十八區各區居民以當區區議會名稱稱呼所住地方之習慣

事先聲明：個人廢嗡，不喜勿插。

（標題可能有啲1999，簡單講就係灣仔區居民會唔會話自己住喺灣仔，離島區居民會唔會主動話自己住離島，諸如此類。）

（呢個情況包括問當區居民係咪住喺某地，例如問荔枝角居民「你係咪住深水埗？」，而唔係「你係咪住深水埗區？」後者嘅話幾乎所有人都會答係，但我地而家聚焦喺前一種情況，即係詢問當區居民住喺邊道嘅時候淨係以區議會名稱發問，唔會帶個「區」字。
眾所周知，十八區呢個行政區劃就搞咗幾廿年，但其實「十八區」嘅概念喺日常生活上其實同香港人較少交集，一來好多政府部門嘅服務分區就唔會跟十八區，乜嘢法定分區、警察、消防、醫管局同社署嘅分區都唔跟十八區，甚至同一個區議會被其他政府部門嘅分區分割嘅情況都時有發生（例子有成個南大嶼山都係醫管局港島東聯網）。二來，區議會制度誕生以來都係作為諮詢機構嘅角色，無乜實際權力，最多就係建議同埋使政府嘅撥款。（雖然市政局被殺局嗰陣就話會將部份原屬市政局嘅權力由食環署同康文署轉交畀區議會，但係廿幾年後呢個承諾好明顯係落空嘅，而最近嘅區議會改革就更加扼殺咗呢個可能性啦）。所以十八區居民平時除咗喺區議會事務，同埋接觸到使用區議會名稱嘅機構之外（例如油尖區康樂體育會），都係無乜幾可會直接同區議會嘅分區有交集嘅。

入返正題，咁我地就討論下十八區唔同居民直接以當區區議會名稱稱呼所住區域嘅習慣，呢個情況可以分開做幾級：


1. 當區居民通常喺大多數情況下會主動用區議會名稱稱呼所住地方：

屯門、大埔

屯門：無論係住喺離屯門市中心有一段距離，例如屯碼、良景甚至兆康嘅居民被區外人問住邊道嘅話通常都會答係住喺屯門。
大埔：與屯門同理，無論係太和、富善、甚至係部份林村居民問起都會答自己係住大埔。（十四鄉另作別論）

2. 當區居民喺部份情況下會主動用區議會名稱稱呼所住地方：

北區、南區、沙田區、荃灣區、東區

北區：通常都會話「我住喺上水/粉嶺......」之類，不過都有機會話自己住喺北區。
南區：通常都會話「我住喺華富/香港仔/黃竹坑......」之類，但係都有一啲主動話自己係住喺南區嘅例子。
沙田區：其實除咗馬鞍山居民之外，都有唔少住喺離沙田市中心有一定距離嘅人主動話自己係住喺沙田，包括火炭、大圍、城河東......
荃灣區：其實大窩口居民會唔會話自己住喺荃灣我就唔知，不過荃灣區咁細就當佢係啦......（馬灣除外）


3. 當區居民甚少會以區議會名稱稱呼所住地方，但他人問及所住區域是否十八區之一時無違和感

離島區、葵青區、油尖旺區、中西區

油尖旺同葵青嘅居民就真係較少講「我住喺油尖旺」同「我住喺葵青」，咁就更加唔會有人講「我住喺中西」啦，通常都係講「我住喺油麻地/旺角/尖沙咀」同埋「我住喺青衣/葵涌」多，不過問到「你係咪住喺油尖旺？」之類嘅問題嗰陣就會答係。

4. 當區居民甚少會以區議會名稱稱呼所住地方、且區議會名稱於一般語境中僅局限於區內某地、其他居民被問及是否當地居民時或會感到違和



深水埗區、觀塘區、黃大仙區、元朗區、灣仔區

以上區域全部都有一個共通點，就係區議會嘅名稱喺一般語境中就只係指區內某個地方，其餘地方喺大眾眼中都唔係屬於「區議會名稱」嘅地方，例如荔枝角之於深水埗、九龍灣之於觀塘、彩虹之於黃大仙、天水圍之於元朗、銅鑼灣之於灣仔。例如部份居民被問及「你係咪住喺灣仔/元朗/觀塘？」嗰陣，可能會回答「唔係，我住喺銅鑼灣/天水圍/九龍灣。」之類。

5. 當區居民甚少會以區議會名稱稱呼所住地方、且區議會名稱於一般語境中僅局限於區內某地、其他居民被問及是否當地居民時或會感到十分違和

西貢區、九龍城區

呢部份同第四類嘅分別就在於，第四類區域嘅居民就算會否認自己係住喺「所屬區議會名稱」嗰陣，就算否認都好，都會覺得佢自己就係住喺嗰頭，例如灣仔/銅鑼灣、牛頭角/觀塘、荔枝角/長沙灣/深水埗。但呢類嘅居民你直接以區議會名稱發問嘅話，佢喺極大多數情況下都會否認。例如你問一百個將軍澳居民：「你係咪住喺西貢？」嗰陣，我諗有一百個將軍澳居民會答：「唔係，我住喺將軍澳」。畢竟將軍澳站離西貢市嘅直線距離就已經有約八公里，將來嘅137區離西貢市就更加有約13公里，相等於荃灣站與觀塘站之間嘅直線距離。
九龍城區同理。


sorry for 1999

其實大窩口邨係屬於葵青區，我估住大窩口邨嘅人唔會話自己住荃灣？

不過荃灣區其實比你想像中大，深井同梨木樹都係荃灣區，但住深井多數會直接話自己住深井而唔會話自己住荃灣，梨木樹應該都差唔多

同埋我感覺好多人會用最近地鐵站名介紹自己住邊，而唔係區名，例如住富昌邨會話自己住南昌而唔會話自己住深水埗，住荔景邨會話自己住荔景而唔會話自己住葵涌／葵青，不過都好睇每個人自己習慣

呢類地理題其實普通人答唔出都好正常
唔好諗住香港人個個都咁熟各區

地政IN人有D都係問呢D地理題
但其實都考起唔少人

2有錯，東區、南區、北區居民唔會話自己住東、南、北

我介乎3同4之間，open question會話自己住鑽石山，但你話我住黃大仙區又唔會有特別感覺。日常生活中，居所附近幾個屋苑分得好清楚，鳳凰邨（唔會講「鳳凰新邨」）、慈雲山、黃大仙、大磡村／啟鑽苑（啟鑽苑落成後才終於改口）、新蒲崗亦有明確區分。另外，我的心態亦係地鐵站令原有地名移位的例子，理論上鑽石山火葬場一帶才是原有的「鑽石山」，但我心理上唔當係，樓盤會當宏景花園係鑽石山，但我將佢歸入「斧山」。

我好多親友住沙田，感覺從開發新市鎮起已居住的，由顯徑到駿景園／碧濤花園都會稱自己住沙田，馬鞍山則由富安起計，係另一件事；我入到中大後才知道區外人只覺得「沙田站」附近係沙田，但我及親友叫該處做「新城市」，其他相連商場會直接講商場名，或著名店舖只需講名已經知係邊度。即係，一個住禾輋的人去新城市唔會話自己「去沙田」，而區外人同我講「去沙田」，我會有疑問「即係沙田邊度？」，因為沙田在我心目中係好大範圍，但對方會有點不明所以，因為佢心目中沙田就係沙田站。

我諗住華荔邨嘅人都唔會話自己係住葵青區吧，會有人當自己住美孚／荔枝角
葵青區其實比較少用，因為佢係將葵涌同青衣兩個唔同嘅地方合埋，而荔景人又未必會話自己係住(下)葵涌
另外，油尖旺區係將油尖區同旺角區合埋一齊，不過識嘅人都會講返住邊度或邊度返工而唔會用區議會名稱
另外紅磡站以東嘅部分尖沙咀東嘅範圍，傳統上會畀人當成係紅磡而唔係尖沙咀(東)

其實點答係睇想唔想講/同果個人熟唔熟
例如你住杏花邨
好熟就照講杏花邨
無咁熟就話柴灣
再平水相逢D就話自己住東區甚至港島就算

當然, 樓主西貢/九龍城呢個例子係舉得幾好

呢ｄ稱呼好多都同發展／交通歷史有關。

沙田都係因為個沙田站先比人叫做沙田。以前叫瀝源（單指火車站果頭），海對面有個小瀝源相對。

填海之前個海就真係叫沙田海。有少少九龍灣feel。

答人住邊頭，個仔細程度係同問你果個人相熟程度係掛勾嘅
三唔識七，正常都唔會講到自己住邊個地方啦

行政區點劃界除考慮當區居民嘅習慣外，
更重要係政府或部門嘅權責同資源分配。

行政區點改名唔會亦唔太可能有標準
如屯門、灣仔代表到全區又有
如深水埗、九龍城用區入面具代表性嘅地方做大區區名又有
如葵青、中西取區入面地方嘅簡稱溝埋一齊做瀨尿牛丸又有
如離島、北區用客觀陳述，同區內任何一個地方完全無關又有

輪到公眾嘅習慣，就算撇除近年新盤掹車邊都要搵D高級D嘅區域扯上關係外
例如九龍塘大致响九龍城區。
深水埗區一邊嘅又一村叫相信大部分人都會當係九龍塘一部分。
唔當嘅大抵係考慮校網嘅人士吧