Zurich 鐵路半日遊
本帖最後由 JH_LE4612 於 2020-4-27 08:54 編輯疫情喺歐洲肆虐之時，連街都唔出得，莫講話去旅行，就係屋企睇下相算。早前二月由香港飛瑞航翻倫敦嘅時候，見到喺蘇黎世 stay 半日唔使加錢，度度日期後就去馬。
一直都好想去瑞士，得半日一定唔夠喉，反而逼到我認真度下行程。本身有冧過搭火車落 Lucerne，但始終之後都要趕飛機，加上身體唔太舒服，就決定留喺 Zurich 入面算。執筆之際睇翻自己影嘅相，可能當時真係唔舒服，所以影得好求其，先道個歉先。
清晨六點幾到達 Zurich Airport 嘅 Travel Centre。如果搭電車就上地面，如果搭火車就要落翻地底。
地面嘅巴士總站。隔離係電車站。
搭出市中心可以搭 10 號，慢慢碌出去都只係七個字。
Zurich 將城市唔同嘅部份劃為三十幾個 zone，要plan 行程就要數埋自己會經過幾多個 zone。咁啱上網搵到 Albis 24H 呢種選項，基本上已經覆蓋哂市中心同埋隔離嘅 Uetliberg 山，見價錢唔錯就直接買呢張，巴士站隔離就有售票機，不過都搞左一陣先搵到。 CHF 21.60 大約係 170 港紙。
漫無目的咁搭 10 號出城，唔太肚餓所以冧住出到市中心先搵食。望住地圖搭搭下，去到有個位，見地圖有啲特別野，就落車睇下。
呢度叫 Seilbahn Rigiblick，Seilbahn 德文解 Cableway，而所謂嘅 Cableway 過條馬路就到。
好迷你嘅纜車，唔知坐到幾多人呢？留意後面嘅 passing loop，其實距離唔算長。
先搭到頂，等居民落哂車先影內籠。頂站嘅纜索系統。
載客量隨時比香港小巴更少。
總覺得人地個 PIDS 靚過香港好多，隔離飯香？
列車 size 都唔大，留意後面有間控制室，有人負責操作纜車。
開門掣。
六分鐘一班，好快又落翻去。
上到山，就出去行下。呢條 23 號，係 Zurich 兩條 Funicular Railway 嘅其中一條，喺 1901 年開始營運。
眺望 Zurich 市同佢個大湖 Lake Zurich。
行落一層山路，可見列車有幾迷你。
行落下一個站都好快，但唔知點解封左，太少人搭？但佢本身都唔預多人搭呀？
行翻上去，唔識德文所以仲未知咩事。
直至見到封左站，先知死。 Wartungsarbeiten 原來解 Maintenance Work，而呢條纜車線一過左早繁 (8:45am)就會停。下咁我點落山？
自然係 Rail Replacement Bus。雨下等十分鐘車係幾狼狽嘅，但可以試哂兩種方法上落山又好彩。冇錯，RR Bus 係入埋路軌上面落客嘅，後面就係行李車。
買左個包，繼續亂搭。10 號呢啲多機場客嘅電車線已經全線換哂低地台車，其他線就至少會有一半車隊用低地台車，例如呢條 9 號。
行下行下，就見到 Zurich Hbf 蘇黎世火車站。
經扶手電梯落到去，又見到多啲，一陣上 Uetliberg 應該要落地底搭。
冇點做 research，不過冇可能全部車都係地底掛，上去睇下先。一上到去，乜都冇...
原來嚟後面。呢種顯示方式一炮過列哂啲大站出嚟，忽然覺得有啲亂。
應該冇收費區呢樣野，就入去月台行下。
一堆regional 嘅火車，呢幾架可以去 Chur、Ertsfeld 同 Schaffhausen，其中 Chur 係著名 Bernina Express 嘅其中一面總站，穿過瑞士山脈去到意大利嘅 Tirano，今次冇得去，就睇住版友早前嘅相先。
月台好長，可以分成 A B C D 四截用，可能因為過哂繁忙時間，所以好多車都只係用 A 月台
去其他月台可以落一層。
火車站嘅另外一面，冇乜特別，得個 coach station。
之後又落地下月台行下，唔睇翻資料都唔知道原來 Zurich Hbf 有成十個地下月台，但係又分成三組，所以呢度 41-44 台係睇唔到早前 Uetliberg 嘅 21 22 月台嘅。至於地面就有 16個掘頭月台。
行翻上地面，突然見到架 passenger coach 自己入站。
咦，冰河列車!? 隻觀光窗特別大。
每日四班嘅 Hamburg 車，經 Basel、Freiburg、Baden-Baden、Mannheim 同 Cologne。
三卡一等喺車尾，八卡二等喺前面，中間夾住餐車。
可惜冇影到機頭，但唔知點解又影左隔離台部頭。
泊喺側線嘅電車。
走上 Lindenhof 小山坡。
見時間唔多，就趕去搭 S10 上 Uetliberg，呢座山喺城市嘅西面，聽講風景唔錯，但火車半個鐘一班，所以好驚趕唔到。Zurich 嘅 S-bahn 代表近郊線，通常路線都唔算長。
地圖嘅黑線就係火車線，環山而建，好多時望出窗都會見到前面轉大彎嘅路軌。留意呢條線入山後多為單軌。
內籠，呢款係 Stadler Be510，可以通過AC DC 供電，山下用 AC，上到山就用 DC。有好多低地台位方便行動不便嘅人士，或者係行山客。
時間表，上山每半個鐘一班。
一 set Be510 有三卡，呢抽 couple 左有六卡。
因為 Uetliberg Line 用 DC嘅關係，所以都要特登 mark 翻呢款車 Uetliberg Bahn，分辨翻其他只可以行 AC 嘅車。
可以見到歐洲火車，尤其 Stadler 啲車嘅地台做到幾矮，同英國好唔同。
海拔 814m / 2671 ft 嘅 Uetliberg 站。
好快就落翻山。又離遠見到大彎。
Giesshubel 附近見到車廠。
呢架好矇嘅應該係 Uetliberg Line嘅上一代用車，依家只會行去 Triemli 嘅短途特班。
雖然趕時間，但發覺自己未去過 Lake Zurich 邊，唔去又覺得好蝕底，最後嘅 Zurich Hbf 前一個站 Selnau 跳車。呢個站有乜野咁特別呢，原來佢個島式月台起喺係河嘅下面，你見到同一 set escalator就由路面直接落到月台，視覺上好特別。
事旦跳上一架電車出湖。望完就搭火車翻機場。
結果趕到連入機場架快 IC車都冇影到......
喺冇點 plan 嘅情況下，天公唔做美，自己又唔舒服，可以去到咁多地方已經好滿足。當然，Zurich 以外仲有大把地方未去過，瑞士呢個雪國喺疫情後／有錢後點都要 encore。
多謝分享。就咁睇，瑞士鐵路既風格同格局同德國、奧地利幾似，可能因為大家都係德語區既緣故⋯
樓主半日已經睇到咁多野都算難得，畀著係我，行下影下相，可能要一整日先睇得晒⋯
S3BL100 發表於 2020-4-28 00:34
多謝分享。就咁睇，瑞士鐵路既風格同格局同德國、奧地利幾似，可能因為大家都係德語區既緣故⋯
樓主半日已 ...
德奧我都未去過，所以唔可以比太多意見，但的確地理上差唔多 (多行山嘅路線)，或者政策上都好似 (強調低地台輪椅位/multi-modal planning)。
我自己唔係太鐘意睇古蹟博物館，加上天氣唔好，所以先不斷搭車避住雨走嚟走去。Rigiblick只係咁啱撞到，之前聽朋友講嘅另外兩條登山列車/ trolleybus都冇時間搭，更加唔好講遊船河，所以其實我都睇得算少野。反正 Zurich應該會 encore，就留翻下次啦。 Zurich路面電車加速力都好似好暴力，十一月去果時無坐過，但o係地面聽聲同睇佢加速度就拍得住香港輕鐵 我2014年可能就係搭11:00由蘇黎世開的EC由科隆(約17:00)去漢堡(約21:00)，頭等超正，不過冇入去餐車見識～
頁:
[1]