[飛行報告]
浸鹹水遇溺記 第二十回 RAF Museum Cosford
[複製鏈接]
|
本帖最後由 HZ8186 於 2020-10-26 03:01 編輯
繼上回 遇溺記 介紹位於劍橋郡嘅帝國戰爭博物館 IWM Duxford 後, 小弟呢篇遇溺記就會同大家介紹位於 West Midlands 嘅皇家空軍博物館 - RAF Museum Cosford。同 Duxford 一樣, 呢個博物館都係全年無休對外開放, 而博物館旁亦設有跑道 年中會舉行空展。雖然小弟探訪當日並沒有特別活動, 不過適逢當日早上小弟喺 NEC 睇展覽, 中午有空閒, 小弟就搭火車黎到 Cosford, 睇下呢個博物館有啲咩睇啦~~
小弟喺呢回遇溺記都戴多一次頭盔啦 - 由於小弟嘅興趣係比較傾向民航嘅發展, 相對地小弟對軍事航空嘅認知係比較貧乏。小弟為呢回遇溺記做咗逾兩星期嘅資料蒐集, 如文章內容有錯漏, 歡迎讀者喺留言指正。
--- 簡介 --- RAF Museum Cosford 於 1979 年由 RAF 設立, 為 RAF Museum London 後 第二個由皇家空軍設立嘅博物館。 同倫敦嘅展館唔同, 由於 Cosford 嘅展館相對上唔受土地問題限制, Cosford 嘅展覽係相對上多元化, 而其機庫亦能容納體積較大嘅飛機, 例如前 RAF 嘅運輸機 AW Argosy, 以及史上僅餘嘅一部 dH Comet 1。
呢個博物館一共設有五個展館, 分別係主要收藏運輸機及 Trainer Aircraft 嘅 "Hangar 1", 描述冷戰歷史嘅 "Cold War", 收藏戰機嘅 "War In The Air", 收藏英國喺五, 六十年代研發嘅多款超音速戰機嘅 "Test Flight", 以及顧名思義, 講述皇家空軍歷史嘅 "History of the RAF"。同時, 博物館外亦有多部退役 RAF 飛機, 例如 VC-10, C-130, 以及呢個博物館嘅 Gate Guardian Hawker Hunter - 小弟會喺相片描述詳細介紹展品同佢嘅背後故事 - 記得睇埋 Photo Caption 吖~~
--- Hangar 1 --- 小弟到達博物館後, 就先到設於跑道旁嘅Hangar 1 開始遊覽。 Hangar 1 係 Cosford 最早設立嘅展館 - 雖然呢個展館並沒有任何特定嘅主題, 不過呢個展館嘅收藏都係非常之珍貴嘅。除咗有世上僅餘嘅 de Havilland Comet 1 之外, 呢個館亦展出多部 RAF 嘅運輸機, 例如 Armstrong Whitworth Argosy, Scottish Aviation Jetstream, 以及 Hawker Siddeley Andover。同時, 佢亦有展出多部常見嘅訓練機種, 例如 de Havilland Canada Chipmunk, Scottish Aviation Bulldog 等。
"And it's good news!" - 呢個展館亦展出一部假嘅 Spitfire 以及一位假嘅 James May - 事源 James May 喺電視節目 James May's Toy Stories 嘗試整一個 1:1 嘅 Airfix 模型, 並動用 <del> 童工 <del/> 當地學生嘅幫手裝砌模型及上色。呢個系列嘅其他五集都同樣精彩 - 有 Amazon Prime 嘅朋友不妨去重溫下~~
--- Cold War --- National Cold War Exhibition, 顧名思義, 係一個講述冷戰期間西方國家同蘇聯喺太空, 軍事同政治等範疇角力嘅展館。呢個展館喺 07 年建成, 並展出唔少經典嘅機型, 例如 C-47 Dakota (軍事版 DC-3), English Electric Lightning, General Dynamics F111 等, 而呢個展館嘅 Centrepiece 則為冷戰期間英國政府使用嘅 V-Bomber - Hawker Siddeley Vulcan, Handley Page Victor 以及 Vickers Valiant。
呢個展館亦有敘述冷戰期間嘅各項大事, 並展出 Leopard 1 等冷戰期間研發嘅陸上裝備, 唯由於展品內容嘅 target audience 有唔多唔少係以中學生為主, 佢嘅內容係比較簡短 - 如果閣下希望研究冷戰歷史嘅, 睇書或者睇 浸鹹水遇溺記 (大誤) 會實際好多~~
--- War in the Air --- 參觀完講述冷戰嘅展館之後, 小弟就黎到呢個收藏二戰時期戰機嘅展館 ‘War In The Air’ - 值得一提嘅係 呢個展館除咗收藏唔少英製戰機之外，呢度亦展出大量曾於德軍服役嘅機型, 例如 Focke-Wulf Fw190 及 Messerschmitt Me109 等大量為德軍效力嘅戰鬥機, 以及德軍嘅重型轟炸機 Junkers Ju 88。展館亦收藏唔少罕有嘅機種，例如德軍於二戰末製作嘅噴射式戰機 Messerschmitt Me262，以及世上僅餘嘅 Boulton Paul Defiant。
Boulton Paul Defiant 為一部定位頗特別嘅戰機 - 呢部戰機外貌類似颶風型戰機，而兩者甚至都係由同一種引擎推動，惟前者嘅武器係設於駕駛室後方嘅砲塔 - 呢部戰機係一個 turret fighter，並利用可以旋轉嘅砲台多角度攻擊敵方，並從而獲得優勢。雖然理論上呢部戰機係應該幾打得，可惜由於呢部飛機需要搭載多一位炮手及相應嘅設備，呢部飛機嘅表現往往都比唔上敵軍嘅 Bf109 等戰機，並喺多次日間執行任務的時候遭德軍圍剿。有見及此，皇家空軍將呢部戰機調做夜間飛行，負責截獲轟炸機。使用砲塔提供嘅強大火力，Defiant 喺英國上空係可以有效擊落德軍派出嘅轟炸機，而 Defiant 喺呢個角色服務至1942年，直至新一代嘅夜間戰鬥機 例如 de Havilland Mosquito 等嘅引入才退下前線。
--- Test Flight --- Test Flight 嘅展館設於 War In The Air 嘅展館旁, 並展出多部實驗性質嘅飛機。英國喺二戰過後繼承咗一個強勁嘅航空業，而當年政府為咗維持英國喺天上擁有嘅科技優勢，英國政府係花費大量金錢進行研發及實驗嘅。呢個決定亦容許各飛機生產商製作唔少 one-off 及實驗性飛機，大大推動英國對引擎科技及超音速戰機嘅發展。
呢個展館嘅展品大概可以分兩類 - 第一類為比較純科學，為研究單一題目而製做嘅飛機，而第二類係為戰機研發而製作嘅。比較純研究嘅飛機包括研究超音速飛行嘅 Fairey Delta 以及研究機師坐姿嘅改裝版 Gloster Meteor，而為戰機研發而設計嘅則有為 English Electric Lightning 的飛行表現做研究的 Shorts SB5 及 English Electic P1, 為 European Typhoon 做飛行系統研發的 BAe EAP, 以及為 Eurofighter 進行 fly-by-wire 測試的改裝版 SEPECAT Jaguar 等。
--- fin --- 展館嘅介紹就黎到呢度先，小弟喺下面揀咗幾件重量級同背後有特別故事嘅展品介紹，記得睇埋圖片描述阿~~
Hawker Siddeley/BAe HS125 為一部英製嘅中型私人飛機 - 設計團隊以容易維修及 STOL (短起飛&降落距離)為設計重點，於 1963年推出一部可以載八位乘客，由一對 Rolls Royce Viper 引擎推動嘅私人飛機。呢部私人飛機可以話係第一代私人飛機之中最成功嘅型號，而 HS/BAe (以及後來購入生產線嘅 Raytheon) 於之後嘅五十年間一共售出一千七百部 HS125。
由於呢部飛機嘅解構設計簡單，呢個型號歷年黎亦經過多次系統及引擎升級。Raytheon 於1993年從 Hawker Siddeley 嘅繼承公司 BAe 購下呢個飛機型號，並改以 Hawker 800 嘅名繼續售賣配上 Garett 引擎嘅更新版 HS125, 並以 U-125 及 C-29 嘅名稱售賣軍用嘅 HS125 予日本嘅自衛隊及巴西嘅空軍。現時世界各地依然有大量私人企業及軍隊使用呢部飛機作運輸或偵測等用途，而最後一部 HS125 才於 2013 年投入服務，可見呢部飛機嘅耐用性及通用性。
諷刺嘅係，由於呢部飛機太耐用嘅關係，呢部飛機亦令好多美洲國家嘅軍隊同緝毒組頭痛 - 由於呢部飛機可以於臨時跑道上運作，維修成本低，以及呢種飛機嘅二手價格低廉，好多美洲嘅毒梟都會使用呢種飛機運送違禁品，並喺國界之間低飛 以避過軍事雷達。
圖中嘅 Hawker Siddeley Dominie 為一部軍事版嘅 HS125 - 英國嘅皇家空軍曾購買三十部 Dominie 以用作飛行訓練及 VIP Transport 等用途。 第一部投入服務嘅 Dominie XS709 於 1964 年生產，為皇家空軍服務 47 年後喺 2011 年退役，成為 Cosford 嘅其中一件展品。
相信好多喺香港土生土長嘅航空迷都會見過香港飛行服務隊嘅 BAe Jetstream 41, 不過唔知大家又有無見過 Jetstream 嘅原型 - Handley Page Jetstream 呢?
第一代 Jetstream 係由英國公司 Handley Page 自主研發，而當時 HP 嘅工程團隊係希望製做一部能以接近噴射客機嘅速度飛行 ，設有機艙加壓及搭載十二位乘客嘅小型客機。原本嘅設計喺美國受到歡迎，而廠商係接獲多張 Jetstream 嘅訂單。惟由於引擎生產商 Astazou 遇上開發問題，HP 係被逼延遲客機嘅交付 - Handley Page 好快就遇上財務問題，並於 1970 年宣布破產。 幸好呢個計劃同生產線被 Scottish Aviation 購下，而 Royal Air Force 同年亦購下 26 部 Jetstream 以作飛行員訓練之用, 令第一代 Jetstream 嘅生產得以延續。
現代版嘅 Jetstream 31 則要等到 1978 年才開始研發 - 當時 Scottish Aviation 已被國有化，而合拼而成的 British Aerospace 認為當時有一個二十人嘅小型客機嘅市場空缺，並決定製做新一代嘅 Jetstream。新一代嘅 Jetstream 係轉用輸出較強嘅 Garett TPE311 引擎，而原有嘅 1+1 座位排位則變成 2+1 嘅座位排位，喺唔改動機身大小嘅情況下把載客量提升一半。呢個改動令 BAe Jetstream 31 喺美洲大受歡迎，而最後 BAe 係售出近四百部 Jetstream 31 嘅。
最後，香港人最熟悉嘅 BAe Jetstream 41 係於 1990 年開始研發，並於 1992 年投入服務。除咗伸長機身同裝多十張座位之外，BAe 當時係為Jetstream 41 重新設計過機翼同襟翼，亦安裝咗新嘅電子系統。呢個型號嘅銷情亦算理想，而最後 BAe 係生產咗一百部 Jetstream 41 嘅。小弟去年遊歷威爾士時曾乘搭一部 Eastern Airways (opf. flyBE) 嘅 Jetstream 41 由北部飛去威爾士首府 Cardiff - 如果閣下有興趣知道呢批小型客機嘅飛行體驗係點，不妨睇埋小弟喺上年寫落嘅 浸鹹水遇溺記 第十三回~~
Looks can be deceiving...
圖中嘅 G-AOVF 為一部 Bristol Type 175 Britannia 312，為英國戰後嘅第二批新設計嘅民航客機。呢部客機可以載一百三十位乘客及具有七千公里航程，而引擎方面則採用四部自家設計嘅 Bristol Proteus Turboprop 引擎。呢部飛機於 1958年投入服務，並以二十六張臥舖座及二十六張頭等座嘅豪華格局服務 BOAC 嘅倫敦紐約 '線皇'。惟隨著更先進嘅 de Havilland Comet 及 Boeing 707 投入服務， BOAC 於 1965 年把機隊調離紐約嘅航線，並於 1968 年把 AOVF 改為一部貨機。 BOAC 同年把 AOVF 賣走，而喺之後嘅十六年間，呢部貨機會為唔同嘅航空公司服務，直至飛機喺 1984 年退役，並獲 RAF Museum 購買及展出。
圖中嘅 G-AOVF 雖然披上 RAF Air Support Command 嘅色彩並掛上 XM497 嘅篇號，不過呢部飛機係從未為 RAF 服役過，甚至真實嘅 XM497 同 G-AOVT 本身係兩部唔同嘅機型。(XM497 原為一部 Series 253，而 G-AOVT 為一部 Series 312(F) - 後者除咗用有加大油缸同改良嘅起落架之外，機身亦比前者長 3.1米) 如果閣下有興趣拜訪一部真正嘅 Series 253，閣下係可以前往 Cotswold Airport 拜訪同樣披上 RAF Air Support Command，而真係服務過 RAF 嘅 XM496。
Armstrong Whitworth Argosy 係一部英國於五十年代設計嘅客機及軍用運輸機 - 原為英國政府發出嘅其中一個 'Operational Requirement' 而設計，呢部雙機尾飛機係可以搭載重 13 噸嘅貨物，而巨型嘅機艙門則容許車輛或貨物直接裝卸。雖然當時 RAF 當年五十多部 Argosy 嘅訂單並唔足以覆蓋開發一部新飛機嘅成本，不過由於 AW 認為當時民航市場或許對一部短航程嘅貨機有需求，因此 Armstrong Whitworth 選擇以私人名義研發呢個設計，並於 1961年交付呢部外形獨特嘅四引擎運輸機。
雖然呢部運輸機嘅設計係非常實用同靈活，可惜 Argosy 嘅銷售表現則強差人意 - AW 只係售出十八部 Argosy 予航空公司，而 RAF 亦喺十年後因為運作成本嘅關係開始購入 Hawker Siddeley Andover (軍事版 HS.748) 同 Lockheed Hercules 替代 Argosy, 並把剩餘嘅 Argosy 賣出民航市場，更進一步擊沉 AW 嘅銷售展望。圖中嘅 Argosy 為 XP411，於 1962年投入服務，生前曾駐守中非同塞浦路斯等地，為當地嘅英軍基地提供補給。呢部運輸機喺 1975 年退役，而同年獲 RAF Museum Cosford 收藏。
世上第一部噴射客機 de Havilland Comet 於 1952 年投入服務 - 雖然呢部新型客機當時只有僅僅 2400 公里嘅航程，不過佢係為英航嘅乘客帶黎全新嘅體驗。 de Havilland 為 Comet 裝上嘅四部 turbojet 引擎減去舊式活塞引擎同螺旋槳嘅嘈音及震動，並容許飛機以時速 740 km/h 喺各大城市之間穿梭，大大縮減飛行時間。呢部客機無疑係用上當時最先進嘅科技 - 由於當年嘅噴射引擎技術未算發達，de Havilland 當年除咗要研發機身之外，甚至要自家研發引擎推動呢部極之前衛嘅客機，直到第二代機 Comet 才用上 Rolls Royce Avon 引擎。
圖中展出嘅 G-APAS 為世上最後一部生產嘅第一代彗星型客機，亦係世上僅餘嘅第一代彗星型客機 (現時世上只剩餘七部完整嘅 dH Comet, 而其餘六部皆為第四代嘅彗星型) - 雖然呢部客機出廠嘅時候係裝上方窗，不過喺 1954 年意外報告推出後廠房係特意把機身加固，並把窗口改成橢圓形。最後，雖然呢部彗星型客機係披上 BOAC 嘅機身色彩，不過呢部客機身前並沒有為 BOAC 服役過 - G-APAS 為法航服役後轉投英國皇家空軍服務，並於 1978 年退役並獲收藏。
唔知大家又認唔認得出 Comet 前面嘅訓練機係咩型號呢? 俾個小提示 - 同型號嘅訓練機係曾為 RHKAAF 服役~~
雖然 Comet 喺 1952 年投入服務時 係能夠提供嶄新嘅體驗俾乘客, 不過好可惜地呢部彗星型遇上嘅唔係一份又一份嘅訂單, 而係一單又一單嘅不幸事件。
1954 年一月十號 ，英國海外航空 BOAC 由羅馬飛往倫敦希斯羅嘅 Flight 781 於起飛後不久於空中解體，機上三十五名乘客及機組人員全部罹難。
呢個不幸嘅消息傳到倫敦後，英國政府隨即要求 de Havilland 展開事故調查，亦派皇家海軍到附近區域打撈飛機碎片。BOAC 即時宣佈會停用機隊並等待調查報告，並指派職員去研究 Comet 嘅潛在缺陷。惟由於當年 Comet 係全球最先進嘅飛機，英國政府唔想英國嘅航空業沾上污名，以及 BOAC 當年開始面對財政壓力嘅情況下，即使當時嘅打撈行動尚未完結，英國政府同 dH 好快就正式結束呢個調查，而 BOAC 則於同年三月二十三號重新使用 Comet 執飛旗下航班。
1954 年四月八號 ，南非航空 SAA 由羅馬飛往開羅嘅 Flight 201 於起飛後不久於空中解體，機上二十一名乘客及機組人員全部罹難。
呢個不幸嘅消息再次傳到倫敦後, 英國再次要求 de Havilland 展開調查, 再次派出皇家海軍打撈飛機殘骸, 並再次要求 Comet 嘅機隊停飛 - 而今次唔同嘅係, BOAC 嘅 Comet 機隊一停飛就停足四年。dH 嘅工程師開始循機艙失壓嘅方向調查, 並使用一個 BOAC 嘅彗星機身及一個大型水缸進行加壓測試, 而測試好快就發現問題嘅根源 - 方窗設計。(圖中展出嘅窗口組件正正就係 G-ALYP 進行加壓測試時 破裂嘅機身組件)
雖然 de Havilland 最終係成功克服 Comet 遇上嘅問題，不過傳媒對該兩宗空難嘅大肆報導已經大大打擊 Comet 嘅銷情 - 原有 Comet 1 嘅客戶大多已經轉投 DC-8 或 B707 嘅懷抱，而最後使用 Comet 4 嘅客戶則大多來自英聯邦內 - de Havilland 亦將設計改成 Vulcan 以供英國皇家空軍使用，而呢部軍事版 Comet 則為 RAF 服役至 2011 年才退役。
(等等先 點解呢個劇本好似近期喺唔知邊度見過嘅...)
呢度講多少少啦，一個對 dH Comet 常見嘅誤解係 導致兩次飛機空中解體嘅裂痕係源自窗口嘅其中一個角落 - 惟事實上裂痕係源自窗口組件嘅拉釘孔，因製造方式不妥而產生嘅。其實當年嘅飛機製造業已經知道有金屬疲勞以及裂痕成長等現象嘅存在，惟呢兩個現象對業界依然係一個新嘅現象，而業界對呢兩個現象嘅認知同應對方法亦無今時今日咁咁全面。有見及此， de Havilland 於 1949 年於其廠房為 Comet 1 嘅設計進行多項測試，例如負重測試以及單次嘅壓力測試，惟廠商並沒有為機身進行多次嘅加壓測試。最後，喺 廠商嚴重低估窗口附近位置承載壓力 以及 廠商組裝機身時使用 punch riveting 技巧嘅情況下 (呢種組裝方法雖然快速, 不過過程係有機會導致接合洞口出現微細裂痕), 悲劇喺 1954 年發生咗兩次。
作為一個講述英國皇家空軍同二次世界大戰歷史嘅博物館, 呢個博物館當然係有一對噴火型同颶風型戰機展出啦 - Cosford 收藏嘅噴火型為 K9942 SD-D, 係一部 Mark I 嘅噴火型, 而颶風型則為 LF738 UH-A, 而佢係屬於一部 Mark IIc 嘅颶風型。
雖然喺大眾眼中 英國戰機 "黎黎去去咪又係嗰兩個部 Spitfire & Hurricane", 不過事實並非如此 - 根據官方數字, 噴火型戰機係可以細分為 19 種, 而颶風型戰機則可以細分 5 大種。喺二次世界大戰期間, 各方都不斷為旗下嘅戰機改裝升級以提升戰機嘅性能, 而升級部份好多時候都係針對引擎同螺旋槳等部件。呢類型嘅改動往往比較不顯眼 - 以噴火型戰機為例, 雖然一部 1939 年投入服務嘅 Spitfire Mk.I 同一部 1942 年投入服務嘅 Spitfire Mk. XII 外觀上只有駕駛艙外型同螺旋槳數量嘅分別，不過前者係用可以產生 1030 匹馬力嘅 Rolls Royce Merlin III 引擎，而後者係用可以產生 1735 匹馬力嘅 Rolls Royce Griffon II 引擎 - 除咗把噴火型戰機嘅最高速度提升 50% 之外，戰機嘅靈活性亦大大提升。
戰機嘅槍械配置亦有跟隨戰機嘅進化而轉變，而博物館亦詳細列出當年戰機會選用嘅唔同槍械配置。圖中嘅槍械有 (由上而下) .303 Browning Machine Gun, 0.5’ Browning Machine Gun AN/M2, 20mm Hispano Mk.V Autocannon, 20mm Hispano Mk.II Autocannon。Spitfire Mk.I 係配上八支 .303 Browning 機關槍，而 Hurricane Mk.IIc 則用上四支火力比較強勁嘅 Hispano Mk.II 自動炮。
The faux Spitfire - complete with a faux James May
作為二次世界大戰入面最出名嘅戰機， Supermarine Spitfire 喺戰後獲唔少收藏家垂青 - 喺過兩萬部 Spitfire 之中，有大約一百七十部係獲保留，而當中甚至有至少五十部係 airworthy 嘅。1939年戰前一部全新嘅 Spitfire 係價值 ￡12,000 英鎊 (相當於 2015 年嘅 ￡740,000)，而喺 2015 年一部適航嘅 Spitfire 係以￡3,100,000 嘅價格喺拍賣中轉手。
如果你覺得三百萬英鎊嘅價格太高，閣下係可以模仿 James May，走去英國中部請一班童工幫你砌一部 1:1 嘅噴火型戰機 (誤), 或者攞支金屬探測器去啟德掃 (認真) - 傳聞當時駐 RAF Kai Tai 嘅 Spitfire VN318, PS852 & PS854 服役完後係俾人推咗落海以作填海之用 - 閣下得閒嘅話不妨走去挖翻佢地出黎啦
P.S. 攞飛機黎填海真係第一次聽 - 早知就唔好拆泰東部 747，攞佢黎起港珠澳個人工島啦 :0)
Me262 於 1944 年投入服務，為世上第一部投入服務嘅噴射式戰機 - 呢部戰機由兩部 Junkers 嘅噴射式引擎推動，論速度同載重都比當時嘅傳統戰機，甚至比隔岸於同年投入服務嘅 Gloster Meteor 優勝。可惜因為材料短缺及引擎穩定性不足，以及聯軍於 1944 年開始優先轟炸設有 Me262 嘅德軍基地，呢部極度先進嘅戰機係無能力拯救當時大勢已去嘅德軍。
戰後，呢批戰機迅速被蘇聯及英美等國家用作飛行實驗及技術轉移，而研發 Me262 嘅團隊亦迅速被各方 招攬/虜走, 並為勝利嘅國家繼續研發戰後嘅 F-86 及 MiG-15 等戰機。現時世上有大約十部完整嘅 Me262 擺放於世界各地嘅博物館展出。
Junkers Ju-88 係一部於二戰時期主要為德國服役嘅中型轟炸機 - 原為高速轟炸任務而設計，呢部飛機嘅設計喺戰時係多次被修改，而唔同型號嘅 Ju-88 係可以進行各種轟炸任務，例如夜間轟炸，俯衝式轟炸等等。Junkers 喺二戰期間生產座過一萬五千部轟炸機，令 Ju-88 成為德國空軍入面一個不可或缺嘅機型。
圖中嘅 360043 喺 1943 年五月被兩名叛逃嘅德國空軍人員帶到蘇格蘭，而佢係世上兩部僅餘完整嘅 Ju-88 之一。呢個叛逃事件對英國係喜事黎 - 英方除咗突然間有部 Ju-88 自動送上門之外, 呢部 Ju-88 喺 Aberdeen Dyce 降落嘅時候係裝有當時德軍新研發嘅機上雷達 - 英方除咗可以測試 Ju-88 嘅飛行表現之外，英國嘅工程師亦隨即研發出干擾敵方雷達運作嘅科技。順帶一提，另外一部完整嘅 Ju-88 都係因為士兵叛逃而送到聯軍手上嘅 - 一名羅馬尼亞機師同年飛往塞浦路斯投誠嘅時候 送多部偵察版 Ju-88 俾英軍，而呢部 Ju-88 現處於美國嘅 NMUSAF。
同上回遇溺記介紹嘅 IWM Duxford 一樣，睇黎 National Cold War Exhibition 都有唔少土地問題 - 圖中為 (由近至遠排序) 由著名轟炸機 Avro Lancaster 改裝而成嘅運輸機 Avro York，由 DC-3 改裝而成嘅美製運輸機 Douglas C-47 Dakota ，為取代 Avro York 而設計嘅 Handley Page Hastings，英制嘅第二代噴射戰機 Gloster Javelin，以及重型運輸機 Shorts Belfast， 而最近筆者嘅坦克則為一部由西德製造嘅 Leopard I。
順帶一提，唔知大家又點睇以前嘅飛機名呢？ 小弟就幾欣賞個個年代啲人為飛機同飛機引擎命名 - 個性化嘅命名係可以令部飛機喺觀感上更加親切及優雅，而唔似得而家咁所有飛機名都係一串數字咁死板 - 唔知大家又有無特別鍾意某一部機嘅機名呢?
Gloster Meteor 為世上第二部使用噴射引擎推動嘅戰機 (唔好意思, 呢個頭香俾 Me262 搶咗) - 呢部戰機喺 1943 年首次飛行，並於 1944 年投入服務 - 配上四支 Hispano 20mm Autocannon, 呢部戰機喺二戰尾端以及冷戰初期擔主要係當起攔截任務嘅重任。
戰後， Meteor 系列嘅戰機亦化身為一個空中實驗室 - 除咗測試唔同引擎同彈射座椅等新款裝備，RAF 亦改裝咗圖中嘅 Meteor 以測試唔同坐姿對機師嘅影響。當時 RAF 認為如果機師躺下控制戰機嘅話，機師可以承受嘅更大嘅向心力，同時亦可以令戰機更加流線，減低空氣阻力，而 RAF 於五十年代初期改裝一部 Meteor 以測試呢個駕駛坐姿。可惜機師可承受嘅向心力嘅增加係不足以抵消機師難以轉身觀察飛機後方等問題，最後 RAF 係擱置咗呢個設計，而改為為機師提供可以把血液壓翻上上半身嘅壓力衣，以解決向心力所導致嘅問題。
P.S. 唔知有無人同小弟一樣, 覺得 Meteor 呢個名好唔吉利? 雖然呢部戰機服役時係一部性能良好嘅戰機, 不過叫佢做 隕石 就真係唔係太老黎咯 :p
Fairey Delta 2 為一部英製嘅試驗噴射戰機 - 於 1954 年投入服務, 呢部飛機係被用作研究喺音速及超音速飛行嘅氣流學, 而呢部試驗機亦於 1966 年刷新最高飛行速度紀錄。
雖然 Fairey 當時係一間專門設計艦載飛機嘅公司, 並設計出 Swordfish 同 Firefly 等多款經典嘅飛機, 不過呢個製造商喺戰後一直關注超音速飛行嘅發展, 並多次提倡使用 Delta Wing 嘅飛機設計。呢個睇法後來係獲得英國政府認同, 而英國政府喺 1949 年批出一個合約俾 Fairey 製造兩部可以達到超音速速度嘅雙引擎飛機。
可惜英國政府嘅支持好快就乾涸 - 執政政黨喺 1951 年輪替後, 新上任嘅國防部長將研究重點放喺可以運送核武嘅洲際彈道導彈, 並開始減少對超音速戰機研究嘅資金。英國政府後來甚至以 "超音速飛行產生嘅 Sonic Boom 有機會傷害民居" 為由, 禁止 Delta 2 喺英國上空試飛, 而 Fairey 只好將研究計畫搬到法國, 喺本身同 Fairey 友好嘅法國飛機生產商 Dassault 嘅幫助下繼續計畫。(Dassault 喺呢個情況下亦大大得益 - Fairey 對 Delta Wing 嘅研究係直接幫助 Mirage 系列嘅戰機嘅研發)
失去英國政府嘅支持後, Fairey 亦開始向海外推銷以 Delta 2 作基礎嘅戰機。 喺五十年代末 Fairey 曾夥拍 Dassault 及 Rolls Royce 向西德提供戰機, 唯喺 Lockheed 用重金 '游說' 嘅情況下, 西德最終係選用 F-104 為其國防擔當起攔截嘅重任。
Fairey Delta 2 嘅最後任務就係協助 協和號客機 嘅研發 - Fairey 嘅飛機生產部門喺 1960 年同其他公司合拼成 BAC, 而當時 BAC 剛剛展開協和號客機嘅研發同設計 - 由於 Delta 2 係設有 Droop Nose 嘅關係, Fairey 團隊嘅經驗係大大幫助協和號嘅機頭設計，而後來 BAC 為咗驗證 Ogival Delta Wing 嘅表現, BAC 更加為第一部試驗 FD2 換上 協和號 嘅翼面，並改稱 BAC 221。
現時, 兩部 FD2 都被博物館收藏 - 被改成 BAC 221 嘅第一部 Delta 2 WG774 現於 Yeovilton 嘅 Fleet Air Arm Museum, 而第二部 Delta 2就係圖中喺 RAF Museum Cosford 展出嘅 WG777, 紀錄呢段頗崎嶇嘅超音速戰機發展史, 以及見證呢段由英國政府嘅平庸製造出黎嘅 "英法友好"。
A Bristol Type 188, BAC TSR-2, a Hunting H.126 and a Hawker Siddeley Kestrel rests in RAF Museum Cosford's Test Flight Hangar.
// 一轉念 誰人在 說當然 沈默奉獻 原本的世界 在改變 快樂嗎 望見盛世依然（天空望見） 約定以後 努力再走前 //
RAF Cosford’s Gate Guardian Hawker Hunter XG225 keeps a watchful eye over the airbase under the setting sun.
終括呢篇博物館報告，Cosford 無論喺展品或設施方面都無令小弟失望 - Cosford 嘅戰機收藏係非常之重量級，而其展品嘅保養都做得好好。同時，Cosford 嘅設施都好齊全 - 餐廳，兒童遊憩區等基本設備係應有盡有。無論閣下係獨自參觀，或帶埋親朋戚友一齊玩，相信呢個博物館都好適合嘅~~
交通方面, 呢個博物館係相對上容易前往嘅 - 呢個博物館喺設於 Shifnal, Shropshire, 而距離博物館十分鐘左右 則有一個同名嘅國鐵車站 Cosford - 雖然火車班次唔係密, 不過該站嘅火車係來往 Birmingham New Street, 由倫敦/曼徹斯特等城市出發前往嘅話轉一次火車便可。順帶一提， RAF Museum 喺倫敦亦設有博物館，並位於 RAF Hendon 的舊址上。如果閣下認為 Shropshire 未必放得落行程，或閣下喺倫敦有半日空閒，閣下係可以考慮參觀 RAF Museum London 嘅。
不過呢個博物館嘅唯一美中不足，就係佢比較密集嘅展品排位。Test Flight 展館嘅飛機基本上係翼尖貼翼尖咁泊，而 National Cold War Exhibition 嘅飛機則好似 Duxford 咁 由腳趾到頭頂全部都係展品 - 小弟甚至係完全睇漏展出嘅 V-Bombers 之一 - Vickers Valiant, 到後來為博物館做資料蒐集嘅時候才發現呢個展品嘅存在。如果博物館方面肯將展品排位改良少許，相信參觀體驗會舒服好多嘅~~
最後, 留意翻呢個係一個 Active 嘅 RAF Station, 雖然呢個場地大多都係用作訓練用途, 不過探訪博物館嘅人仕則要留意指示 唔好擅闖軍營 阻到人地摺被啦~~
呢篇博物館報告就寫到呢度先，希望睇完之後大家可以加深對 RAF 嘅認識。下回 遇溺記 小弟會前往位於 Weybridge 嘅 Brooklands Museum，stay tuned!
epilogue
小弟同友人食飯閒談嘅時候 友人偶然間問咗一條幾好嘅問題 - 點解唔見皇家海軍嘅二戰軍艦好似 Cosford 咁, 整整齊齊排列喺 Portsmouth 或 Liverpool 嘅?
雖然呢度係航空版, 不過見呢幾期 遇溺記 都係講英國嘅博物館, 小弟不妨抽少少時間講述下海軍保育, 以及小弟對英國嘅保育文化嘅意見啦。
事實上, 皇家海軍喺二次世界大戰期間扮演咗一個極度重要嘅角色。作為當時世上最龐大嘅艦隊, 皇家海軍喺二戰期間基本上係功不可沒 - 除咗同德, 意嘅海軍較量 同支援陸上嘅軍事行動之外, 皇家海軍亦負責為橫越大西洋嘅貨船提供保護, 防止德軍嘅潛艇擊沉載有食物及戰略物資嘅船隻。同時, 皇家海軍嘅表現亦相對出色 - 由於皇家海軍係非常重視紀律及船員培訓, 英方係可以喺 Battle of Cape Matapan 以及 Battle of the North Cape 等戰役中佔優, 可見皇家海軍喺二戰嘅功勞係絕對不可忽視。
同時, 喺船上服役嘅風險往往遠超做戰機機師承受嘅風險 - 一部戰艦嘅運作係需要極大量人手喺甲板下工作, 從通訊, 大炮操作, 甚至係引擎運作, 全部都係需要靠一班訓練良好嘅船員才得以讓艦隻喺戰鬥期間有效操作。唯當船隻不幸被擊中時, 由於船員位於艦隻下層, 由船長下令棄船到船員能夠全體撤離往往係需要一定嘅時間, 好多時候都會有過百, 甚至上千位船員連人帶船葬身大海嘅事件。(HMS Glorious 沉沒嘅時候帶走咗 1200 位軍人, 而 USS Jarvis 喺 Guadalcanal 被擊沉嘅時更係全軍覆沒) 相反, 降落傘喺二戰期間係戰機機師嘅標準設備 - 喺飛機被擊落嘅時候, 尤其如果閣下喺 friendly territory 上空被擊落, 只要閣下用降落傘著地嘅時候唔好跌斷腳, 閣下基本上係可以立即繼續上戰線。
可惜現時英國對皇家空軍戰機嘅保育同皇家海軍嘅保育係嚴重不成正比 - 當英國擁有四十多間航空博物館及上千部獲保育嘅飛機時, 於皇家海軍服役並獲保留嘅戰艦真係十隻手指數得曬, 而真正屬於二戰時代嘅戰艦甚至只有三部 - Imperial War Museum 旗下嘅 HMS Belfast, 正於 Chatham Dockyard 展出嘅 HMS Cavalier, 以及 HQS Wellington。
無論係汽車, 火車, 民俗 以至係飛機, 英國大部份嘅博物館都係獨立運作, 除咗幾個比較大型嘅博物館會由 National Trust, English Heritage 等機構管理之外, 大部份博物館都係獨立營運及自負盈虧嘅。收入方面, 呢類型嘅博物館則長期依賴義工嘅管理以及訪客嘅捐款維持收支平衡 (註: 唔少獨立博物館都係註冊慈善機構, 入場 "捐款" 收據可以扣稅), 而博物館嘅翻新/壙展則依賴 National Lottery (英國版賽馬會) 等機構嘅贈款以維持博物館運作。可惜呢個分散嘅博物館架構亦限制咗保育規模 - 雖然小型嘅博物館喺呢個模式下得以生存, 不過有好多大型保育計畫都喺呢個眾籌模式下因為成本問題無疾而終。
另一個限制皇家海軍嘅戰艦保育嘅因素則源自一個比較現實嘅問題 - 就係戰後根本無船俾你保育。雖然英國喺二次世界大戰之中係勝利一方, 不過英國亦喺呢個大戰中付出沉重代價 - 英國除咗由一個帝國變翻做一個島嶼之外, 戰時嘅龐大開支亦導致國庫虧空, 而經濟復甦更係遙遙無期。(As a reference, 英國喺二戰時設下嘅強制糧食配給制度喺 1954 年才結束) 喺呢個情況下, 英國只好開源節流, 縮減軍隊規模, 並把艦隻拆售。
以 HMS Belfast 為例, 即使呢部 Light Cruiser 喺二戰期間 喺擊沉德軍戰艦 Bismarck & Scharnhorst 嘅行動之中係功不可沒, 不過佢成為 IWM 嘅收藏品嘅路途卻一波三折。 Belfast 先喺 1963 年進入後備狀態, 而 IWM, MoD 以及 NMM 三個組織則先喺 1968 年提出將 Belfast 保留, 唯呢個計畫並沒有獲接納, 而英國政府係計畫於 1971 年把戰艦拆售。 喺多個官方機構挽留不果嘅情況下, 興趣人仕喺同年成立信託公司 HMS Belfast Trust, 並向政府提出私人保育嘅請求。經過多番游說之後, 政府喺同年同意把 Belfast 轉讓, 而把船上嘅軍事設備移除及進行小量裝修後, HMS Belfast 於同年十月停泊泰晤士河, 並展開其博物館船嘅生涯。
唯講到呢度 呢個故事依然未能夠有一個 "Happily ever after" - HMS Belfast 喺私人保留嘅情況下財務狀況一直欠佳, 而經過協商後, HMS Belfast 最終喺 1978 年收歸 Imperial War Museum 旗下, 並由 IWM 接手籌款及日常運作。 喺新嘅領導下 (i.e. 獲得 IWM 背後嘅豐厚財力支持 :p) HMS Belfast 係得以被好好照顧, 並船上嘅軍事設備亦漸漸重新裝上及修復好, 成為今時今日 一個遊覽倫敦時必去嘅景點。
英國近年開始有呼聲要求皇家海軍保育退役船隻, 以設立博物館及開辦以皇家海軍為中心嘅展覽。(RN 曾於 14年提出保留 HMS Illustrious, 可惜因為成本問題最終擱置) 雖然小弟對於 "究竟英國係咪需要多一個戰爭博物館" 持有保留, 不過小弟亦樂於見到英國大眾對於歷史嘅保育意識提高嘅。小弟都喺呢度 ff 多幾句啦 - 唔知一個結合打仗同造船嘅博物館有無得唸? 英國曾經擁有一個輝煌嘅造船業, 而呢個行業嘅興衰亦見證好多北部城市嘅轉變 - 無論係從戰爭, 工程或社會角度出發, 相信一個以造船為主題嘅博物館會係一個極之有趣嘅出發點~~
好啦, 後記就寫到呢度先, 希望各位鐘意小弟嘅呢篇極度離題嘅 ‘HKVDB’ 短文啦。 下回 遇溺記 小弟會前往位於英國南部嘅 Brooklands Museum, 探訪另一部協和號超音速客機, Stay tuned~~
P.S. 閣下鍾意睇船嘅話，經過愛丁堡嘅時候不妨走去拜訪 HMY Britannia~~ P.P.S. 本身貪得意念住俾 5p 買張 Permit To Travel 紀念，點知個 5p 卡住咗喺個入口位 O.o 回水啊啊啊啊 P.P.P.S. 究竟我寫曬五篇 遇溺記 先定係搵到份 Grad Job 先?
--- fin ---
小弟開咗個 IG 專頁啊~~ 有興趣知道更多航空相關既冷知識就跟蹤 IG: @bombe_de_terre
如果閣下鐘意小弟既飛行報告既話, 不妨睇埋小弟之前寫落既飛行報告~~ 第七回 BE7671 NCL-BHD-IOM 尋找 Jetstream 41 的故事 - 不日推出 第八回 BA3287 IOM-LCY 一個避完稅走去翻學既故事 - 不日推出 第二十回 拜訪 RAF Museum - Cosford 第二十一回 拜訪協和號試驗機 - Brooklands - 不日推出 第二十三回 SN2093 BRU-LHR 初嘗布魯塞爾航空 - 不日推出 第二十四回 EI283 LCY-DUB 尋找 Avro RJ 的故事 - 不日推出 第二十五回 FR534 DUB-EMA 初嘗瑞恩航空的故事 - 不日推出
|
評分
-
查看全部評分
|
|
|
|
|
|
|
|
都知呢篇 遇溺記 係偏長
俾個 tl;dr 大家先
英國人幫飛機改名係特別優雅
飛機太耐用未必係好事
飛機換一次引擎又一條好漢
樓主搵緊工
喺英國僱用童工係買一送一 叫個中學生幫手 家長係會自動幫埋一份
英國航空業嘅最大絆腳石係英國航空業
(部份展品係) 假的 樓主眼睛業障重
英國都有土地問題
變節嘅話記得帶埋最新嘅戰機投誠
呢度係 C3版, 樓主話係就係
要發達唔駛跟 Brian Cha，攞支金屬探測器去啟德掃就得
樓主表示 早知呢篇野當畢業論文交
|
|
|
|
|
|
|
|
|
RAF Museum Cosford 喺以前 Shropshire 讀書果陣跟學校去過一次，可惜當時對戰機認識貧乏，對大部分展品的背景都不太了解，主要都係對Comet 1，以及佢大量的Test Plane 比較有深刻印象。今次睇番樓主報告，有如重去了一次，非常精彩。
P.S. 樓主現時還在英國搵工? 有意投身航空業?
|
|
|
抗議962B重組
還我962全日服務
|
|
|
|
|
|
|
Advertisement
Advertisement
Advertisement
Advertisement
Advertisement
|
樓主