐係同攞咗兩年米芝蓮綠星嘅陽明春天合作，所以小弟就想試下。架機仲未起飛嗰陣，坐艙長走嚟同小弟 confirm 咗先。




左上角係生果，兩嚿蘋果加一嚿石榴，中間係一啲齋，重點都係兜飯。講真，我又唔覺有咩特別，唔會難食嘅，飯係咖喱飯，左邊係菇加啲汁，但菜就得一條...

食完冇耐就降落，終於返到香港。啲防疫限制已經取消哂，唔係撩鼻，落機直接行去過關、攞行李，跟住上巴士返歸~~（離題講下，小弟上咗某條 A 線，載住我一個人離開總站上公路）


歡迎留言~~

好奇想知兩班機載客率有幾多

同埋好奇邊班 KE 要凌晨四點到香港？ 十二月中打後 KE 好似一星期 11 班機飛香港，KE177 每日夜晚十一點到，同埋 KE171 每星期四日朝早十一點幾到

兩班機都係 full 嘅。

應該記錯，係温哥華好早飛，香港好晏返到。時間好差，所以揀咗華航。

本帖最後由 FBI2 於 2023-1-20 00:01 編輯

特工上個月係溫哥華返香港,過完安檢後腦霧發作,成個背包唔記得拎走,銀包仲要係背包入面. 當時施施然去LOUNGE食野,一小時後先發現唔見左個背包,跑去安檢睇下,安檢叫我唔駛驚,結果安檢入面搵番個背包,不過被沒收左一樽藥丸.
BTW, 溫哥華上個月兩次大雪都好勁,聽講2月頭又落多舖,我都唔知點過去.

樓主個 trip 有 20 幾日都算好彩，如果我係聖誕假去 Vancouver 旅遊一個星期上下，CX delay 要 5 日後先有機，應該成個 trip 可以告吹；照計因為無機飛到，YVR > HKG 一程同樣會有航班取消、滯留問題，CX 會唔會將班機 delay 一兩日好過直接 cancel?

睇落華航 A350 好新淨，體驗應該唔錯? 如果 TPE - HKG 遇上 A321 neo 應該仲正~
不過台灣未全面開放旅遊，除非純為轉機，搭到 CI BR 機會應該比以前少

唔知會唔會分享埋去程 AC 8?

21 號 CX838 先 cancel 咗，前一日嗰班機仲飛到，不過 land 咗要等 7 個鐘先落到機

如果咁啱 21 號出發，最快都要 23 號先飛到，一星期嘅話真係留返喺香港好過

A350 真係好新正，坐落係舒服，比 AC8 嘅 77W 真係正啲（華航 A350 係 3-3-3，加航 77W 係 3-4-3）。同埋聽講 A350 係冇咁乾，客艙加壓都做得好啲？小弟就覺得分別唔大，但可能有啲人會覺得好好多。
CI903 日日都唔同機，A330 又有，好似 A320 都飛過。只能話今次中 A350 算係好彩。

至於去程 AC8，小弟冇影到相，所以只有純文字討論...

岩岩睇過天氣報告，二月未講會落。

不過今年啲雪係幾誇張，
起呢邊住左十幾年，呢啲場面真係一隻手都數得哂。
十一月尾個場雪直情誇到 BR 架 77W 滑埋出去，溫哥華啲路基本上條條路都死哂咁濟。
我同事塞左十二粒鐘先返到屋企 (平時頂多都係一粒鐘，塞下車比多你半個鐘好未；12 個鐘真係 …) ...

唔係
小弟本身買21號CX838(1615HKG>1140YVR)
20230101CX837返香港

1221

我1250香港站搭東涌線轉S1
入到T11410-1415
果日check-in,CX個地勤叫小弟唔好入禁區住，建議等到1530再睇下screen或者到時再問
同屋企人食完delifrance送埋佢去S1巴士站都未轉

1530問櫃檯，地勤哥哥:你屋企係香港既，就唔好入去住啦。又表示等緊YVR通知
同一時間：住Richmond既親戚signal我大雪照片，問我上機未

1620已過原定離場時間
CX地勤：由於大雪YVR暫停未來48小時國際線，838取消(當時個顯示仲係話delay)

等拎返寄艙行李走人都1700

搭完A11,1930鬆收到電郵確定cancelled flight, 表明會rebook

最後係安排12.25
經NRT塞去JAL18(767一架)了事(對比CX838:A350-900!)

JAL 用 B767 飛 NRT - YVR 都勁下

雖然航程係短，JAL 767 Sky Suite 亦都好過 regional B788, 但 trans-Pacific 好似有點...

下... 我就 exactly 嗰一日嗰一班機喎... 點解地勤又叫我 check in 咗先嘅...