東九郊遊記

今日陽光普照, 決定去之前有版友去過嘅寶琳南路行下

搭95M於茅湖仔落車，沿寶琳南路行，右手邊就係茅湖仔村，再落左手邊就見到成個將軍澳，由景林開始一直去到健明邨，見到整個石屎森林。過左靈實醫院，行多一陣就見到舊調景嶺差館，卻已經變成一個佛堂。繞過佛堂再繼續行，下面就係翠嶺路，沿途都有Ｄ溪，仲見到以前區域市政局蟲鼠隊宿舍，已荒廢。一直行，一直覺得政府發展調景嶺，無需要清拆舊嘅調景嶺，因為都冇影響，發展區0係填海區，而舊區則在山上，或者呢Ｄ係港英政府送俾共產黨嘅禮物。

之後去到一片空地，似係晨運人士聚腳地，左手邊係調景嶺配水庫，右手已經望到藍田同油塘，落去已經係澳景路，０個時只係４點，行左１個鐘，我唔想咁快完左我嘅旅程，於是搵路行，最後沿住衞亦信徑行，不過原來始終都係要落去澳景路，見對面有另一條路，就過左馬路繼續行，但原來呢條係長命樓梯，行行下都要抖一抖...一上到去，點知就係落樓梯，行得咁辛苦，心有不甘，於是揀左小路行，雖然都係落山，但條路好玩Ｄ，感覺上抵Ｄ

一路沿衞亦信徑行，右手邊嘅景亦由藍田，一直卷去油塘，鯉魚門，而左手邊就係將軍澳墳場。呢度真係唔錯，好開揚，望住個海，眺望清水灣半島，只可惜政府將呢度變做堆填區。

落山時見到有個牌指住去炮台山，唔通呢度就係聞名已久嘅魔鬼山？一場黎到當然要上去睇下～上到去，發覺呢個炮台俾龍虎山炮台更具規模，更精細，牆上有一個個窿作瞭望，堡裏間隔錯綜複雜，入到去好似玩迷宮咁。上到去屋頂，ＷＡ～一邊可以眺望成個清水灣半島，一邊可以遙望由北角至小西灣嘅港島東，另一邊可以望哂整個九龍，難怪以前嘅人就用黎做炮台，依家嘅人就上黎影日落，影飛機。我坐左0係舊石上，望住個海，如果唔係有個埋填區，有Ｄ高聳入雲嘅日出康城屏風樓，就完美啦～

落山之際見到有人用ＢＢ彈打野戰，超危險，本想大聲指責，但唔知佢有冇牌，都係急急腳走過，以免中招
落山後，沿住墳場通道行。ＷＡ，條路超長，頭段仲超斜，唔怪得冇14S嘅日子，拜山嘅人會牙痛咁聲，好彩我係落山ＪＥ...

歡迎討論