免費火車入湖區

第二次喺 R3發文，出遊記都只係第一次，還請多多指教。

有留意開英國鐵路新聞嘅版友，都唔會對上年五月發生嘅 timetable crisis 太陌生。簡單啲講，火車公司同 Network Rail 傾好左新嘅火車時間表，但因為工程延誤，職工訓練不足，新車嚟唔切等因素導致開唔到車，後患無窮。

經營英格蘭北部路線嘅 Northern Rail係其中一個影響最嚴重嘅營運商，規模之大，導致高峰期每星期近1100班次停開。Blackpool North 一帶嘅電氣化工程加上本來已經爆棚嘅城市通勤線，令受影響乘客怨聲載（鐵）道。就算營運商急急腳劃左份過渡時間表出嚟，但仍然有近6%班次需要取消。

如此一嚟，通勤線當然係重中之重中之重。最大犧牲嘅一條線，就係湖區嘅支線 Windermere Branch Line。由West Coast Main Line 嘅 Oxenholme Lake District 向西北行，經 Kendal、Burneside, Staveley到 Windermere。留意翻呢個 Windermere 火車站未落到湖嘅，要再行落山去翻 Bowness 先到，但都可以轉巴士去其他湖區。五六月唔多人放假，結果呢條旅遊線就成為開刀對象（雖然單線鐵路用嘅車唔多）。

本來用 Rail Replacement Bus 代左兩個禮拜，結果Northern 宣布因為司機未訓練完，又要再臨時要代多兩個禮拜。隨住天氣慢慢熱起上嚟，遊客都慢慢增加，RR bus 始終唔係長久方案。於是，有間私人公司出手。

緩緩入站嘅 Class 47 loco，係六十年代嘅產物。


別號 The Lakelander 嘅 47425，入湖區線又有一番滋味。


West Coast Trains（冇同鄰帖嘅 West Coast Express撈亂呀）做好多旅遊包車嘅服務，有廠喺 Carnforth 離 Oxenholme 唔算遠。大家搭 Leeds - Lancaster/Morecombe 嘅火車落 WCML嗰個大彎，隔離就係佢車廠。WCML 都可以隱約見到。


Slam Door。


車廂入面留住歷史貼紙。Anglia Railways 喺97-04年間營運Anglia franchise。


唔同車廂有唔同設計。呢卡以紅色為主，似七十年代嘅 Intercity 設計。


試坐一轉。冇錯，正如標題所講，免費嘅。埋單嗰個，據聞係要保經濟保旅遊業嘅 Department for Transport，一日成本聽聞 5500 鎊。


行一轉，大約一個鐘。留意單線鐵路，只此一抽車。


好快就到左 Oxenholme。呢度可以轉 TPE 落曼城，同埋 Virgin Trains 落 Birmingham/London。

  

Slam Door again 好似係。



好快又會再開。



巧遇不久將來就會落 West Midlands Trains 嘅 TPE Class 350。


另一車廂，睇落又比紅色車廂前衛。同樣大家都有枱，應該以前行開長途線？


富有歷史味嘅廁所，唔好誤會呀，幾十年都仲好乾淨，冇屎味得史味。



翻去少人啲嘅紅色車廂。卡末有行李架，凳上高都有小型行李架。


枱上擺放左湖區嘅旅遊單張。咁呢架的而且確又係湖區專車嚟嘅。


有免費火車嘅同時，都有比較密嘅 RR bus，至於係咪免費呢......


富有人情味嘅 station cafe，當然會捧火車場。留意翻佢只行 weekdays，咁係想做通勤客而唔想做遊客生意呀，定 WCR 自己要車要人，就不得而知。


可惜只係行左兩個禮拜，司機 train 好哂，又回復正常。

就係咁，就搭左轉免費火車，火車本身仲吸睛過火車出面嘅景色（其實都係民居多，要景色就轉巴士啦），都係一次有趣嘅經歷。如果大家想搭 WCR嘅車，可以留意下佢啲團，佢派咩就唔到我控制...

60年車

塊headboard寫住The Lakelander係代表列車嘅名，47245車身應該冇名

原本都好想搭，但係8月去到嗰時已經冇再行...好似係當地 MP 「成功爭取」返嚟嘅成果，好似行完個兩個禮拜之後有 extension 行到7月頭好似後期仲換埋一邊係 cl52 添！
有得搭真係好難得
感覺上 WCR 嘅 Mk2 客車比 DRS 既殘舊得多... 但係勝在内籠應該係原裝
之前經過 Carnforth 果時覺得 WCR 嘅 rolling stock maintenance 好似真係麻麻 啲車生晒銹
同埋有少少驚喜呢條綫風景冇乜特別，仲以爲係一係有湖景一係有開揚嘅山景，因爲當地鐵路迷好似幾鍾意呢條綫
順便問一問有冇係 Lake District 搭埋當地嘅巴士或者順便落埋 Cumbrian Coast 搭 DRS 嘅客列呀 ;)

theodore.c 發表於 2019-2-22 12:52
原本都好想搭，但係8月去到嗰時已經冇再行...好似係當地 MP 「成功爭取」返嚟嘅成果，好似行完個兩個禮拜之 ...

我嗰次自駕所以冇乜點搭車，睇景多。講景，去 Settle Carlisle 好好多，呢條Windermere Branch Line 都係似翻工線多啲，沿途都係望人地屋企個花園……

可能呢間公司嘅賣點就係懷舊呢？Rail tours其實喺六七十年代好盛行，間接養活左一堆海邊鎮仔，係到八九十年代歐洲機開始平先少左人搭。所以留翻以前嘅設計都正常。